Na te faaroo i roto i te ahoaho e horoʻa mai i te hau e te oaoa
Noaʼtu te huru rumaruma e vai nei i roto i te ao nei i teie mahana, noaʼtu te mau vero ta tatou e farerei nei, … e roaa taua oaoa ra ia tatou i teie nei.
Ia oti taʼna haapiiraaʼtu i te nahoʻa taata, fano atura Iesu e Taʼna mau pìpì i te pae hitiʻa o te râ o te Roto no Galilea. Ua pô hoʻi e te taoto ra te Faaora i niʻa i te hoê tuaurua i te reimuri o te poti. « Ua tupu maira te hoê maa mataʻi rahi, fati maira te are i niʻa i te pahi e î roa aʻera ». No to ratou riʻariʻa rahi ua faaaraʼtura Taʼna mau pìpì Iaʼna : « E te orometua, eita oe e haapaʻo mai i to matou nei pohe ? » 1 Ua pahono maira Oia ma te mărû, mai Taʼna i mataro ra : « Eaha outou i mătaʻu ai, o outou i te faaroo tapetepete e ? » 2 « Ua tiʻa aʻera oia i niʻa, avau atura i te mataʻi, e ua na ŏ atura i te are, a faaea, a mania. Pohe ihora te mataʻi, mania roaʼtura ».3
Oia tei rahu i te fenua nei, teie Oia e faaue faahou nei i te mau mea o te natura.4 Uiui maere aʻera Taʼna mau pìpì ratou ratou iho e, « O vai hoʻi teie o tei faaroo te mataʻi e te moana atoa iaʼna ? » 5
Te ora nei tatou i te hoê tau arepurepu. E vero rahi no te ino tei farara mai i niʻa i te fenua nei. Te haati nei te mau mataʻi o te ino ia tatou ; te tupaʻi nei te mau are o te tamaʻi i niʻa i to tatou pahi. Mai ta Paulo i papaʻi atu ia Timoteo ra : « E tupu te ati rahi i taua anotau hopea nei. E riro te taata nei ei miimii, e nounou moni, e faaahaaha, e teʻoteʻo, e faaino, e faaroo ore i te metua, e mauruuru ore, e te viivii, … E hohoʻa paieti hoʻi to ratou ; o te puai râ o te reira ra, ua hunahia ïa ia ratou. »6
E tiʻa ia parau e, te haati nei te mau ata riʻariʻa ia tatou, tera râ, mai te hau tei tupu i roto i te mau Aposetolo i roto i te poti na roto i te mau parau a te Faaora, te faatupu atoa nei te reira mau parau i te hau i roto ia tatou i teie mahana : « E ia faaroo outou i te parau tamaʻi ra, e te aueue roo tamaʻi, eiaha e aehuehu, ia tupu hoʻi te reira e tiaʻi, aita râ i fatata te hopea i reira ».7 « Mai te mea râ ua vai ineine noa outou e ore outou e mătaʻu ».8
Na ŏ atura Iehova ia Elia, « A haere, ei niʻa i te mouʻa tiʻa noaʻi i te aro o Iehova ». Ua faaroo Elia i te parau, e ia mure aʻera te mataʻi rahi, te aueue fenua e te auahi, « e reo iti haʻihaʻi maira ». Ui atura te Fatu ia Elia tei tapuni i roto i te ana ra, « Te aha noa na oe i ô na, e Elia ? » Ua parau atura Elia, « No te mea, ua faaruʻe te tamarii a Iseraela i ta oe parau, ua faaruʻe i ta oe mau fata i raro, e ua taparahi i te mau peropheta na oe i te ʻoʻe ; e o vau nei, o vau anaʻe ra tei toe ; e te imi mai nei ratou iaʻu nei ia pohe ». Tera râ, e ohipa faufaa roa ta te Fatu i faataa na Elia, e no reira « ua parau maira Iehova iaʼna, A haere, mai te medebaraʼtu nei e Damaseko ».9 Haere atura Elia.
E mea tiʻa atoa ia tatou ia tiʻaʼtu i rapae i to tatou mau ana paruruhia, no te mea e ohipa faufaa tei faataahia na tatou. Na roto i te reo iti haʻihaʻi o Toʼna Varua, e paruru mai, e tauturu mai e e arataʻi atoa mai te Fatu ia tatou.
Haamanaʻo outou e, ua haapii atu Oia i te taeaʻe o Iareda e nahea ia hamani i te pahi no toʼna utuafare, no te tauturu ia ratou ia fano ma te peʻapeʻa ore na niʻa i te moana aano, no te paruru ia ratou i te mataʻi e te are, e no te arataʻi ia ratou i te fenua i parauhia ra.
Mea taaê rii te hamaniraa o taua mau pahi ra, tera râ, e mau pahi papu : « E te paremo ra ratou i te miti, aita e peʻapeʻa to ratou no te miti, … e aita roa e tiʻa ia parari ratou i te mea rahi o te tai, e aore roa i tiʻa ia haapeʻapeʻahia e te iʻa rahi ra ».10
Tera râ, aita e mori to roto i teie mau pahi. Ua riro te reira ei haapeʻapeʻaraa i te feruriraa o te taeaʻe o Iareda. Aita oia e hinaaro ia tere noa toʼna utuafare i roto i te pouri ; no reira, aita oia i tiaʻi i te faaueraa, ua pŭpŭ atu râ oia i toʼna manaʻo i te Fatu ra. « E ua parau maira te Fatu i te taeaʻe o Iareda, na ŏ maira, Eaha taʻu e rave ia roaa mai te maramarama i roto i to outou mau pahi ? » 11
Ei pahonoraa na te taeaʻe o Iareda i teie nei uiraa, ua titauhia iaʼna ia faaitoito : Taʻumaʼtura oia i te mouʻa i parauhia o Selema « e ua hamani ihora oia i na ofaʻi rii e hoê ahuru ma ono no roto i te mato tarapapehia ra ».12 I muri iho, ani atura oia i te Fatu ia faatiʻaia i taua mau ofaʻi ra i taʼna rima ia horoʻa mai hoʻi te reira i te maramarama.
Tatou e te mau metua e tae noaʼtu i te feia faatere, ia haamanaʻo noa tatou e, « e ere i te mea tiʻa [i te Fatu] ia faaue [mai] i te mau mea atoa ».13 Mai te taeaʻe o Iareda ra, e tiʻa atoa ia tatou ia hiʻopoʻa maite i te mau hinaaro o te mau melo o to tatou utuafare, ia faanaho i te hoê faanahoraa no te pahono i taua mau hinaaro ra, e i muri iho, faaite atu i ta tatou faanahoraa i te Fatu ra na roto i te pure. E titauhia to tatou faaroo e te itoito no te raveraa i te reira, tera râ, e tauturu mai Oia ia tatou ia titau tatou i Taʼna tautururaa e ia haapaʻo tatou i Toʼna hinaaro.
I muri aʻe i taua ohipa ra i tupu i rotopu iaʼna e te Fatu, ua tamau noa te taeaʻe o Iareda i te faaineine iaʼna ma te itoito no te tere.14 E na reira atoa tatou i te haapaʻo i te mau haapiiraa a to tatou mau peropheta. Ua aʻo mai to tatou mau peropheta ora ia tatou i tera taime e tera taime, ia faatitiaʻifaro i to tatou oraraa – ia faaore i te tarahu, ia haaputu i te maa e te tahi atu mau mea e titauhia, ia aufau i ta tatou tuhaa ahuru, ia titau i te ite, e ia haapaʻo i te mau faaueraa. Ua haapaʻo anei tatou i teie mau arataʻiraa faufaa roa ?
Ia hiʻo anaʻe tatou i roto i te mata o ta tatou mau tamarii e ta tatou mau mootua, e ite tatou i te manaʻo tapitapi e te mătaʻu o to tatou nei anotau. I te mau vahi atoa ta teie mau tamarii e haere, te faaroo nei ratou i te parau no te ohipa ore, no te veve, no te tamaʻi, no te ino i te pae morare, e no te taparahi taata. Te uiui nei ratou e, « nahea tatou i mua i teie mau fifi ? »
No te iteraa i te pahonoraa, te hiʻo nei ratou i muri i roto i to tatou mau mata e te faaroo nei ratou i ta tatou mau parau. Te faaroo ra anei ratou ia tatou ia parau ma te faaroo e te tiʻaturi, noaʼtu te ahoaho o to tatou nei anotau ?
Te hinaaro nei ratou ia ite ia tatou ia tamau noa i te pure amui e i te taiʻo amui i te mau papaʻiraa moʻa, ia tamau noa i te faatere i te pô utuafare e te mau apooraa utuafare, i te tavini ma te itoito i roto i to tatou mau piiraa no te Ekalesia, ia tamau noa i te haere i te hiero, e i te haapaʻo i ta tatou mau fafauraa. Ia ite ratou i to tatou paari i te haapaʻoraa i te mau faaueraa, e iti to ratou mătaʻu, e e tupu i te rahi to ratou tiʻaturi i te Fatu.
Na roto i te faaiteraa tatou i to tatou faaroo i roto i te arepurepuraa, te faaite papû ra ïa tatou ia ratou e, e ere te riri uʻana o te enemi i te mea e pohe ai tatou. Ua pure Iesu i Toʼna ra Metua no tatou : « Aore au i pure ia oe e ia hopoi ê atu oe ia ratou i teie nei ao, ia tiaʻi mai râ oe ia matou eiaha ei ino ».15 E pahonohia teie pure i te taime e i te tau ta te Metua i te Ao ra i faataa, ia au i to tatou faaroo.
Taaê noaʼtu te reira, e auraa e e tumu to to tatou mau ati i te tahuti nei. A hiʻo na tatou i te peropheta Iotepha Semita : i roto i toʼna oraraa ua farerei oia i te hoê aroraa teimaha – te maʻi, te ati pepe, te veve, te haroaroa-ore-hia oia, te faahaparaa hape, e te hamani-ino-raa. E riro paha te hoê taata i te ui e, « No te aha aita te Fatu i paruru i Toʼna peropheta i taua mau ati ra, aita i horoʻa iaʼna i te mau raveʻa rau, e aita i tapiri i te vaha o toʼna mau taata faahapa ? » Te pahonoraa, teie ïa, ua titauhia ia tatou tataʻitahi ia farii i te tahi mau iteraa no te riro mai mai to tatou Faaora te huru. I roto i te tahuti nei, o te mauiui e te ati te orometua, ua faataahia râ te mau haapiiraa ei haamaitairaa e ei faaetaetaraa, eiaha ei haamouraa. Na ŏ atura te Fatu ia Iosepha te taata faaroo :
« E taʻu tamaiti, ia hau mai na to oe aau ; e vai poto noa mai to oe enemi e to oe mau ati hoʻi ».16
« Mai te mea e hurihiaʼtu oe i roto i te moana ra ; mai te mea e tapoʻipoʻi mai te are tupaipai ia oe na ; mai te mea e riro mai te mau vero puai ei enemi no oe na ; mai te mea e haaputuputu mai te mau raʻi i te pouri, e amui mai te mau mea rii tumu no te faaapiapi i te eʻa ; … a ite mai oe e taʻu tamaiti nei e, e noaa ia oe te ite i te ohipa na roto i teie mau mea atoa nei, e e riro hoʻi ei maitai no oe na ».17
Noaʼtu te mau ati e rave rahi i roto i te oraraa o te peropheta Iosepha, ua tupu te mau ohipa rarahi no te faahoʻi-faahou-raa mai i te evanelia i te mau mahana hopea nei. Ua ite Iosepha, e ua haapii maira oia ia tatou e, i roto i taʼna tautooraa, aita te Fatu i faaruʻe iaʼna ia pohe noaʼtu. Ua riro atoa te mau tamataraa i to tatou faroo ei mau raveʻa faufaa rahi no te ite e, te hiʻo mai nei te Fatu i te ora maitai o to tatou varua, no te tauturu ia tatou ia rohi tamau noa e tae roaʼtu i te hopea ra.
I to tatou nei anotau, te tae mai nei ia tatou nei te mauhaa tauturu a te Fatu na roto mai i te mau oroʻa no Toʼna ra Hiero moʻa. Na ŏ atura te peropheta Iosepha i te Feia Moʻa no Navu, « E oroʻa hiero tei tiʻa ia outou ia farii, e te huitaeaʻe e, ia tiʻa ia outou ia ineine e ia upootiʻa i te mau mea atoa ra ».18 Ua tiʻa mau roa oia ! Na te haamaitairaa o te mau fafauraa o te hiero e te oroʻa hiero tei fariihia e ratou i tauturu i te Feia moʻa i te mau mahana hopea nei ia faaoromaʻi tamau maite i te ati ma te faaroo. I te hopea o toʼna tere, ua papaʻi o Sarah Rich i teie mau parau, « Ahiri aita te faaroo e te ite tei tuuhia mai i niʻa ia matou i roto i taua hiero ra… e au ïa to matou tere mai… te huru i te ouʻaraa i roto i te pouri ».19
E putapû roa taʻu aau ia ite au i te ahoaho rahi i roto i te oraraa o te Faaora. Noaʼtu e, e Tamaiti Fanau Tahi Oia na te Metua, ua imi te feia iino i te raveʻa ia taparahi pohe roa Iaʼna mai te haamataraa mai. I roto i Taʼna tau ohiparaa, ua apee-noa-hia Oia e te hoê vero parau papu ore, te haavare e te hamani-ino-raa, i te mau vahi atoa Taʼna e haere.
Te tupu nei te maere rahi i roto iaʻu ia feruri anaʻe au i te hepetoma o Toʼna ra poheraa : ua aro te tahuʻa i Toʼna mana, ua tamata i te faahema Iaʼna, e ua imi i te raveʻa e piti taime no te haapohe Iaʼna. I Gesemane, a taoto noa ai Taʼna mau pìpì, ua mamae Oia i te hara a te taata atoa nei e ua tahe maira te toto na roto i te mau poa o toʼna iri. Ua tavirihia Oia, ua haruhia, ua uiuihia, ua motohia, ua tutuhahia e ua tairihia. Ia oti Oia i te uiuihia e te apooraa ture, ua faaooo o Heroda Iaʼna e ua tuu atura Iaʼna ia Pilato ra, i reira Toʼna tuu-raa-hiaʼtu i mua i te nahoʻa taata iino. Ua huihia i te taura hui, ua faaheihia i te hei taratara, ua faahepohia Oia ia amo i Toʼna satauro e tae roaʼtu i Gologota ra. Ua patiahia te naero i roto i Toʼna na rima e Toʼna na avae. Ua faatiʻahia toʼna tino i niʻa i ropu i na taata eiâ matarohia. Ua haru te mau faehau i te mau mea e rave rahi Naʼna ra, e ua horoʻahiaʼtu te vinega no te faahaumaru i toʼna poʻihâ. E ono hora i muri aʻe ra,20 ua tuu atura Oia i Toʼna varua i roto i te rima o Toʼna ra Metua, auta aʻera e pohe atura.
Ia hiʻo anaʻe tatou i te hepetoma hopea o te oraraa o te Faaora ia au i ta tatou hiʻoraa no te tahuti nei, te manaʻo matamua e roaa mai ia tatou o te manaʻo mauiui ïa e te haamouraa. E riro tatou i te ite i te metua vahine anaʻe o te Faaora e i te tahi atu mau taata i te taʻiraa i pihaʻi iho i te satauro, te mau faehau mătaʻu, te fenua i te aueueraa, te mau mato i te parariraa, te paruru o te hiero i te mahaeraa, te pouri i te tapoʻiraa i te fenua e toru hora te maoro. Ua tupu atoa te reira huru vero e te haamouraa i roto i te Ao Apî nei. Parau poto noa tatou e, e vero rahi uʻana ta tatou e ite nei.
Tera râ, a hiʻo faahou na – i teie râ taime, na roto ïa i te mata o te faaroo.
I roto i te hepetoma hopea ra e te oto hoʻi o Toʼna ra oraraa, a feruri na e, ua haapii Iesu, ua faaite papu, ua faateitei, ua haamaitai, e ua faaetaeta i te taata ati tiʻa aʻe Iaʼna. Ua faatiʻa ia Lazaro mai te pohe mai, ua haapii i te parau no Toʼna Metua, ua faatitiaifaro i te hiero, ua parau i te mau parabole e rave rahi, ua ite i ta te vahine ivi i horoʻa ra, ua haapii atu i Taʼna mau pìpì i te mau tapaʻo no Toʼna Hoʻi-Piti-raa mai, ua haere atu i te fare o Simona te taata lepera ra, ua haamau i te oroʻa moʻa, ua horoi i te avae o te mau Aposetolo, e ua haapii i Taʼna mau pìpì ia aroha te tahi i te tahi. Ua faaite papu Oia i Toʼna tiʻaraa Atua ei Tamaiti na te Atua e ua parau i te parau no te Tamahanahana – te Varua Maitai. I roto i Taʼna pure arai faahiahia, ua pure Oia i Toʼna Metua no Taʼna mau Aposetolo e no te mau taata atoa e tiʻaturi nei i ta ratou mau parau, « ia tiʻa roa [Toʼna] oaoa ia ratou ra ». 21
I roto i Toʼna ra mau hora pouri rahi, aita te maramarama o te hau e te oaoa i mohimohi. Ua rahi atu râ te maramarama ! I muri aʻe i Toʼna poheraa ua fâ mai Oia ia Maria Magedalena. Eaha râ ïa te rahi o te oaoa i taua poʻipoʻi ra i te faaroo-raa-hia te parau apî e : « Ua tiʻa faahou aʻe nei ïa ! » 22 I muri aʻe ra, ua fâ mai Oia i te mau vahine i niʻa i te purumu ra ; ia Keleopa ra e hoê pìpì te haere anaʻe ra i Emausa ; i te mau Aposetolo e te mau pìpì i te tahua i niʻa ; ia Toma ra o tei ore i tiʻaturi e ia vetahi atu. Te ite-faahou-hia nei â te oaoa e te poupou i roto i te Taraehara e te Tia- faahou-raa.23
E ere râ i te reira anaʻe. I roto i te hoê orama, ua ite te peresideni Joseph F. Smith – e peropheta, e hiʻo, e e heheu parau – i te tere o te Faaora i roto i te ao varua :
« E ua putuputu i te vahi hoe te tiria rahi o te mau varua parau-tiʻa aita e roaa i te taiʻo, o tei vai parau-tiʻa i to ratou iteraa papu no te Mesia a ora ai ratou i te oraraa tahuti…
« Ua pohe pauroa teie feia, ma te paari i roto i te tiʻaturiraa i te hoê tiʻa-faahou-raa hanahana, …
«… [e] ua î ratou i te oaoa, e te oaoa amui nei ratou no te mahana o to ratou faaora-raa-hia tei te uputa roa.
« Ua amui ratou ma te tiaʻi i te taeraa mai o te Tamaiti a te Atua i roto i te ao varua, no te faaî hua i to ratou faaoraahia i te taʻumu o te pohe ».
Ua ite teie mau varua e aore e maoro « e riro to ratou tino repo i te faahoʻi-faahou-hia ei tino maitai roa, te ivi i toʼna ivi, e te mau uaua i te iʻo, e ia amuihia te varua i te tino e ia ore e taa faahou, e ia roaa te îraa o te oaoa ».
« [E] a tiaʻi ai e a aparau ai teie tiria rahi, ma te oaoa i te hora no to ratou faaoraraa mai te mau fifi ra o te pohe, ua fa mai te Tamaiti o te Atua, o tei faaite i te tiʻamâraa i te feia i tapeʻahia o tei vai parau-tiʻa ».24
E au mau taeaʻe e au mau tuahine, noaʼtu te huru rumaruma e vai nei i roto i te ao nei i teie mahana, noaʼtu te mau vero ta tatou e farerei nei, i roto anei i to tatou fare e to tatou utuafare, e roaa taua oaoa ra ia tatou i teie nei. I te tahi taime aita tatou e maramarama nei i te parau no te pohe, te maʻi, te mau fifi i te pae feruriraa e i te pae o te tino, te mau ati e tupu nei i niʻa ia tatou, te tamaʻi, e te tahi atu huru peʻapeʻa. Te tahi pae o teie mau mea, e mea faufaa ïa no to tatou tamataraa i te tahuti nei. E te tahi atu pae ra, mai ta Enoha i ite atea mai ra, e mau mea ïa no te faaineineraa i te Hoʻi-piti-raa mai o te Faaora, i te taime « e haapoirihia te mau raʻi, e e tapoʻihia te fenua e te hoê paruru poiri ; e aueue te mau raʻi, e te fenua atoa ra ; e e tupu te ahoaho rahi i rotopu i te mau tamarii a te taata, area râ », te na reira maira te Fatu, « e faaherehere au i toʻu feia i maitihia ». E ia ite aʻera Enoha i teie mau mea atoa nei, « ua [roaa aʻera iaʼna] te îraa o te oaoa ».25
I teie poʻipoʻi, i teie puʻe tau no te fanauraa e te tiʻa-faahou-raa o te Faaora, te faaite nei au i te hoê iteraa taaê ma te oaoa e te poupou e, ua haere mai Oia i te ao nei, ua mauiui no ta tatou mau hara, e e hoʻi mai â Oia. Na roto i to tatou faaroo Iaʼna e to tatou haapaʻo i Taʼna mau faaueraa, e roaa ia tatou « te tiaʻi papu roa » 26 e na te reira e faaore i te poiri o te manaʻo paruparu, i roto i teie tau ahoaho. Te taata tei Iaʼna te mana no te tamarû i te mau mea rii tumu o te fenua nei, tei Iaʼna atoa ïa te mana no te tamarû i to tatou varua, e no te paruru ia tatou i te vero, « A faaea, a mania ».27
Te faaite papu nei au i te reira na roto i te iʻoa o Iesu Mesia ra, amene.