ልባችን ሁሉንም ተሰማው

በሽማግሌ ዲይተር ኤፍ. ኡክዶርፍ

የአስራ ሁለቱ ሐዋርያት ጉባኤ አባል

አዳኝ ወደ ሰማይ እንዲያነሳን ከፈለግን፣ ለእርሱ እና ለወንጌሉ ያለን ቁርጠኝነት ተራ ወይም አልፎ አልፎ ሊሆን አይችልም።

ለእርሱ መስዋት

ኢየሱስ ክርስቶስ ለእኛ ሲል ህይወቱን ከመሰጠቱ ጥቂት ቀናት በፊት በኢየሩሳሌም በሚገኘው ቤተመቅደስ ውስጥ ሰዎች ለቤተመቅደሱ ግምጃ ቤት ልገሳ ሲሰጡ ይመለከት ነበር። “ብዙ ባለ ጠጎች ብዙ ይጥሉ ነበር፣” በኋላ ግን አንዲት ድሀ መበለት መጣችና “ሁለት ሳንቲም ጣለች።” በጣም ትንሽ መጠን ነበር፣ ለመመዝገብም የሚያስቆጭ አልነበረም።

ምስል

አንዲት መበለት ሁለት ናስ ስትሰጥ

ሆኖም ይህ የማይረባ የሚመስለው ልገሳ የአዳኝን ትኩረት ስቧል። እንዲሁም፣ ይህ በጥልቅ አስገርሞት፣ “ደቀ-መዛሙርቱን ጠርቶ እንዲህ አላቸው-በእውነት እላችኋለሁ በሳጥኑ ውስጥ ገንዘብ ከጨመሩት ሰዎች ሁሉ አብልጣ የሰጠች ይህች ድሃ መበለት ናት-

“ምክንያቱም ሌሎቹ ሁሉ የሰጡት ካላቸው ሃብት የተረፋቸውን ነው እርስዋ ግን ድሃ ሆና ሳለች ምንም ሳታስቀር ያላትን ሁሉ ሰጠች።“¹

በዚህ ቀላል ምልከታ፣ አዳኝ መስዋዕቶች በመንግስቱ እንዴት እንደሚለኩ አስተምሮናል—እናም ነገሮችን በተለምዶ ከምንለካበት መንገድ በጣም የተለየ ነው። ለጌታ፣ የልገሳው ዋጋ የሚለካው በግምጃ ቤቱ ላይ ባሳደረው ተጽእኖ ሳይሆን በለጋሹ ልብ ላይ ባሳደረው ተጽእኖ ነው።

ይህችን ታማኝ መበለት በማወደስ፣ አዳኝ በብዙ አገላለጾች ውስጥ የእኛን ደቀመዝሙርነት የምንለካበት መለኪያ ሰጠን። ኢየሱስ የእኛ መስዋዕት ትልቅ ወይም ትንሽ ሊሆን እንደሚችል፣ ነገር ግን በማንኛውም መንገድ በልባችን በሙሉ የተሰጠ መሆን እንዳለበት አስተምሯል።

ይህ መርህ በመጽሐፈ ሞርሞን ነቢይ አማሌቅ ልመና ውስጥ ተስተጋብቷል፦ “የእስራኤል ቅዱስ ወደ ሆነው ክርስቶስ [ኑና]፣ የማዳኑን ኃይል [ተካፈሉና]፣ የቤዛነቱን ኃይል [አግኙ]። አዎን፣ ወደ እርሱ ኑ፣ እናም መላ ነፍሳችሁን ለእርሱ እንደ መስዋዕትነት አቅርቡ።”²

ግን ይሄ እንዴት ሊሆን ይችላል? ለብዙዎቻችን፣ እንዲህ ዓይነቱ የሙሉ ነፍስ ቁርጠኝነት ደረጃ የማይደረስ ይመስላል። እኛ ቀድሞውኑ የምናደርገው ይበዛብናል። ነፍሳችንን በሙሉ ለጌታ ለማቅረብ ከምኞት ጋር ብዙ የህይወት ፍላጎቶችን እንዴት ማመጣጠን እንችላለን?

ምናልባት የእኛ ፈተና ሚዛን ማለት ጊዜያችንን በተወዳዳሪ ፍላጎቶች መካከል እኩል ማካፈል ነው ብለን ማሰብ ነው። በዚህ መንገድ ከተመለከትን፣ ከኢየሱስ ክርስቶስ ጋር ያለን ቁርጠኝነት ልናደርጋቸው ከሚገቡት ከተጨናነቀው ፕሮግራማችን ጋር የምናስማማው ብዙ ነገሮች አንዱ ነው። ግን ምናልባት ሌላ የሚታይበት መንገድ አለ።

ሚዛን፦ ልክ እንደ ብስክሌት መንዳት

እኔና ባለቤቴ ሃሪየት አብረን ብስክሌት መንዳት እንወዳለን። አብሮ ጊዜ በማሳለፍ አንዳንድ የአካል ብቃት እንቅስቃሴዎችን ለማድረግ ጥሩ መንገድ ነው። በምንነዳበት ጊዜ፣ እና በጣም በማላስለከልክበት ሰዓት፣ በዙሪያችን ባለው ውብ ዓለም ደስ ይለናል እና አልፎ ተርፎም አስደሳች ውይይት እናደርጋለን። በብስክሌቶቻችን ላይ ሚዛናችንን ለመጠበቅ ብዙ ትኩረት መስጠት ያለብን አልፎ አልፎ ነው። አሁን ለበቂ ጊዜ እየነዳን ስለነበርን ስለዚያ እንኳን አናስብም—ለእኛ የተለመደ እና ተፈጥሯዊ ሆኗል።

ነገር ግን አንድ ሰው ለመጀመሪያ ጊዜ ብስክሌት መንዳት ሲማር በተመለከትኩበት ጊዜ፣ በእነዚህ ሁለት ጠባብ ጎማዎች ላይ እራስን ማመዛዘን ቀላል እንዳልሆነ አስታውሳለሁ። ይህ ጊዜ ይወስዳል፡፡ ልምምድ ያስፈልገዋል። ትዕግስት ያስፈልገዋል። አንድ ወይም ሁለት ጊዜ እንኳን መውደቅን ይጠይቃል።

ከሁሉም በላይ፣ በብስክሌት ላይ ሚዛንን ለመጠበቅ የተሳካላቸው እነዚህን ጠቃሚ ምክር ይማራሉ፦

እግራችሁን አትመልከቱ።

ወደፊት ተመልከቱ።

ዓይናችሁን ከፊትህ ባለው መንገድ ላይ አድርጉ። መድረሻችሁ ላይ አተኩሩ። እና ፔዳሉን ግፉ። ሚዛናዊ መሆን ሁል ጊዜም ወደ ፊት መሄድ ነው።

የኢየሱስ ክርስቶስ ደቀ መዛሙርት ሆነን በህይወታችን ውስጥ ሚዛናዊነትን ለማግኘት ስንመጣ ተመሳሳይ መርሆዎች ይሠራሉ። ጊዜአችሁን እና ጉልበታችሁን ከብዙ ጠቃሚ ስራዎቻችሁ መካከል ማከፋፈል ከሰው ወደ ሰው እና ከአንድ የህይወት ወቅት ወደ ሌላ ይለያያል። የእኛ የጋራ፣ አጠቃላይ ዓላማ የጌታችንን የኢየሱስ ክርስቶስን መንገድ መከተል እና ወደ የሰማይ አባታችን መገኘት መመለስ ነው። እኛ ማንም ብንሆን እና በህይወታችን ውስጥ እየሆነ ያለው ምንም ቢሆን፣ ይህ አላማ ቋሚ እና ወጥነት ያለው መሆን አለበት።³

ማንሳት፡ ልክ እንደ አውሮፕላን መብረር

አሁን፣ ብርቱ የብስክሌት ነጂዎች ለሆኑት፣ ደቀመዝሙርነትን .ከብስክሌት መንዳት ጋር ማነፃፀር ጠቃሚ ምሳሌ ሊሆን ይችላል። ላልሆኑትም አትጨነቁ። ሁሉም ወንድ፣ ሴት እና ልጅ ይህን ሊረዱበት እንደሚችሉ እርግጠኛ የምሆንበት ሌላ ምሳሌ አለኝ ነኝ፣።

ደቀመዝሙርነት፣ ልክ እንደ አብዛኞቹ የህይወት ነገሮች፣ አውሮፕላን ከመብረር ጋር ሊመሳሰል ይችላል።

አንድ ግዙፍ የመንገደኞች አውሮፕላን ከመሬት ወጥቶ መብረር መቻሉ ምን ያህል አስደናቂ እንደሆነ አስባችሁ ታውቃላችሁን? እነዚህ የበረራ ማሽኖች ውቅያኖሶችን እና አህጉራትን አቋርጠው በሰማይ ላይ በሚያምር ሁኔታ እንዲበሩ ያደረገው ምንድን ነው?

በቀላል አነጋገር፣ አውሮፕላን የሚበረው አየር በክንፉ ላይ ሲንቀሳቀስ ብቻ ነው። ያ እንቅስቃሴ ለአውሮፕላኑ መነሳት የሚሰጠውን የአየር ግፊት ልዩነት ይፈጥራል። እና ማንሳትን ለመፍጠር በቂ አየር በክንፎች ላይ እንዴት እንዲንቀሳቀስ ማድረግ ትችላላችሁ? መልሱ ግፋት ነው።

አውሮፕላኑ በመሮጫው መንገድ ላይ ተቀምጦ ከፍታ አያገኝም። ነፋሻማ በሆነ ቀን እንኳን፣ አውሮፕላኑ ወደ ፊት እስካልሄደ ድረስ በቂ ግፊት አይፈጠርም ወደ ኋላ የሚይዘውን ኃይሎች የሚቃረን በቂ መንደርደር ከሌለ።

ወደፊት የሚገፋ ፍጥነት ብስክሌት ሚዛኑን የጠበቀ እና ቀና እንደሚያደርገው ሁሉ፣ ወደ ፊት መሄድ አውሮፕላን የስበት ኃይልን እና መጎተትን ለማሸነፍ ይረዳል።

የኢየሱስ ክርስቶስ ደቀ መዛሙርት እንደመሆናችን መጠን ይህ ለእኛ ምን ትርጉም አለው? ይህም ማለት በህይወታችን ውስጥ ሚዛን ለማግኘት ከፈለግን፣ እና አዳኝ ወደ ሰማይ እንዲያነሳን ከፈለግን፣ ለእርሱ እና ለወንጌሉ ያለን ቁርጠኝነት ተራ ወይም አልፎ አልፎ ሊሆን አይችልም። በኢየሩሳሌም እንዳለችው መበለት እኛም ነፍሳችንን ሁሉ ለእርሱ መስጠት አለብን። የእኛ መስዋዕት ትንሽ ሊሆን ይችላል፣ ነገር ግን ከልባችን እና ከነፍሳችን መምጣት አለበት።

የኢየሱስ ክርስቶስ ደቀመዛሙርትነት ከምናደርጋቸው ነገሮች መካከል አንዱ አይደለም። አዳኙ የምናደርገውን ሁሉ እንዲደረግ የሚያነሳሳው ሀይል ነው። እርሱም በጉዞአችን ለማረፍ የምንቆምበት አይደለም። እሱ የእይታ ስፍራ ወይም ዋና የምድር ምልክት አይደለም። እርሱ “መንገድና እውነት ህይወትም [ነው]፤ [በኢየሱስ ክርስቶስ] በቀር” ወደ አብ የሚመጣ የለም።”⁴ መንገዱ እና የመጨረሻው መድረሻ ያ ነው።

ሚዛን እና ማንሳት የሚመጣው እኛም “ፍጹም የሆነ የተስፋ ብርሃን፣ እናም የእግዚአብሔርና የሰዎች ሁሉ ፍቅር [እየኖረን] በክርስቶስ [ባለን] ፅኑነት መቀጠል” ነው።⁵

መስዋዕት እና ቅድስና

እና ህይወታችንን በጣም የተጠመዱ ስለሚያደርጉት ብዙ ተግባራት እና ኃላፊነቶችስ? ከምትወዳቸው ሰዎች ጋር ጊዜ ማሳለፍ፣ ትምህርት ቤት መሄድ ወይም ለሙያ መዘጋጀት፣ ገቢ ማግኘት፣ ቤተሰብን መንከባከብ፣ በማህበረሰቡ ውስጥ ማገልገል—ይህ ሁሉ የሚስማማው የት ነው? አዳኙ በድጋሚ ያረጋግጥልናል፦

“የሰማይ አባታችሁ እነዚህን ነገሮች በሙሉ እንደምትፈልጉ ያውቃል።

“ነገር ግን በመጀመሪያ የእግዚአብሔርን መንግስትና ፅድቁን ፈልጉ፣ እናም እነዚህ ነገሮች በሙሉ ይጨመሩላችኋል።”⁶

ነገር ግን ይህ ቀላል ይሆናል ማለት አይደለም።⁷ ይህም መስዋዕት እና ቅድስና ያስፈልገዋል።

አንዳንድ ነገሮችን መልቀቅ እና ሌሎች ነገሮች እንዲያድጉ ማድረግን ይጠይቃል።

መስዋዕት እና ቅድስና በቅዱስ ቤተመቅደስ ውስጥ ልንገዛቸው ቃል የገባናቸው ሁለት ሰማያዊ ህጎች ናቸው። እነዚህ ሁለት ህጎች ተመሳሳይ ናቸው ነገር ግን አንድ አይነት አይደሉም መስዋእት ማለት ነገርን የበለጠ ዋጋ ላለው ነገር መተው ማለት ነው። በጥንት ጊዜ የአምላክ ህዝቦች ለሚመጣው መሲህ ክብር ሲሉ የመንጋቸውን በኵሮች መሥዋዕት አድርገው ነበር። በታሪክ ውስጥ፣ ታማኝ ቅዱሳን የግል ምኞቶችን፣ ምቾቶችን እና ህይወታቸውን እንኳን ለአዳኝ መስዋዕት አድርገዋል።

ኢየሱስ ክርስቶስን በፍፁም ለመከተል ሁላችንም መስዋዕት የምናደርጋቸው ትልቅም ትንሽም ነገሮች አሉን።⁸ የእኛ መስዋዕትነት ዋጋ የምንሰጠውን ያሳያል። መሥዋዕቶች በጌታ የተቀደሱ እና የተከበሩ ናቸው።⁹

ቅድስና ከመስዋዕት በአንድ አስፈላጊ ነገር ልዩ ነው። አንድን ነገር ስንቀድስ በመሠዊያው ላይ እንዲቃጠል አንተወውም። ከዚህ ይልቅ ለጌታ አገልግሎት እንጠቀምበታለን። ለእርሱ እና ለቅዱስ ዓላማዎቹ በመቀደስ እንሰጣለን።¹⁰ ጌታ የሰጠንን ችሎታዎች እንቀበላለን እናም በጌታ መንግስት ውስጥ ጠቃሚ ለመሆን የበለጠ ለማሳደግ እንጥራለን።¹¹

በጣም ጥቂቶቻችን ህይወታችንን ለአዳኝ በመስዋዕትነት እንድንሰጥ እንጠየቃለን። ነገር ግን ሁላችንም ህይወታችንን ለእርሱ እንድንቀድስ ተጋብዘናል።

አንድ ስራ፣ አንድ ደስታ፣ አንድ አላማ

ህይወታችንን ለማንጻት ስንፈልግ እና በሁሉም ሃሳቦች ወደ ክርስቶስ ስንመለከት፣¹² የተቀረው ነገር ሁሉ መስተካከል ይጀምራል። ህይወት ከአሁን በኋላ በደካማ ሚዛን የተያዙ ረጅም የተናጠል ጥረቶች ዝርዝር መስሎ አይሰማትም።

ከጊዜ በኋላ፣ ይህም ሁሉ አንድ ስራ ይሆናል።

አንድ ደስታ።

አንድ ቅዱስ አላማ።

ይህም እግዚአብሔርን የማፍቀር እና የማገለገል ስራ ነው። የእግዚአብሔርን ልጆች የማፍቀር እና የማገለገል ስራ ነው።¹³

ህይወታችንን ስንመለከት እና የምንሰራቸውን መቶ ነገሮች ስናይ፣ እንጨነቃለን። አንድ ነገር ስናይ፣ እንዲሁም በመቶ የተለያዩ መንገዶች እግዚአብሔርን እና ልጆቹን መውደድ እና ማገልገል፣ ያኔ በደስታ በእነዚያ ነገሮች ላይ መስራት እንችላለን።

ነፍሳችንን ሁሉ የምናቀርበው በዚህ መንገድ ነው—የሚከለክለንን ማንኛውንም ነገር በመሰዋት እና የቀረውን ለጌታ እና ለዓላማዎቹ በመቀደስ።

የማበረታቻ ቃል እና ምስክርነት

ውድ ወንድሞች እና እህቶች እንዲሁም ውድ ጓደኞቼ፣ ተጨማሪ ለማድረግ ይእምትመኙበት ጊዜ ይኖራል። የሰማይ አፍቃሪ አባታችሁ ልባችሁን ያውቃል። ልባችሁ ማድረግ የሚፈልገውን ሁሉ ማድረግ እንደማትችሉ ያውቃል። ግን እግዚአብሔርን መውደድ እና ማገልገል ትችላላችሁ። የእርሱን ትዕዛዛት ለመጠበቅ የተቻላችሁን ማድረግ ትችላላችሁ። የእሱን ልጆች መውደድ እና ማገልገል ትችላላችሁ። እና ጥረታችሁ ልባችሁን እያጠራ እና ለተከበረ ወደፊት እያዘጋጃችሁ ነው።

በቤተመቅደሱ ግምጃ ቤት ያለችው መበለት የተረዳችው ይህን ይመስላል። እሷ የምታቀርበው መስዋዕት የእስራኤልን ሀብት እንደማይለውጥ በእርግጥም ታውቃለች፣ ነገር ግን ይህ እሷን ሊለውጣት እና ሊባርክ ይችላል፣ ምክንያቱም ትንሽ ቢሆንም፣ ይህም እርሷ ያላት ሁሉ ነበር።

እንግዲያው፣ ውድ ጓደኞቼና የተወደዳችሁ የኢየሱስ ክርስቶስ ደቀ መዛሙርት፣ “በመልካም ሥራ አንታክት ምክንያቱም እኛ ታላቅ ሥራን መሠረት እየጣልን ነን።” ከትንንሽ ነገሮቻችንም “ታላቅ የሆነው” ይወጣል።¹⁴

ኢየሱስ ክርስቶስ መምህራችን፣ ቤዛችን እና ወደ ሰማይ ወዳለው አባታችን የምንመለስበት አንድ እና ብቸኛው መንገድ እንደሆነ ስመሰክር፣ ይህ እውነት መሆኑን እመሰክራለሁ። በተቀደሰው በእየሱስ ክርስቶስ ስም አሜን፡፡