E Poder di Impulso Spiritual

Dor di Presidente Russell M. Nelson

Presidente di E Iglesia di JesuCristo di e Santunan di e Delaster Dianan

Lo mi ke sugerí sinku akshon spesífiko ku nos por tuma pa yuda nos pa mantené impulso spiritual positivo.

Mi kerido rumannan, mi ta stima boso. Mi ta apresiá e momento aki pa papia ku boso awe. Mi ta resa diariamente ku boso lo ta protehá di e e atakenan feros di e atversario i tin e forsa pa pusha bai dilanti dor di kualke sea e desafionan ku boso ta enfrentá.

Algun desafio ta karganan profundamente privá ku niun otro hende por mira. Otronan ta hunga riba e senario mundial. E konfliktonan armá den Oropa Oriental ta un di esakinan. Mi a yega di bishitá Ukraina i Rusia hopi biaha. Mi ta stima e teranan ei, e hendenan, i nan idiomanan. Mi ta yora i resa pa tur ku ta afektá pa e konflikto aki. Komo iglesia nos ta hasi tur loke ta posibel pa yuda esnan ku ta sufriendo i luchando pa sobbrebibí. Nos ta invitá tur pa kontinua yuna i resa pa e hendenan ku ta wòrdu afektá dor di e kalamidat aki. Kualke guera ta un violashon horibel di tur kos ku Señor JesuCristo ta para p’e i ta siña.

Ningun di nos no por kontrolá nashonan òf e akshonnan di otronan, ni asta e miembronan di nos propio famia. Pero nos por kontrolá nos mes. Mi yamada awe, mi kerido rumannan, ta pa para konfliktonan ku ta rastrando den bokurason, bohogar, i bobida. Dera kuallke i tur inklinashon pa hasi daño na otronan—sea e inklinashonnan ei ta bo temperamentu, lenga skèrpi, òf resentimentu pa un hende ku a lastimá bo. I asina mes, Señor ta siña nos pa bira e otro banda di kara,¹ pa stima nos enemigunan, i pa resa pa esnan ku ta usa nos ku despresio.²

E por ta dolorosamente difísil pa laga rabia lòs ku ta parse asina hustifiká. E por parse imposibel pa pordoná esnan ku nan akshonnan destruktivo a lastimá e inosente. I asina mes, e Salbador ta eksortá nos pa “pordoná tur hende.”³

Nos ta siguidónan di e Prens di Pas. Awor mas ku nunka, nos mester di e pas ku solamente E por trese. Kon nos por spera pa pas eksistí den un mundu ora, individualmente nos no ta buskando pas i harmonia? Rumannan, mi sa ku loke mi ta sugeriendo no ta fásil. Pero siguidónan di JesuCristo mester ta e ehèmpel pa henter e mundu por sigui. Mi ta supliká ku boso pa hasi tur loke boso por pa para konfliktonan personal ku na e momento aki ta rastrando den boso kurason i den boso bida.

Mi por suprayá e yamada aki ku akshon dor di trese un konsepto dilanti ku resientemente mi a wòrdu rekordá di dje miéntras mi tabata wak un wega di basket.

Den e wega, e promé mitar tabata un bataya balansá, bai i bin. Despues, durante e delaster sinku sekònde di e promé mitar, un defensa di un tim a skor tres punto. Ku solamente un sekònde mas di wega, su kompañero di ekipo a interseptá un pase i a skor nèt na final di e promé mitar. Kermen e ekipo ei a bai nan kamerin ku kuater punto dilanti ku un ola palpabel di impulso. Nan tabata apto pa karga e impulso ei den e di dos mitar i a gana e wega.

impulso ta un konsepto poderoso. Nos tur a eksperensié di un forma òf otro—por ehèmpel, den un vehíkulo ku ta kue velosidat òf ku un desakuerdo ku direpente ta kambia den un diskushon.

E ora ei mi ta puntra, kiko por sende impulso spiritual? Nos por a wak ehèmpelnan di tantu impulso positivo komo negativo. Nos konosé sigiodónan di JesuCristo kende a bira kombertí i a krese den nan fe. Pero tambe nos konosé esnan ku a yega di kere pero ku awor a kai afó. Impulso por bai tur dos banda.

Nunka nos no tabatin mester mas di implulso spiritual positivo ku nos mester awor aki, pa kontrarestá e spit ku kual maldat i señalnan skur di tempu ta intensivándo. Impulso spiritual positivo lo tene nos moviendo bai dilanti meimei di miedu i insertidumbre kreá pa pandemia, sunami, erupshon di volkan, i hostilidat armá. Impulso spiritual por yuda nos resistí atakenan brutal i maligno di e atversario i frustra su esfuerso pa erosioná nos fundamento personal spiritual.

Hopi akshonpor sende e impulso spiritual positivo. Obediensia, amor, humildat, servisio, i gratitut⁴ ta djis algun.

Awe lo mi ke sugerí sinku akshon spesífiko ku nos por tuma pa yuda nos pa mantené impulso spiritual positivo.

Promé: Subi riba e kaminda di kombenio i keda ei.

No masha tempu pasa, mi tabata tin un soño realistiko den kua mi a topa un grupo grandi di hende. Nan a puntra mi hopi pregunta, esun mas frekuente tabata tokante di e kaminda di kombenio i dikon e ta asina importante.

Den mi soño, mi a splika ku nos mester drenta e kaminda di kombenio dor di batisá i hasi nos promé kombenio ku Dios.⁵ Kada biaha ku nos partisipá di e santa sena, nos ta primintí atrobepa tuma e nòmber di e Salbador riba nos, pa kòrd’E, i warda Su mandamentunan.⁶ A kambio , Dios ta sigurá nos ku semper nos por tin e Spiritu di Señor pa ta huntu ku nos.

Despues nos ta hasi kombenionan adishonal den tèmpel, kaminda nos ta risibí promesanan ainda mas grandi. Ordenansanan i kombenionan ta duna nos akseso na poder dibino. E kaminda di kombenio ta e úniko kaminda ku ta kondusí na eksaltashon i bida eterno.

Den mi soño, un hende muhé a puntra mi e ora ei kon un hende ku a kibra su kombenionan por drenta bèk riba e kaminda ei. E kontesta na su e preguntanan ta hiba na mi siguiente sugerensia.

Deskubrí e goso di arepentimentu diario.

Kon importante arepentimentu ta? Alma a siña ku si nos mester “prediká nada mas ku solamente arpentimentu i fe den Señor.”⁷ Arepentimentu ta rekerí di kada persona responsabel ku ta deseá gloria eterno.⁸ No tin eksepshon. Den un revelashon na e Profeta José Smith, Señor a kastigá e promé lidernan di Iglesia pa no siña e evangelio na nan yunan.⁹ Arepentimentu ta e yabi pa progreso. Fe puru ta tene nos moviendo dilanti riba e kaminda di kombenio.

Por fabor no tin miedu di òf demorá arepentimentu. Satanas ta deleitá den bo miseria. Kaba kune. Saka su influensia for di bo bida! Kuminsá awe pa eksperensiá e goso di kita e hòmber natural.¹⁰ E Salbador semper ta stima nos pero spesialmente ora nos arepentí. E ta primintí ku maske “e serunan por wòrdu kitá i e seritunan por sakudí … mi bondat lo no wòrdu kitá for di bo,.”¹¹

Si bo sinti ku bo a kita for di e kaminda di kombenio demasiado largu i no tin manera pa regresá, esei simpelmente no ta bèrdat.¹² Por fabor tuma kontakto ku bo obispu òf presidente di rama. E ta Señor Su representante i lo yuda bo eksperensiá e goso i alivio di arepentimentu.

Awor, un atvertensia: Regresando riba e kaminda di kombenio no ta nifiká ku bida lo ta fásil. E kaminda aki ta rigoroso i tin biaha lo sinti manera un subida difísil.¹³ E aksento, sinembargo, ta diseñá pa tèst i siña nos, pa refiná nos naturalesa, i yuda nos pa bira santunan. Ta e úniko kaminda ku ta hiba na eksaltashon. Un profeta¹⁴ a deskribí e “bendishon i estado felis di esnan ku ta warda e mandamentunan di Dios. Pasó at’akí, nan ta wòrdu bendishoná den tur kos, tantu temporal komo spiritual; si nan keda fiel te na fin nan ta wòrdu risibí den shelu, … [i] di e manera aki nan por biba ku Dios den un estado di felisidat sin fin.”¹⁵

Kanando riba e kaminda di kombenio, huntu ku arepentimentu diario, ta sende nan impulso positivo spiritual .

Mi di tres sugerensia: Siña di Dios i kon E ta obra.

Un di nos desafionan di mas grandi ta distingui entre e bèrdatnan di Dios i e falsifikashonnan di Satanas. Ta p’esei Señor a atvertí nos pa “semper resa, … pa [nos] por konkistá Satanas, i, … skapa di e mannan di e siervonan di Satanas ku ta sigui ku su obra.”¹⁶

Moises a proveé un ekselente ehèmpel di enseñansa pa diserní entre Dios i Satanas. Ora Satanas a bin tent’é, Moises, el a detektá e desepshon pasó el a kaba di tin un interakshon kara kara ku Dios. Moises a realisá lihé ken Satanas ta i a mand’é p’e bai.¹⁷ Ora Satanas a persistí, Moises tabata sa kon pa yama na Dios pa yudansa. Moises a risibí fortalesa dibino i a reprendé esun malu atrobe, “bai for di mi, Satanas, pasó ta solamente e Dios aki lo mi adorá.”¹⁸

Nos mester sigui e ehèmpel ei. Saka Satanas su influensia for di bo bida! Por fabor no siguié den su “ola di miseria i sufrimentu sin fin.”¹⁹

Ku velosidat spantoso, un testimonio ku no ta wòrdu nutrí diario “pa e bon palabra di Dios”²⁰ por kibra na pida. E ora ei, e antídoto pa satanas su plan ta kla: nos mester di eksperensia diario adorando Señor i studiando Su evangelio. Mi ta roga ku boso lo bo ta dispuesto pa laga Dios triunfá den bo bida? Dun’E un parti hustu di bo tempu. Ora bo hasié, tuma nota kiko ta pasa ku bo impulso positivo spiritual.

Sugerensia number 4: Buska i spera milagernan.

Moroni a sigurá nos ku “Dios no a stòp di ta unDios di milager,”²¹ Tur buki di skritura ta demostrá kon dispuesto Señor ta pa intervení den e bidanan di esnan ku ta kere den Dj’E.²² El a parti e Lamana Kòrá pa Moises, yuda Nefi haña e planchanan di bròns, i restorá Su Iglesia dor di e Profeta José Smith. Kada unu di e milagernan aki a tuma tempu i no lo tabata eksaktamente loke e individuonan ei originalmente tabata deseá di Señor.

Di mes manera, Señor lo bendishoná bo ku milagernan dje ku bo ta kere den DjE, “no dudando.”²³ Hasi e obra spiritual pa mira e milagernan. Puntra Dios den orashon pa yuda bo eksperensiá e tipo di fe ei. Mi ta primintí ku bo por eksperensiá pa bo mes ku JesuCristo “a duna poder na esnan ku ta desmayá; i na nan ku no tin forsa e ta oumenta fortalesa,”²⁴ Poko kos lo aselerá bo impulso spiritual mas ku realisando ku Señor ta yudando bo pa move un seru den bo bida.

Sugerensia number 5. Kaba ku konflikto den bo bida personal.

Mi ta ripití mi yamada pa para tur konflikto den bo bida. Ehersé e humildat, kurashi, i fortalesa rekerí tantu pa pordoná i pa buska pordon. E Salbador a primintí ku “si [nos] pordoná hende nan fayonan, [nos] Tata Selestial tambe lo pordoná [nos].”²⁵

Aki dos siman nos lo selebrá Pasku di Resurekshon. Entre awor i e tempu ei, mi ta invitá bo pa buska un fin na un konflikto personal ku ta pisa riba bo. Por tin un akshon di gratitut na JesuCristu ku ta pas mas pa Su ekspiashon? Si pordoná awor ta parse imposibel, roga pa poder dor di e sanger ekspiatorio di JesuCristo pa yuda bo. Ora bo hasié, mi ta primintí bo pas personal i un eksploshon di impulso positivo spiritual.

Ora e Salbador a ekspiá pa henter humanidat, El a habri un kaminda ku esnan ku sigui’E por tin akseso na Su poder ku ta sana, fortalesé i redimí. E privilegionan spiritual ta aksesibel pa tur ku ta buska pa skuch’É i siguiÉ.

Mi kerido rumannan, ku tur e ruego di mi kurason, mi ta urgi boso pa subi riba e kaminda di kombenio i keda einan. Eksperensiá e goso di arepentimentu diario. Siña tokante Dios i kon E ta traha. Buska i spera milagernan. Lucha pa para tur konflikto den bo bida.

Ora bo aktuá riba e metanan aki, mi ta primintí boso e abilidat pa move bai dilanti riba e kaminda di kombenio ku un impulso kresiente no opstante kualkier opstakulo ku bo enfrentá. I mi ta primintí boso mayor fortalesa pa resistí tentashon, mas pas na mente, libertat di miedu, i mayor unidat den boso famia.

Dios ta biba! Jesus ta e Cristu! E ta bibu! E ta stima nos i lo yuda nos. Di esaki mi ta testifiká den e nòmber sagrado di nos Redentor, JesuCristo, amèn.