Bo Naturalesa Dibino i Destino Eterno
Mi ta invitá bo pa sentra bo bida riba JesuCristo i kòrda e bèrdatnan fundamental den e Lema di Mujeres Jóvenes.
Rumannan stimá, danki ap ta akinan. Ta un honor pa mi pa partisipá den e seshon di hende muhé aki di konferensia general. Sierto okashon mi tambe tabatin e privilegio pa asistí na klasnan di Mujeres Jóvenes. Pero laga mi pone un punto opvio—mi no ta yòn, i mi no ta un hende muhé! Mi a siña, sinembargo, ku mi ta sinti mi ménos for di lugá si mi resitá e Lema di Mujeres Jóvenes huntu ku nan. E doktrina profundo siñá den e Lema di Mujeres Jóvenes1ta importante pa muhénan hóben, pero ta aplikabel na tur hende, inkluso esnan di nos ku no ta mujeres joven.
E Lema di Mujeres Jóvenes ta kuminsá ku, “Mi ta un yu muhé stimá di Mayornan Selestial, ku un naturalesa dibino i un destinashon eterno.”2 E deklarashon aki ta kontené kuater bèrdat importante. Di promé, bo ta un yu muhé stimá. Nada ku bo hasi—òf no hasi—por kambia esei. Dios ta stima bo pasó bo ta Su yu muhé spiritual. Tin biaha nos lo no ta sinti Su amor, pero e tei semper. Dios Su amor ta perfekto.3 Nos abilidat pa sinti e amor ei no ta [perfekto].
E Spiritu ta hunga un ròl importante den komuniká Dios Su amor na nos.4 Sinembargo, e influensia di e Spiritu Santu por keda “skondí debí na emoshonnan fuerte, manera rabia, odio, … [òf] temor … manera purba na disfrutá e sabor delikado di un drùif miéntras ta kome pika jalapeño. … [Un sabor] ta superá e otro kompletamente.”5 Asina tambe, komportashonnan ku ta distansiá nos for di e Spiritu Santu, inkluso piká,6 ta hasi difísil pa nos por persibí Dios Su amor pa nos.
Di manera similar, nos sentido di Dios Su amor por bira stòmpi dor di sirkunstansianan desafiante i malesa físiko òf mental, entre otro kosnan. Den tur e kasonan aki, e konseho di lidernan òf profeshonalnan konfiabel hopi biaha por ta di benefisio. Nos por purba tambe pa mehorá nos resepshon na Dios Su amor dor di puntra nos mes, “Mi amor pa Dios ta konstante òf mi ta stim’É ora mi tin dianan bon, pero no asina tantu ora mi tin dianan malu?”
E di dos bèrdat ta ku nos tin mayornan selestial, un tata i un mama.7 E doktrina di un Mama Selestial ta bini dor di revelashon i ta un kerensia distintivo entre e Santunan di Delaster Dianan. Presidente Dallin H. Oaks a splika e importansia di e bèrdat aki: “Nos teologia ta kuminsá ku mayornan selestial. Nos aspirashon di mas haltu ta pa bira meskos ku nan.”8
Masha poko a wòrdu revelá tokante Mama den Shelu, pero lokual ku nos sa ta resumí den e gospel topic hañá den e aplikashon di Gospel Library.9 Un biaha ku bo a lesa lokual tin skirbí eiden, lo bo sa tur kos ku ami sa di e tema. Mi ta deseá ku mi tabata sa mas. Bo tambe ainda por tin preguntanan i ke haña mas kontesta. Buska a mas komprondementu ta un parti importante di nos desaroyo spiritual, pero por fabor tene kuidou. Rason no por remplasá revelashon.
Spekulashon lo no hiba na konosementu spiritual mas grandi, pero e por hiba na desepshon òf kita nos enfoke for di lokual a wòrdu revelá.10 Por ehèmpel, e Salbador a siña Su disípulonan, “Hasi orashon semper na e Tata den mi nòmber.”11 Nos ta sigui e patronchi aki i ta dirigí nos adorashon na nos Tata Selestial den e nòmber di JesuCristo i no ta resa na Mama Selestial.12
For di tempu ku Dios a apuntá profetanan, nan a wòrdu outorisá pa papia den Su nòmber. Pero nan no ta pronunsiá doktrinanan fabriká “di [nan] mente propio”13òf siña lokual no a wòrdu revelá. Konsiderá e palabranan di e profeta Balaam di Tèstamènt Bieu, ku a haña oferta di soborno pa maldishoná e israelitanan pa benfisio di Moab. Balaam a kontestá, “Ni maske [e rei di Moab] duna mi tur su plata i oro, di ningun manera mi no por bai kontra e palabra di Señor mi Dios, pa hasi menos òf mas.”14 Profetanan di delaster dianan tin restrikshonnan similar. Eksigiendo revelashon di Dios ta tantu arogante i improduktivo. Na lugá di edaki, nos ta warda riba Señor i Su tempu pa revelá Su bèrdatnan pa medio di e medionan ku E a establesé.15
E di tres bèrdat den parafó inisial di e Lema di e Mujeres Jóvenes ta ku nos tin “naturalesa dibino.” Esaki ta fundamentalmente ken nos ta. E ta spiritualmente “genétiko,” heredá di nos mayornan selestial,16i ta rekerí ningun esfuerso di nos parti. Esaki ta nos identidat di mas importante, apesar di kon otro manera nos skohe pa indentifiká nos mes. Komprondé e bèrdat profundo aki ta importante pa tur hende pero spesialmente pa personanan ku ta pertenesé na gruponan ku a wòrdu marginalisá, oprimí, òf dominá histórikamente. Kòrda ku e identidat di mas importante ta relatá na bo naturalesa dibino komo yu di Dios.
E di kuater bèrdat ta ku nos tin “un destinashon eterno.” Tal destinashon lo no wòrdu forsá na nos. Despues di morto, nos lo risibí lokual nos a kualifiká p‘’e i “gosa [solamente] lokual ku [nos] ta dispuesto pa risibí,”17 Realisando ku nos destino eterno ta dependé di nos eskohonan. E ta rekerí pa hasi i warda kombenionan sagrado. E kaminda di konvenio aki ta e kaminda ku nos ta bini na Cristo i ta basá riba bèrdat apsoluto i eterno, lei ku no ta kambia. Nos no por krea nos mes kaminda i spera Dios su resultadonan primintí. Pa spera Su bendishonnan miéntras no ta sigui e leinan eterno riba kual nan ta basá18ta robes, meskos ku pensa ku nos por mishi ku un stof kayente i “disidí” pa no wòrdu kimá.
Kisas boso sa ku mi tabata trata pashèntan ku fayo di kurason. Nan mihó resultadonan tabata wòrdu optené dor di sigui plannan di tratamentu establesí, basá riba evidensia. Apesar di sa esaki, algun pashènt tabata purba pa negoshá un plan di tratamentu diferente. Nan a bisa, “Mi no ke tuma asina tantu remedi” òf “Mi no ke sigui tantu tèst di seguimentu.” Klaro, pashèntanan tabata liber pa tuma nan propio desishonnan, pero si nan a desviá for di plannan di tratamentu optimal, nan resultadonan lo a sufri. Pashèntnan ku fayo di kurason no por skohe un ruta inferior i despues duna falta na nan kardiólogo pa resultadonan inferior.
Meskos ta pa nos tambe. Tata Selestial Su kaminda preskribí ta hiba na e mihó resultadonan eterno. Nos ta liber pa skohe, pero nos no por skohe e konsekuensianan di no sigui e kaminda revelá.19 Señor a bisa “Aquello que traspasa una ley, y no se rige por la ley, antes procura ser una ley a sí mismo, … no puede ser santificado por la ley, ni por la misericordia, ni por la justicia, ni por el juicio.”20 Nos no por desviá for di Tata Selestial Su ruta i despues duna falta na E pa nos resultadonan inferior.
E di dos parafó den e Lema di Mujeres Jóvenes ta bisa: “Komo disípulo di JesuCristo, mi ta lucha pa bira manera E. Mi ta buska i ta aktua riba revelashon personal i ministrá otro den Su nòmber sagrado.” Nos por desaroyá un testimonio di JesuCristo dor di aktua den fé.21 Nos por reklamá e don spiritual “pa sa ku JesusCristo ta e Yu di Dios, i ku E a wòrdu krusifiká pa e pikánan di e mundu.” Òf nos por risibí e don pa kere na e palabranan di esnan ku sa,22te ora nos sa pa nos mes. Nos por sigui e Salbador Su enseñansanan i yuda otronan bini na DiE. Di e manera aki, nos ta djòin E den Su obra.23
E Lema di e Mujeres Jóvenes ta sigui, “Lo mi para komo testigu di Dios tur ora den tur kos i na tur lugá.” Tin mester di tur miembro di Iglesia komo testigunan di Dios,24ounke Apòstelnan i Setentanan ta komishoná komo testigunan spesial di e nòmber di Cristo.25 Imaginá un wega di futbòl den kual solamente e kiper ta protehá e palu di gol. Sin yudansa di e otro hungadónan, e kiper lo no ta kapas pa defendé e gol adekuadamente i e ekipo lo pèrdè semper. Asina tambe, tur hende ta nesesario den e ekipo di Señor.26
E delaster parafó di e Lema di e Mujeres Jóvenes ta kuminsá, “Miéntras mi ta lucha pa kalifiká pa eksaltashon, mi ta balorá e don di arepentimentu i trata pa bira mihó kada dia.” Pa motibu di e Salbador Su sakrifisio ekspiatorio, nos por arepentí, siña di nos fayonan, i no wòrdu kondená pa nan. Presidente Russell M. Nelson a siña: “Demasiado hende ta konsiderá arepentimentu komo un kastigu. … Pero e sentimentu aki di ta kastigá ta engendrá pa Satanas. E ta trata na blòkia nos pa wak JesuCristo ku ta pará ku mannan habrí sperando i dispuesto di sana, pordoná, limpia, i fortalesé, purifiká, i santifiká nos.”27
Ora nos arepentí ku sinseridat, ningun sikatris spiritual no ta keda, no ta importá kiko nos a hasi, kon serio e tabata, òf kuantu biaha nos a ripitié.28 Tan frekuentemente ku nos arepentí i buska pordon ku berdadero intenshon, nos por wòrdu pordoná.29 Esta un regalo remarkabel di nos Salbador, JesuCristo!30 E Spiritu Santu por sigurá nos ku nos a wòrdu pordoná. Ora nos ta sinti goso i pas,31 kulpa ta wòrdu kitá kompletamente,32 i nos no ta wòrdu tormentá mas pa nos piká.33
Sinmebargo, asta despues di arepentimentu sinsero, nos por trompeká. Trompeká no ta nifiká ku e arepentimentu tabata inadekuá pero por reflehá simplemente debilidat humano. Esta un konsuelo pa sa ku “Señor ta mira debilidat diferente ku E ta [mira] rebelion.” Nos no mester duda e abilidat di e Salbador pa yuda nos ku nos ku nos debilidatnan pasó “ora Señor ta papia di debilidat, ta semper ku miserikòrdia.”34
E Lema di Mujeres Jóvenes ta konkluí, “Ku fe, lo mi fortalesé mi hogar i famia, hasi i warda kombenionan i risibí e ordenansanan i bendishonnan di e sagrado tèmpel.” Fortalesé hogar i famia por nifiká kuminsá e promé laso den un kadena di fieldat, kargando un herensia di fé, òf restorand’é.35 Di tur manera, fortalesa ta bini mediante fé den JesuCristo i dor di hasi kombenionan sagrado.
Den tèmpel, nos ta siña ken nos ta i unda nos tabata. E filosófo romano Cicero a bisa, “Pa ta ignorante na lokual a sosedé promé bo a nase ta pa keda semper manera un mucha.”36 E tabata, dimes, referiendo na e historia sekuliar, pero su opservashon astuto por wòrdu ekspandé, Nos ta biba manera muchanan pa semper si nos ta ignorante di e perspektiva eterno hañá den tèmpelnan. Aya nos ta krese den Señor, “isibí un plenitut di e Spiritu Santu,”37i bira mas kompletamente komprometí komo disípulonan di e Salbador.38 Ora nos warda nos kombenionan, nos ta risibí Dios Su poder den nos bida.39
Mi ta invitá bo pa sentra bo bida riba JesuCristo i kòrda e bèrdatnan fundamental den e Lema di Mujeres Jóvenes. Si bo ta dispuesto, e Spiritu Santu lo guia bo. Nos Tata Selestial ke pa bo bira Su heredero i risibí tur lokual E tin.40 E no por ofresé bo mas. E no por primintí bo mas. E ta stima bo mas ku bo sa i ke pa bo ta felis den e bida aki i den e bida benidero. Den e nòmber di JesuCristo, amèn.