Servisio Mishonal a Bendishoná Mi Bida pa Semper
Mi ta resa pa boso hombres jovenes i mujeres jovenes i boso mayornan lo mira i sa kon servisio mishonal lo bendishoná boso bida pa semper.
Danki, Presidente Nelson, pa kompartí atrobe e konseho ei tokante servisio mishonal.
Rumannan, algun aña pasá miéntras mi tabata diskursándo den konferensia general, e bista den mi wowo robes diripente a wòrdu afektá pa un kos yamá degeneracshon makular, ku despues a bira pió i a laga mi sin bista útil den e wowo ei.
Segun mi a atendé ku e desafio aki, mi ta masha gradisí pa otro sorto di vishon, inkluso vishon riba kosnan ku a pasa kaba. Segun mi a wak bèk riba mi bida, mi por a mira sierto eksperensianan ku a hasi un diferensia signifikante. Un di e eksperensianan ei ta kon mi servisio mishonal di tempu kompleto komo un hòmber hóben na Inglatera a bendishoná mi bida i a influensiá mi destinashon spiritual.
Mi a reflekshpná riba kon e desafionan ekonómiko asosiá ku e Gran Depreshon den añanan [19]30 a hiba na un kambio desfaborabel pa mi mayornan i nos famia. Mi tata a bira asina enbolbí den salba su negoshi di outo i sostené un famia durante e temporada difísil ei ku pa un tempu mi mayornan no a bai iglesia.
Ounke nos no tabata bai servisionan di iglesia komo famia, esei no a stroba mi pa de bes en kuando atendé ku mi amigunan.
E tempunan ei, sirbi un mishon tabata den mi pensamentu, pero no tabata algu di kua mi a papia ku mi mayornan.
Durante ku mi tabata na universidat, diferente amigu i ami a disidí pa sirbi mishon. Di bishita serka mi obispu, mi a yena mi aplikashon mishonal miéntras mi mayornan tabata for di siudat. Ora mi mayornan a regresá, mi a sorpresá nan ku e notisia ku mi a wòrdu yamá pa sirbi na Gran Bretaña. Mi ta gradisí pa nan sosten entusiasmá di e desishon aki i pa bon amigunan ku a yuda mi disidí di sirbi.
Mi servisio mishonal a prepará mi pa ta un mihó kasá i tata i pa por tin éksito den negoshi. El a prepará mi tambe pa un bida largu di servisio na Señor den Su Iglesia.
Den e konferensia general di aprel di 1985, mi a wòrdu asigná pa papia den e seshon di saserdosio. Mi a dirigí mi remarkenan na e hombres jovenes. Mi a papia tokante prepará pa sirbi komo un mishonero. Mi a bisa, “Di tur e entrenamentu ku mi a risibí den i asignashonnan di Iglesia, ningun tabata mas importante pa mi ku e entrenamentu ku mi a risibí komo un elder di diesnuebe aña sirbiendo un mishon di tempu kompleto.”1
Señor konosé bo. Ora bo ta sirbiendo bo mishon, lo bo haña eksperensianan ku lo yuda bo bin na konos’É mihó. Lo bo krese spiritualmente den sirbiÉ. Den Su nòmber, lo bo wòrdu mandá ku enkargo pa sirbi otronan. E lo duna bo eksperensianan ku impreshonnan di e Sípiritu Santu. Señor lo outorisá bo pa siña den Su nòmber. Bo por mustr‘É ku E por konfia bo i ku [E] por dependé di bo.
Un poko mas ku sinku luna pasá, Elder Jeffrey R. Holland i Elder Quentin L. Cook, ku tambe a sirbi komo mishoneronan na e Islanan Britániko, a uni ku mi pa bishitá miembronan i mishoneronan den e pais bunita ei. Ora nos tabata ayanan, mi a reflekshoná riba mi eksperensianan komo un mishonero hóben. Mi ta tèstifiká ku mi mishon ta kaminda mi a yega na sa ku mi Tata Selestial i mi Salbador, JesuCristo konosé mi i stima mi.
Mi tabata bendishoná di por tin presidentenan di mishon maravioso, Selvoy J. Boyer i Stayner Richards, huntu ku nan kompañeronan dediká Gladys Boyer i Jane Richards. Mirando atras, mi por mira ainda ku mas klaridat ku nan a konfia mi i stima mi. Nan a siña mi e evangelio. Nan a spera hopi di mi. Nan a duna mi hopi asignashon ku desafio i responsabilidat di liderazgo pa yuda mi krese i prepará pa un bida di sirbishi.
Mi a refleshoná tambe riba e yamada di Presidente Spencer W. Kimball pa presidí riba e Mishon Canada Toronto ku mi kerida esposa, Barbara, i nos yunan na nos banda. Presidente Kimball a yama nos pa sirbi na aprel 1974, poko despues di a duna su mensahe mishonal titulá “Ora e Mundu Wòrdu Kombertí.”2 Den e mensahe ei Presidente Kimball a splika su vishon pa kon e evangelio lo wòrdu hibá na henter e mundu. El a yama pa muchu mas mishonero for di rònt mundu. El a rekordá nos di Señor Su espektativa “ku tur hende mester … alsa un bos di atvertensia na e habitantenan di e tera.”3 Presidente Kimball su enseñansa tokante e espektativa pa hòmbernan hóben sirbi un mishon a bira un tópiko di kombersashon den hogarnan rònt mundu. E espektativa ei no a kambia. Mi ta gradesí ku Presidente Russell M. Nelson tambe a afirmá di nobo Señor Su espektativa awe mainta.
Ta kasi 10 aña pasá ku Presidente Thomas S. Monson a hasi e anusio pa baha e edat di hombres jovenes i mujeres jovenes pa bai mishon. 4 Den mi bista, un motibu prinsipal pa e kambio aki tabata pa duna mas di nos hóbennan oportunidat ku lo kambia bida dor di sirbi komo un mishonero.
Komo un Apòstel di Señor JesuCristo, awor ami ta yama boso hombres jovenes—i e mujeres jovenes ku tin deseo pa sirbi un mishon—pa kuminsá awor aki na papia ku boso mayornan tokante sirbi un mishon. Mi ta invitá boso tambe pa papia ku boso amigunan tokante sirbi un mishon, i si un di boso amigunan no tin sigur [si e mester] sirbi, animá nan pa papia ku nan obispu.
Komprometé na boso mes i na boso Tata Selestial ku boso lo sirbi un mishon i ku for di awor pa dilanti boso lo hasi esfuerso pa mantené boso kurasonnan, mannan, i mentenan limpi i digno. Mi ta invitá boso pa haña un testimonio sólido di e evangelio restorá di JesuCristo.
Tatanan i mamanan di e hóbennan maravioso aki, boso tin ròl importante den e proseso di preparashon aki. Kuminsá papia awe ku boso yunan tokante servisio mishonal. Nos sa ku e famia ta e influensia di mas profundo den yuda nos hombres i mujeres jovenes prepará.
Si ainda bo ta den e edat apropiá pa sirbi mishon pero bo no a sirbi ainda pa motibu di e pandemia òf otro motibunan, mi ta invitá bo pa sirbi awor. Papia ku bo obispu, i prepará pa sirbi Señor.
Obispunan mi ta animá boso pa yuda tur hombres jovenes i mujeres jovenes ku ta serka di edat mishonal pa prepará pa sirbi, i tambe mi ta animá boso obispunan pa identifiká esnan ku ta di sufisiente edat pero ku no a sirbi ainda. Invitá kada hòmber hóben pa bira un mishonero, tambe kada muhe hóben ku ta deseá pa sirbi.
Na e mishoneronan ku ta sirbi aktualmente, nos ta gradisí boso. Boso mishon tabata durante un pandemia mundial. Komo resultado, boso eksperensia mishonal no tabata manera mi eksperensia mishonal òf di kualke mishonero ku a sirbi promé ku 2020. Mi sa ku no tabata fásil. Pero asta durante e tempunan difísil aki, Señor tabatin un trabou pa boso hasi, i boso a hasié maraviosamente bon. Por ehèmpel, boso a uza teknologia den maneranan nobo pa haña esnan ku tabata kla pa siña tokante di e Restorashon di e evangelio di JesuCristo. Komo boso a sirbi ku diligensia i segun boso abilidatnan, mi sa ku Señor ta kontentu ku boso esfuerso. Mi sa ku boso servisio lo bendishoná boso bida.
Ora boso haña relevo di boso mishon, kòrda ku boso no a haña relevo di boso aktividat den Iglesia. Edifiká riba e bon kustumbernan ku boso a siña na mishon, sigui fortalesé boso testimonio, traha duru, resa, i ta obediente na Señor. Honra e kombenionan ku boso a hasi. Sigui bendishoná i sirbi otronan.
Mi ta resa pa boso Hombres Jovenes i Mujeres Jovenes i boso mayornan lo mira i sa kon servisio mishonal lo bendishoná boso bidanan pa semper. Ku boso por sa den boso mentenan i sinti den boso kurasonnan e poder di e invitashon ku Señor a duna na e yunan mishonero di Mosiah. El a bisa, “Id … y estableced mi palabra; pero seréis pacientes en las congojas y aflicciones, para que les deis buenos ejemplos … en mí, y os haré instrumentos en mis manos para la salvación de muchas almas.” 5
Ku Dios por bendishoná e hubentut di e Iglesia pa deseá pa prepará i sirbiÉ ta mi humilde orashon, ku mi ta ofresé e mainta aki den e sagrado nòmber di Señor, JesuCristo, amèn