Hasi Loke Ta Mas Importante

Pa Rebecca L. Craven

Segundo konsehero den e Presidensia General di Mujeres Jovenes

Ora nos ta enfoká nos bida riba JesuCristo, e lo bendishoná nos ku fortalesa, satisfakshon, i goso spiritual.

No hopi tempu pasa, un amigu kerí a haña un impreshon pa bishitá un hende muhé den su bario. El a ignorá e inspirashon pasó apénas e tabata konos’é—e no tabata tin sentido. Pero dor ku e pensamentu a sigui bin na e, el a disidí na aktua segun e inspirashon. Dor ku el a kuminsá sinti inkonfortabel kaba tokante e bishita riba man el a disidí ku hiba algu pa e hermana lo yud’é aliviá su ansiedat. Siguramente e lo no por a bai man bashi! Pues el a kumpra un baki di eiskrim, i el a bai pa kuminsá e loke e tabata preokupá ku por a bira un bishita inkómodo.

El a bati na e muhé su porta, i djis despues e hermana a kontesta. Mi amiga a entreg’é e eiskrim den un saku di papel maron, i e kombersashon a kuminsá. E no a dura largu pa mi amiga realisá pa kiko e bishita tabata nesesario. Segun nan tabata sinta huntu riba e stupi dilanti, e muhé a revelá un kantidat di reto ku e tabata konfrontando. Despues di un ora papiando den e wer kayente di zomer (verano), mi amiga a ripará e eiskrim ta dirti dor di e saku di papel maron.

El a grita, “Sòri ku bo eiskrim a dirti!”

E muhé a respondé kariñosamente, “E ta OKE! Mi ta intolerante pa ku laktósis!”

Den un soño Señor a bisa e profeta Lehi, “Bendishoná bo ta Lehi, dor di e kosnan ku bo a hasi.”¹

Ser un disípulo di JesuCristo ta enserá mas ku djis tin speransa òf kere. E ta rekerí esfuerso, moveshon i kompromiso. E ta rekerí pa nos hasi algu, ser “hasidónan di e palabra , i no skuchadó so.”²

Den kaso di e eiskrim ku a dirti, kiko ta mas importante? E eiskrim? Òf ku mi amiga simplemente a hasi algu?

Mi tabata tin un eksperensia dushi ku un dushi muhé yòn ku a hasi un pregunta hopi sinsero: “Hermana Craven, kon bo por sa ku kosnan tokante e Iglesia ta bèrdat? Paso ami no ta sinti nada.”

Promé ku mi a bula duna un kontesta, Mi a hasié algun pregunta promé. “Konta mi di bo estudio personal di skritura.”

El a kontestá, “Mi no ta lesa e skrituranan.”

Mi a puntra, “Ke hubo ku bo famia? Boso ta studia Bin, Sigui Mi huntu?”

El a bisa, “No.”

Mi a puntra tokante su orashonnan: “Ki bo ta sinti ora bo hasi orashon?”

El a kontesta: “Mi no ta hasi orashon.”

Mi kontesta na e tabata simpel: “Si bo kier sa kualkier kos, bo mester bai hasi algu.”

E no ta asina ku kualkier kos ku nos kier siña òf sa? Mi a invitá mi amiga nobo pa kuminsá práktika e evangelio di JesuCristo: hasiendo orashon, studiando, sirbiendo otro nan, i konfiando den Señor. Kombershon lo no bini sin ta hasi nada. E ta bini pa medio di e poder di e Spiritu Santu ora ku intenshonalmente nos hasi un esfuerso pa sa dor di puntra, buska, i yama. E ta bin dor di hasi.³

Den Doctrina y Convenios, Señor ta bisa tin bes, “E no ta importá.”⁴ E ta pone mi pensa ku si algun kosnan no ta importante, o ta ménos importante, mester tin kosnan ku ta mas importante. Den nos esfuersonan pa pa hasi algu òf hasi kualkier kos, nos lo puntra nos mes, “Kiko ta mas importante?”

Hendenan ku ta traha propaganda hopi bes ta usa lema nan manera “Esensial” òf “mester tin” den e speransa pa laga nos kere ku e produkto ku nan ta bendiendo ta nesesario pa nos felisidat òf bienestar. Pero e loke nan ta bendiendo ta realmente esensial? Di bèrdat nos mester di dje? E ta realmente importante?

Aki algun pensamentunan pa konsiderá. Kiko ta mas importante?

Kuantu “likes” nos haña riba nos pòst nan di media sosial? Òf kon stima i balorá nos ta dor di nos Tata Selestial?
Bistiendo e último paña nan na moda? O mustrando rèspèt pa nos kurpa dor di bisti desente?
Buskando kontesta via un búskeda riba Internèt? O risibiendo kontesta di Dios pa medio di e Spiritu Santu?
Sperando mas? O ser kontentu ku loke a wòrdu duna na nos?

Presidente Russell M. Nelson ta siña nos:

“Ku e Spiritu Santu komo bo kompañero, bo por mira direktamente dor di e kultura di selebridat ku a dal nos sosiedat. Bo por ta mas sabi ku e generashonnan previo tabata nunka. …

“Pone un norma pa e restu di mundu!”⁵

E ta eksigí esfuerso pa keda enfoká riba loke di bèrdat ta esensialpa alegria duradero. No tin nada ku Satanas lo stima mas ku laga nos pèrdè nos balornan eterno, dirigiendo nos pa pèrdè tempu presioso, talento nan, o forsa spiritual riba kosnan ku no ta importante. Mi ta invitá kada un di nos pa konsiderá hasiendo orashon e kosnan ku ta distraé nos pa hasi loke ta mas importante.

Nos yu hòmber mas grandi su maestro di grupo tres a siña su klas pa “ta doña riba bo seleber.” E tabata un rekordatorio pa su studiantenan yòn ku nan tabata tin kontròl riba nan pensamentunan i p’esei por a kontrolá loke nan ta hasi. Mi ta rekordá mi mes pa “ta doño riba mi seleber” ora ku Mi deskubrí mi mes ta desviá for di kosnan ku ta ménos importante.

Un studiante di skol avansá a bisa mi resien ku a bira popular bou di algun hóbennan di Iglesia pa no hasi kaso di e mandamentu nan ku un plan bon kalkulá pa arepentí despues. “E ta un sorto di karnèt di honor,” nan a bisa MI. Señor sigur lo sigui pordoná esnan ku arepentí humildemente ”ku berdadero intenshon.”⁶ Pero e Salbador su ekspiashon miserikordioso no mester wòrdu usa nunka den un manera di mofa asina. Nos konosé e parabel di e karné pèrdí. Naturalmente e wardadó di karné lo bai laga e otro 99 karnénan pa buska esun ku a dualu. Pero bo por imaginá e goso ku esnan ku a skohe di ta e 99 ta trese nan e Bon Pastor? Esnan ku ta keda huntu i yuda otro biba nan kombenionan? Bo por visualisá kiko e mundu òf bo skol òf bo trabou òf bo hogar lo tabata si ta obediente tabata e kos popular pa hasi? E no ta bai pa biba bida perfektamente—e ta bai pa haña goso segun nos ta hasi nos esfuerso pa biba e kombenionan ku nos a hasi ku Señor.

Ku e mundu ekspresando mas duda tokante Dios i konfushon i preshonnan oumentando, esaki ta e tempu ku nos mester keda mas serka di e profeta. Dor ku e ta e portabos di Señor, nos por konfirmá ku loke e ta urgí, konsehá, i roga nos pa hasi ta e kosnan ku ta mas importante.

Ounke e no ta fásil, semper tin un manera pa hasi loke ta korekto. Miéntras un mujcha hóben tabata papia ku un grupo di amigunan na skol, a sinti su kurason sak ora e kombersashon a kue un rumbo di krítika e norma nan di Iglesia. El a realisá ku e no por a keda ketu—e mester a hasi algu. Ku rèspèt el a papia tokante e amor di Tata Selestial i kon e mandamentu nan ku El a pone ta pa bendishoná i protehé Su yunan. Tabata hopi mas fásil pe keda sin hasi nada. Pero kiko ta mas importante? Meskla den e multitut? O resaltá komo un testigu di Dios na “tur momentu i den tur kos i na tur lugá”?⁷

Si e Iglesia restorá di JesuCristo ta bai sali for di skuridat, nos mester sali for di skuridat. Komo muhénan ku ta warda konvenio, nos mester laga nos lus di evangelio bria rònt mundu dor di lanta para i resaltá. Nos ta hasi esaki huntu komo yu muhénan di Dios—un forsa di 8.2 mion di hende muhé di 11 aña pariba, kual nan trabou ta eksaktamente meskos. Nos ta reuniendo Israel segun nos ta partisipá den e obra di salbashon i eksaltashon; luchando pa biba e evangelio di JesuCristo, kuidando di otronan den nesesidat, invitando tur pa risibí e evangelio, i uniendo famianan pa eternidat.⁸ E evangelio di JesuCristo ta un evangelio di akshon i un evangelio di goso! Laga nos no balotá nos kapasidat pa hasi e kosnan ku ta mas importante. Nos herensia divino ta duna nos kurashi i konfiansa pa hasi i ta tur loke nos Tata Selestial sa ku nos por ta.

E tema pa hubentut pa e aña aki ta for di Proverbionan 3:5–6:

“Konfia den Señor ku henter bo kurason i no inkliná riba bo propio komprenshon.”

“Rekonos’É den tur bo kaminda nan, i E lo dirigí boso kaminda nan.”

Un komponente klave di konfia den Señor ta sigui pa dilanti, keriendo ku E lo guia nos asta ora ku nos no tin tur e kontesta nan.

Rumannan, e no ta bai pa e eiskrim. I e no ta tokante hasi mas. E ta tokante hasi loke ta importante. E ta pa apliká e doktrina di Cristo den nos bida segun nos ta lucha pa bira mas manera E.

Mas nos hasi pa keda firme riba e kaminda di kombenio, mas nos fe den JesuCristo lo krese. Mas nos fe krese, mas nos lo deseá pa arepentí. I mas nos arepentí, mas nos lo fortalesé nos relashon di konvenionan ku Dios. E relashon di kombenio ei ta hiba nos na tèmpel, pasó wardando e kombenionan di tèmpel ta e forma kon nos ta perserverá te na fin.

Ora nos enfoká nos bida riba JesuCristo, nos lo wòrdu guiá pa hasi loke ta mas importante. I nos lo wòrdu bendishoná ku fortalesa, satisfakshon spiritual, i ku goso! Den e nòmber di JesuCristo, amèn.