Amor dibino den e Plan di e Tata
E propósito di e doktrina i polítika di e Iglesia restorá ta pa prepará Dios Su yunan pa salbashon den e reino selestil i pa eksaltashon den su grado di mas haltu.
E plan di evangelio ta mustra nos Tata Selestial Su amor pa tur Su yunan. Pa komprondé esaki, nos mester buska pa komprondé Su plan i Su mandamentunan. E stima Su yunan asina tantu ku El a duna Su Yu Unigénito, JesuCristo, pa ta nos Salbador i Redentor pa sufri i muri pa nos. Den e Iglesia restorá di JesuCristo di e Santunan di e Delaster Dianan, nos tin e komprendementu úniko di Nos Tata Selestial Su plan. Esaki ta duna nos un manera diferente di wak e propósito di bida mortal, e huisio dibino ku ta siguié, i e destino final glorioso di tur Dios Su yunan.
Mi ta stima boso, mi rumannan. Mi stima tur Dios Su yunan. Ora Jesus a wòrdu untrá, “Kua ta e gran mandamentu den e lei?” El a siña pastima Dios i pa stima nos próhimo ta e promé di Dios Su gran mandamentunan.1 E mandamentunan ei ta promé pasó nan ta invitá nos pa krese spiritualmente dor di buska pa imitá Dios Su amor pa nos. Mi ta deseá pa nos tur tin un mihó komprendementu di e doktrina i polítika ku nos Tata Selestial i Su Yu JesuCristo, a establesé den e Iglesia di JesuCristo di e Santunan di e Delaster Dianan. Loke mi ta bisa aki ta buska pa klarifiká kon Dios Su amor ta splika e doktrina ei i e maneho inspirá di Iglesia.
I.
Un malkomprendementu komun di e huisio ku na final ta sigui bida mortal ta ku bon hende ta bai na un lugá yamá shelu i ku mal hende ta bai na un lugá sempiterno yamá fièrnu. E suposishon eróneo aki di solamente dos destino final ta impliká ku esnan ku no por warda tur e mandamentunan rekerí pa shelu nesesariamente ta pa semper destiná pa fièrnu.
Un Tata Selestial amoroso tin un mihó plan pa Su yunan. E doktrina revelá di e Iglesia restorá di JesuCristo ta siña ku tur e yunnan di Dios—ku eksepshonnan demasiado limitá pa konsiderá aki—finalmente lo bai kaba den un reino di gloria.2 “Den Mi Tata Su kas tin hopi manshon,”3 Jesus a siña. Di revelashonnan moderno nos sa ku e manshonnan ei ta den tres diferente reino di gloria. Den e Huisio Final kada unu di nos lo wòrdu husgá di akuerdo ku nos obranan i e deseonan di nos kurasonnan.4 Promé ku esei, nos lo tin ku bai sufri pa nos pikánan di kual nos no a arepentí. E skrituranan ta kla riba esaki.5 Despues nos Hues Hustu lo konsedé nos residensia den un di e reinonan ei di gloria. Asina ta, ku manera nos sa di revelashon moderno, tur lo wòrdu husgá … , i kada hende lo haña di akuerdo su propio obra, su propio dominio, den e manshon ku ta prepará.”6
Señor a skohe pa revelá komparativamente poko tokante di e reinonan ei di gloria. Kontrali na esaki, Señor a revelá hopi tokante e reino mas haltu di gloria, di loke e Beibel ta deskribí komo e “gloria di e solo.”7
Den e gloria “selestial”8 tin tres grado, òf nivel.9 Esun di mas haltu di esakinan ta eksaltashon den e reino selestial, den kual nos por bira meskos ku nos Tata i Su Yu, JesuCristo. Pa yuda nos desaroyá e atributonan dibino i e kambio den naturalesa nesesario pa realisá nos potensial dibino, Señor a revelá doktrina i establesé mandamentunan basá riba e lei eterno. Esaki ta loke nos ta siña den e Iglesia di JesuCristo di e Santunan di e Delaster Dianan pasó e propósito di e doktrina i polítika di e Iglesia restorá ta pa prepará Dios Su yunan pa salbashon den e reino selestial i, mas partikular, pa eksaltashon den e grado di mas haltu.
E kombenionan hasí i e bendishonnan primintí na e fielnan den e tèmpel di Dios ta e yabi. Esaki ta splika nos konstrukshon di tèmpel rònt mundu, di kual e koro a kanta asina bunita. Algun ta asombrá di e énfasis aki, no komprondiendo ku e kombenionan i ordenansanan di tèmpel ta guia nos pa logra eksaltashon. Esakipor wòrdu komprondé solamente den e konteksto di e bèrdat revelá di tres grado di gloria. Dor di nos Tata Selestial Su gran amor pa tur Su yunan, El a proveé otro reinonan di gloria—manera Elder Quentin L. Cook a splika ayera—tur di kual ta mas maravioso ku nos por komprondé.10
E Ekspiashon di JesuCristo ta hasi esaki posibel. El a revelá ku E “ta glorifiká e Tata, i ta salba tur e obra di Su mannan.”11 E salbashon ei ta wòrdu konsedé den diferente reino di gloria. Nos sa di revelashon moderno ku “tur reino tin un lei duná na dje.”12 Signifikatívamente:
“Esun ku no ta apto pa obedesé e lei di un reino selestial no por soportá un gloria selestial.
“I esun ku no por obedesé e lei di un reino terestial nos por soportá un gloria terestial.
“I esun ku no por obedesé e lei di un reino telestial nos por soportá un gloria telestial.”13
Ku otro palabra, e reino di gloria ku nos risibí den e Huisio Final ta determiná leinan ku nos skohe pa obedesé den nos Tata Selestial Su plan di amor. Bou di e plan ei tin hopi reino pa asina tur Su yunan por wòrdu asigná na un reino ku nan por “soportá.”
II.
E enseñansanan i polítikanan di Señor Su Iglesia restorá ta apliká e bèrdatnan eterno aki di un manera ku nan por wòrdu komprondé kompletamente solamente den e konteksto di nos Tata Selestial Su plan di amor pa tur Su yunan.
Asina ta, ku nos ta honrá albedrio individual. Mayoria ta konsiente di e esfuerso grandi aki di e Iglesia aki pa promové libertat di religion. E esfuersonan aki ta pa promové e plan di nos Tata Selestial. Nos ta buska pa yuda tur Su yunan—no solamente nos propio miembronan—gosa e presioso libertat pa skohe.
Igualmente, tin biaha nos ta wòrdu puntrá dikon nos ta manda misioneronan na asina tantu pais, asta bou di poblashon Cristian. Tambe ta puntra nos dikon nos ta duna enorme ayudo humanitario na personanan ku no ta miembro di nos Iglesia sin vinkulá esaki ku nos esfuerso mishonal. Nos ta hasi esaki pasó Señor a siña nos pa stima tur Su yunan manera nos rumannan i nos ke kompartí nos abundansia spiritual i temporal ku tur hende.
Doktrina eterno tambe ta proveé un perspektiva distinto riba mucha. Dor di e perspektiva aki nos ta wak e hañamentu i kriamentu di yu komo parti di e plan dibino. Ta un deber di alegria i sagrado na esnan ku tin e poder pa partisipá den esaki. P’esei, nos ta wòrdu mandá pa siña i lucha pa prinsipionan i práktikanan ku ta proveé e mihó kondishonnan pa e desaroyo i felisidat di e muchanan den Dios Su plan.
III.
Finalmente, E Iglesia di JesuCristo di e Santunan di e Delaster Dianan ta konosé [di manera] apropiá komo un Iglesia sentrá riba famia. Pero no bon komprondé ta e realidat ku e echo di ta sentrá riba famia, no ta limitá na relashonnan mortal. Relashonnan eterno tambe ta fundamental den nos teologia. E mishon di e Iglesia restorá ta pa yuda tur e yunan di Dios kalifiká pa loke Dios ta deseá komo nan destino final. Pe medio di e redenshon proveé dor di e Ekspiashon di Cristo, tur por risibí e bida eterno (eksaltashon den e reino selestial), kual Mama Eva a deklará “Dios ta duna na tur ku ta obediente.”14 Esaki ta mas ku salbashon. Presidente Russell M. Nelson a kòrda nos ku “den Dios Su plan eterno, salbashon ta un asuntu individual: [pero] eksaltashon ta un asuntu di famia.”15
Fundamental pa nos ta ku Dios Su revelashon ku eksaltashon por wòrdu optené solamente dor di fieldat na e kombenionan di un matrimonio eterno entre un hende hòmber i un hende muhé.16 E doktrina dibino ei ta dikon nos ta siña ku “género ta un karakterístika esensial di e identidat i propósito individual premortal, mortal, i eterno.”17
Esei ta tambe dikon Dios a rekerí Su Iglesia restorá pa oponé preshon sosial i legal pa kita for di e doktrina di matrimonio entre hende hòmber i hende muhé i pa oponé kambionan ku ta konfundí òf modifiká género òf homogenisá e diferensia entre hende hòmber i hende muhé òf konfundí òf kambia genero.
E Iglesia restorá su posishon riba e fundamèntnan aki hopi biaha ta provoká oposishon . Nos ta komprondé esei. E plan di nos Tata Selestial ta pèrmití “oposishon den tur kos,”18 i Satanas su oposishon mas pisá ta dirigí na loke ta mas importante di e plan ei. Konsekuentemente, e ta buska pa oponé na progreso pa [yega] na eksaltashon dor destorshoná matrimonio, i deskurashá hañamentu di yu., i konfundí e genero. Sinembargo, nos sa ku riba término mas largu, e propósito dibino i e plan di nos Tata Selestial amoroso lo no wòrdu kambiá. Sirkumstansianan personal por kambia, i Dios su plan ta sigurá nos ku a largo plaso, esnan fiel ku ta warda e kombenionan lo tin e oportunidat pa kalifiká pa kada bendishon primintí.19
Un enseñansa di balor úniko pa yuda nos prepará pa bida eterno, “e don di mas grandi di Dios,”20 ta e proklamashon di 1995 tokante e famia.21 Su deklarashonnan ta, dimes, diferente for di algun lei, praktika, i argumento aktual, manera biba huntu i matrimonio di mesun sexo. Esnan ku no ta kompronde Tata Selestial su plan amoroso pa Su Yunan por konsiderá e proklamashon di famia aki no mas ku un deklarashon di maneho ku por kambia. Kontrali na esaki, nos ta afirmá ku e proklamashon di famia, fundá riba doktrina irevokabel, ta definí e tipo di relashonnan familiar kaminda e parti mas importante di nos desaroyo eterno por sosodé.
Esei ta e konteksto pa e doktrina i polítika úniko di E Iglesia restorá di JesuCristo di e Santunan di Delaster Dianan.
IV.
Den asina hopi relashonnan i sirkunstansianan di bida mortal, nos mester biba ku diferensianan. Komo siguidónan di Cristo ku mester stima nos próhimo, nos mester biba den pas ku esnan ku no ta kere manera nos. Nos tur ta yunan di un Tata Selestial amoroso. Pa nos tur, El a destiná bida despues di morto i, finalmente un reino di gloria. Dios ta deseá pa nos tur lucha pa Su bendishon mas haltu posibel dor di warda e mas haltu di Su mandamentunan, kombenionan, i ordenansanan, tur ku ta kulminá den Su tèmpel sagrado konstruí rònt mundu. Nos mester buska pa kompartí e bèrdatnan di eternidat aki ku otronan. Pero ku e amor ku nos mester tin pa tur nos próhimo, semper nos ta aseptá nan desishonnan. Manera un profeta di e Buki di Mormon a siñá, nos mester pusha dilanti, ku “un amor pa Dios i pa tur hende.”22
Manera Presidente Russell M. Nelson a deklará den nos delaster konferensia: “Nunka tabatin un tempu den historia di mundu kaminda e konosementu di e Salbador ta mas personalmente vital i relevante pa kada alma humano. … E doktrina puru di Cristo ta poderoso. E ta kambia e bida di tur esnan ku komprond’é i ta buska pa implement’é den nan bida.”23
Ku nos tur por implementá e sagrado doktrina den nos propio bida, mi ta roga den e nòmber di JesuCristo, amen.