Te mau Hitu Ahuru i pii-apî-hia ; te aʻoraa a te feia faatere no niʻa i te tamaʻi e te hau

I te tuhaa amuiraa i te avatea mahana maa no te 173raa o te amuiraa rahi matahiti, ua faaite te Peresideniraa Matamua i te tauiraa i roto i te peresideniraa o te Hitu Ahuru e te peresideniraa rahi o te Haapiiraa Sabati. Ua pii-atoa-hia te hoê melo o te tavini nei ei hui mana faatere rahi i roto i te pŭpŭ matamua no te mau Hitu Ahuru, e e pae Hui mana faatere rahi apî e e 37 Hitu Ahuru mana area apî.

No toʼna pii-raa-hia iho nei ei peresideni no te fare haapiiraa tuatoru no Brigham Young i Provo, elder Cecil O. Samuelson Jr. no te Hitu Ahuru, ua haamauruuruhia ïa ei melo no te peresideniraa rahi o te Haapiiraa Sabati.

Ua piihia o elder Merrill J. Bateman no te Hitu Ahuru ei melo no te peresideniraa no te Hitu Ahuru e ei peresideni rahi o te Haapiiraa Sabati. E tamau noa ïa o elder John H. Groberg e o elder Val R. Christensen i te tavini ei tauturu hoê e ei tauturu piti, i roto i te peresideniraa rahi o te Haapiiraa Sabati.

O elder Bruce D. Porter, e melo no te pŭpŭ piti o te Hitu Ahuru mai te matahiti 1995 mai â, ua piihia ïa ei melo no te pŭpŭ matamua no te Hitu Ahuru. Teie te mau hui mana faatere rahi apî tei piihia ei mau melo no te pŭpŭ piti o te Hitu Ahuru : o elder Mervyn B. Arnold, elder Shirley D. Christensen, elder Clate W. Mask Jr., elder William W. Parmle e o elder W. Douglas Shumway.

Ua paturu-atoa-hia 37 Hitu Ahuru mana area – 4 no Paratira, 2 no Mexique, 2 no Nigeria, 12 no te fenua Marite, e hoê no te mau fenua tataʻitahi i muri nei, Ra-Parata, Autararia, Auteteria, Bolivie, Costa Rica, Repubilita Dominique, Hong Kong, Indonésie, Italia, Panama, Philipino, Hamoa, Paniola, Helevetia, Taiwan, Tona, e Venuezuela (a hiʻo i te mau tabula iʻoa i roto i te tufaa « Te patururaa i te feia toroʻa o te Ekalesia », i roto i teie veʻa i te api 23).

Ua haamauruuruhia elder J. Devn Cornish, Hitu Ahuru mana area no Amerita apatoʻerau no te area apatoʻa-hitiʻa o te râ, e ua piihia ei peresideni misioni.

I roto i te amuiraa rahi, ua haamanaʻo te peresideni Gordon B. Hinckley e te tahi atu feia faatere no te Ekalesia i te fifi rahi e tupu nei i roto i te ao e ua horoʻa i te mau parau tamahanahana, te arataʻiraa, e te mau haamaramaramaraa i te feia i ô atu i roto i teie mau arepurepuraa.

Ei pahonoraa i te uiraa « Eaha te tiʻaraa o te Ekalesia i roto i teie mau mea ? » Ua haamanaʻo mai te peresideni Hinckley i te mau melo no te Ekalesia e « aita tatou i peʻapeʻa e te mau Musulman e aore râ, i te tahi noaʼtu faaroo. Ua farii e te haapii nei tatou e ua riro te mau taata atoa i te ao nei ei utuafare no te Atua ».

Ua ani te Peresideni Hinckley i te mau melo o te Ekalesia ia haapaʻo i te hiroʻa faaroo numera ahuru ma piti na roto i te patururaa i te mau ture o to ratou mau fenua e i te auraro i to ratou mau faatere hau. Ua faaara mai oia, « Eiaha roa tatou ia riro ei pŭpŭ no te mau parau e aore râ, no te mau ohipa a te diabolo no to tatou mau taeaʻe e mau tuahine i roto i te mau nunaa i te piri-raa-atu i te tahi pae e aore râ, ia vetahi ê ».

Ua aʻo oia i te Feia Moʻa ia pure no te feia i ô i roto i teie tamaʻi e ia imi i te Faaora. « Ia oti te taatoʻaraa o te mea i parauhia e i ravehia, o tatou te feia no teie nei Ekalesia, e mau taata tatou no te hau. E mau pîpî tatou na te Faaora, te Fatu o Iesu Mesia, tei riro na ei Arii no te Hau ».

I roto i te aʻoraa o teie nei Mahana Maa poʻipoʻi, ua faataa te Peresideni Hinckley i te tupuraa o te Ekalesia. Ua faaite oia e, te patu nei te Ekalesia fatata 400 fare pureraa apî i te matahiti hoê, e te tamau noa nei i te « patu i te mau hiero na te ao atoa nei ». Ua faaite atoa oia e, ua raeʻahia 8.000 feia apî tane e vahine o tei fanaʻo i te Tufaa no te Haapiiraa Tamau, e ei tumu no teie nei tauturu, ua maraa ta vetahi imiraa e maha taime e te afa na roto i te mau parau tuʻite tei roaa ia ratou.

Ua faaara te Ekalesia hou te amuiraa, eita te mau misionare e tonohia i te fenua Hong Kong e tae noaʼtu e e oti te mau tuatapaparaa no niʻa i te tirotiro o teie maʻi apî no te mahaha. Te manaʻonaʻo-rahi-hia nei te ʻea e te maitai rahi o te mau misionare e tavini nei i Hong Kong. Te farerei tamau nei te peresideniraa area no Asia e te tiʻa area no te pae utuuturaa maʻi no Hong Kong i te mahana hoê no te tauʻaraa i te tupuraa o teie nei maʻi e no te horoʻa i te mau arataʻiraa i te mau peresideni misioni no te raveraa i te mau faito parururaa e tano no te mau misionare.