Mau vahi moʻa, mau area moʻa
Na to tatou ite i te imi, i te ite, e te faatura i te mau mea moʻa hau atu i te mau mea o te ao nei, e te faatura hoʻi i faataa i to tatou pae varua.
Ei pahonoraa i te uiraa a Pilato, « O te Arii oe o te Ati Iuda ? » ua pahono te Faaora, « E ere i to teie nei ao toʻu basileia » (Ioane 18:33,36). Ua faaite Iesu na roto i teie noa mau parau rii e mea taaê Toʼna basileia i te ao nei. E faateitei te mau haapiiraa a te Faaora, te parau haapiiraa, e te iteraa rau o te taata iho i te mau taata atoa o tei tiʻaturi Iaʼna, i te hoê faito hanahana o te titau i te mata rotahi i te hanahana o te Atua (a hiʻo PH&PF 4:5 ; 88:68). E tahoê te hanahana o te Atua i te taatoaraa o te mau mea moʻa. Na to tatou ite i te imi, i te ite, e te faatura i te mau mea moʻa hau atu i te mau mea o te ao nei, e te faatura hoʻi i faataa i to tatou pae varua. Aita anaʻe e moʻe ê te mâ, e toe noa mai ïa te mau viivii e te mau mea a te taata noa.
I roto i te mau ahoaho o te ao nei tei î roa i te feaa, te vaira te mau vahi o te pûpû mai i te hoê pare tapuniraa no te pae varua, no te faaapîraa, no te tiʻaturiraa, e no te hau. Te vai mau nei taua mau vahi ra. E mau vahi moʻa e te mâ. Te vaira te mau vahi e farii ai tatou i te hanahana e i te Varua o te Fatu.
I roto i te Mau Parau Haapiiraa e te mau Parau Fafau e toru taime to te Fatu aʻoraa i Toʼna feia ia « tiʻa i roto i te mau vahi moʻa » (a hiʻo PH&PF 45:32 ; 87:8 ; 101:22). Ia hiʻo tatou i te taatoaraa o Taʼna aʻoraa, e mau mea faufaa ta tatou e ite noaʼtu te huru o to tatou nei ao. Ua roaa te maʻi riʻariʻa, te hamani-ino raa, e te tamaʻi tei matarohia e tatou e ua tomo roa mai i roto i to tatou oraraa. Na roto i teie mau arepurepuraa ua aʻo mai te Fatu : « Inaha, o toʻu ia hinaaro ia ratou atoa o te pii mai i toʻu nei iʻoa, e o te haamori mai iaʻu nei mai te au i taʻu evanelia mure ore, ia putuputu mai i te vahi hoê, e ia tiʻa mai i te mau vahi moʻa ra » (PH&PF 101:22).
E mea faufaa te mau vahi moʻa no te haamoriraa mau i te Atua. No te Feia Moʻa i te Mau Mahana Hopea Nei, e riro taua mau vahi moʻa ei mau vahi faufaa mai te mau vahi tuiroo, to tatou iho mau fare, te mau pureraa oroʻa, e te mau hiero. Te mau mea o ta tatou e faatura rahi, e o ta tatou e haapii i ta tatou mau tamarii ia faatura ei mau vahi moʻa e te mâ, e iteahia ïa i roto i teie nei mau vahi. Ia amuihia te faaroo e te faatura i teie nei mau mea, e te faatura o tei tupu e aore râ, ua tupu na, e faarirohia ïa ei mea moʻa. Te faufaa o te mau vahi moʻa e te vahi mâ i roto i ta tatou haamoriraa aita ïa e nehenehe ia aruehia.
E titauhia te faaineineraa rahi a te taata tataʻitahi no te farii i te fanaʻoraa o te pae varua ia tiʻa mai i te mau vahi moʻa ra. E ite-atoa-hia te mau vahi moʻa e te mau area mâ na roto i te faatusiaraa o ta ratou e titau mai. Ua haapii elder M. Russell Ballard e « te auraa o te parau faatusia ’o te faariroraa ïa ei mea moʻa’ e aore râ, ‘te faataaraa ei mea mâ’ » (« The Law of Sacrifice », Liahona, mati 2002, 13). Te mau parau moʻa e te tusia, hoê â ïa. Eita hoê e moʻa mai te mea e aita e faatusiaraa i ravehia no te reira. Aita te moʻaraa e roaa mai te mea aita te hoê i faatusia iaʼna iho. Na te faatusiaraa i haamoʻa i te mau mea moʻa.
Ua manaʻo vetahi mau taata e ua riro te uru raau tapiri i te vahi faaapuraa a Semita ma i New York ei vahi nehenehe mau e te hau. I te Feia Moʻa râ i roto i te ao nei, e mea moʻa ïa no te faaroo e no te faaturaraa o ta tatou e afaʻi atu i reira e no te faahohoʻaraa o taʼna faatusiaraa hohonu.
I te tahi mau avaʻe i mairi aʻe nei, i te hoê mahana nehenehe roa i te taperaa mahana, ua faafaaea maua taʻu vahine faaipoipo i roto i taua uru raau ra. E mea nehenehe mau ihoa, e ua ite maua i te hau i reira. Tera râ, ua hau atu â toʼna faufaaraa i te mea e, te parahi ra maua i te vahi i fâ mai ai te Atua te Metua e Taʼna Tamaiti o Iesu Mesia i te peropheta apî ia Iosepha Semita. No to maua faaroo e no to maua faatura i to raua haereraa mai e no te faatusiaraa a te taata iho no te mau hopearaa i roto i te oraraa o Iosepha Semita, e i roto i te oraraa o to tatou mau tupuna, tei faariro i teie nei vahi ei vahi moʻa.
Ua tupu atoa te manaʻo faatura no te tahi mau vahi mai teie te huru i roto i te ao nei tei faaite i te aamu e te faatiʻaraa o te Ekalesia. E faaurû teie mau vahi moʻa i to tatou faaroo e e faaitoito ia tatou ia vai tiʻa noa i taua faaroo ra e no te nuuraa i mua, noaʼtu te mau tamataraa o te tae mai i niʻa i to tatou eʻa.
Oia atoa to tatou mau utuafare, e mau vahi moʻa tei î i te mau area mâ. Noaʼtu paʻi e, e ere to tatou mau fare i te mea hau roa, e faaîhia râ e te Varua o te Fatu. Ua haapii te peresideniraa Matamua e te Pŭpŭ no te Tino Ahuru Ma Piti Aposetolo i roto i « Te Utuafare : E Poroʻi i to te Ao Nei » : « E mea papu aʻe te oaoa i roto i te oraraa utuafare ia faatumuhia te reira i niʻa i te mau haapiiraa a te Fatu ra o Iesu Mesia. Te mau faaipoiporaa e te mau utuafare tei hau i te manuïa, ua fatumuhia ïa e ua haamauhia i niʻa i te parau tumu no te faaroo, te pure, te tatarahapa, te faaoreraa hara, te faatura, te here, te aroha, te ohipa, e te mau faaoaoaraa maitai » (Liahona, atopa 1998, 24).
E titau teie huru fare i te faatusiaraa a te taata iho. Ua parau te Fatu i te peropheta ia Iosepha Semita : « Ia tatarahapa to oe utuafare e ia haapae atu i te tahi mau mea » (PH&PF 93:48). E faaruru to tatou mau utuafare tataʻitahi i te huru o te mau ohiparaa e te mau faaoaoaraa, e ere râ te taatoaraa i te mea maitai anaʻe – e eita atoa paha vetahi i te mea faufaa roa. Mai te utuafare o te peropheta, e titau-atoa-hia paha to tatou utuafare ia tatarahapa e ia haapae i te tahi mau mea o te ore e tauturu ia tatou ia tapeʻa mai i te huru moʻa o to tatou mau utuafare ? Te faatiʻaraa ia riro to tatou mau utuafare ei mau vahi moʻa roa e faahohoʻaraa te reira i te faatusiaraa hohonu o ta tatou e hinaaro nei ia rave no to tatou mau utuafare.
Ua hau atu te auraa o te mau pureraa oroʻa i te tahi noaʼtu mau pureraa. E mau taime moʻa roa i roto i te vahi moʻa. I roto i teie mau pureraa, e hiʻo tiʻa tatou i te aroha o te taraʻehara o ta te ao nei i ore â i ite na. E feruri hohonu tatou i te here o te Atua o tei horoʻa mai i Taʼna Tamaiti Fanau Tahi ia roaa ia tatou te ora mure ore. A rave ai tatou i te oroʻa, e haamanaʻo tatou Iaʼna e e faaite tatou i to tatou hinaaro i te rave i Toʼna iʻoa i niʻa iho ia tatou e i te haapaʻo i Taʼna mau faaueraa. Te faaineineraa i te taata iho, oiaʼtoa ta tatou iho faatusiaraa na roto i te aau tatarahapa e te varua mărû, o te matamua ïa o te hoê faaapîraa pae varua i te mau hebedoma atoa na roto i te rave tamauraa i te oroʻa. E mea tiʻa ia hinaaro tatou e ia nehenehe atoa ia vaiiho ê atu i te mau mea o teie nei ao no te hoê noa maa taime iti no te feruri-raa i te mau mea moʻa. Mai te mea aita teie faaapîraa pae varua, e haapuunenahia to tatou faaroo e te mau mea viivii o te ao nei.
Rave rahi matahiti i mairi aʻe nei, te vai apî noa ra ta maua tamaiti, i roto i te taime tamaaraa, ua haafaahiahia vau i ta matou pureraa oroʻa e i te mau mea o taʻu i haapii mai. Ta ratou pahono o te huru ïa o to ratou hohoʻa mata e au e ere hoê â huru ta matou pureraa i haere na. Te taa ê raa, oia hoʻi, e ere hoê â huru to matou paari e te huru o to matou faaineineraa ia matou iho. Te faaapîraa o ta matou i farii i roto i ta matou pureraa oroʻa aita ïa i hau aʻe i ta matou faaineineraa e i to matou hinaaro e to matou hiaai ia haapiihia.
Te mau hiero i papaʻihia i niʻa iho « Ia Moʻa to Iehova », ua amui-atoa-hia ïa i rotopu i te mau vahi moʻa roa o te mau vahi atoa i niʻa i te fenua nei. Ua fatuhia te mau haamaitairaa o te hiero e aita e nehenehe ia faataa-ê i te mau faatusiaraa rahi. Te mau oroʻa e ravehia i roto e faaite te reira i te tusia taraʻehara a te Faaora. Na te reira i faataa i te hiero ei vahi moʻa. Tera râ, e titau-atoa-hia mai te faatusiaraa a te taata iho. E faatusia tatou i to tatou mau taime i te imiraa i to tatou mau tupuna e ia haere i te hiero no te faaotiraa i ta tatou mau hopoiʻa. E tutava atoa i te haapaʻoraa i te mau ture teitei no te tiʻamâ ia nehenehe tatou ia tomo i roto i te area moʻa o teie nei vahi moʻa roa.
I roto i te mau vahi moʻa e i roto i te mau area moʻa e iteahia ia tatou te hoê pare tapuniraa no te pae varua, no te faaapîraa, no te tiʻaturiraa, e no te hau. Aita anei te reira i titau mai i te faatusiaraa a te taata iho ? E toʻu mau taeaʻe e toʻu mau tuahine, e mea tiʻa ia faatura tatou i te mau vahi moʻa e i te mau area mâ i roto i to tatou oraraa. Ia na reiraʼtoa tatou i te haapiiraa i ta tatou mau tamarii. Ia tiʻa i roto i te mau vahi moʻa no te hau i te pae varua.
Te faaite nei au i toʻu iteraa papu no te Fatu e Faaora o Iesu Mesia, Te arii no te hau e te tiʻaturiraa, na roto i te iʻoa o Iesu Mesia, amene.