Elder Shirley D. Christensen
No te Hitu Ahuru

Ua riro te poʻipoʻi o te 18 no Me 1980 ei mahana haamanaʻoraa na elder Shirley Dean Christensen. Ua haamata na roto i te hoê mahana nehenehe roa no te tau faatupuraa raau. I te avatea raa, ua faaʻereʻere te raʻi o tRoyal City, i Washington, riro atura te mau aua matie e te mau tumu raau mai te rehu auahi ra te huru. E ua ura te Mouʻa Saint Helens, 150 maile (240km) i te pae tooʻa o te râ no Royal City.

I te mau mahana i muri mai, ua mataʻitaʻi elder Christensen i te ino-rahi o te rehu tei faaino i taʼna mau tumu apara o tei topatopa te mau maa rii. Ua manaʻo oia e ino roa taʼna imiraa moni.

E mea maitai roa râ te toe o te mau apara e e mea iti roa tei ino, e na te reira i haamaitai i taʼna faaapu. « Ua paruru te Fatu i ta matou hotu », o taʼna ïa i parau. « Ua riro taua matahiti ra ei matahiti maitai-roa-aʻe. » Ua faaau oia i taua haamaitairaa i te aufauraa a toʼna utuafare na roto i te faaroo i te tufaa ahuru e i to ratou hiaai rahi i te haapaʻo i te mau faaueraa a te Fatu. Na te reira atoa i haapii iaʼna e nehenehe atoa te enemi e hopoi mai i te mau haamaitairaa manaʻo-ore-hia.

E 64 matahiti to elder Christensen, e melo apî i roto i te pŭpŭ piti o te Hitu Ahuru, fanauhia i Preston, Idaho, ia LeGrand e ia Blanche Naed Christensen i te 8 no Tenuare 1939. Ua paari mai oia i Idaho e i Washington e ua haere i te Brigham Young University, i reira toʼna farereiraa ia Geniel Johnson. Ua faaipoipohia raua i te 23 no Tiunu 1962 i roto i te Hiero no Manti i Utaha. E ono a raua mau tamarii.

Ua tavini o elder Christensen ei misionare i Uruguay mai te matahiti 1959 tae atu 1961, i reira toʼna iteraa papu i tupu ai i te rahi no niʻa i te peropheta Iosepha Semita. « Hou râ te reira, e nehenehe noa vau ia aamu i te Orama Matamua. I toʻu haapiiraa na roto i te pure ia vetahi ê ra, i reira te putapuraa mai o teie nei iteraa no te peropheta Iosepha e no te evanelia i faahoʻi-faahou- hia mai », o taʼna ïa i parau. « Ua ite au e e parau mau te mea o taʻu i haapii ».

Mai te matahiti 1999 tae atu i te 2002, ua tavini o elder Christensen ei peresideni no te misioni no Ra-Parata Resistencia. Ua tavini atoa ei rave ohipa i roto i te hiero, ei peresideni amaa, ei episekopo, e ei melo no te hoê peresideniraa titi.