Pa Sana e Mundu
Heridanan i diferensianan por wòru resolvé i hasta saná ora nos ta honra Dios, e Tata di nos tur, i JesuCristo, Su Yu.
Rumannan, den e glorioso temporada di Pasku di Resurekshon nos ta asina bendishoná di por risibí e konseho i guia for di e siervonan di Dios.
Guia i enseñansanan sagrado di nos Tata Selestial ta yuda nos nabegá bida den e tempunan difísil aki. Manera tabata profetisá, “kandela i tempestat,” “guerra i rumornan di guerra, i teremoto den diverso lugánan,” “i tur tipo di abominashonnan,”1 “plaga,”2 “hamber , i pestilensia”3 ta kabando ku famianan, komunidatnan, i hasta nashonnan.
Tin un otro maldishon ta asotando e mundu: atake riba abo i ami su libertat di religion. E sentimentu kresiente aki ta buskando pa kita religion i fé den Dios for di plasanan públiko, skol, estandartenan di komunidat, i diskursonan síviko. Opositornan di libertat di religion ta buska pa imponé restrikshon riba ekspreshonnan di konvikshon di kurason. Nan ta asta kritiká i ridikulisá tradishonnan di fé.
Un aktitut asin’ei ta marginalisá hende, devaluá prinsipionan personal, rektitut, rèspèt, spritualidat, i pas di konsenshi.
Kiko ta libertat di religion?
Ta un libertat pa adorá den tur su konfigurashonnan: libertat di reuní, libertat di papia, libertat di aktua riba kreensia personal, i libertat pa otronan pa hasi meskos. Libertat d religion ta pèrmití kada un di nos pa disidí pa nos mes kiko nos ta kere, kon nos ta biba i aktua di akuerdo ku nos fé, i kiko Dios ta spera di nos.
Esfuersonan pa desminuí e libertatnan di religion ei no ta nobo. Durante historia, hende di fé a sufri hopi na man di otronan. Miembronan di E Iglesia di JesuCristo di e Santunan di e Delaster Dianan no ta diferente.
For di komienso, hopi den búskeda di Dios a wòrdu atraé na e Iglesia aki pa motibu di su enseñansa di doktrina divino, inkluyendo fé den JesuCristo i Su Ekspiashon, arepentimentu, e plan di felisidat, i e Segunda Benida di nos Señor.
Oposishon, persekushon, i violensia a plaga nos promé profeta di delaster dianan, José Smith, i su siguidónan.
Meimei di e turbulensia di 1842, José a publiká e 13 prinsipionan fundamental di e Iglesia kresiente, inkluyendo esaki: “Nos ta reklamá e derechi di adorá Dios Todopoderoso di akuerdo ku e diktado di nos propio konsenshi, i pèrmití tur hende e mesun privilegio, laga nan adorá kon, unda, òf loke nan ke.”4
E deklarashon aki ta inklusivo, e ta liberá, i respetuoso. E ta e esensia di libertat di religion.
E Profeta José Smith tambe a deklará:
“Mi ta firme pa deklará dilanti Shelu ku mi ta mesun kla pa muri defendiendo e derecho di un Presbiteriano, un Baptista, òf un bon hòmber di kualkier otro denominashon; pa e mesun prinsipio ku lo trapa riba e derechonan di e … Santunan lo trapa riba e derechonan di e Katólikonan, òf di kualkier otro denominashon ku por ta impopular i demasiado debil pa defendé nan mes.
“E ta un amor pa libertat [ku] ta inspirá mi alma—libertat sivil i religioso pa henter e rasa humano.”5
Ainda, miembronan di antaño di Iglesia a wòrdu ataká i nan a kore ku nan miles di mias, di New York pa Ohio pa Missouri, kaminda e gobernadó a duna e ordu ku miembronan di e Iglesia “mester wòrdu tratá manera enemigu i mester wòrdu eksterminá òf saká for di e estado.”6 Nan a hui bai Illinois, pero e tormenta a kontinuá. Un gèng a mata e profeta José Smith, pensando ku matand’e nan lo destruí e Iglesia i separá e kreyentenan. Pero e fielnan a tene duru. José su remplasante, Brigham Young, a guia miles den un éksodo fòrsá, 1,300 mia (2,100 km) wèst pa unda awendia ta e estado di Utah.7 Mi propio antepasadonan tabata den e grupo di promé pioneronan.
For di e dianan ei di persekushon intenso, Señor su Iglesia a krese te kasi 17 mión miembro, mas ku mitar bibando pafó di Merka.8ku
Na aprel 2020 nos Iglesia a selebrá e di 200 aniversario di e Restorashon di e evangelio ku e proklamashon na e mundu, prepará pa nos Promé Presidensia i e Quorum di Diesdos Apòstelnan. E ta kuminsa, “Nos ta proklamá solemnemente ku Dios ta stima Su yunan den tur nashon di e mundu.”9
Nos orofeta stimá Russell M. Nelson, a sigui ekspresando:
“Nos ta kere den libertat, bondat, i igualdat pa kada un di Dios su yunan.
“Nos tur ta rumannan, kada un un yu di un Tata den Shelu amoroso. Su Yu, Señor JesuCristo, ta invitá tur pa bin na DjE, ‘pretu i blanku, koutiverio i liberá, hòmber i muhé.’ (2 Nefi 26:33).”10
Konsiderá ku mi kuater manera ku sosiedat i individuonan por benefisiá di libertat di religion.
Promé. Libertat di religion ta honra e promé i di dos gran mandamentunan, poniendo Dios na e sentro di nos bidanan. Nos ta lesa den Mateo:
“Bo lo stima Señor bo Dios, ku henter bo kurason, i ku henter bo alma, i ku henter bo mente.”11
“I e di dos ta igual ku e promé, Boso lo stima boso próhimo manera bo mes.”12
Sea ku ta den un kapia, snoa, moské, òf den un kasita ku dak di panchi, Cristo Su disípulonan i tur kreyente ku mesun pensamentu, por ekspresá devoshon na Dios dor di adorashon na jDE i e boluntat di sirbi Su yunan.
JesuCristo ta e ehèmpel perfekto di e amor i servisio aki. Durante di Su ministerio, El a kuida e pober,13 sana e enfermo14 i e siegu.15 El a duna e hambriento di kome,16 habri Su brasanan pa e muchanan chikitu,17 i pordoná esnan ku a hasi malu ku nE, asta krusifik’É.18
E skrituranan ta deskribí ku Jesus “a kana hasi bon.”19 Nos tambe tin ku hasie.
Di dos. Libertat di religion ta fomenta ekspreshonnan di kreensia, speransa, i pas.
Komo iglesia, nos ta uni ku otro religionnan pa protehé hendenan di tur kreensia i persuashon i nan derechi pa ekspresá nan konvikshonnan. Esaki no ta nifiká ku nos ta akseptá nan kreensia, tampoko nan di nos, pero nos tin mas en komun ku esnan ku ta deseá na silensia nos.
Resientemente mi a representá Iglesia na e G20 Interfaith Forum anual na Italia. Mi a wòrdu enkurashá, hasta impulsá, ora mi a topa ku e lidernan di gobiernu i religion di rònt mundu. Mi a realisá ku heridanan i diferensianan por wòru resolvé i hasta saná ora nos ta honra Dios, e Tata di nos tur, i JesuCristo, Su Yu. E Gran Sanadó di nos tur ta nos Señor, JesuCristo.
Mi tabata tin un momentu interesante ora mi tabata kabando ku mi diskurso. E shete diskursantenan promé ku mi no a sera den ningun manera di tradishon religioso ni tampoko den nòmber di Dios. Ora mi tabata papia, mi a pensa, “Mi ta bisa danki i sinta, òf mi ta sera ‘den nòmber di JesuCristo?” Mi a kòrda ken mi ta, i mi tabata sa ku Señor lo ta ke pa mi bisa Su nòmber pa konkluí Su mensahe. I esei mi a hasi. Mirando atras, e tabata mi oportunidat pa ekspresá mi kreensia; i mi ta tin e libertat di religion pa duna mi testimonio di Su nòmber sagrado.
Di tres. Religion ta inspirá hende pa sirbi.
Ora religion ta haña e espasio i libertat pa floresé, kreyentenan por hasi aktonan di servisio simpel i tin bia heroiko. E frase bieu Hudiu “tikkun olam,” ku ta nifika “drecha òf sana e mundu,” ta wòrdu reflehá awendia den e esfuersonan di hopi. Mi a uni ku un di e Karidatnan Katóliko, konosí komo Caritas Internationalis, Islamic Relief, i masha hopi organisashonnan Hudiu, Hindu, Budista, Sikh i Cristian manera e Salvation Army i e National Christian Foundation. untu nan ta sirbi miles i miles den nesesidat, mas resien dor di duna asistensia na e refugiadonan di guerra ku tènt, sakunan di drumi, i produktonan di kome,20 i dor di duna vakuna, inkluyendo pa polio21 i CPVID.22 E lista di loke ta wòrdu hasí ta largu, pero e nesesidatnan tambe.
Ningun pregunta, hende di fé, trahando huntu, por hasi intervenshonnan signifikativo. Na mesun momentu, servisio personal ta hopi bia sin rekonosimentu pero silensiosamente ta kambia bida.
Mi ta pensa riba e ehèmpel di Lukas ora JesuCristo a aserká e viuda di Nain. Jesus, akompañá pa un grupo di su siguidónan, a topa ku e proseshon di entiero di e úniko yu di e viuda. Sin dje, e tabata enfrentá ruina emoshonal, spiritual i hasta finansiero. Jesus, mirando su kara muhá ku lagrima, a bisa “No yora.”23 E ora ei El a mishi ku e kaha ku tabatin e kurpa, i e proseshon a para.
“Hóben,” El a komandá, “Mi ta bisa bo, Lanta.
“I e ku tabata morto a lanta sinta, i a kuminsa papia. I [Jesus] a entreg’é na Su mama.”24
Lantando morto ta un milager, pero kada akto di bondat i preokupashon pa un hende su lucha ta e kaminda di konvenio kada un di nos por “[bai] i hasi bon,”25
I di kuater. Libertat di religion ta aktua komo e forsa ku ta uni i kongregá pa moldea balornan i moralidat.
Den e Tèstamènt Nobo nos ta lesa ku hopi a bira lomba pa JesuCristo, murmurando di Su doktrina, “Esaki ta algu hopi difísil; ken por skucha?”26
E lamento ei ainda ta wòrdu skuchá awendia for di esnan ku ta buska pa saka religion for di diskursonan i influensia. Si religion no ta einan pa yuda moldea karakter i tei den tempunan difísil, ken lo tei? Ken lo siña honestidat, gratitut, pordon, i pasenshi? Ken lo ekshibí karidat, kompashon, i bondat pa esnan lubidá i trapá? Ken lo brasa esnan ku ta diferente pero ku tambe ta meresé meskos ku tur e Dios Su yunan? Ken lo habri nan brasa pa esnan den nesesidat i no ta buska rekompensa? Ken lo reverensiá pas i obediensa na leinan mas grandi ku e tendensianan di awendia? Ken lo respondé na e Salbador su súplika “Bai i hasi mesun kos”?27
Nos lo hasie! Si, rumannan, nos lo hasie.
Mi ta invitá boso pa ta kampionnan den e kousa di libertat di religion. Ta un ekspreshon di e prinsipio di albedrio duná di Dios.
Libertat di religion ta trese balansa den filosofianan ku ta kompetí. E bon di religion, su akohida, i e aktonan diaro di amor kua e religion ta inspirá ta solamente multipliká ora nos protehé e libertat di ekspresá i aktua riba kreensianan vital.
Mi ta testifiká ku Russell M. Nelson ta e profeta bibiente di Dios. Mi ta tèstifiká ku JesuCristo ta dirigí i guia e Iglesia aki. El a ekspiá pa nos pikánan, a wòrdu krusifiká na un krus, i a resusitá riba e di tres dia.28 Dor di DjE, nos por biba atrobe pa eternitdat; i esnan ku ta deseá por ta ku nos Tata den Shelu. E bèrdat aki mi ta proklamá na hinter mundu. Mi ta gradesido pa e libertat pa por hasi esaki. Den e nòmber di JesuCristo, amèn.