Tokanikai man Kangaangan te Aonaaba ao Karekean te Rau
Kunea te rau man tinebun, aki kakoauaan, ao karawawataan te maiu aei man tokanikaimi aon kangaangan te aonaaba rinanon am berita ae tabu ma te Atua.
Tariu ao mwaaneu aika kam tangiraki, I rangi ni kukurei ni kamauri ngkami n te ingabong n Tabati ae tamaroa aei. Kam teimatoa ni memena n au iango. I mimi n aromi ni waekoa ni karaoa te mwakuri n te tai are kam nooriia raomi bwa a kainnanoa te ibuobuoki. I mimii n ami onimaki ao kakoaua ake kam kammwakuria n taai nako. I rawaawata n rootakin nanomi, aki kukureimi, ao raraomamii. I tangiri ngkami. I kakoaua nakoimi bwa Tamara are i Karawa ao Natina ae Tangiria, Iesu Kristo, a tangiri ngkami naba. A ataa raoi te bwai ae kam rinanona, raoiroimi, kainnanomi, ao ami tataro ibukin te ibuobuoki. N taainako, I tataro ibukimi bwa kam na namakina Aia tangira ibukimi.
E rangi ni kakaawaki namakinan Aia tangira, ngkai ti a namakinna bwa ti a kairaki ni katoa bong n rongorongo aika karawawata. A na iai boong ae ko ti tangiria ni katinanikui kangaanga n te aonaaba, ni kauangiiko, ao ni butiia temanna bwa e na kautiko ngkana a toki angibuakan nako te maiu aei.
Ma, tariu ao mwaaneu aika a tangiraki, a bati bwaai aika a kamimi i mwaira. Ni boong aika imwaira, ti na noori korakoran bwaai aika a na riki man mwaakan te Tia Kamaiu are e tuai nonoria te aonaaba. Ma ngkai ni kakoroa te tai are E na oki “ma te mwaaka ao te mimitong ae korakora,”1 , E na kabaroa ana akoi, kakabwaia, ao kakai nakoia ake a onimaki.
Ma, n te tai aei ti maeka moa inanon taai ni kangaanga n rongorongon te aonaaba. N taai ni kangaanga aikai ao rawaawata a karekea nakoia aomata namakinan te bwaranano ao te kua. E ngae n anne, iangoa te taneiai ae e a tibwa riki ae e kamataata raoi bwa ko na kanga ngkoe ao Ngai ni karekea te rau.
I nanon tain kaukan neweabaan te Tembora i Washington D.C, temanna te komete ibukin kaukan te neweaba e ongo te kakarabakau ae karekea te atatai ae nano ngke e kairiia tabeman taan kareke rongorongo nako nanon te tembora. Iai teuana te utu ma natiia aika a uarereke a iira naba te neweaba aio. Temanna te tia kareke rongorongo e reitinako ana titiraki iaon “te mwananga” irouia naake a rin nman te ruu teuana nakon te ruu teuana n te tembora. E kan ataia ngkana te mwananga n te tembora kanga te kanikinaa ibukin kangaanga n ana borau te aomata inanon maiuna.
E rangi ni kakauongo n te marooro te ataeinimwane are n te utu. Ngke e a roko te neweaba n ruun te entaumente, e kotea te baonikarea te ataeinimwaane, te tabo are a katorobubua iai aomata ni karaoi berita aika tabu ma te Atua, ao e taku, “Iaa, ai tikiraoira . Aio te tabo ibukiia aomata n motirawa n aia tai ni mwananga n te tembora.”
I aki ataia ngkana te ataeinimwaane e ataa kakawakin te bwai are e tibwaia. Bon akea n ana iango iaon te reitaki ae onoti n karaoan te berita ae tabu ma te Atua n te tembora ao ana berita te tia Kamaiu ae kamiimi:
“Bane mai nako Iu, ngkami akana kam kua ao kam rawawata, ao na motiki rawami.
“Amoa amou iaomi, ao reirei i Rou; … ao e na reke iroumi iai motikan rawan tamneimi.
“Ba e aoraoi amou, ao e bebetee uotau.”2
Tariu ao mwaneu aika kam tangiraki, I rotaki ibukiia ake a kitana te Ekaretia ibukina a namakinna bwa kainakin te ekaretia e rangi ni katabetabe ibukiia. A tuai kunea raoi bwa karaoan ao kawakinan berita aika a tabu e na kabebetea maiuia! Te aomata are e karaoa ana berita aika tabu n nein te tabo ni bwabetito ao n te tembora—ao ni kawakinii—e karikirakea karekean mwaakan Iesu Kristo. Taiaoka ma iangoia inanom te koaua are e kamiimi anne!
Te kaniwanga ibukin kawakinan berita ma te Atua bon te mwaaka mai karawa—mwaaka are e kakorakoraira ni kaitarai ara kangaanga nako, kariiri, ao kanakoraoi kainanon nanora. Te mwaaka aio e karokoira ni kawaira. Te koraki ake a kawakin Ana tua Iesu Kristo aika a korakora a karekea Mwaakana ae korakora riki. Ngaia are, naake a kawakin berita a na karekea okoron motikan rawaia are e roko nakoia rinnaon reitakiia n aia berita ae tabu imarenaia ma te Atua.
Imwaain are e anga Rabwatana te Tia Kamaiu nakon te rawawata ae korakora i Keketemwane ao i Korokota, E taekinna nakoia Ana Abotoro, “I aon te aba te rawawata: ma kam na kabebetei nanomi I a tia ni kataea ana kai te aba.”3 Imwiin rikin arei, E butiira n tatabemaniira Iesu bwa ti na karaoa aekan anne ngke E kangai, “I tangiria bwa kam na tokanikai iaon te aba.”4
Tariu ao mwaneu, au rongorongo nakomin te bong aei bwa ibukina ngkai Iesu Kristo e tokanikai imwiin te bwaka ao ibukina ngkai E kamaiura ni kabane, ko kona naba ngkoe n tokanikai n te aonaaba ae onrake-bure, aomata ae a bon tabe irouia, ao ni kakua.
Ibukina bwa te tia Kamaiu, rinanon Ana Mwakuri ni Kamaiu ae akea tokina, e kaboira ni kabane man mamaraara, kairua, ao ara bure, ao ibukina ngkai E rinanon maraki ni kabane, raraoma, ao karawawata ake a reke iroum,5 ngkanne, ngkai ko raira raoi nanom ao ni karekea Ana buoka, ko kona n tokanikai man kangangan nako te aonaaba.
Ko kona n tokanikai ni maiun tamneim ao am iango ma aorakin te aonaba, ni irianaki ma te kainikatonga, kamoamoa, te un, buakaka, kairiribai, mataai bwai, bakantang, ao te maaku. Ngkai tia otabwaniniaki ni koaua aika a kairua, ko konaa ni kunea raoi te motirawa—nanona te bebete ao te rau—ibuakon korakoran am kangaanga aika a kona ni karika te raraoma.
Kakawakin koaua aikai anga teniua titiraki aika a kakawaki:
Te Moan, tera ae nanonaki n tokanikai man kangaangan te aonaaba?
Te Kauoua, ti na kanga ni karaoia?
Ao te kateniua, e kanga te tokanikai man kangaanga te aonaaba ni kakabwaiai maiura?
Tera ae nanonaki n tokanikai man kangaangan te aonaaba? E nanonaki bwa te tokanikai man te kaririaki n mataiakinan riki bwain te aonaaba aei nakon riki ana bwai te Atua. E nanonaki bwa onimakinan riki ana reirei Kristo nakon aia koaua aomata. E nanonaki bwa te kukurei n te koaua, ni kaitaraa te mwamwanaaki, ao n riki bwa “taan iriira Kristo aika nanorinano.”6 E nanonaki bwa katokan karaoan bwaai ake ana kararoaa te Tamnei ae Raoiroi. E nanonaki bwa te kukurei n “anganako” ao ni katokii karaoan buure ake ti taneiai iai.7
Ma, te tokanikai iaon te aonaaba e aki nanonaki bwa te riki ni kororaoi n te maiu aei, ke tao a nang bua am kaanganga n te aro ae kamiimi—bwa bukina ae a bon aki kona. Ao tiaki naba nanona bwa ko nang aki manga kona ni karaoa te kairua. Ma ae nanonaki bwa te tokanikai iaon te aonaaba ena kakorakoraa riki arom n totokoa te kairua. E na bebete nanom ngkai am onimaki iroun Iesu Kristo e tabe ni korakora.8 E nanonaki bwa te tokanikai iaon te aonaaba bon te rikirake n tangiran te Atua ma Natina nakon riki tangiran temanna ke bwaai riki tabeua.
Ao, tina kangaa ngkanne n tokanikai man kangaangan te aonaaba? E tuangiira arona te Uea Beniamina. E taku bwa “ana kairiribai te Atua te aomata, ao e na teimatoa n aki toki “ni karokoa ae e kakauongo nakon ana wirikiriki te Tamnei ae Tabu, ao e kakorakora nakon te aro n aomata ao n riki bwa ae itiaki rinanon ana mwakuri ni kamaiu Kristo te Uea.”9 Ni katoa tai ngkana ko ukora ao n irii ana kairiiri te Tamnei, ni katoa tai ae ko karaoa te bwai ae tamaroa—bwaai ake e aki kona ni karaoi “te aomata n rabwata”— ko a tokanikai ngkanne iaon te aonaaba.
Te tokanikai man kangaangan te aonaaba tiaki te bwai ae riki n te bongina ke uabong. E ririki inanon maiura ngkana ti teimatoa ni irii ana reirei Kristo. Ti ribanaa ara onimaki iroun Iesu Kristo man ara rairan nano ni katoa bong ao ni kawakin ara berita ake anganiira te mwaaka. Ti teimatoa n nakonako inanon kawain ara berita ao ni kakabwaiaaki ma korakoran tamneira, ma kaotioti aika onoti, ao kakorakorakin ara onimaki, ma aia mwakuri n ibuobuoki anera. Maiuakinan ana reirei Kristo e kona ni karika te kabanea ni korakora n namakin ae teimtoa, are ena anganiira kakorakorakin tamneira inanon maiura.10
Ngkai ti keiaki ni maiuakina ana tua Iesu Kristo aika rietaata, a tabe ni bitaki nanora ma aron tein maiura. E utiira rake te Tia Kamaiu iaon ana katikitiki te aonaaba ni kakabwaiaira ma te tangira ae kororaoi, te nanorinano, ataitai aomata, ta nanoanga, kairan aron maiura, te rau, ao te motirawa.
Ngkai, kona taku n am iango bwa te mwakuri ibukin tamneira e kaanganga arona nakon are te motirawa. Ma aio raoi te koaua ni koaua: Ngkai te aonaaba e kairooro bwa te mwaaka, te bwaibwai, kinaakira, ma kakukurein te rabwata anganiira te kukurei, ma a bon aki! A aki kona! Te bwai ae a kona ni karaoia bon te akea ma tii te bwangabwanga are e onea mwiin “te kakabwaia ma te aro ni kukurei irouia [naake] a kaawakin ana tua te Atua.”11
Te koaua bwa e rangi kakua riki ukoran te kukurei n taabo ake aki kona ni kuneaki iai! Ma e ngae n anne, ao ngkana ko kanimko ma Iesu Kristo ao ni karaoi mwakuri ni maiun tamneim ake a kainanoaki bwa ko aonga n tokanikai iaon te aonaaba, bon tii Ngaia n akea riki, ae iai irouna te mwaaka n eutikorake man te aonaaba aei.
Ma e na kanga ngkanne, ara tokanikai iaon te aonaaba n kakabwaiaira? E rangi ni mataata rekena: Rinnakora inanon te berita imarenara ma te Atua e kabaeira ma Ngaia n te aro ae ena kabebetei bwaai ni kabane ni maiura. Taiaoaka bwa ko na ota raoi: I aki taku bwa karaoan ara berita e na kabebetea maiura. Ni bon arona, kantaninga te kakaitara, ibukina bwa e aki tangiriko teuare buakaka bwa kona ataa mwaakan Iesu Kristo. Ma e nanonaki bwa kabaem ma te Tia Kamaiu e anganiko te kawai nakon Ana korakora ao mwaakana ni kamaiu.
Na kaoka teuana te reirei ae nano mai iroun Beretitenti Ezra Taft Benson: “Mwaane ao Aine ake aanga maiuia nakon te Atua ana kunea ae E kona ni karaoa ae mwaiti riki inanon maiuiia nakon are a kona ngaia ni karaoia. E na kakorakorai kukureia, e na karababai aia taratara, kaotai aia iango, … tabekirake tamneia, kabatiai aia kakabwaia, karikirakea aia tai, karau tamneia, kabatiai raoraoia, ao anga te rau nakoia aomata.”12
A tii reke tibwanga aika akea kabotauaia aikai nakoia ake ukora te ibuobuoki mai karawa ni buokiia ni karekea te tokanikai iaon te aonaaba aei. Ni karekean aei, I reitai ma membwa ni kabutaa te Ekaretia n te bubuti are I anga nakoia kairake ni ikawai n Meei ae nako. I kaumakia ngkoa—ao I bubuti nakoimi ngkai—n tararuaa oin am kakoaua iroun Iesu Kristo ao Ana Euangkerio. Mwakuriia. Nabeia bwa e aonga n rikirake. Boutokaa koauana. Tai kabaerekaa n aia aki kakoaua mwaane ao aine. Ngkai ko reitinako ni kamatoaan am koaua iroun Iesu Kristo bwa am moanibwai, taratarai kakai ake a na riki inanon maium.13
Au bubuti nakoimi n te ingabong aei bwa kam na kunea te rau man korakoran, ana aki koaua, ao te karawawata te maiu aei man tokanikaim iaon te aonaaba rinanon am berita ae tabu ma te Atua. Kaotia Nakoina rinanon am tataro ao am mwakuri bwa ko bon nanonna bwa ko na tokanikai iaon kangaangan te aonaaba. Butiia bwa e na kaotaa am iango ao ni karekea te buoka are ko kainanoia. Korei am iango ake a roko nakoim ngkai ko tataro, ngkanne karaoa nanona. Kabanea riki am tai n te tembora, ao ukora otam bwa e kanga te tembora n reiakiniko bwa kam na tokanikai iaon kangaanga n te aonaaba.14
N aron ae I a tia n taekinna mai imwaaina, ikoikotaia Iteraera bon te kabanea ni kakawaki ni mwakuri ae waakinaki n te bong aei iaon te aba. Teuana kakawakin te ikoikotaki aei bon katauraoaia aomata ake a kona, a tau ni butimwaea te Uea ngkana E a manga roko, aomata ake a tia n rinea Iesu Kristo nakon te aonaaba ae e a tia n roko iai te bure, aomata ake a kakatonga n aia rinerine ni maeka ma tuua ake a rietata, ake mairoun Iesu.
I bubuti nakoimi, tariu ao mwaneu aika kam tangiraki, riiki bwa aomata aika raoiroi. Ururinga ao karinea ami berita ae tabu iaon bwaai ni kabane. Ngkai ko kariaia te Atua n tautaekana maium, I berita nakoimi te rau ae korakora, te onimaki iroum, kimwareirei, ao eng te, rau.
Ma mwaakan te nakoa n abotoro ae tabu ae reke irou, I kakabwai ngkami n ukeran te tokanikai iaon te maiu aei. I kakabwaiai ngkami bwa e na korakora am onimaki iroun Iesu Kristo ao n reiakinna riki bwa ko na kabonganaa mwaakana. I kakabwaiai ngkami bwa kam na ataa te koaua man te kaairua. I kakabwaiai ngkami bwa kam na tabe riki ma ana bwaai te Atua nakon bwain te aonaaba. I kakabwaiai ngkami bwa kam na noori kainanoia ake i rarikimi ao kakorakoraia ake kam tangiria. Ibukina bwa e tokanikai iaon te aonaaba aei Iesu Kristo, ko konaa naba ngke. I kakoaua n aran Iesu Kristo ae tabu, amen.