E Plan ta traha?

Pa Elder Adrián Ochoa

Di e Setenta

Mi ta tèstifiká ku e plan di felisidat ta traha. E a wòrdu kreá pa bo Tata Selestial, ku ta stima bo.

E Plan ta traha?

Resientemente mi tabata tin un kombersashon ku un hoben adulto ku a sirbi un mishon par di aña pasa i awor tabata envolví den su trabou profeshonal. Di algun manera, su bida tabata bai bon. Pero su fe tabata bayendo abou. E tabata hundiendo den un laman di duda di e Salbador i Su Iglesia. E a splika ku e no tabata risibí e bendishonan ku e tabata spera for di e evangelio restourá. E no tabata sinti ku e plan di felisidat tabata traha den su bida.

Mi mensahe awe ta pa tur esnan ku lo por tin sintimentunan paresido. Mi ta papia di esnan ku na un momentu “a sinti pa kanta e kantika di amor redentor” pero no “ta sinti esaki awor.”¹

Nos Tata Selestial a prepará un plan maravioso pa nos felisidat eterno. Pero ora bida no ta desaroyá na e manera ku nos a antisipá òf spera, por wòrdu mirá ku e plan no ta traha.

Kisas tin biaha nos ta sinti e manera ku e disipelnan di Jesus a sinti ora nan tabata den e barku, “mei mei di e laman, batí pa e olanan: pasobra e bientu tabata kontrali.”²

Despues, hopi trempan mainta:

“Jesus a bai serka nan, kanando riba laman.

“I ora e disípulonan a mir’É kana riba laman, nan tabata perturbá, … i nan a grita di miedu.

“Pero direktamente Jesus a papia ku nan, bisando, Ta di bon ánimo; ta Ami; no tene miedu.

“I Pedro a kontest’É i a bisa, Señor, si ta Abo, mi ta roga bo pa laga mi bin serka bo riba el awa,

“I el a bisa, Bin. I despues Pedro a sali for di e boto, a kana riba awa i a bai serka Jesus.

“Pero ora el a mira e bientu fuerte, e tabata tin temor, el a kuminsá ta senk, i a grita, … Señor, salba mi.

“I inmediatamente Jesus a ekstendé su man, i a gar’é, i a bis’é, O abo di poko fe, dikon bo a duda?”³

Lo mi por kompartí ku boso tres prinsipionan ku mi a siña di Pedro? Mi ta hasi orashon pa e prinsipionan aki yuda esnan ku sinti ku e plan di felisidat no ta traha den nan bida.

Promé, aktua ku fe den JesuCristo.

Mi ta sorprendí pa e fe di Pedro. Pa e simpel invitashon di Jesus pa “bini”, el a laga su barku [ku tabata] batí pa e tormenta. Parse ku e tabata sa ku si JesuCristo ta invit’é pa hasi algu e lo por hasi esaki.⁴ Pedro a kere e Salbador mas di lo kual ku el a kere su barku. I e fe ei a dun’é poder pa aktuá ku balentia durante e situashon stresante i spantoso ei.

E fe di Pedro ta kòrda mi un eksperensia ku ku mi a tende di Elder José L. Alonso. Poko despues ku e yu hòmber di Elder Alonso a fayesé, lagando un famia ku muchanan hóben, Elder Alonso a skucha e muchanan papia.

“Kiko nos lo bai hasi?” nan a puntra.

Un yu muhé di nuebe aña a kontesta, “Papi ta bon. E ta predikando e evangelio di JesuCristo.”

Manera Pedro, e mucha chikitu aki a wak mas leu di su pruebanan i a konfia den JesuCristo i Su Ekspiashon. Fe den e Salbador ta trese pas i e forsa pa sigui bai dilanti.

Si bo wak patras den bo bida, mi ta kere ku lo bo mira ku bo a ehersé fe hopi biaha. Uní na e Iglesia ta un akto di fe. Papia ku Tata Selestial den orashon ta un akto di fe. Lesa e skrituranan ta un akto di fe. Skucha mi mensahe di e konferensia general aki ta un akto di fe. Manera Presidente Russell M. Nelson a bisa,”No minimisá e fe ku boso tin kaba.”⁵

Otro lès ku mi a siña di Pedro ta esaki:

Den tempu di problema, bira na JesuCristo mesora.

Ora e tabata kana direkshon di e Salbador, Pedro tabata spanta pa e bientu, i a kuminsá senk. Pero ora ku Pedro a realisá kiko tabata pasando, e no a purba di trapa el awa riba su mes òf landa bèk na e barku. Mas ku laga bai su fe den JesuCristo, el a tene mas fuerte, yorando, “Señor, salba mi.”

“I inmediatamente Jesus a ekstendé Su man, i a gar’é.”⁶

Nos tur ta enfrentá bientunan fuerte ku por sakudí nos fe i pone nos senk. Ora esaki pasa, por fabor kòrda ku e plan di felisidat di Tata Selestial tin otro nòmber—e plan di redenshon. E plan no tabata pa nos slep fásilmente dor di bida, sin trompeká, sin senk, ku un hari semper riba nos kara. Tata Selestial tabata sa ku nos lo tin mester di wòrdu redimí. Esaki ta dikon El a prepará e plan di redenshon.⁷ Esaki ta dikon El a manda un Redentor. Ora nos lucha—pa kualke motibu—esaki no kermen ku e plan no ta traha. Ta einan nos tin mester e plan mas tantu!

Na e momentunan ei, sigui e ehèmpel di Pedro. Bira bai na e Salbador mesora.

“Awor ta e tempu i e dia di nos salbashon. … No demorá e dia di bo arepentimentu.”⁸

No ta importá unda nos ta i unda nos tabata ta, arepentimentu ta e kaminda pa dilanti. Presidente Nelson a siña:

Nada ta liberá mas, ta mas noble, òf mas krusial pa nos progreso individual ku e enfoke regular, diario riba arepentimentu. …

“Sea ku bo ta diligentemente moviendo riba e kaminda di kombenio, a slep òf a baha for di e kaminda di kombenio, òf no por ni wak e kaminda di kombenio for di unda bo ta awor aki, mi ta roga bo pa arepentí. Eksperensiá e poder ku ta fortalesé [ku ta bin] di arepentimentu diario—di hasi i ta un tiki mihó tur dia.”⁹

Bini na Cristo ta nifiká mas ku djis pensa riba DjE òf papia tokante di DjE òf asta stim’É. E ta nifiká siguiÉ . E ta nifiká biba manera el a siña nos pa biba. I pa nos tur, e ta nifiká arepentí, sin retraso.

Un di mi yunan muhé tabata traha na e Sentro di entrenamentu mishonal. E a konta mi di un elder ku e tabata siña ku a konfesá na dje ku e no tabata sigur ku e Buki di Mormon tabata bèrdat. E a hasi orashon tras orashon pa konosementu spiritual, pero e no a risibí kontesta.

Mi yu muhé a hasi orashon pa sa kiko e por hasi pa yuda e mishonero aki. E impreshon ku el a haña ta ku e skrituranan no a wòrdu duná pa nos lesa nan so i haña un testimonio; nan a wòrdu duná tambe pa siña nos warda e mandamentunan di Dios. Mi yu muhé a kompartí e pensamentu aki ku e mishonero.

Despues, el a wak e mishonero aki atrobe, e tabata mustra mas felis. El a bisa mi yu ku el a risibí finalmente un testimonio ku e Buki di Mormon ta bèrdat. E tabata sa ku e konosementu ei a bini pasobra e tabata hasi un gran esfuerso pa hasi lo kual ku e Buki di Mormon ta siña.

Laga nos sigui e ehèmpel di Pedro pa bira na e Salbador den tempunan di problema. Sigui JesuCristo na lugá di konfia den bo propio sabiduria i forsa. No ta importante kon largu bo a purba di ta riba awa sin DjE, nunka no ta lat pa bai serka DjE. E plan ta traha!

E di tres pinsipio ku mi a siña di Pedro i su eksperensia ta esaki:

Humiá bo mes dilanti di Señor, i E lo elevá bo nan kosnan mas grandi.

Pedro a mustra fe, tur dos manera kanando riba awa i teniendo na e Salbador ora e tabata tin mester di yudansa. Hasta, e Salbador a wak den Pedro e potensial pa hopi mas. “O abo, hende di poko fe,” El a bisa, “ pakiko bo a duda?”¹⁰

Pedro por a sinti ofendí pa e represhon aki. Pero el a asept’é humildemente. El a sigui buska un fe mas grandi den JesuCristo. Dor di hopi eksperensianan adishonal di edifikashon di fe—algun di nan hopi, hopi difísil—Pedro eventualmente a bira e lider duru manera un baranka ku Señor tabata tin mester pa e ta. El a logra kosnan grandioso den e servisio di Señor.

Kua kosnan grandioso Señor ta deseá pa bo logra? Den Su Iglesia i reino, tin hopi oportunidatnan di sirbi i ministrá otro manera e Salbador a hasi. E ta ke pa abo ta parti di Su obra grandioso. Nunka e plan di felisidat a bira mas real pa bo te ora bo ta yudando otronan bib’é.

Edifikando mi propio fe, e palabranan di Alma a kambia mi bida: “Bendishoná ta esnan ku ta humiliá nan mes sin wòrdu obligá na ta humilde.”¹¹ Laga nos pone nos mes humildemente den un posishon kaminda Jesus por alsa nos, guia nos, probechá mayoria di nos habilidatnan.¹²

Mi ta tèstifiká ku e plan di felisidat ta traha. El a wòrdu kreá pa bo Tata Selestial, ku konosé bo i stima bo. E ta funshoná pasó JesuCristo a vense piká i morto dor di Su Ekspiashon. Bin na DjE, siguiE, i “mesora e plan grandi di redenshon lo wòrdu tresé na boso.”¹³ Den e nòmber di JesuCristo, amèn.