Halsa Bo Kurason i Regosihá
Nos a nase den e tempu pa un propósito dibino, pa rekohementu di Israel.
Papiando ku Thomas B. Marsh, un konberso resien, Señor a bisa pa enkurashé, “Halsa bo kurason i regosihá, pasó e ora di bo mishon a yega” (Doctrina y Convenios 31:3).
Mi ta kere ku e invitashon aki por sirbi komo inspirashon pa tur miembro di Iglesia. Despues di tur kos, kada un di nos a risibí di nos Tata Selestial e mishon di rekohé Israel na tur dos banda di e velo.
“E rekohementu,” Presidente Russell M. Nelson a bisa, “ta e kos di mas importante pasando na mundu awendia. Nada otro no ta di kompará ku e magnitut, nada otro ta kompará den importansia, nada otro ta kompará den mahestat.”1
Sigur, ku tin hopi kousa ku ta balapena den mundu. TE ta imposibel pa menshoná nan tur. Pero lo bo no kier partisipá den un kousa grandi den bo alkanse i kaminda bo kontribushon ta hasi un diferensha vital? E rekohementu ta hasi un diferensha eterno na tur. Hende di tur edat por partisipá den e kousa aki no opstante di nan sirkunstanshanan i unda nan ta biba. No tin niun otro kousa na mundu ku ta mas kompletu.
Papiando spesífikamente ku e hubentut, Presidente Nelson a bisa ku “nos Tata Selestial a reserva hopi di Su spiritunan mas noble—kisas … Su mihó tim—pa e fase final aki. E spiritunan noble ei—e mihó hungadónan ei, e héroenan ei—ta boso!”2
Si, boso a wòrdu prepará for di promé ku e bida aki i a nase awor pa partisipá den e gran obra di rekohementu di Israel na ámbos banda di e velo den e delaster dianan (wak Doctrina y Convenios 138:53–56).
Dikon e kousa aki ta asina importante? Paso “e balor di e alma ta grandi den bista di Señor” (Doctrina y Convenios 18:10). I paso “esun ku yega na kere den [JesuCristo], i wòrdu batisá, esei lo wòrdu salba; i … nan lo heredá e reino di Dios” (3 Nefi 11:33). Ademas, “tur loke [e] Tata tin lo wòrdu duna na” esnan ku risibí Su ordenansanan i warda Su kombenionan (Doctrina y Convenios 84:38). Ademas, “e trahadónan ta poko” (Lukas 10:2
Solamente den e Iglesia di JesuCristo di e Santunan di e Delaster Dianan nos lo haña e poder, e outoridat, i e kaminda pa ofresé tal bendishon na otronan, sea na bida o morto.
Manera Presidente Nelson a bisa: “Kada biahaku bo hasi kualkier kos ku ta yuda un hende—na tur dos banda di e velo—ta dal un paso pa hasi e kombenionan ku Dios i risibí e ordenansanan esensial di boutismo i tèmpel, bo ta yuda do pa rekohé Israel. E ta asina simpel.”3
Maske tin hopi manera pa yuda den e rekohementu, mi kier papia di unu partikularmente: sirbi komo mishonero di tempu kompletu. Pa hopi di boso, esaki lo nifiká ser un mishonero ku ta siña. Pa hopi otro, e lo nifiká ser un mishonero ku ta sirbi. Pero e mundu ta purba di distraé hubentut for di e responsabilidat mas sagrado usando miedu i inseguridat.
Algun otro distraishon por ta eksperenshá un pandemia, bandoná un bon trabou,stòp ku edukashon, o ta interesá partikularmente den un persona di forma romántiko. Tur hende lo tin nan propio kantidat di reto. Tipo di distraishonnan aki por lanta presisamente na e tempu di embarká den e servisio di Señor, i eskohonan ku ta mustra opvio despues no semper ta mesun fásil na e momentu ei.
Mi sa di eksperensia e mente problemátiko di un persona yòn asina. Ora ku mi tabata preparando pa bai ku mi mishon, algun forsanan sorprendente a purba na deskurashá mi. Unu di nan tabata mi dentista. Ora ku el a realisá ku mi sita tabata pa mi por a bira un mishonero, el a trata na deskonsehá mi pa sirbi. Mi no tabata tin ni idea ku mi dentista tabata kontra di Iglesia.
E interupshon di mi edukashon tambe tabata kompliká. Ora mi a puntra pa dos aña di ousensia for di mi programa di universidat, Mi a keda informá ku e no tabata posibel. Lo mi a pèrdè mi lugá na e universidat si mi no regresá bek despues di un aña. Na Brazil, esaki tabata serio ya ku e úniko kriterio pa atmishon den un programa universitario tabata un eksamen hopi difísil i kompetitivo.
Despues di insistí repetidamente, mi a wòrdu informá na un manera hesitante ku despues di ta ousente pa un aña, mi por a pidi pa un eksepshon bou di base nan ekstraordinario. E por wòrdu aprobá òf keda sin wòrdu aprobá. Mi tabata spantá di e idea pa bolbe pasa e tèst di atmishon difísil ei despues di dos aña for di mi estudionan.
Tambe mi tabata speshalmente interesá den un hóbensita. Vários di mi amigunan tabata kompartí e mesun interesnan. Mi a pensa den mi mes, “Si mi bai ku un mishon, lo mi ta kore un riesgo.”
Pero Señor JesuCristo tabata mi gran inspirashon pa no tin miedu di futuro miéntras mi tabata lucha pa sirbiÉ ku tur mi kurason.
E tambe tabata tin un mishon pa kumpli kuné. Den Su propio palabranan, El a splika, “Paso mi a baha for di shelu, no pa hasi mi boluntat, pero e boluntat di Esun ku a manda mi ” (Juan 6:38). I Su mishon tabata fásil? Naturalmente ku no. Su sufrimentu, kual tabata un parti esensial di Su mishon, a kousa ku E, asta Dios, “ e mas grandi di tur, a tembla pa kousa di doló, i a sangra for di tur porio, i a sufri tantu den kurpa komo spiritu—i tabata ke pa [E] no mester a bebe for di e kopa margá ei, i retirá—
“Sinembargo, gloria sea na e Tata, i [El] a partisipá i terminá [Su] preparashonnan pa ku e yunan di hòmber.” (Doctrina y Convenios 19:18–19).
Sirbi un mishon di tempu kompletu por parse difísil na nos. Kisas e ta rekerí ku nos ta entregá kosnan importante pa un momentu. Señor sa esaki sigur, i E lo ta na nos banda semper.
Den nan mensahe pa mishoneronan den Prediká Mi Evangelio, e Promé Presidensia ta primintí, “Señor lo rekompensa i bendishoná bo rikamente si bo sirbié ku humildat i orashon.”4 Ta bèrdat ku tur e yunan di Dios ta bendishoná den un manera òf otro, pero tin un diferensha entre wòrdu bendishoná i wòrdu bendishoná rikamente den Su servisio.
Bo ta kòrda e retonan ku mi a pensa ku mi a konfrontá promé ku mi mishon? Mi dentista? Mi a haña un otro. Mi universidat? Nan a hasi un eksepshon pa mi. Bo ta kòrda e hende hóbensita? El a kasa ku un di mi bon amigunan.
Pero Dios di bèrdat a bendishoná mi rikamente. I mi a siña ku bendishon nan di Señor por bin den formanan diferente di loke nos ta spera. Despues di tur kos, Su pensamentunan no ta nos pensamentunan (wak Isaias 55:8–9).
Den e bendishon nan riku ku El a duna mi dor di sirbié komo mishonero di tempu kompletu tin tambe un fe mas grandi den JesuCristo i Su ekspiashon i un konosementu mas fuerte i testimonio di Su enseñansanan, di manera ku mi no ta wòrdu influenshá asina fásil dor di kada bientu di doktrina” (Efesionan4:14). Mi a pèrdè mi miedu pa siña. Mi kapasidat pa enfrentá retonan ku optimismo a krese. Opservando individuonan i famianan ku mi a konosé o siña komo misionero, mi a siña ku enseñansanan di Dios ta bèrdat ora ku E bisa ku pika no ta trese felisidat berdadero i ku ser obediente na e mandamentu nan di Dios ta yuda nos prosperá tantu temporalmente i spiritualmente (wak Mosia 2:41; Alma 41:10). I mi a siña pa mi mes ku Dios ta un Dios di milager (wak Mormon 9).
Tur e kosnan aki tabata instrumento pa mi preparashon pa bida di un adulto, inkluyendo tambe matrimonio i paternidat, servisio di Iglesia, i bida profeshonal i den komunidat.
Despues di mi mishon, mi a benefisiá di mi kurashi ku a krese pa presentá mi mes komo un fiel siguidó di JesuCristo i Su Iglesia den tur sirkunstansha i na tur hende, hasta kompartí e evangelio ku un muhé bunita ku lo bin bira mi kompañero eterno stima virtuoso, sabi, prèt, i e lus di mi bida.
Si, Dios a bendishoná mi rikamente, mas aya di loke mi a imaginá, meskos ku El lo hasi pa tur esnan ku “sirbié ku humildat i orashon.” Mi ta eternamente gradesí na Dios pa Su bondat.
Mi mishon a forma mi bida kompletamente. Mi a siña ku ta balapena e esfuerso pa konfia den Dios, pa konfia den Su sabiduria i miserikòrdia i Su promesanan. Despues di tur kos, E ta nos Tata, i sin ningun duda, E kier lo miho pa nos.
Kerido hubentut rònt mundu, mi ta ekstendé e mesun invitashon ku nos profeta, Presidente Nelson, a hasi na boso tur “pa pone bo mes disponibel den e batayon di hubentut di Señor pa yuda rekohé Israel.” Presidente Nelson a bisa:
“No tiin nada ku mayó konsekuensia Absolutamente nada.
“E rekohementu aki mester nifiká tur kos pa bo. Esaki ta e mishon pa kual bo a wòrdu manda na mundu.”5
Nos a nase den e tempu pa un propósito divino, pa rekohementu di Israel. Ora ku nos sirbi komo mishonero di tempu kompletu, nos lo wòrdu retá tin biaha, pero Señor Mes ta nos gran ehèmpel i guia den tal sirkunstanshanan. E ta komprondé kiko ta un mishon difísil. Ku Su yudansa, nos por hasi kosnan difísil. E lo ta na nos banda (wak Doxtrina y Convenios 84:88), i El lo bendishoná nos grandemente si nos sirbiÉ ku humildat.
Pa tur e motibunan aki, mi no ta sorprendí ku Señor a bisa Thomas B. Marsh i na nos tur, “Halsa bo kurason i regosihá, pasó e ora di bo mishon a yega.” Den e nòmber di JesuCristo, amèn.