Di Henter Nos Kurason
Si nos ke pa e Salbador alsa nos na shelu, e ora ei nos kompromiso na DjE i Su evangelio no por ta kasual ni un ratu.
Un Ofrenda pa E
Djis algun dia promé ku El a entregá su bida pa nos, JesuCristo tabata den e tèmpel di Yerusalèm, ta opservá hende hasi donashonnan den e kaha di tèmpel. “Hopi ku tabata riku a duna hopi,” pero n’e momentu ei, a bin un viuda pober, “i el a tira dos sèn.” Tabata un montante asina chikitu, kasi no tabata bale la pena pa registr’é.
Pero asina mes e donashon aparentemente insignifikativo aki a gara e Salbador Su atenshon. De echo, El a keda profundamente impreshoná ku “El a yama Su disipulonan, i a bisa nan, Sigur mi ta bisa boso, E viuda pober aki a duna mas, ku tur esnan ku a tira den e kaha di sèn:
“Pasobra tur a duna di nan abundansia; pero e di su nesesidat el a duna tur loke e tabatin, hasta tur su entrada.”1
Ku e opservashon aki, e Salbador a siña nos kon ofrendanan ta wòrdu midí den Su reino—i e ta basta diferente for di e manera ku nos ta midi kosnan usualmente. Pa Señor, e balor di e donashon a wòrdu midí no pa medio di e efekto ku e tabatin riba e kaha di sèn pero riba e kurason di e dunadó.
Den Su elogio na e viuda fiel aki, e Salbador a duna nos un norma pa midi nos disipulado den tur su diferente ekspreshonnan. Jesus a siña nos ku nos ofrenda por ta grandi òf e por ta chikitu, pero di tur manera, e mester ta di henter nos kurason.
E prinsipio aki ta wòrdu ripití den e ruego di e profeta Amaleki di e Buki di Mormon: “Venid a Cristo, el cual es el Santo de Israel, y participa de su salvación y del poder de su redención.[Bin na Cristo, ken ta e Santu di Israel, i partisipá den su salbashon, i e poder di su redenshon.] Sí, venid a él y ofrecedle vuestras almas enteras como ofrenda.”[Si, bin na DjE, i ofresé hinter bo alma komo un ofrenda na DjE.”]2
Pero kon esaki ta posibel? Pa hopi di nos, e normanan di kompromiso ku alma kompletu ta leu for di alkanse. Ya nos ta kasi na nos limite kaba. Kon nos por balansá e hopi demandanan di bida ku nos deseo di ofresé henter nos alma na Señor?
Kisas nos desafio ta ku nos ta pensa ku balansá ta nifiká dividí nos tempu igual entre interesnan ku ta kompeti. Mirando di e manera aki, nos kompromiso na JesuCristo ta un di e hopi kosnan ku nos tin ku hink’é den nos eskema okupá. Pero kisas tin un otro manera pa mir’é.
Balansá: Manera Kore un Baiskel
Mi kasá, Harriet, i ami gusta kore baiskel huntu. Ta un manera maravioso pa por hasi poko ehersisio miéntras nos ta pasa tempu huntu. Miéntras nos ta koriendo, i mi no ta hala rosea muchu duru, mi ta disfrutá di e mundu bunita rondó di nos i asta ta den un kombersashon plasentero. Poko biaha nos ta pone atenshon na mantené nos balansa riba nos baiskelnan. Nos tin tempu sufisiente ta kore ku nos no ta ni sikiera pensa riba esei—e a bira algu natural pa nos.
Pero kada biaha ku nos mira un hende siña kon ta kore baiskel pa promé biaha, mi ta kòrda ku no ta fasil balansá nos mes riba e tayernan fini ei. E ta tuma tempu. E ta tuma práktika. E ta rekerí pasenshi. E ta hasta rekerí kai algun biaha.
Mas ku tur kos, esnan ku logra pa balansá riba un baiskel ta siña e tepnan importante aki:
No wak bo pianan.
Wak dilanti.
Mantené bo wowonan riba e kaminda bo dilanti. Enfoká riba bo destino. I sigui trapa pedal. Keda balansá ta nifiká sigui bai dilanti.
Prinsipionan similar ta apliká ora nos bin haña balansa den nos bida komo disípulo di JesuCristo. Kon pa distribuí bo tempu i energia bou di bo hopi tareanan importante lo vária di persona pa persona i di temporada di bida pa un otro. Pero nos ophetivo komun en general ta di sigui e Kaminda di nos Maestro, JesuCristo, i regresá den e presensia di nos kerido Tata den Shelu. E ophetivo aki mester keda konstante i konsistente, ken ku nos ta i loke sea ku ta sosodiendo den nos bida.3
Lanta: Manera Bula un Avion
Awor, pa esnan ku ta bon koredó di baiskel, komparando disipulado na kore un baiskel ta un analogia ku por yuda. Pero pa esnan ku no ta, no preokupá. Mi tin un otro ku analogia ku mi tin sigur, kada hende hòmber, i hende muhé, i mucha por relatá na dje.
Disipulado, manera hopi kos den bida, por wòrdu kompará ku bula un avion.
Bo a yega di para ketu i pensa kon maravioso ta ku un avion di pasahero grandi por lanta for di suela i bula? Kiko ta loke ta mantene e mashinnan grandi aki den laira mei mei di e shelu, krusando oséano i kontinentenan?
Simplemente bisá, un avion ta bula solamente ora tin airu ta move bou di su alanan. E moveshon ei ta krea diferensia den e preshon di airu ku ta lanta e avion. I kon bo ta haña sufisiente airu moviendo riba i abou di e alanan pa lanta? E kontesta ta move pa dilanti.
E avion no ta gana altitut sinta áriba pista. Asta riba un dia ku hopi bientu, sufisiente forsa pa lant’é no ta sosodé si e avion no move pa dilanti, ku sufisiente forsa pa kontraresta e forsanan ku ta wante atras.
Meskos ku e forsa di bai dilanti ta wanta un baiskel den balansa i ariba, moviendo pa dilanti tambe ta yuda un avion surpasá e peso di gravedat ku ta hal’éabou.
Kiko esaki ta nifiká pa nos komo dispulonan di JesuCristo? E ta nifiká ku si nos haña balansa den bida, i si nos ke e Salbador lanta nos bai shelu, e ora ei nos kompromiso na DjE i Su evangelio no por ta kasual ni djis un ratu. Manera e viuda na Yerusalèm, nos mester ofresé na dj’E DjE henter nos alma. Nos ofrendanan por ta chikitu, pero e mester bin for di nos kurason i alma.
Ser un disípulo di JesuCristo no ta solamente un di e hopi kosnan ku nos ta hasi. E Salbador ta e poder ku ta motivá tur loke nos ta hasi. E no ta un luga di deskanso den nos biahe. E no ta un bista panorámiko ni tampoko un punto di referensia grandi. E ta “e kaminda, e bèrdat, i e bida: ningun hende no por bai na e Tata, sino pa medio di [JesuCristo].”4 Esei ta e Kaminda i nos destino final.
Balanse i lanta ta bin ora nos “pusha dilanti ku un firmesa den Cristo, mustrando un puresa perfekto di speransa, i un amor pa Dios i pa tur hende.”5
Sakrifisio i Konsagrashon
I ke hubo di e vários tareanan i responsabilidatnan ku ta hasi nos bida asina okupá? Pasa tempu ku sernan keri, bai skol òf prepará pa un trabou, ganando pan di kada dia, kuidando famia, sirbi den komunidat—unda tur esei tur ta pas? E Salbador ta sigurá nos:
“Bo Tata selestial sa ku bo tin nesesidat di tur e kosnan aki.
“Pero buska promé e reino di Dios i su hustisia, i tur e kosnan aki lo wòrdu añadí n’abo.”6
Pero esei no ta nifika ku e lo ta fasil.7 E ta rekerí tantu sakrifisio i konsagrashon.
E ta rekerí pa laga algun kos bai i laga algun kos krese.
Sakrifisio i konsagrashon ta dos leinan selestial ku nos ta hasi kombenio pa obedesé den e tèmpel sagrado. E dos leinan aki ta similar pero no idéntiko. Sakrifiká ta nifiká pa entregá algu na fabor di otro kos mas balioso. Den antaño, Dios Su pueblo tabata sakrifiká e primogénito di nan bestianan na honor di e Mesias ku ta biniendo. Den historia, Santunan fiel a sakrifiká deseonan personal, komodidat, i asta nan bida pa e Salbador.
Nos tur tin kosnan, grandi òf chikitu, ku nos mester sakrifiká p’asina sigui JesuCristo mas kompletu.8 Nos sakrifisionan ta mustra loke nos ta balorá berdaderamente. Sakrifisionan ta sagraod i ta honra Señor.9
Konsagrashon ta diferente for di sakrifisio den por lo menos un manera importante. Ora nos konsagrá algu, nos no ta lagué pa e wòrdu konsumí riba e altar. Na su lugá, nos ta us’é den servisio di Señor. Nos ta dediká na DjE i Su propósito santu.10 Nos ta risibí e talentonan ku Señor a duna nos i ta hasi esfuerso pa oumentá nan, multipliká, pa bira ainda mas útil den edifiká Señor Su reino.11
Masha poko di nos lo wòrdu pidí pa sakrifiká nos bida pa e Salbador. Pero nos tur ta invitá pa konsagrá nos bida na DjE.
Un Obra, Un Goso, Un Propósito
Ora nos ta buska pa purifiká nos bidanan i wak na Cristo den kada pensamentu,12 tur kos lo kuminsa bai na nan lugá. Bida ya no ta sinti mas komo un lista di esfuersonan separá mantené den un balanse.
Despues di tempu, tur esei ta bira un obra.
Un goso.
Un propósito santu.
Ta e obra di e Dios amoroso i sirbidó. Ta stima i sirbi Dios su yunan.13
Ora nos ta wak nos bida i mira miles di kosnan pa hasi, nos ta sinti [nos mes] bou di preshon. Ora nos mira un kos—Dios amoroso i sirbidó i Su yunan, den miles di manera—e ora ei nos por traha riba e kosnan di goso.
Di e manera aki nos ta ofresé henter nos alma—dor di sakrifiká kualke kos ku ta manteniendo nos atras i konsagrá e sobrá na Señor i Su propósito.
Un Palabra di Enkurashamentu i Testimonio
Mi kerido rumannan i mi kerido amigunan, lo bai tin tempu ku lo bo ta desea di por hasi mas. Bo Tata amoroso den Shelu konosé bo kurason. E sa ku bo no por hasi tur kos ku bo kurason ke pa bo hasi. Pero bo por stim’É i sirbiÉ. Bo por hasi bo bèst pa warda su mandamentu nan. Bo por stima i sirbi Su yunan. I bo esfuersonan ta purifiká bo kurason i prepará bo pa un futuro glorioso.
Esaki ta loke e viuda den e tèmpel a parse di ta komprondé. E sigur tabata sa ku su ofrenda lo no a kambia e fortuna di Israel, pero e por kambia i bendishoná e—pasobra, ounke chikitu, ta tur loke e tabatin.
Pues, mi kerido amigunan i ko disípulonan stimá di JesuCristo, laga nos no ta “kansá den hasi bon, pasobra [nos] ta poniendo e fundeshi di un gran obra.” Y de las cosas pequeñas proceden “la que es grande.” [I for di kosnan chikitu lo sali “e loke ta grandi.”]14
Mi ta testifiká ku esaki ta bèrdat, manera tambe mi ta testifiká ku JesuCristo ta nos Maestro, nos Redentor, i nos ùniko Kaminda pa bai bèk serka nos kerido Tata Selestial. Den e nòmber sagrado di JesuCristo, amèn.