2003
Te mana au mau o te pure
Me 2003

Te mana au mau o te pure

Elder Russell M. Nelson

No te Pŭpŭ no te Tino Ahuru Ma Piti Aposetolo

E mea tiʻa ia pure tatou ia au i te hinaaro o to tatou Metua i te Ao ra. Ua hinaaro oia i te tamata ia tatou, ia haapuai ia tatou, e ia tauturu ia tatou ia roaa to tatou puai.

I teie tau no te mau matini roro uira, te niuniu paraparau, e te mau vini, ua tiʻa atura i te mau taata ia apararau ohie aʻe te tahi e te tahi. Te iti noa ra â te tauʻa parauraa. Ua haere au e ere i te mea maoro aʻe nei i te hoê fare ruau, e ua aniani au i te hoê vahine no niʻa i toʼna utuafare. Ua faaite mai oia e e toru aʼna tamaroa, e piti o te haere pinepine noa nei e farerei iaʼna.

Ui atura vau, « E te toru ïa o ta oe tamaiti ? »

Pahono maira oia ma te taʻi, « aita vau i ite tei hea roa oia. Aita â vau i faaroo aʻe nei noʼna a tau matahiti i teie nei. Aita vau i ite ehea rahiraa mootua taʻu ».

No te aha tatou e pure ai

Mai te hiaai o teie metua vahine ia faaroo i te parau apî no taʼna mau tamaiti, e mea ohie roa ia ite no te aha te hoê Metua Here i te Ao ra e hinaaro mai ai i te parau apî oTaʼna mau tamarii.1 E nehenehe tatou e faaite i to tatou here i te Atua na roto i te pure. Ua faaohie hoʻi Oia i te reira. E pure tatou Iaʼna i te mau taime atoa. Aita e titauhia te hoê mauihaa. Aita atoa tatou e titauhia ia faaî i te uira e aore râ, ia aufau i te moni avaʻe.

E pure vetahi ia roo-anaʻehia ratou e te tahi mau fifi. Eita roaʼtu vetahi e pure. Te na o ra te hoê irava parau : « Aita outou i manaʻo i te Fatu ra i to outou Atua i te mau mea taʼna i horoʻa mai na outou ra, te manaʻo noa ra râ outou i ta outou mau taoʻa, aita râ i haamaitai i te Fatu i te Atua ra… no te reira ».2

Ua faaue te mau peropheta ia tatou ia pure ma te haehaa e te pinepine.3

Nahea ia pure

Ua haapii mai o Iesu nahea.4 E pure tatou i to tatou Metua i te Ao ra,5 na roto i te iʻoa o Iesu Mesia,6 na roto i te mana o te Varua Maitai.7 Teie ïa te « faanahoraa mau no te pure »,8 eiaha ia rahi te parau rii « faufaa ore » 9 e aore râ, te faahitiraa i te parau ia « hiʻohia mai e te mau taata atoa ».10

Ua heheu mai Iesu e te pure nei tatou i te hoê Metua tei î i te paari o tei ite atea i te mau mea hou tatou a ani ai iaʼna.11

Ua haapii Moromona i taʼna tamaiti, ia Moroni, ia pure tatou « ma te puai hope o te aau ». 12 Ua parau Nephi, « Te pure noa nei a hoʻi au ia [ratou] i te ao, e te faararirari noa nei hoʻi toʻu roimata i toʻu tuarua ia ratou i te ruʻi, … e te tiʻaoro noaʼtura vau i toʻu Atua ma te faaroo, e ua ite hoʻi au e, e faaroo mai oia i taʻu ra tiʻaororaa ».13

E rahi roa te mana au mau o te pure na roto i te haapaeraa i te maa, i te tahi mau taime, e no te hoê tumu taa ê mau.14

E pûpû-atoa-hia te pure ma te mamu noa. E nehenehe te hoê e feruri i te pure, ia ore te parau ia anoi-noa.15 E tuturi pinepine tatou ia pure ; e nehenehe tatou e tiʻa noa e aore râ, e parahi.16 E mea iti aʻe te faufaa no te huru faanahoraa o te pure i te auraroraa pae varua i te Atua.

E faaoti tatou i ta tatou pure « na roto i te iʻoa o Iesu Mesia, amene ».17 Ia faaroo tatou i te hoê taata ia pure, e amui tatou i ta tatou « amene », oia hoʻi ïa, « Naʻu atoa teie pure ».18

Eaha te taime ia pure

Eaha te taime tatou e pure ai ? Ua parau te Fatu, « A imi itoito noa, a pure noa i te mau taime atoa, e ia faaroo noa hoʻi, e e ohipa amui mai te mau mea atoa ei maitai no outou ».19

Ua parau Alama, « E ui atu i te Fatu i te mau mea atoa ta oe e rave ra, e naʼna hoʻi oe e arataʻi i te maitai ; e ia taʻoto oe i te ruʻi ra, ia taoto ia oe i te Fatu ra, ia tiaʻi mai oia ia oe i ta oe na taotoraa ; e ia tiʻa aʻera oe i te poʻipoʻi, ia î to aau i te haamaitai i te Atua ra ».20

E pure tatou i te vahi moʻemoʻe, e pure tamau tatou e te utuafare, i te taime tamaaraa, e i roto i te mau ohipa o te mahana. E mea ohie roa, e nunaa pure tatou.

To tatou mau iteraa rau no te pure

Rave rahi o tatou tei roaa te mau iteraa rau no te mana au mau o te pure. Ua faaite au i toʻu i te hoê paterealeha o te tĭtĭ no te pae apatoa o Utah. Ua farerei mau no te taime matamua i roto i taʻu piha taote a 40 matahiti i mairi aʻenei, i te tupuraa te ohipa tapuraa maʻi mafatu. Ua mauiui teie varua moʻa no te paruparu o toʼna mafatu. Ua ani mai oia i te tauturu, ma te manaʻo e na te hoê piha iti i roto i toʼna mafatu te tumu o te fifi e e nehenehe te reira e rapaau.

I roto i te hiʻopoʻaraa onoono, ua itehia e piti teie na piha iti i roto i toʼna mafatu. E nehenehe ia tapu i te hoê, eiaha râ te tahi. No reira, e ere i te mea maitai ia tapu. Aita roa oia i farii maitai i teie faaotiraa.

Hoê â parau tei horoʻahiaʼtu iaʼna i roto i te mau farereiraa i muri iho. I te pae hopea, ua paraparau mai oia iaʻu ma te manaʻo ahoaho : « E te taote Nelson, ua pure au no te farii i te tauturu e ua arataʻihia mai au ia oe. Aita te Fatu e heheu mai iaʻu nahea ia rapaau i te piti o te piha iti tera râ, e nehenehe Oia e heheu te reira ia oe. Ua ineine hoʻi to oe feruriraa. Mai te mea e tapu oe iaʻu, e faaite mai te Fatu ia oe eaha te ohipa e tiʻa ia rave. A tapu oe iaʻu, e a pure ia horoʻahia mai te tauturu o ta oe e hinaaro ».21

Ua puta pû roa toʼna faaroo rahi i roto iaʻu. Nahea ia vau i te patoʻi faahou atu iaʼna ? I muri mai i ta maua pure amui, ua farii au ia tamata. Ei faaineineraa no taua mahana riʻariʻa ra, ua pure e ua pure tamau noa vau tera râ, aita â ra vau i ite nahea ia rapaau i teie nei piha iti. Tae noaʼtu i te taime tapuraa, 22 ua ui mai toʻu tauturu tapu, « Nahea oe ia rave i te reira ? »

Ua parau atu vau, « Aita vau i ite ».

Ua haamata maua i te tapu. I muri aʻe i te iriti-raa-hia te piha iti matamua, 23 ua tae maua i te piti o te piha iti. Ua ite maua e, aita roa aʻe i ino roa, ua aano roa râ i ore ai e ohipa maitai faahou. A hiʻopoʻa maitai ai i te reira, ua tae mai te hoê manaʻo i roto i toʻu feruriraa : A faaiti i toʼna menemeneraa. Faaite atura vau i toʻu tauturu. « E ravaʻi noa mai te mea e faaiti mai taua i toʼna menemeneraa ia riro mai te huru mau ».

Nahea ïa ? Aita e nehenehe ia taaamu i te hoê hatua, mai ta tatou e taaamu i te hatua i niʻa i te piripou. Aita atoa e nehenehe e taumi i te hoê taaamu mai te ravehia i niʻa i te hoê puaahorofenua. I ô mai ai te hoê hohoʻa papu maitai i roto i toʻu feruriraa, ma te faaite e nahea ia nira – ia tuu i te hoê tufeturaa i ô e ia firi i raro aʻe. Te ite noa ra vau i taua hohoʻa ra – e te mau haapapuraa i te mau vahi e tano ia nira. Ua oti te tataʻiraa mai tei faaitehia iaʻu. Ua tamatamata maua e inaha, e mea iti roa te tahe o te toto. Ua parau mai toʻu tauturu, « E semeio mau teie ».

Ua pahono vau, « E pahonoraa teie i te pure ».

Ua ora oʻioʻi roa teie taata maʻi e ua mauruuru oia. Eiaha noa i te mea e ua tauturuhia oia, e tauturu-atoa râ no vetahi tei raeʻa-atoa-hia i teie nei fifi o tei riro ei ohipa umere mau. Aita râ vau i rave mai i te tura noʻu. Ia faateiteihia râ teie paterealeha faaroo e te Atua, tei pahono i ta maua mau pure. Ua ora teie nei taata faaroo e rave rahi matahiti, e ua hoʻi i toʼna hanahana mure ore.

A ani i te Fatu

Ia pure tatou, eiaha tatou e manaʻo i te horoʻaʼtu i te parau aʻo, e tiʻaoro ra tatou i te Fatu,24 e e faaroo atu i Taʼna parau aʻo.25 Na te pure matamua a Iosepha Semita i faatupu i te Faahoʻiraa mai o te evanelia.26 Ua farii oia i te Parau Paari i muri i toʼna aniraa i te Fatu.27 Ua fariihia te heheuraa no niʻa i te autahuʻaraa i te matahiti 1978 e te peresideni Spencer W. Kimball i muri iho i taʼna aniraa onoono.28 Ua tae mai te faaurûraa no te hamaniraa i te mau hiero naʻinaʻi i muri iho i te feruriraa hohonu a te peresideni Gordon B. Hinckley.29

Te mau pahonoraa o te mau pure

Eita ta tatou mau pure atoa e pahonohia mai te au i ta tatou e hinaaro. I te taime e pahonohia mai e « Aita ». Eiaha tatou e maere. Aita te mau metua maitai i roto i te tahuti nei e parau noa ‘Eʻ i te mau titauraa atoa a ta ratou mau tamarii.30

I te hoê pureraa pô utuafare aita i maoro aʻenei, te hauti haere ra ta maua mau mootua. Ua riri roa aʻera taʻu mootua tamaroa e 6 matahiti i te parauraa toʼna papa ua hora no te hoʻi i te fare. Eaha ia ta teie tamaiti here i rave ? Ua haere mai oia iaʻu nei e ua parau mai,

« E papa ruau, e horoʻa mai anei oe i ta oe parau faatiʻa no te patoʻi i toʻu papa ? »

Pahono atura vau, « Aita, e taʻu tamaiti here. Hoê o te mau haapiiraa rahi o te oraraa nei, oia ïa, e roaa te oaoa na roto i te haapaʻoraa.31 A hoʻi i te fare e to oe utuafare, e oaoao ïa oe ». Noaʼtu e aita oia i au i taʻu parau, ua haapaʻo ra oia.

E mea tiʻa ia pure tatou ia au i te hinaaro o to tatou Metua i te Ao ra. Ua hinaaro oia i te tamata ia tatou, ia haapuai ia tatou, e ia tauturu ia tatou ia roaa to tatou paari.32 A tapeʻahiaʼi te peropheta Iosepha Semita i te fare auri no Liberty, ua taparu oia ia tuuhia oia. Ua pahonohia mai taʼna mau pure na roto i teie nei parau : « Ia hau mai na to oe aau ; e vai poto noa mai to oe enemi e to oe mau ati hoʻi ».33

Himene no te pure

Ua faaurûhia vau ia faaoti i teie parau poroʻi no niʻa i te pure na roto i te pure – horoʻahia na roto i te hoê himene. Ua parau te Fatu e « E riro te himene a tei parau-tiʻa ei pure iaʻu nei ».34 No roto mai teie himene i te buka ra Hymns,35 e ua papaʻi au i te tahi mau parau apî no te reira. Ma te haamauruururaa ia Craig Jessop, ia Mack Wilberg e te tahi atu mau hoa i roto i te pŭpŭ himene no te Fare Menemene, e faaroo mai ia tatou i te himene no teie nei pure. E te taeaʻe Jessop, tei a oe ra :

Na roto i te iʻoa o Iesu Mesia, amene.

Te mau nota

  1. E rave rahi mau irave e faaite ra no te feia « ru ore hoʻi ratou i te haamanaʻo i te Fatu » (a hiʻo Mosia 9:3 ; 13:29 ; Helamana 12:15).

  2. Helamana 13:22.

  3. Ei mau hiʻoraa, a hiʻo Ieremia 29:11-13 ; Iolea 2:32 ; Philipi 4:6 ; 1 Nephi 15:8-11 ; Alama 37:37.

  4. A piri atu ai Oia i te Taraehara, ua tamau Oia i te pure noa i Toʼna Metua, i Getesemane (a hiʻo Luka 22:39-44) e i niʻa i te tatauro i Kalavaria (a hiʻo Luka 23:33-34, 46).

  5. A hiʻo Mataio 6:9 ; Iritiraa a Iosepha Semita, Mataio 6:10 ; Luka 11:2 ; 3 Nephi 13:9.

  6. A hiʻo Iakoba 4:4-5 ; 3 Nephi 20:31 ; 27:9 ; Mose 5:8.

  7. A hiʻo Moroni 6:9 ; 10:4-5.

  8. Bruce R. McConkie, A New Witness for the Articles of Faith (1985), 380.

  9. Mataio 6:7.

  10. Mataio 6:5.

  11. A hiʻo Mataio 6:8.

  12. Moroni 7:48.

  13. 2 Nephi 33:3 ; a hiʻo atoa Iakoba 3:1 ; Alama 31:38 ; PH&PF 37:2.

  14. A hiʻo Mataio 17:21 ; Mareko 9:29 ; 1 Korinetia 7:5 ; Mosia 27:22-23 ; Alama 5:46 ; 3 Nephi 27:1 ; PH&PF 88:76.

  15. Te faaite ra hoê a ta tatou mau himene « Te hiaai mau o te aau,/ I parau e aore râ, i parau- ore- hia, /… Te hiʻo ra atu i niʻa / Aita hoʻi e taata o te Atua anaʻe râ » (Te mau Himene, no. 77).

  16. E tano no taua ohipa ra.

  17. No te tahi mau haapiiraa, a hiʻo Dallin H. Oaks, « The Language of Prayer », Ensign, me 1993, 15-18.

  18. A hiʻo The American Heritage Dictionary of the English Language, 4raa o te neneʻiraa (2000), 57: « Amene… faahitihia i te hopea o te hoê pure e aore râ, te hoê parau i parauhia ei faariiraa. [E parau Peretane Tahito, e Latino amen, parau Hereni, parau Hebera amen, oia hoʻi te reira mau, e parau mau, no roto mai i te aman, tei papu mau »].

  19. PH&PF 90:24 ; haapapuraa tuuhiaʼtu.

  20. Alama 37:37 ; haapapuraa i faahauhia. A hiʻo atoa Mosia 26:39 ; Alama 26:22. No te faaauraa i te haapiiraa a Paulo, a hiʻo 1 Tesalonia 5:17.

  21. Noaʼtu e aita taʼna mau parau i papaʻihia verbatim, e mea tiʻa mau ra teie parau.

  22. Ua tupu teie tapuraa i te 24 no me 1960.

  23. Ua oaoa toʼna piha iti, ua roaa teie maʻi na roto i te hoê fiva rumati.

  24. Ua parau te Fatu, « Mai te mea e ani mai outou, e farii mai hoʻi outou i te heheuraa na niʻa i te heheuraa, te ite hoʻi na niʻa i te ite » (PH&PF 42:61). Mai teie te huru, I roto i te tuhaa 9 no te Parau Haapiiraa e te Mau Parau Fafau. Ua tatara te Fatu e « Ia imi oe i te reira i roto i to oe aau e tiaʼi ei reira oe e ani mai ai iaʻu e ua tiʻa anei, e mai te mea ua tiʻa ra, e faatupu ïa vau i te ahu i roto i to oe ouma ; na te reira oe e ite ai em ia tiʻa ihoa. Mai te mea râ e ere ïa i te mea tiʻa e ore roa e noaa ia oe te reira huru ahu i roto ia oe ra, e haapourihia ra to oe manaʻo » (irave 8-9). A hiʻo atoa Iakoba 4:10.

  25. A hiʻo Exodo 15:26 ; Deuteronomi 13:17-18 ; 1 Samuela 15:22 ; Ieremia 26:4-6 ; Omoni 1:13 ; PH&PF 41:1 ; 133:16.

  26. A hiʻo Te Aamu o Iosepha Semita 1:15-20.

  27. A hiʻo PH&PF 89.

  28. A hiʻo Te Faaiteraa Mana 2 [reo Farani].

  29. A hiʻo Church News, 1 no atete 1998, 3, 12 ; 13 no mati 1999, 9 ; 4 no mati 2000, 7 ; 24 no tiunu 2000, 9.

  30. Ua faaruru atoa te Tamaiti a te Atua i teie nei tamataraa, « ma te parau e, E taʻu Metua, ia tiʻa ia oe ra, e hopoi ê atu i teie nei auʻa : ia tupu râ to oe hinaaro eiaha toʻu » (Luka 22:42). Ua ite te Metua e te Tamaiti toopiti eaha te rave.

  31. No te haapaʻoraa i te ture moʻa, a hiʻo Aberahama 3:25. No te haapaʻoraa i te aʻo paari no na metua here, a hiʻo Ephesia 6:1 ; Kolota 3:20.

  32. A hiʻo Helamana 10:4-5.

  33. PH&PF 122:7.

  34. PH&PF 25:12.

  35. Hymns no. 337 ; fatuhia e Joseph Parry ; reo : SWANSEA.