Firme den e Tormentanan
Ora e tormentanan di bida bini, bo por ta firme pasó bo ta para riba e baranka di bo fe den JesuCristo.
Mi rumannan stimá, awe nos a wòrdu bendishoná pa skucha sirbidónan inspirá di Dios duna konseho i enkurashamentu. Kada un di nos, unda ku nos ta, sa ku nos ta biba den tempunan hopi peligroso. Mi orashon ta ku e por yuda bo para firme den e tormentanan ku nos ta enfrentá, ku un kurason na pas.1
E manera pa kuminsá ta pa rekordá ku nos kada un ta un yu stimá di Dios i ku E tin sirbidónan inspirá. E sirbidónan ei di Dios a premirá e tempunan den kua nos ta biba. E Apòstel Pablo a skirbi na Timoteo, “Sa tambe, ku den e último dianan lo bini temporada peligroso.”2
Kualke hende ku wowo pa mira e señalnan di e tempunan i oreanan pa skucha e palabranan di e profetanan sa ku esaki ta bèrdat. E peligernan di e peliger di mas grandi ta bin serka nos for di e forsanan di maldat. E forsanan aki ta oumentando. I asina lo bira mas difísil, no mas fásil, pa honra e konvenionan ku nos mester hasi i warda pa biba e evangelio di JesuCristo.
Pa esnan di nos ku ta preokupá pa nos mes i pa esnan ku nos stima, tin speransa den e promesa ku Dios a hasi di un lugá sigur den e tormentanan ku ta bini.
Tin un deskripshon di e lugá aki. El a wòrdu deskribí kada biaha pa profetanan bibu. Por ehèmpel, manera registrá den e buki di Mormon, un tata inspirá i amoroso a bisa su yunan kon pa fortalesé nan mes dor di para firme den e bientnan ku ta keda nan dilanti: “Y ahora bien, recordad, hijos míos, recordad que es sobre la roca de nuestro Redentor, el cual es Cristo, el Hijo de Dios, donde debéis establecer vuestro fundamento, para que cuando el diablo lance sus impetuosos vientos, sí, sus dardos en el torbellino, sí, cuando todo su granizo y furiosa tormenta os azoten, esto no tenga poder para arrastraros al abismo de miseria y angustia sin fin, a causa de la roca sobre la cual estáis edificados, que es un fundamento seguro, … sobre el cual, si los hombres edifican, no caerán.”3”
E miseria i angustia sin fin di kual el a papia ta e efektonan teribel di piká si nos no arepentí kompletamente di nan. E tormentanan kresiente ta e tentashonnan i atakenan di Satanas ku ta oumentá. Nunka no tabata mas importante ku awor pa komprondé kon pa edifiká riba e fundeshi sigur aki. Pa ami, no tin mihó lugá pa mira ku den e delaster predikashi di Rei Benjamin, tambe registrá den e Buki di Mormon.
E palabranan profétiko di Rei Benjamin ta aplikabel na nos den nos tempu. E tabata sa dor di su mes eksperensia di e terornan di guera. El a defendé su pueblo den kombate, konfiando riba e poder di Dios. El a mira bon kla e podernan teribel di Lucifer pa tenta, pa purba na vense, i pa deskurashá Dios Su yunan.
El a invitá su pueblo i nos pa edifiká riba e úniko baranka di seguridat, ku ta nos Salbador. El a laga kla ku nos ta liber pa skohe entre bon i robes i ku nos no por evitá e konsekuensia si nos mes eskohonan. El a papia direktamente i skèrpi pasó e tabata sa ku tristesa lo bini na esnan ku kisas lo no skucha i hasi kaso na su atvertensianan.
Aki ta manera el a deskribí e konsekuensianan ku ta sigui nos eskoho sea pa sigui e impreshon di e Spiritu òf pa sigui e mensahenan maligno ku ta bini di Satanas, ken su intenshon ta pa tenta i destruí nos:
“Pasobra ata awor, tin un ‘ai!’ ku ta wòrdu pronunsiá riba esun ku skohe obedesé e spiritu ei; pasobra si e skohé pa obedesé, i keda i muri den su pikánan, esun mes ta bebe kondenashon pa su propio alma, pasobra e ta risibí pa su pago un kastigu eterno, faltando ku e lei di Dios kontrali na su propio konosementu. …
“Di manera ku si e hòmber ei no arepentí, i keda i muri un enemigu di Dios, e demanda di hustisia divino ta spièrta su alma inmortal na un sentimentu intenso di su propio kulpa, ku ta poné bai bèk for di e presensia di Señor, i ta yena su pechu ku kulpa, i doló, i angustia, ku ta manera un kandela ku no ta paga, kua su vlam ta subi pa semper.”
Rei Benjamin a sigui bisa: “O, boso tur, hòmbernan mayor, i tambe boso hòmbernan yòn, i boso muchanan chikí ku por komprondé mi palabranan, pasobra mi a papia klaramente na boso pa boso por komprondé, mi ta pidi pa boso spièrta na un rekuerdo di e situashon teribel di esnan ku a kai den transgreshon.”4
Pa ami, e poder ku ta atvertí pa arepentí ta forma den mi mente un imágen di un tempu sigur ora abo i ami lo para dilanti di e Salbador despues di e bida aki. Nos ke ku henter nos kurason pa no kremp pero mas bien mira na E, i mira E sonrisa, i skuch‘E bisa, “Bon hasí, abo sirbidó bon i fie: … drenta [aden].”5
Rei Benjamin a laga bon kla kon nos por risibí e speransa pa skucha e palabranan ei si nos haña e kaminda den e bida aki pa por tin nos naturalesa kambiá mediante Ekspiashon di JesuCristo. Esaki ta e úniko kaminda ku nos por edifiká ariba i asina para firme durante e tormentanan di tentashonnan i pruebanan nos dilanti. Rei Benjamin ta deskribí ku kambio den nos naturalesa ku un metáfora bunita ku semper a toka mi kurason. E tabata uzá dor di profetanan i dor di Señor Mes pa míles di aña. Ta esaki: nos tin ku bira manera un mucha—un mucha chikí.
Pa algun, esei lo no ta fásil pa aseptá. Mayoria di nos ke ta fuerte. Nos por mira bira manera un mucha komo algu suak. Mayoria mayornan ta mira na e dia ora nan yunan ta ménos infantil. Rei Benjamin, ku a komprondé meskos ku kualke otro hende bibu kiko ta nifiká pa ta un hòmber di forsa i kurashi, a laga kla ku di ta manera un mucha no ta di ta infantil. E ta di ta manera e Salbador, ku a resa na Su Tata pa forsa pa por ta kapas pa hasi boluntat di Su Tata i ekspiá pa e pikánan di tur e yunan di Su Tata i despues a hasié. Nos naturalesa mester wòrdu kambiá pa bira manera un mucha pa haña e forsa ku nos mester tin pa para firme i na pas den tempunan di peliger.
Aki ta Rei Benjamin su deskripshon emoshonante di kon pa e kambionan ta bin: “Pasobra e hòmber natural ta un enemigu di Dios, i tabata for di e kaida di Adam, i lo ta pa semper, a ménos ku e someté na e persuashon di Spiritu Santu, i despohá di e hòmber natural i bira un santu pa medio di e ekspiashon di Cristo e Señor, i bira manera un mucha, sumiso, mansu, humilde, ku pasenshi, yen di amor, dispuesto na someté na tur loke Señor ta konsiderá apropiá pa imponé riba dje, meskos ku un yu ta someté na su tata.”6
Nos ta risibí e kambio ei ora nos ta hasi i renobá konvenionan ku Dios. Esei ta trese e poder di Cristo Su Ekspiashon ta permití un transformashon di nos kurason. Nos por sintié kada biaha ku nos partisipá di e Santa Sena, realisá ordenansa di tèmpel pa un antepasado ku a bai, tèstifiká komo testigu di e Salbador, òf kuida un hende den nesesidat komo disípulo di Cristo.
Den e eksperensianan ei, nos ta bira despues di tempu manera un mucha den nos kapasidat pa stima i obedesé. Nos ta yega na para riba un fundeshi sigur. Nos fe den JesuCristo ta trese nos na arepentimentu i pa warda Su mandamentunan. Nos ta obedesé, i nos ta haña poder pa resistí tentashon, i nos ta haña e promesa di kompania di e Spiritu Santu.
Nos naturalesa ta kambia pa bira manera un mucha chikí, obediente na Dios i mas amoroso. E kambio aki lo kualifiká nos pa gosa di e donnan ku ta bini pa medio di e Spiritu Santu. Tin e Spiritu su kompania lo konsolá, guia, i fortalesé nos.
Mi yega na sa algun kos di loke Rei Benjamin tabata ke men ora el a bisa ku nos por bira manera un mucha chikí dilanti Dios. Mi a siña for di hopi eksperensia ku e Spiritu Santu ta papia mayoria bia den un stèm ketu, ku ta skucha mas fásil ora un hende su kurason ta mansu i sumiso, manera di un mucha chikí. Defakto, e orashon ku ta tfunshoná ta “mi ke solamente loke Abo ke. Djis bisa mi kiko esei ta. Lo mi hasié.”
Ora tormentanan di bida bini, bo por ta firme pasó bo ta para riba e baranka di bo fe den JesuCristo. E fe aki lo guia bo na arepentimentu diario i wardamentu konsistente di kombenionan. E ora ei lo bo kòrd’É semper. I durante e tormentanan di odio i maldat, lo bo sinti firme i ku speransa.
Mas ku esei, lo bo haña bo mes ta saka man pa lanta otronan pa seguridat riba e baranka ku bo. Fe den JesuCristo semper ta hiba na speransa grandi i na sentimentunan di karidat pa otronan, kual ta e amor berdadero di Cristo.
Mi ta duna mi testimonio solèm ku Señor JesuCristo a duna bo e invitashon “Bini na Mi.”7 E ta invitá bo, ku amor pa bo i pa esnan ku bo ta stima, pa bini na dj’E pa pas den e bida aki i bida eterno den e mundu benidero. E konosé perfektamente e tormentanan ku bo lo enfrentá den bo prueba komo parti di e plan di felisidat.
Mi ta roga boso pa aseptá invitashon di e Salbador. Manera un mucha mansu i sumiso, aseptá Su yudansa. Hasi i warda konvenionan ku E ta ofresé den E Iglesia di JesuCristo di e Santunan di e Delaster Dianan. Nan lo fortalesé bo. E Salbador konosé e tormentanan i e lugánan di seguridat riba kaminda pa kas na DjE i na nos Tata Selestial. E konosé e kaminda. E ta e Kaminda. Mi ta testifiká asina den e nòmber sagrado di JesuCristo, amèn.