Hoê tamarii e hoê pĭpĭ
Ua tiʻaturi te Fatu i Taʼna mau pĭpĭ. E faahaere mai Oia i te feia i ineine i Taʼna ra mau tavini o tei faaineinehia.
Ua tuuhia tatou paatoa i raro aʻe i te fafauraa o te bapetizoraa e ua fafau tatou ia faaite i te evanelia ia vetahi ê.1 I te tahi taime, e roaa te taia ia ore e tauʻahia mai e aore râ, e roaa te inoino no te faataupupuraa o te ore roa e nehenehe ía ‘aro atu. E mea ohie râ na te tahi mau melo ia haaparari i taua patura. Ua hiʻopoʻa noa vau ia ratou i roto i toʻu mau tere. E mai te mea ra e te ite atu nei au i te tahi o ratou i teie nei.
E mahana haereraa matete te Mahana Maa no to te ao atoa nei. I te fenua Afirika i Ghana, i Equateur, e i te mau Motu no Philipino, e rave rahi feia o te afaʻi atu i ta ratou mau maa e ta ratou mau taoʻa rima î no te hoo i roto i te oire. E paraparau ratou i te feia o ta ratou e farerei nei i niʻa i te puromu. E farerei atoa ratou i te feia hoo tapiri ia ratou a tiaʻi noaʼtu ai i te mau taata e haere mai e tii i te maa. Te rahiraa o te parau, no niʻa ihoa ïa i te mau ‘aroraa o te oraraa, e i te imiraa i te mau raveʻa ia upootiʻa i te veve e i te tahi taime, no niʻa i te ati.
Te itehia nei te Feia Moʻa i te Mau Mahana Hopea Nei i rotopu i te mau taata i niʻa i te mau puromu e i te matete. Hoê â ta ratou parau e te mau parau i mataro-noa-hia i te mau vahi atoa o te ao nei. « No hea mai oe ? » « Ta oe tamaiti teie ? » « Ehea rahiraa tamarii ta oe ? » Area râ, e mea huru- ê-rii te Feia Moʻa. E itehia te taaê-raa i roto i to ratou mata e i roto i ta ratou mau parau. E faaroo maitai ratou mai te hoê taata o te tauʻa atu i te mau pahonoraa o te mau uiraa e i te taata hoʻi e parau mai nei.
Ia maoroʻtu te aparauraa, e faahohonu roaʼtu ïa raua i te mau mea o ta raua e tauʻaparau nei. E paraparau ïa raua no niʻa i te mau mea o ta raua e tiʻaturi nei e o te hopoi mai i te oaoa e i te oto. E e taui roaʼtu ta raua tauʻaraa parau i te mau mea o ta raua e tiaʻi ra no teie oraraa e no te oraraa a muri atu. E pahono te Feia Moʻa na roto i te ite papu. I te tahi mau taime, eiaha râ pauroa te taime, e uihia mai te Feia Moʻa, « No te aha oe e vai hau noaʻi ? » « E mea nahea to oe iteraa e parau mau te mau mea o ta oe i ite ? »
Ei reira te pahonoraa hau e tae mai ai. E mea papu, no niʻa i te Metua i te Ao ra e i Taʼna Tamaiti, o Iesu Mesia, tei fâ mai i te tamaiti apî roa ra ia Iosepha Semita. No niʻa atoa i te misioni a te Faaora o tei tiʻa-faahou mai, mai te au i te faaitehia i roto i te Buka a Moromona, i te feia tei tiʻaturi Iaʼna e o tei here Iaʼna mai ia tatou atoa nei.
Ia faaroo outou i taua mau tuuraa parau no te pae varua i roto i te matete e aore râ, i niʻa i te puromu, e uiui ïa outou e : « Mea nahea toʻu raveraa i te reira ? Mea nahea toʻu faaiteraa i toʻu faaroo i te feia aita ă i farii i te mea o taʻu i farii ? » E uiraa teie no tatou te mau melo tataʻitahi. Te vai atoa nei teie uiraa i roto i te feruriraa o te mau episekopo tataʻitahi e o te mau peresideni amaa o te Ekalesia tei ia ratou ra hoʻi te hopoiʻa no te arataʻiraa i te ohipa misionare i rotopu i te taata nei. Te pahonoraa i teie uiraa, o te niu ïa o te auhuneraa e tae mai nei.
Ua hiʻopoʻa maite e ua pure au no te feia faaroo e no te mau ite no te Faaora e no Taʼna Ekalesia. E mea faaurûhia to ratou mau aamu. Ua piihia te hoê taata haehaa roa ei peresideni no te hoê amaa iti. E no te mea e mea iti roa ratou, aita oia e taa e nahea teie amaa ia haere i mua. Ua haere oia e pure i roto i te uru raaʻu. Ua ani oia i te Atua eaha te mea e tiʻa iaʼna ia rave. Ua tae mai te hoê pahonoraa. Ua titau manihini oia e te tahi mau melo rii i te mau hoa ia amui mai ia ratou. I roto noa hoê matahiti te maoro, ua bapetizohia e rave rahi mau taata i roto i te Ekalesia a te Fatu.
Ua matau vau i te hoê taata o te tere haere no taʼna ohipa i te mau hebedoma atoa. Noaʼtu eaha te mahana, e haapii te mau misionare i te hoê taata o taʼna i farerei i te mau vahi atoa o te ao nei o taʼna i tere. Te vai atoa ra te hoê taata o te ore e tarapape te aau ia paraparau e rave rahi mau taata hou ratou a haapiihiaʼtu ai e te mau misionare. Aita roa oia e taiʻo i toʼna taime, i te oaoa râ o te feia o tei taui te oraraa.
Aita e faanahoraa taaê i roto i te ohipa o ta ratou e rave. Aita hoʻi e raveʻa taaê. E afaʻi vetahi i te hoê Buka a Moromona no te opere. E faaau vetahi i te taiʻo mahana no te imiraa i te hoê taata ia haapiihia e te mau misionare. E uiraa ta te tahi no te haaferuri eaha te mau mea tauʻa-roa-hia i roto i te oraraa o te hoê taata. Ua pure tataʻitahi te mau melo ia ite eaha râ te mea e tiʻa ia rave. E te mau pahonoraa ta ratou e farii e tano ïa na ratou iho e na te feia o ta ratou i farerei.
Tera râ, hoê â huru te mau raveraa. Teie ïa : ua ite ratou e o vai râ ratou. E rave ratou mai te au i te faaurûraa no te mea, ua ite ratou e o vai ra ratou. Ia rave tatou i te mea tano, e riro ia tatou mai ia ratou te huru i roto i na tuhaa e piti. A tahi, ua ite ratou e e mau tamarii herehia ratou e te hoê Metua Here i te Ao ra. Na te reira e faafariu ohie ia ratou Iaʼna ra e ia pure tamau noa. Te hinaaro nei ratou ia farii i Taʻna mau arataʻiraa. E haapaʻo ratou na roto i te auraro maite e te haehaa, mai te mau tamarii a te hoê metua maitai. Tei pihaʻi iho noa Oia ia ratou.
A piti, e mau pĭpĭ aau mehara ratou na Iesu Mesia o tei tiʻa-faahou. Ua ite ratou e e parau mau te Taraʻehara e e mea titauhia no te taatoaraa. Ua ite ratou e ua mâ ratou na roto i te bapetizoraa na roto i te feia o tei mau i te mana e ua farii hoʻi ratou i te Varua Maitai. E no te hau o ta ratou i farii, ua riro ratou mai te mau tamaiti a Mosia, «…e ua hinaaro hoʻi ratou e, ia faaite-hua-hiaʼtu te ora i te taata atoa, aore hoʻi i tiʻa ia ratou ia pohe te varua o te hoê noaʼtu taata ; oia ïa, te manaʻo ra ratou i te hoê taata i atihia i te mauiui mure ore, ua aueue ïa ratou, e ua rurutaina ».2
O ratou o te parau ohie e te pinepine no niʻa i te evanelia i faahoʻihia mai, e haafaufaa ïa ratou i te mea o ta ratou i ite. E manaʻo pinepine ratou i taua haamaitairaa rahi ra. E haamanaʻo ratou i te horoʻa o ta ratou i farii e o te faaitoito ia vetahi ê ia farii i te reira. Ua ite ratou i te here o te Faaora. E parau mau teie mau parau ia ratou i te mau mahana, e i te mau hora atoa :
« Aore o te aroha ra e mătaʻu ; e pee te mătaʻu i te aroha tiʻa mau ra : e mauiui hoʻi tei te mătaʻu.O tei mătaʻu ra, aore ïa i maitai roa i te aroha.
« Te hinaaro nei tatou iaʼna, no te mea oia na tei hinnaro mai na ia tatou nei ».3
Noaʼtu taua here ra, e mătaʻu te pĭpĭ mau i te tahi taime. Ua haapapu mai râ te Aposetolo Ioane no niʻa i te reira : e pee ê te mătaʻu ia faarirohia tatou ei mea maitai roa i roto i te here. E pure tatou no taua horoʻa no te here ra. E pure tatou na roto i te tiʻaturi e e farii tatou i te here o te Faaora no tatou e no te feia atoa o ta tatou e farerei. No Toʼna here ia tatou e ia ratou i aufau ai oia i ta tatou mau hara. E tiʻaturi tatou i te reira. O te hoê ïa mea faufaa roa e na te reira i faahuru ê i to tatou aau ia farii noa i te here i te mau taime atoa. E faueraa te pure no te farii i te here o te Faaora e e fafauraa atoa hoʻi. A faaroo mai na :
« No reira, e au mau taeaʻe here, aore o outou e aroha, aita roa a outou e faufaa, e ore hoʻi te aroha e mou. No reira a taati i te aroha, o tei hau i te mau mea atoa ra, e mou hoʻi te mau mea atoa ra –
« O te aroha râ, o te hinaaro mau ïa i te Mesia, e ore roa ïa e mou ; e o te itea te aroha i roto iaʼna i te mahana hopea ra, e maitai ïa toʼna.
« No reira, e au mau taeaʻe here, e pure atu i te Metua ma te puai hope o te aau ia î outou i teie nei aroha, o taʼna i ho mai i te taata atoa e pee mau i taʼna tamaiti ia Iesu Mesia, ia riro outou ei tamarii na te Atua, e ia fâ mai oia ra ua riro tatou mai iaʼna ra te huru ; e ite hoʻi tatou iaʼna i toʼna ra huru mau, e ia vai maite â teie nei tiaʻiraa i roto ia tatou, e ia tamâhia hoʻi tatou atoa mai iaʼna i mâ ».4
Ua tiʻaturi te Fatu i Taʼna mau pĭpĭ. E faahaere mai Oia i te feia i ineine i Taʼna ra mau tavini o tei faaineinehia. Ua ite outou oiaʼtoa vau nei e, e farerei tatou i te mau taata i te hoê vahi o tei manaʻo-ore-hia.
E pure toʻu hoa i te mau mahana atoa ia haafarerehia oia i te hoê taata o tei ineine i te farii i te evanelia. E taʻitaʻi noa oia i te hoê Buka a Moromona. Hoê pô hou toʼna tere iti poto noa, ua manaʻo oia aita e faufaa ia rave i te hoê buka ia rave noa râ i te « tareta opere ». Ia poʻipoʻi aʻe râ, tae maira te hoê faaurûraa iaʼna : « A rave i te hoê Buka a Moromona ». Tuu ihora oia hoê i roto i taʼna pute.
I roto i te manureva, parahi mai nei te hoê vahine o taʼna i matau i pihaʻi iho iaʼna e manaʻo ihora oia e, « O teie mau te taata ? » I toʼna hoʻiraa mai, hoê â to ratou manureva. Feruri ihora oia, « Nahea râ ia faaite i te evanelia ? »
Area râ, parau mai nei taua vahine ra iaʼna, « E aufau outou i te tuhaa ahuru i roto i ta outou Ekalesia, e ere anei ? » Pahono atura oia, e. Parau mai nei taua vahine ra e, ua opua oia i te aufau i taʼna tuhaa ahuru i taʼna ekalesia aita râ oia i na reira. Parau faahou mai nei, « Eaha te Buka a Moromona ? » Tataraʼtura oia e papaʻiraa moʻa, te tahi atu ite no Iesu Mesia, iritihia e te peropheta Iosepha Semita. Ua anaanatae roa taua vahine ra. No reira, tanao atura toʻu hoa i roto i taʼna pute e parau atura, « Ua faaurûhia vau ia afaʻi mai i teie buka na muri iaʻu. Na oe teie buka ».
Haamata ihora oia i te taiʻo. A taa atu ai raua, parau mai nei taua vahine ra, « E aparau atu â taua no niʻa i teie buka ». Te mea râ o te ite-ore-hia e toʻu hoa, ua ite râ te Atua e te imi nei taua vahine ra i te ekalesia. Ua ite te Atua e ua hiʻo tamau noa teie vahine i toʻu hoa e ua maere i te oaoa o ta te ekalesia i faatupu noʼna. Ua ite te Atua e ui atu oia no teie nei Buka a Moromona e ua ite te Atua e hinaaro teie vahine ia haapiihia oia e te mau misionare. Ua ineine roa oia. Oiaʼtoa toʻu hoa. Oiaʼtoa outou e o vau nei.
E iteahia te anaana o to outou tiʻamâraa e to outou hinaaro i niʻa i to outou na mau mata. E faaanaanatae te reira ia outou no niʻa i te Ekalesia a te Fatu e i Taʼna ohipa e e faaitehia te reira i niʻa i to outou mau mata. E riro outou ei mau pĭpĭ 24 hora i te mahana hoê. Aita e faufaa ia outou ia patu i to outou itoito no te hoê noa taime no te aparau i te hoê taata no niʻa i te evanelia e i muri iho e faaruʻe roaʼtu ai. Ia haapii outou no niʻa i te evanelia i faahoʻi-faahou-hia mai eita te taata e anaanatae. Ia faaite râ outou i te mea o ta outou i tiʻaturi, e tuhaa ïa te reira no to outou huru.
Mai te reira atoa toʻu metua tane. E taata ite rahi teie. E aʻo oia i roto i te mau amuiraa i te mau fenua o te ao nei. Ua taiʻo vau i te hoê aʻoraa o taʼna i horoʻa i te hoê putuputuraa rahi na te mau taata ihi. I roto i taʼna aʻoraa, ua faahiti oia no niʻa i te poiete-raa e no te hoê Taata tei Poiete e no Taʼna ihi. Ua ite au aita reʻa taata i farii i toʼna mau manaʻo. Ua parau atura vau ma te maere e te faahiahia, « Papa, ua faaite oe i to oe iteraa papu ». Hiʻo maira oia iaʻu ma te maere, « A, ua na reira vau ? »
Aita hoʻi oia i ite e, e aito oia. Ua parau noa râ oia i te mea o taʼna i ite e parau mau. I toʼna horoʻaraa i toʼna iteraa papu, ua tae roa te ite i te feia patoʻi e, e ere te reira i te hoê noa hohoʻa, e tuhaa râ noʼna iho. O toʼna ihoa huru tera.
Te huru tera o te taata itoito e te puai i roto i te pororaa evanelia. Ua ite ratou e mau tamarii herehia ratou e te hoê Metua ora i te Ao ra. E ua ite ratou e mau pĭpĭ ratou na Iesu Mesia. Aita e faaheporaa e titauhia ia ratou ia pure. E tae ohie noa mai te reira. Aita e faaheporaa no te haamanaʻoraa i te Faaora. E vai noa te here o te Faaora i roto ia ratou e Toʼna atoa hoʻi no ratou ra. Oia hoʻi, ua ite ratou e o vai râ ratou e mea nahea ratou i te hiʻoraa ia ratou iho e i te feia e haaati ra ia ratou.
E au e, te hinaaro nei tatou ia titau i te hoê faahuru-ê-raa rahi, tera râ, e tiʻaturi tatou e e tae mai ihoa te reira. Te tupu nei teie mau faahuru-ê-raa i te mau melo tataʻitahi i roto i te Ekalesia i te ao atoa nei. O teie taua taime ra i ite ateahia e te mau peropheta mai te poiete-raa-hia mai â o te ao nei. E tae te evanelia i faahoʻi-faahou-hia mai i te mau nunaa atoa. Teie ta te Faaora i faaite ia Iosepha Semita :
« Ua tono atura vau i taʻu melahi i te maʻueraa na ropu i te raʻi, ma te evanelia e tiʻa i te vairaa, o tei fâ mai i te tahi mau taata e ua horoʻaʻtura i te reira i te taata nei, o te fâ mai hoʻi i te taata nei e rave rahi o tei parahi i niʻa i te ao nei.
« E e porohiaʼtu teie nei evanelia i te mau nunaa atoa, i te mau opu atoa e i te mau reo atoa, e i te mau taata atoa ».5
Noaʼtu eaha te mau tamataraa e tupu ua ite râ tatou e ua ruuruuhia te Atua no te faatupuraa i Taʼna mau fafauraa. E ere Oia i te taata noa, o Oia râ te faatere hau aʻe no te mau nunaa e no te mau ohipa no te faatupuraa i Taʼna mau opuaraa. I rotopu i te mau taata e i te mau nunaa, e rave rahi feia o te tomo mai i roto i te Ekalesia e o tei tavini na roto i te tiʻaturi e, e mau tamarii ratou na te Atua e o tei riro ei mau pĭpĭ tamâhia e te Mesia i tiʻa faahou ra i roto i Taʼna Ekalesia.
I te tahi mau matahiti i mairi aʻe nei, ua paraparau vau i te mau misionare i te pû haapiipiiraa misionare no te fenua Tapone. Ua tohu vau ia ratou e tae mai te hoê tauiraa rahi i roto i te nunaa. Ua parau vau ia ratou, e rave rahi mau melo o te faaite hua i to ratou iteraa papu no te evanelia i faahoʻi-faahou-hia mai. Ua manaʻo vau e, e roaa te itoito no te parauraa, na roto i te faahiahia rahi o te Ekalesia i taua fenua ra. Ua ite au i teie nei i te semeio rahi, te hoê faahuruʻe-raa-rahi, e tae mai i roto i te mau melo, eiaha râ i roto i te ao e haati nei ia ratou.
E faaite ratou e tae noaʼtu i te mau melo i te ao atoa nei ma te here, te faaroo, te parauraa, e te faaiteraa i te faahuru-ê-raa o to ratou aau. E arataʻi te mau episekopo e te mau peresideni amaa ia ratou na roto i te hiʻoraa maitai. E rahi te ootiraa o te mau varua e e paruruhia ratou i te rima o te Fatu.6
Ia riro ei tuhaa no taua semeio ra, eiaha roa outou e tiaʻi ia piri atu outou i te Metua i te Ao ra e aore râ, ia papu outou e, ua tamâhia outou e te Taraʻehara a Iesu Mesia. A pure ia farerei i te mau taata o te manaʻo ra e te vai nei te hoê mea faahiahiaʼtu â i roto i to ratou oraraa. A pure ia ite outou i te raveʻa no te tautururaa ia ratou. E pahonohia ta outou mau pure. E farerei outou i te mau taata o tei faaineinehia e te Fatu. E i reira outou e ite ai e e parau ai i te mau mea i ô atu i to outou mau iteraa i mutaa ihora. I te taime mau, e haafatata-roa-hiaʼtu outou i to outou Metua i te Ao ra e e ite outou i te tamâraa e te faaoreraa hapa o ta te Faaora i fafau mai i Toʼna mau ite haapaʻo. E ite outou e ua farii Oia, ma te ite e ua rave outou mai te au i Taʼna i ani ia outou ia rave, no te mea ua here e ua tiʻaturi Oia ia outou.
Te mauruuru nei au i te oraraa i roto i teie nei tau. Te mauruuru nei au ia ite e e mau tamarii herehia outou e o vau nei e te hoê Metua hanahana i te Ao ra. Te faaite papu nei au e, o Iesu te Mesia, o Oia toʻu Faaora e to outou hoʻi, e te Faaora no te mau taata atoa o ta tatou i matau. Ua fâ mai te Metua e te Tamaiti i te peropheta Iosepha Semita. Ua faahoʻihia mai te mau taviri o te autahuʻaraa e o te hopea ihoa ïa, ua haamata te haaputuputuraa rahi i teie nei. Ua ite au e e parau mau te reira.
Na roto i te iʻoa o Iesu Mesia, amene.