សេចក្តីពិតដ៏បរិសុទ្ធ គោលលទ្ធិដ៏បរិសុទ្ធ និងវិវរណៈដ៏បរិសុទ្ធ
សូមធ្វើឲ្យសន្និសីទនេះក្លាយជាពេលនៃការទទួលទានសារលិខិតមកពីព្រះអម្ចាស់ តាមរយៈអ្នកបម្រើទាំងឡាយរបស់ទ្រង់ ។
បងប្អូនប្រុសស្រីជាទីស្រឡាញ់របស់ខ្ញុំ សូមស្វាគមន៍មកកាន់សន្និសីទទូទៅ ! ឱវាជាអំណរអ្វីម្ល៉េះដែលបាននៅជាមួយបងប្អូន ! ខ្ញុំគិតដល់បងប្អូនស្ទើរគ្រប់ពេលវេលានៅអំឡុងប្រាំមួយខែកន្លងទៅនេះ ។ ខ្ញុំបានអធិស្ឋាន ពី បងប្អូន និង សម្រាប់ បងប្អូន ។ នៅប៉ុន្មានសប្តាហ៍មុននេះ ខ្ញុំបានអធិស្ឋានយ៉ាងយកចិត្តទុកដាក់សូមឲ្យសន្និសីទនេះក្លាយជាពេលនៃវិវរណៈ និង ការសញ្ជឹងគិតសម្រាប់បងប្អូនទាំងអស់ដែលស្វែងរកពរជ័យទាំងនោះ ។
ពួកយើងត្រេកអរណាស់ដែលបានថ្លែងទៅកាន់បងប្អូន ចេញពីមជ្ឈមណ្ឌលសន្និសីទនេះម្តងទៀត ។ កៅអីភាគច្រើននៅតែទំនេរដដែល ប៉ុន្តែមានវត្តមានរបស់សមាជិកក្រុមចម្រៀងរោងឧបោសថមួយចំនួន ដែលនេះជាការបោះជំហានទៅមុខដ៏អស្ចារ្យ ។ យើងសូមស្វាគមន៍បងប្អូនទាំងអស់គ្នា មកកាន់ការប្រារព្ធសន្និសីទពីចម្ងាយដ៏ធំនេះ ទោះជាបងប្អូននៅទីណាក្តី ។
យើងទាំងអស់គ្នានៅតែប្រឈមមុខនឹងការបំផ្លិចបំផ្លាញនៃជំងឺកូវីដ-១៩ និងការប្រែប្រួលនៃជំងឺនេះដដែល ្នុងសហគមន៍របស់បងប្អូនផ្ទាល់ ។
យើងធ្វើការប្រជុំរាល់សន្និសីទទូទៅតាមដែលបានដឹកនាំដោយព្រះអម្ចាស់ ។ ១ រាប់ឆ្នាំមកនេះ ទម្រង់នៃការប្រជុំមានលក្ខណៈខុសៗគ្នា ។ កាលខ្ញុំនៅក្មេង សន្និសីទមានរយៈពេលបី ឬបួនថ្ងៃ ។ ក្រោយមក សន្និសីទនេះត្រូវបានកាត់មកនៅតែពីរថ្ងៃ ។ រាល់សារលិខិត—នៅពេលនោះ និងពេលនេះ—គឺបានមកពីការអធិស្ឋានដ៏ស្មោះសរ និងការរៀបចំខាងវិញ្ញាណជាច្រើន ។
ពួកអ្នកមានសិទ្ធិអំណាចទូទៅ និងអ្នកកាន់តំណែងទូទៅនៃសាសនាចក្រដែលថ្លែងទីបន្ទាល់ នឹងផ្តោតសារលិខិតរបស់ពួកលោកលើព្រះអង្គសង្រ្គោះរបស់យើង ព្រះយេស៊ូវគ្រីស្ទ សេចក្តីមេត្តាករុណារបស់ទ្រង់ និងព្រះចេស្តាប្រោសលោះដ៏និរន្តររបស់ទ្រង់ ។ មិនដែលមានពេលណានៅក្នុងប្រវត្តិសាស្រ្តពិភពលោកនេះ ដែលចំណេះដឹងអំពីព្រះអង្គសង្រ្គោះរបស់យើងមានសារៈសំខាន់ផ្ទាល់ខ្លួន ហើយទាក់ទងនឹង ព្រលឹងមនុស្សគ្រប់គ្នាយ៉ាងខ្លាំងដូច្នេះនោះទេ ។ សូមស្រមៃមើលថា តើជម្លោះដ៏បំផ្លិចបំផ្លាញនៅទូទាំងពិភពលោកនេះ—និងការបំផ្លិចបំផ្លាញនៅក្នុងជីវិតរបស់យើងម្នាក់ៗ—នឹងត្រូវដោះស្រាយបានលឿនប៉ុណ្ណាប្រសិនបើយើងទាំងអស់បានជ្រើសរើសធ្វើតាមព្រះយេស៊ូវគ្រីស្ទ និងស្តាប់តាមការបង្រៀនទាំងឡាយរបស់ទ្រង់ ។
តាមស្មារតីនោះ ខ្ញុំសូមអញ្ជើញបងប្អូនឲ្យយកចិត្តទុកដាក់ស្តាប់នូវរឿងបីយ៉ាងនៅក្នុងសន្និសីទនេះ ៖ សេចក្តីពិតដ៏បរិសុទ្ធ គោលលទ្ធិនៃព្រះគ្រីស្ទដ៏បរិសុទ្ធ និងវិវរណៈដ៏បរិសុទ្ធ ។ ផ្ទុយនឹងមន្ទិលរបស់មនុស្សមួយចំនួន នោះរឿងខុស និងត្រូវ គឺ មានពិតមែន ។ សេចក្តីពិតដ៏ឥតខ្ចោះ—សេចក្តីពិតដ៏អស់កល្បជានិច្ច គឺ មានពិតប្រាកដមែន ។ គ្រោះកាចមួយក្នុងចំណោមគ្រោះកាចទាំងឡាយនៅសម័យរបស់យើងគឺថា មានមនុស្សតិចតួចណាស់ដែលដឹងថាត្រូវងាកទៅរកសេចក្តីពិតនៅឯណា ។ ២ ខ្ញុំអាចធានាដល់បងប្អូនបានថា អ្វីដែលបងប្អូននឹងស្តាប់ឮនៅថ្ងៃនេះ និងថ្ងៃស្អែក គឺជាសេចក្តីពិតដ៏បរិសុទ្ធ ។
គោលលទ្ធិនៃព្រះគ្រីស្ទដ៏បរិសុទ្ធគឺមានអានុភាពណាស់ ។ វាផ្លាស់ប្តូរជីវិតមនុស្សគ្រប់គ្នាដែលយល់ពីគោលលទ្ធិនេះ ហើយស្វែងរកដើម្បីអនុវត្តតាមគោលលទ្ធិនេះនៅក្នុងជីវិតរបស់ពួកគេ ។ គោលលទ្ធិនៃព្រះគ្រីស្ទជួយយើងឲ្យរកឃើញ និងបន្តនៅលើផ្លូវនៃសេចក្តីសញ្ញា ។ ការបន្តនៅលើផ្លូវតូចចង្អៀត ប៉ុន្តែត្រូវបានកំណត់យ៉ាងច្បាស់នោះ នឹងធ្វើឲ្យយើងមានភាពស័ក្តិសមដើម្បីទទួលអ្វីៗទាំងអស់ដែលព្រះមាននៅទីបំផុត ។ ៣ គ្មានអ្វីមានតម្លៃជាង អ្វីៗទាំងអស់ ដែលព្រះវរបិតាសួគ៌របស់យើងមាននោះទេ !
ជាចុងក្រោយ វិវរណៈដ៏បរិសុទ្ធសម្រាប់សំណួរនៅក្នុងដួងចិត្តរបស់បងប្អូននឹងធ្វើឲ្យសន្និសីទនេះមានតម្លៃ និងមិនអាចបំភ្លេចបានឡើយ ។ ប្រសិនបើបងប្អូនមិនទាន់បានស្វែងរកការផ្តល់ការងារបម្រើពីព្រះវិញ្ញាណបរិសុទ្ធ ដើម្បីជួយបងប្អូនឲ្យស្តាប់ឮអ្វីដែលព្រះអម្ចាស់ចង់ឲ្យបងប្អូនស្តាប់នៅអំឡុងពេលពីរថ្ងៃនេះទេ ខ្ញុំសូមអញ្ជើញបងប្អូនឲ្យធ្វើវាឥឡូវនេះ ។ សូមធ្វើឲ្យសន្និសីទនេះក្លាយជាពេលនៃការទទួលទានសារលិខិតមកពីព្រះអម្ចាស់ តាមរយៈអ្នកបម្រើទាំងឡាយរបស់ទ្រង់ ។ សូមរៀនអនុវត្តអ្វីៗទាំងនេះនៅក្នុងជីវិតរបស់បងប្អូន ។
នេះ គឺជា សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ យើងគឺជារាស្រ្តនៃសេចក្តីសញ្ញារបស់ទ្រង់ ។ ព្រះអម្ចាស់បានប្រកាសថា ទ្រង់នឹងពន្លឿនកិច្ចការរបស់ទ្រង់តាមពេលវេលារបស់វា ៤ ហើយទ្រង់កំពុងធ្វើដូច្នោះក្នុងល្បឿនដ៏លឿនមួយ ដែលមិនធ្លាប់មានពីមុនមក ។ យើងមានអភ័យឯកសិទ្ធិណាស់ ដែលបានចូលរួមនៅក្នុងកិច្ចការដ៏បរិសុទ្ធរបស់ទ្រង់ ។
ខ្ញុំសូមផ្តល់ពរជ័យដល់បងប្អូនទាំងអស់គ្នា ដែលកំពុងស្វែងរកពន្លឺ ចំណេះដឹង និងសេចក្តីពិតដ៏អស្ចារ្យនេះ ។ ខ្ញុំសូមបង្ហាញសេចក្តីស្រឡាញ់របស់ខ្ញុំចំពោះបងប្អូនម្នាក់ៗ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ៕