Te tamaʻi e te hau
Te tiʻaturi nei au e, e parahi noa te mau taata o te Fatu i roto i te hau te tahi e te tahi, i roto i teie mau tau aehuehu, taaê noaʼtu to ratou tururaa i te tera e tera faatereraa hau fenua e aore râ, i tera e tera pŭpŭ.
E toʻu mau taeaʻe e toʻu mau tuahine, i te sabati i mairi aʻe nei, a parahi noaʼi au i roto i toʻu piha toroʻa ma te feruri i te mea taʻu e parau i teie taime, ua taʻi maira te niuniu no te faaite mai iaʻu e, ua pohe te Sergent James W. Cawley, no te nuu Marine Marite, i Irakia. E 41 toʼna matahiti, e ua vaiiho mai oia i muri iaʼna hoê vahine e e piti tamarii naʻinaʻi.
A piti ahuru matahiti i mairi aʻe nei, e misionare o elder Cawley na te Ekalesia i te fenua Tapone. Mai te tahi atu mau tamarii e rave rahi, ua paari oia i roto i te Ekalesia, ua hauti oia i toʼna tau tamarii haere haapiiraa, ua opere i te oroʻa moʻa ei diakono, e ua tiʻamâ no te rave i te hoê tau misionare, no te haapii i te evanelia o te hau i te mau taata no Tapone. Ua hoʻi mai oia i te fare, ua faaô iaʼna i roto i te nuu Marines, ua faaipoipo, ua riro mai ei mutoi, e ua pii-faahou-hia ia faaô i roto i te nuu faehau, e ua farii oia i te reira ma te otiʻatiʻa ore.
Toʼna oraraa, taʼna misioni, taʼna ohipa faehau, toʼna poheraa, ua riro ïa ei faaiteraa i te taaêraa i rotopu i te hau o te evanelia e te ino o te tamaʻi.
E no reira, ua faaoti au e parau i te hoê parau no niʻa i te tamaʻi e te evanelia ta tatou e poro nei. Ua paraparau riiʻtu vau i te reira i roto i ta tatou amuiraa i te avaʻe atopa 2001 ra. I toʻu haereraa mai i mua i teie purupiti i taua taime ra, no haamata noaʼtura ïa te tamaʻi no te aro i te peu haamataʻu. Ua riro te tamaʻi e tupu nei i teie mahana ei aveave e ei puʻoiraa no taua aroraa ra. Te tiʻaturi nei au e, te haamata nei te reira i te hope.
Te titau nei au i te arataʻiraa a te varua no te aparau atu i teie nei parau. Ua pure e ua feruri maite au i teie tumu parau. Te taa nei iaʻu e, e tumu parau fifi teie no te hoê haapaʻoraa i te ao atoa nei, tae roaʼtu no ratou e ere i ta tatou haapaʻoraa.
Aita te manaʻo o tera nunaa e tera nunaa i hoê i niʻa i te ohipa e tupu nei i teie taime. Mea puai roa te mau feruriraa. Te ite nei tatou i te mau taahiraa no te farii e no te patoʻi. Tei te ao atoa nei ta tatou Ekalesia, e te vai nei te mau melo i roto i te rahiraa o te mau nunaa tei patoʻi i teie ohipa. E manaʻo to roto i to tatou mau taata. Te vai nei to ratou manaʻonaʻoraa.
Oia mau, e ere te tamaʻi i te ohipa apî. Te mauhaa tamaʻi tei taui. Ua tamau noa te taata i te haamaitai i toʼna aravihi no te taparahi e no te haamou. I vai na te tamaʻiraa i tera tau e tera tau no taua mau tumu nei â.
Te faaite poto ra te Buka Apokalupo i te peʻapeʻa rahi tei tupu i roto i te aau e i niʻa i te huru haavare ore o te mau tamarii a te Atua. E mea tano ia faahiti-faahou-hia taua aamu ra :
« E e tamaʻi tei niʻa i te raʻi : O Mihaela e taʼna ra mau melahi tamaʻi atura i te teni ; e ua tamaʻi maira te teni e taʼna ra mau melahi,
« Aore râ i riro te re ia ratou ; e aore roaʼtura o ratou e parahiraa i niʻa i te raʻi.
« Hurihiaʼtura hoʻi te teni rahi i rapae, o taua ophi tahito ra ïa, o tei parauhia o te diabolo ra, e o Satane hoʻi, o tei haavare i to te ao atoa nei ; i hurihia oia i rapae i niʻa iho i te fenua nei, e taʼna mau melahi atoa ua huri-atoa-hia i rapae » (Apokalupo 12:7-9).
O Isaia tei parau, i muri aʻe ra, no niʻa i taua tamaʻi rahi ra (a hiʻo Isaia 14:12-20) Na te heheuraa no teie tau e horoʻa mai i te tahi atu mau haamaramaramaraa (a hiʻo PH&PF 76:25-29), e tae noaʼtu i te buka a Mose (a hiʻo 4:1-4), te faaite ra te reira i te opuaraa a satane no te haamou i te tiʻamâraa o te taata.
I te tahi taime te hinaaro nei tatou e faateitei i te parau no te mau hau rarahi i tahito ra, mai te hau Turekia, te hau Roma e te hau Bizatina, e no teie rii roa nei tau, te Hau Peretane rahi. Te vaira râ te hoê vahi piʻo i roto i taua mau hau ra. Te vaira te hoê hiʻoraa riʻariʻa e te oto, o te parau ïa no te haruraa haavî, te faatitiraa, te taparahiraa, e tae noaʼtu i te parau no te haamauʻaraa rahi no te ora e no te moni.
Teie te parau faaooo rii a te taata papaʻi parau etotia ra o Thomas Carlyle, i te hoê taime : « Eita e ore e, te ata noa ra te Atua i te ohipa e ravehia nei e te mea ta toʼna rima i hamani i niʻa i te fenua nei » (faahitihia i roto i te Sartor Resartus [1836], 182). Te feruri nei au e, te oto nei to tatou Metua i te raʻi ra ia hiʻo mai Oia i Taʼna mau tamarii i raro nei, tei haamauʻa, i roto i te mau tenetere e rave rahi, i to ratou tuhaa matahiapo na roto i te haamouraa ma te ino rahi, te tahi i te tahi.
I roto i te parau no te aamu, ua tiʻa mai te feia haavî i tera tau e tera tau, e ua faatiti ratou i to ratou nunaa e ua haamataʻu ratou i te ao nei. Te tiʻaturi nei te rahiraa o te taata e, o te reira te ohipa e tupu nei i teie mahana, e na roto i te reira, ua tiʻa mai te tahi mau nuu rarahi e te riʻariʻa, e ta ratou mau mauhaa maramarama e te riʻariʻa, no te aro.
E rave rahi o to tatou iho mau melo no te Ekalesia tei ô atoa i roto i teie tamaʻi. Ua ite aʻe nei tatou i roto i te afata teata e i roto i te veʻa, i te mau tamarii te aue ra, ma te haru i niʻa i to ratou metua tane, tei roto i te ahu o te nuu faehau, te haere ra i niʻa i te reni aroraa.
I roto i te hoê rata peʻapeʻa tei fariihia e au i teie hepetoma, ua papaʻi mai te hoê metua vahine no niʻa i taʼna tamaiti no te nuu Marine, te haere nei oia no te piti o te taime, i roto i te hoê tamaʻi i te mau Pae Fenua Arapia mâ. Te parau ra oia e, i te taime matamua a tonohia ai oia i Irakia, « ua hoʻi mai oia i te fare no te hoê tau faafaaearaa, e ua ani mai oia iaʻu ia haere e orihaere rii na muri iho iaʼna… Ua tauahi mai oia iaʻu e ua paraparau iaʻu i te parau no te haereraa i te tamaʻi. Te na ô ra oia e, ‘Mama, titauhia iaʻu ia haere, ia roaa te tiʻamâraa ia oe e i te utuafare, ia tiʻamâ no te haamori mai ta oe e hinaaro… e mai te mea e, e titauhia toʻu ora e mea tiʻa ïa iaʻu ia horoʻa i toʻu ora no te reira’ ». Tei ô oia i teie taime, e ua papaʻi mai oia i toʼna utuafare aita i maoro aʻe nei, ma te parau mai e, « Te haapeu nei au ia tae mai i ô nei no te tavini i toʻu nunaa e i te huru o to tatou oraraa…Te hau nei te aau ia ite e, tei pihaʻi iho to tatou Metua i te Ao ra iaʻu. »
Te vai atoa ra te tahi atu mau metua vahine, e mau vahine tivira hapa ore, te haru nei i ta ratou mau tamarii ma te riʻariʻa e ma te hiʻo i niʻa i te raʻi, i te taparuraa ma te peʻapeʻa, a aueue ai te fenua i raro aʻe i to ratou avae, e tore ai te mau ofaʻi pupuhi no te pohe i roto i te raʻi poiri.
Ua pohe te taata i roto i teie tamaʻi riʻariʻa, e e pohe â te tahi. Mea papu e, e tamau noa â te huiraatira i te patoʻi. Ua faahapa papu te mau tiʻa faatere no te tahi atu mau fenua i te faanahoraa a te nuu tamaʻi amui.
Te faaroohia nei te uiraa e, « Eaha te tiʻaraa o te Ekalesia i niʻa i teie parau ? »
A tahi, ia maramarama maitai tatou e, aita to tatou e inoino e hoê iti noa aʻe i te nunaa taata arapia e aore râ i te mau taata no te tahi atu haapaʻoraa. Te farii nei tatou e te poro nei tatou e, no roto te mau taata atoa o te fenua nei i te utuafare o te Atua. E no te mea Oia to tatou Metua, no reira, e mau taeaʻe e e mau tuahine anaʻe tatou, e e hopoiʻa hoʻi ta tatou paatoa i te tahi e te tahi.
Tera râ, i roto i to tatou tiʻaraa taata aiʻa, tei raro aʻe tatou paatoa i te faatereraa a to tatou mau tiʻa faatere o te fenua. Tei ia ratou te mau iteraa no te tereraa ohipa poritita e te ohipa no te nuu faehau, hau atu i te iteraa o te huiraatira. O ratou e haa nei i roto i te nuu faehau, tei raro aʻe ratou i te titauraa a to ratou faatereraa hau no te faatupu i te mau faaueraa a te mau mana faatere i niʻa roa. Ia tomo te taata i roto i te nuu faehau, e rave ratou i te hoê faaauraa o te ruuruu ia ratou, e o ta ratou e faatura.
Te hoê o ta tatou mau Hiroa Faaroo, tei riro ei faaiteraa no ta tatou parau haapiiraa, te na ô ra ïa e : « Te tiʻaturi nei matou e, e mea tiʻa ïa ia auraro i te mau arii, te mau peresideni, te mau faatere hau, e te mau haavâ, e ia haapaʻo, ia faatura, e ia paturu i te mau ture o te fenua » (Hiroa Faaroo 1:12).
Te na ô atoa ra râ te heheuraa no teie tau e, e mea tiʻa ia tatou ia « faaore atu i te tamaʻi e a poro i te parau hau » (PH&PF 98:16).
I roto i te hoê Haumanahune, e nehenehe ta tatou e faaore i te tamaʻi e ia poro i te parau hau. Te vai ra te tiʻaraa ia patoʻi. E rave rahi o tei paraparau mai ma te teimaha. Tei ia ratou te reira mana. E tiʻaraa to ratou ia na reira, mai te mea e, e ravehia ia au i te ture. Tera râ, e mea tiʻa ia tatou paatoa ia feruri atoa i te tahi atu hopoiʻa faufaa roaʼtoa, te parau nei au e, o te faatere nei i toʻu mau manaʻo e te faaite mai nei iaʻu i toʻu turu i te ohipa e tupu nei i teie mahana.
A uʻana ai te tamaʻi i rotopu i te ati Nephi e te ati Lamana, te faaite ra te mau papaʻiraa e, « Ua faaitoitohia râ te ati Nephi e te hoê mea maitai aʻe, aore hoʻi ratou i aro ia roaa… te mana ; te aro ra râ ratou no to ratou mau utuafare, e to tatou tiʻamâ, e ta ratou mau vahine, e ta ratou mau tamarii, e to ratou mau mea atoa ra ; oia ïa, no to ratou peu haamoriraa, e to ratou ekalesia.
« Te rave ra ratou i te mea i manaʻohia e ratou, o tei au i te Atua ra » (Alama 43:45-46).
Ua haapii atu te Fatu ia ratou, « A paruru outou i to outou mau utuafare e tae roaʼtu i te haamaniiraa toto » (Alama 43:47).
« Ua hahae ihora oia [Moroni] i toʼna ra pereue, rave atura i te hoê vahi iti no te reira, ua papaʻi i niʻa ihora, – Ei haamanaʻoraa i to tatou ra Atua, e ta tatou haapaʻoraa, e to tatou tiʻamâ, e to tatou hau, e ta tatou mau vahine, e ta tatou mau tamarii – e ua taamu ihora oia i te reira i niʻa i te auru o te hoê raau.
« E ua rave ihora oia i taʼna tapoʻi upoo, e taʼna tapoʻi ouma, e taʼna paruru, e tatua ihora i taʼna haana tamaʻi i toʼna tauupu ; e rave ihora oia i te raau i taamuhia toʼna ra pereue i te auru ra, (ua mairi oia i te reira, te tapaʻo no te tiʻamâ), ua tipapa ihora oia i raro i te repo, pii huaʼtura i toʼna ra Atua, ia faaea te maitai o te tiʻamâ i niʻa iho i toʼna ra mau taeaʻe » (Alama 46:12-13).
Na roto i teie mau irava e i te tahi atu mau papaʻiraa, e mea maramarama maitai e, i te tahi mau taime e i roto i te tahi mau huru, ua tiʻa te tahi mau nunaa, e e hopoiʻa ïa na ratou, ia aro no te utuafare, no te tiʻamâ, e ia aro i te faatereraa haavî, te haamataʻuraa, e te faatitiraa.
I muri aʻe i teie mau parau atoa, tatou to teie nei Ekalesia, e mau taata tatou no te hau. E mau pĭpĭ tatou na to tatou Faaora, te Fatu o Iesu Mesia ra, Oia te Arii no te Hau. Noaʼtu râ i te reira, te parau ra Oia e, « Eiaha e manaʻo e i haere mai au e hopoi mai i te hau i te fenua nei : aore au i hopoi mai i te hau, i te ʻoʻe râ » (Mataio 10:34).
Te faariro nei teie mau parau ia tatou, ei mau taata e titau tuutuu ore nei i te hau, e poro nei i te hau, e haa nei no te hau, tera râ, e mau taata aiʻa atoa tatou no tera fenua e tera fenua, e tei raro aʻe ïa tatou i te ture a to tatou mau faatereraa hau fenua. Taaê noaʼtu i te reira, ua riro tatou ei mau taata here i te tiʻamâraa, tei pŭpŭ ia tatou no te paruru i te tiʻamâraa, i te mau vahi atoa e te fifi ra to te reira parau. Te tiʻaturi nei au e, eita te Atua e faahapa i te mau tane e te mau vahine i roto i te nuu faehau, tei riro ei mau tiʻa no to ratou faatereraa hau fenua, no te rave i te mea tei titauhia ia ratou e te ture ia rave. E riro râ paha Oia i te faahapa ia tatou mai te mea e, e tamata tatou i te faaapiapi e aore râ, i te faataupupu i te feia e aro nei i te mau puai o te ino e te faatitiraa.
I teie nei, ua rau te ohipa o te nehenehe ia tatou ia rave, e o te tiʻa ia tatou ia rave, i roto i teie anotau fifi. E nehenehe ta tatou e horoʻa i to tatou mau manaʻo no niʻa i teie mau mea e tupu nei, ia au i ta tatou hiʻoraa ; eiaha râ tatou e parau i te parau, e aore râ, e rave i te ohipa aita i haamanahia e te ture, i roto i tera nunaa e tera nunaa, i tera pae e tera pae. Aitâ te taaêraa manaʻo i te pae poritita i faatiʻa aʻe nei i te riri uʻana e te hinaaro tiʻa ore. Te tiʻaturi nei au e, e parahi noa te mau taata o te Fatu i roto i te hau te tahi e te tahi, i roto i teie mau tau aehuehu, taaê noaʼtu to ratou tururaa i te tera e tera faatereraa hau fenua e aore râ, i tera e tera pŭpŭ.
E pure anaʻe tatou no ratou o tei piihia e to ratou mau faatereraa hau fenua, no te aro, ma te taparu i te parururaa o te raʻi ia tae mai i niʻa ia ratou, ia tiʻa ia ratou i hoʻi faahou i pihaʻi iho i tei herehia e ratou, ma te peʻapeʻa ore.
I to tatou mau taeaʻe e to tatou mau tuahine tei pŭpŭ i to ratou ora i roto i te ati, te parau atu nei matou e, te pure nei matou no outou. Te pure nei matou ia tiaʻi mai te Fatu ia outou, e ia faaora ia outou i te ati, ia tiʻa ia outou ia hoʻi faahou mai i te aiʻa, e ia rave faahou i to outou oraraa. Ua ite matou e, aita outou i tae i te reira medebara veʻaveʻa e te mataʻi no to outou au i te ohipa hauti tamaʻi. Te puai o ta outou horoʻaraa, tei roto ïa i to outou hinaaro mau ia horoʻa i to outou iho ora no te mea ta outou e tiʻaturi nei.
Ua ite tatou e, i pohe iho nei te tahi, e e pohe â te tahi i roto i teie aroraa fifi e te pohe. E nehenehe ta tatou e rave i te mau mea atoa no te tamahanahana e no te haamaitai i te feia tei ere i tei herehia e ratou. Outou e oto nei, farii mai i te tamahanahanaraa hoê roa no ô mai i te Mesia te Faaora. Oia tei parau atu i Taʼna mau pĭpĭ here e :
« Eiaha e horuhoru to outou aau, e faaroo i te Atua, e e faaroo atoa mai hoʻi iaʻu.
« E rave rahi te parahiraa mau i te fare o taʻu Metua ra : ahiri aita râ, ua parau atu ïa vau ia outou. Te haere nei au e haamaitai i te hoê vahi no outou… ei reira atoa outou i te vahi e parahihia e au ra.
« E hau taʻu e vaiiho ia outou nei, o toʻu nei hau taʻu e ho atu no outou : e ere mai ta to te ao nei horoʻa taʻu horoʻa ia outou. Eiaha e taiâ to outou aau, eiaha hoʻi e mataʻu » (Ioane 14:1-3, 27).
Te ani nei tatou i te Fatu, Oia tei mau i te puai rahi e te mau mana atoa, ia faatae mai Oia i te hoê hopearaa i roto i teie tamaʻi, hoê hopearaa maitai no te oraraa o te mau taata atoa i roto i teie fifi. Ua parau te Fatu e, « No te mea o vau nei o te Fatu, te faatere nei i te mau raʻi i niʻa, e i rotopu i te mau nuu no te fenua nei » (PH&PF 60:4).
E nehenehe ta tatou e tiʻaturi, e epure hoʻi no taua mahana hanahana ra i tohuhia e te peropheta Isaia, i reira hoʻi te taata « e tiapai [ai]…i ta ratou ʻoʻe ei auri arote, e ta ratou mau mahae ei tipi tope raau : e ore te hoê fenua e aa mai i te tahi fenua i te ʻoʻe, e ore hoʻi ratou e haapii faahou i te tamaʻi » (Isaia 2:4).
Noaʼtu te ino o te ao nei, e nehenehe ta tatou e ora i to tatou oraraa ia tiʻa ia tatou ia fanaʻo i te aupururaa paruru a to tatou Metua i te Ao ra. E nehenehe ta tatou e ora mai te feia parau tiʻa i ora na i roto i te ino no Sodoma e o Gomora. Ua taparu Aberahama ia faaorahia teie na oire no te feia parau tiʻa ra (a hiʻo Genese 18:20-32).
E i niʻa aʻe i taua mau mea atoa ra, e nehenehe ta tatou e faatupu i te iteraa e te hinaaro i te faaoraraa a te Fatu o Iesu Mesia, e ia poro i te reira. Na roto i Toʼna tusia taraehara, ua papu ia tatou e, e tamau noa te ora e tae roaʼtu i ô mai i te paruru o te pohe. E nehenehe ta tatou e poro i taua evanelia ra, o te arataʻi i te taata haapaʻo i te faateiteiraa.
Noaʼtu e, te tupu nei te hoê tamaʻi riʻariʻa e te pohe, e te vai nei te poiri e te riri uʻana i roto i te aau o te tahi mau taata, te tiʻa noa nei ma te aueue ore, ma te hau, e ma te tamahanahana, e ma te here rahi, te hohoʻa hau o te Tamaiti a te Atua, te Faaora o te ao nei. E nehenehe ta tatou e poro mai ta Paulo i poro ra :
« Ua ite mau hoʻi au e, e ore te pohe, e ore hoʻi te ora, e ore te mau melahi, e ore hoʻi te hui arii, e ore te mau mea mana, e ore te mau mea e vai nei, e ore hoʻi te mau mea e tupu a muri atu,
« E ore te teitei, e ore hoʻi te haehaa, e e ore atoa te mau mea i hamanihia nei, e tiʻa ia faataa ê ia tatou i te aroha o te Atua, i roto i to tatou fatu ia Iesu Mesia ra » (Roma 8:38-39).
Teie oraraa, o te hoê ïa tuhaa iti naʻinaʻi roa i roto i te faanahoraa mure ore a te Metua. Ua î teie oraa i te tamaʻi e te mau mea aore i au i te evanelia. Te pohe nei te tahi mau taata i te apî-roa-raa ra. Te ora nei te tahi pae i te ruauraa. Aita e tiʻa ia tatou ia tatara i taua huru ra. Te farii nei râ tatou i te reira ma te ite papu e, na roto i te tusia taraehara o to tatou Fatu, e haere tamau tatou i mua, ma te farii papu i Toʼna here faito ore.
Ua parau Oia e : « A haapii mai i te mau mea noʻu nei, e a faaroo mai na i taʻu mau parau ; a haere hoʻi i roto i te mărû o toʻu nei Varua, e e noaa ïa ia oe te hau i roto iaʻu nei » (PH&PF 19:23).
E i roto i taua mau parau nei, e au mau taeaʻe e au mau tuahine, e tuu ai tatou i to tatou faaroo. Ma te hiʻo ore i te mau huru e vai ra, e roaa ia tatou te tamahanahana e te hau o te Mesia to tatou Faaora, to Tatou Taraehara, te Tamaiti a te Atua ora. Te faaite papu nei au i te reira na roto i Toʼna iʻoa moʻa, oia te iʻoa o Iesu Mesia ra, amene.