Te mau parau no te haapaʻo
Na roto i te haapaʻo-maite-raa i te huru no to tatou oraraa, a haapaʻo ai tatou i te tumu mau o te oraraa, e haamaitaihia ïa tatou i teie nei ao e i te ao a muri atu.
Ua î te ao nei i te mau parau. E rave rahi mau parau e mea peʻapeʻa e te faahapa, e e rave rahi e mau parau faaino ïa. E roo parau noa te reira mau parau, e aita tatou e faaroo e aore râ, e tâuʻa roa i te reira. E i reira, i te tahi taime, i roto i te maniania rahi, te faaroo nei tatou i te tahi mau parau faufaa roa, mai teie i roto i teie amuiraa, te mau parau ïa o te tiʻa ia haapaʻo.
Teie ta te peresideni Thomas S. Monson i faahiti i roto i te amuiraa no eperera 1988:
« Te poihere nei tatou i te manaʻo faauruhia :
« E metua te Atua.
E taeaʻe te taata.
E misioni te oraraa
E ere i te hoê tiʻaraa toroʻa ».
(Faahitiraa a Stephen L Richards i roto i te « An Invitation to Exaltation », Ensign, me 1988, 54).
E mau parau teie o te tiʻa ia haapaʻo.
O te Atua to tatou Metua Here i te Ao ra. E mau tamarii varua tatou Naʼna ra. Na roto te iteraa tatou i to tatou auraa i te Atua e tauturu mai tatou ia maramarama maitai e nohea mai tatou e aha ta tatou mau raveʻa mure ore. Te ite maitairaa Iaʼna, e roaa ai ia tatou i te haafatata atu ia tatou Iaʼna ra no te haamauruuru Iaʼna. E tuhaa to tatou oraraa tahuti nei i roto i te faanahoraa no te oaoa o Taʼna i faanaho, tei horoʻahia ia tatou ia haapaʻo na roto i te faaroo, no te farii i te mau faanahoraa tahuti nei, e nehenehe atu ai ia tatou na roto i te haapaʻoraa e te mana no te Taraehara e hoʻi i mua i Toʼna ra aro no te ora mure ore.
Te ora nei tatou i roto i te hoê ao taaê rahi roa : te mau fenua taaê, te mau hiroʻa tumu, te mau nunaa, e te mau reo taaê. Mea titauhia i te tahi taata ia tiʻaturi e o te reira te raveʻa ta te Atua i faanaho. Te haapii nei te evaneria ia tatou noaʼtu te reira mau taaêraa, e mau tamarii paatoa tatou na te Metua Here no te Ao ra. Hoê utuafare te nunaa taata atoa, e no reira, e mau taeaʻe e mau tuahine anaʻe tatou.
Ei taeaʻe e ei tuahine, e mea tiʻa ia tatou ia ite e te here nei to tatou Metua Here i te Ao ra i Taʼna mau tamarii paatoa, mai ta te hoê metua tahuti e here ra i taʼna mau tamarii. Ia riro te peu maitai, te aroha, te aau haehaa, e te faaoreraa hara ei mau faanahoraa i roto i te oraraa utuafare. E hiʻo na tatou i te manaʻo peʻapeʻa o te hoê Metua here o te ite ra i Taʼna mau tamarii o te hamani-ino ra te tahi i te tahi.
Mea poto te oraraa. « E au auahi ïa, no vaivai aʻe e maoro iti aera, mou atura » (Iakobo 4:14). E rave rahi mau ohipa o te titauhia ia rave faaoti i roto i te tau faufaa i roto i te tahuti nei. Te tahi o taua mau ohipa faufaa atu â i te tahi pae, e mea tiʻa ia rave tatou i te mau faaotiraa paari. Te vai ra te tahi mau ohipa hape. Te vai ra te mau ohipa maitai. Te vai nei râ te tahi mau titauraa a to tatou Metua Here i te Ao ra o te tiʻa ia tatou ia rave maitai i roto i to tatou oraraa tahuti.
Te mau titauraa a te Metua, e mea rahi aʻe ïa i te faatupu-noa-raa i te hoê oraraa no tatou i roto i te mau mea nehenehe e te oaoa o teie nei fenua ; ua haapapu te Fatu i te reira ia tatou : « E na te reira i haamauruuru i te Atua i te mea e ua horoʻatu oia i teie nei mau mea atoa i te taata nei ; no te mea no reira hoʻi teie nei mau mea i hamanihiaʻi ia ravehia, na roto i te manaʻo au, eiaha mai te faarahi roa ino » (PH&PF 59:20).
Na roto i te haapaʻo-maite-raa i te huru no to tatou oraraa, a haapaʻo ai tatou i te tumu mau o te oraraa, e haamaitaihia ïa tatou i teie nei ao e i te ao a muri atu. Na roto i te haapaʻoraa i te mau faaueraa, te tapeʻaraa i te mau fafauraa moʻa, e ia « anaanatae i te ohipa maitai » (PH&PF 58:27) e nehenehe ai tatou i te farii i te oaoa e o te reira te tumu no to tatou oraraa i niʻa i te fenua nei (a hiʻo 2 Nephi 2:25).
Ua horoʻa mai te Fatu ia tatou i teie â haapapuraa : « A haapii mai ra e o oia o te rave i te mau ohipa parau tiʻa ra e farii ïa oia i taʼna utuʻa, oia ïa te manaʻo hau i roto i teie nei ao, e te ora mure ore i roto i te ao a muri atu ra » (PF&PH 59:23).
No reira ta tatou misioni i niʻa i te fenua nei e ere roa ïa no te mau toroʻa tahuti nei. No te faaineineraa i to tatou oraraa tahuti ore.
Te faaite papu nei au e arataʻi te oraraa maitai ia tatou i te Metua ra, tei horoʻa mai i te ora ia tatou i ô nei e o te farii mai hoʻi ia tatou i roto i te ora mure ore.
E rave rahi mau tamarii a te Atua e ora nei mai te mea ra e aita e mahana haavaraa. E faanaho ratou i to ratou oraraa na roto i te imiraa i te nahonaho, te moni e te oaoa.. Teie ta Nephi parau no niʻa i te reira, « Oia îa, e parau te taata e rave rahi e, a amu, a inu, e ia oaoa, ananahi hoʻi e pohe ai tatou ; e e maitai to tatou i reira » (2 Nephi 28:7). E faaau nei te mau taata e rave rahi i te numeraraa hape ma te parauraa e : « Area ra a mătaʻu i te Atua – E faatiʻa hoʻi oia ia oe i te raveraa i te hara iti ; oia ïa a haavare rii, a faahapa i te tahi o taʼna parau, a ô i te apoo no to oe taata tupu ; e ere te reira i te hara. A rave hoʻi i teie mau mea atoa, ananahi hoʻi e pohe ai tatou ; e mai te mea e hara ta tatou, e papai mai te Atua ia tatou i te tairiraa iti, e i te hopea ra, e faaorahiaʻi tatou i te basileia o te Atua » (2 Nephi 28:8).
Na roto i tera huru feruriraa hape, ua î te ao nei i te mau anapanaparaa. Te ite nei tatou i te feia apî tamaroa i te farii oreraa ia faaipoipo, e i te feia apî tamahine i te horoʻa maau-noa-raa i to ratou viivii ore i roto i te mau faanahoraa repo, te patoʻiraa te tane e te vahine ia fanau i te tamarii e aore râ ia fanau hoê noa tamarii ta ratou e « faatietie » ai inaha ua tano te reira i to ratou feruriraa no te haapaʻo noa ia ratou iho no te haereraa i tera vahi e tera vahi, e aore râ ia rahi roaʼtu te moni.
Teie râ, rave rahi milioni mau taeaʻe e mau tuahine faaroo i roto i te ao nei o te aro nei i te mau mahana atoa ia ora ratou « na roto i te mau parau atoa na roto mai i te vaha o te Atua » (PH&PF 84:44). Ua faanaho ratou i to ratou oraraa ma te auraro i te hinaaro o te Metua i te Ao ra. Te haa itoito nei, te taiʻo itoito nei, e te pure itoito nei ratou. Ua ite ratou e nahea ia paari e nahea ia arearea. E faaroo ratou i te parau e e haapaʻo hoʻi i te parau. Ua ite ratou i te auraa e i te mau haamaitairaa o te tae mai na roto i te haapaʻoraa i te ture no te faatusiaraa. E tauturu teie feia faaroo ma te faafanaʻo ia vetahi ê. E here e e haapaʻo ratou i te mau tamarii e te feia paari. Te peu maitai e te mau tumu faufau to ratou ïa huru, e e arataʻi ratou na roto i te hiʻoraa maitai to ratou mau utuafare, to ratou mau taata tupu, e te mau mataeinaa. Ua here te Atua e ua haamaitai ia ratou. E ora ratou na roto i Taʼna mau parau, te mau parau « e ore roa e mou » (PH&PF 64:31).
Te mau parau e haapaʻo. E mau parau ohie roa e te tano hoʻi. E tauturu mai teie mau parau ia tatou ia haamanaʻo. Na tera mau parau e tapeʻa ia tatou i niʻa i te haereʻa papu. E arataʻi hoʻi ia tatou i to tatou Metua Here i te Ao ra e faaea atu ai i pihaaiho Iaʼna ra.
Ia haamanaʻo tatou :
E metua te Atua.
E taeaʻe te taata.
E misioni te oraraa
E ere i te toroʻa.
Na roto i te iʻoa o Iesu Mesia, amene.