E tamarii oe na te Atua
Eiaha ia moʻehia ia outou e taʻu mau hoa here e, e tamarii mau outou na te Atua… , outou Taʼna e here nei e Taʼna e hinaaro nei e tauturu e e haamaitai
E au mau hoa apî e, e au mau tamaiti here e au mau tamahine here, te oaoa nei au ia tae mai i rotopu ia outou, i roto i teie faahanahanaraa ta outou i te 125raa o te matahiti o te Paraimere.
Iaʻu i manaʻo, aitâ i tupu aʻe nei hoê rururaa no te mau tamaiti e no te mau tamahine mai teie te huru. Te paraparau atu nei au ia outou mai roto atu i te pû amuiraa rahi i Roto Miti nei. Ua î roa teie Pû i te tamarii, to ratou mau metua e to ratou mau orometua – 21,000 rahiraa o ratou. E i roto i te tahi atu rahiraa tauatini fare ati aʻe te ao nei, ua putuputu atoa mai outou no te faahanahana i teie taime faahiahia roa. E hurihia taʻu mau parau i roto i te mau reo e rave rahi. Te noho nei tatou i roto i tera e tera fenua, e te faatura nei tatou i tera reva e tera reva. Tera râ, ua hoê tatou i roto i te hoê mea faufaa roa, inaha : e melo anaʻe tatou paatoa no Te Ekalesia a Iesu Mesia i te Feia Moʻa i te mau Mahana Hopea nei. E na roto i to outou haereraa mai i tera vahi e tera vahi, ua riro ïa te reira ei tapaʻo no te tupuraa nehenehe o teie Ekalesia mai te taime matamua a faatiʻahia ai te reira.
Aita te Paraimere i vai tamau na i roto i te Ekalesia nei. I roto i na matahiti matamua e 48 o te aamu o te Ekalesia, aita ta te mau tamaroa e te mau tamahine e faanahonahoraa. Ua feruri aʻera te hoê vahine maitai roa, o Aurelia Spencer Rogers toʼna iʻoa, e mea tiʻa ia faatiʻahia te hoê pŭpŭ na te mau tamaroa naʻinaʻi i reira hoʻi ratou « e haapiihia ai ia riro mai ei mau tane maitai aʻe ».
Ua faataehiaʼtura toʼna manaʻo i te peresideni o te Ekalesia i taua taime ra, o John Taylor. Ua feruri aʻera oia e, ia maitai te hoê pŭpŭ no te mau tamaroa naʻinaʻi e maitai atoa ïa no te mau tamahine naʻinaʻi, e e riro ïa ta ratou himeneraa ei himeneraa nehenehe aʻe. E no reira, 125 matahiti i mairi aʻe nei, ua putuputu ihora te Paraimere matamua i te rahiraa e 224 tamaroa e te tamahine « ia haapiihia ratou i te parau no te haapaʻo, te faaroo i te Atua, te pure, te haapaʻoraa i te hora tiʻa, e te peu maitai » (i roto i te neneʻira a Daniel H. Ludlow, Encyclopedia of Mormonism, 5 buka [1992], 3:1146).
Mai taua haamataraa iti naʻinaʻi ra, ua tupu te Paraimere i te rahi e ua riro mai ei tuhaa no te Ekalesia ati aʻe te ao nei. I teie mahana fatata hoê milioni rahiraa outou tamarii i roto i te Paraimere.
E mea maitai ïa, i te mea e, e mea tiʻa ia faatupuhia te hoê pŭpŭ na te mau tamaroa e te mau tamahine, mai te huru i te mau pŭpŭ haapiiraa a te feia apî tamaroa e te feia apî tamahine, e te mau taata paari atu.
Teie na tuahine e toru tei paraparau atu na ia outou, na ratou e arataʻi nei i te ohipa o te Paraimere na te ao atoa nei. I rotopu ia ratou, te vaira e 23 tamarii, no reira, ua ite ratou e, eaha to outou mau hinaaro.
Aue hoʻi outou i te fanaʻo e taʻu mau hoa here e, i te mea e, e mau orometua faahiahia roa to outou. Te here nei ratou ia outou, e ta ratou manaʻonaʻoraa, o te putuputuraa ïa e o outou i te mau hepetoma atoa no te haapii ia outou i te mau haerea o te Fatu.
Ua faatiʻa te taeaʻe Artel Ricks i te hoê aamu maitai roa no niʻa i te hoê orometua Paraimere faauruhia. E tamaiti iti noa o Artel i taua taime ra, e pae e aore râ e ono matahiti toʼna. I te hoê pô, tei niʻa toʼna utuafare i te amuraa maa e te paraparau anaʻe ra i te parau no te tuhaa ahuru. Ua parau maira ratou iaʼna e, « te tuhaa ahuru o te hoê ïa tuhaa i niʻa i te ahuru o te mau mea atoa e roaa mai ia tatou, e e aufauhia te reira i te Fatu ra na te feia tei here Iaʼna ».
Ua here roa oia i te Fatu e no reira, ua hinaaro oia e horoʻa i taʼna tuhaa ahuru na te Fatu. Ua rave aʻera oia i te moni taʼna i haaputu e iriti aʻera oia hoê i niʻa i te ahuru o taʼna moni iti haaputu. Teie taʼna parau, « Haere atura vau i roto i te piha tei reira anaʻe te opani e ponao to niʻa iho – te piha haumitiraa – e i reira, tuturi ihora vau i pihaʻi iho i te auʻa haumiti. Na toata e toru e aore râ e maha i roto i toʻu apu rima hurihia i niʻa, ani atura vau i te Fatu ia farii mai Oia i te reira [Ua tiʻaturi roa vau e, e fâ mai oia no te rave atu i te reira]. Ua taparu noa vau i te Fatu no te tahi maa taime iti te maoro [Aita râ hoê aʻe ohipa i tupu. Eaha Oia i ore ai e farii i taʻu tuhaa ahuru ?]. I toʻu tiʻaraa mai i niʻa, ua tupu te manaʻo i roto iaʻu e, aita vau i tiʻamâ, e no reira, aita vau i faaite i te hoê noa aʻe taata i te ohipa tei tupu…
« Tau mahana i muri mai, i roto i te Paraimere, ua parau maira te orometua e, ua tupu te manaʻo rahi i roto iaʼna ia aparau i te hoê mea aita to roto i te haapiiraa. Ua parahi noa vau ma te maere i toʼna haapiiraa ia matou e nahea ia aufau i te tuhaa ahuru [i te episekopo ra, oia te tavini o te Fatu]. Te mea râ taʻu i haapii mai, ua hau roaʼtu ïa i te faufaa i te parau e nahea ia aufau i te tuhaa ahuru. Ua haapii mai au e, ua faaroo mai te Fatu i taʻu pure e ua pahono mai hoʻi i te reira, e ua here Oia iaʻu, e taata faufaa roa vau i mua Iaʼna. I te mau matahiti i muri mai, ua tupu atoa mai toʻu mauruuru i te tahi atoa haapiiraa ta toʻu orometua Paraimere i haapii mai iaʻu i taua mahana ra – oia hoʻi, ia haapii ia au i ta te Varua e faauru mai.
« No te faahiahia te mau manaʻo no niʻa i taua taime ra, aita i tiʻa iaʻu ia faaite i te reira hau atu e toru ahuru matahiti te maoro. Tae roa mai i teie mahana, e ono ahuru matahiti i muri mai, te fifi noa nei â vau ia faatiʻa i te reira ma te ore te roimata e tahe. Te vahi peapea roaʼtu, maori râ ïa, aita roaʼtu te hoê orometua Paraimere nehenehe roa i ite e, ua paraparau mai te Fatu i te hoê tamaiti iti na roto iaʼna » (« An Answer to Prayer », Tambuli, me 1988, 28).
Ua haere au i te Paraimere i toʻu tamariiriiraa. I taua tau ra, e Mahana Piti avatea matou e haere ai, i muri aʻe i te haapiiraa. Mai te mea ra iaʻu e, i te avatea, ia faaoti anaʻe te haapiiraa, e rohirohi e te poia te tupu mai i roto ia matou. Auaʻe râ, e mea maitai roa to matou mau orometua i niʻa ia matou. Mea pinepine ratou i te afaʻi mai i te tahi faraoa monamona na matou, e te mea faufaa roaʼtu, ua haapii ratou ia matou i te mau haapiiraa nehenehe roa. I reira to matou haapiiraa i te parau no Iesu e Toʼna here rahi ia tatou. Ua haapiihia matou i te parau no te Atua to tatou Metua Mure Ore, o ta tatou e nehenehe e pure atu.
Ua haapiihia matou i te parau no te tamaiti ra o Iotepha tei haere i roto i te uru raau no te pure e ua pahonohia mai hoʻi taʼna pure na roto i te fâraa mai to tatou Metua i te Ao ra e Taʼna Tamaiti o Iesu Mesia ra. Ua haapii-atoa-hia matou i reira i te aamu o te Ekalesia, e i te parau no te mau tane e te mau vahine e te mau tamaiti iti e te mau tamahine itoito e te faaroo, tei rave itoito i te ohipa no te faaetaeta i te Ekalesia. Ua haapii-atoa-hia matou i reira ia hamani-maitai te tahi i te tahi, e ia tauturu i te mau taime atoa. Ua haapiihia ia matou e, e mea faufaa roa ia tauturu i te raveraa i te mau ohipa i te fare. Ua haapiihia ia matou ia rave i te peu maitai.
I teie nei, te faatupuhia nei te Paraimere i te Sabati. O te taime maitai mau aʻe teie, no te mau tumu e rave rahi. Aita tatou i rohirohi i te haereraa i te haapiiraa i te reira mahana taatoa. Ua ite au te manaʻo nei outou e, e mea roa te Paraimere, tera râ, ua faaineine maitai to tatou mau orometua ia ratou, e aita hoʻi tatou e haapii-noa-hia i te mau haapiiraa maitai anaʻe, e hauti atoa râ tatou.
Te himene amui nei tatou i reira i te mau himene Paraimere nehenehe roa. Hoê himene ta matou e himene i taua tau ra, tei na ô e :
E to matou Metua,
Ninii mai na
I to maramarama
Niʻa ia matou ;
Ia ite matou nei i
To Oe hinaaro.
Arataʻi mai ia matou nei
I te ora mau.
(« Na roto i te maramarama o te Fatu », Te mau Himene, no. 191).
Na matilda W. Cahoon i papaʻi i teie himene nehenehe roa. Oia toʻu orometua i te haapiiraa i toʻu tamariiriiraa.
I teie nei, te vai nei teie Buka himene na te mau tamarii nehenehe roa, tei î roa i te mau pehe e rave rahi te huru tei papaʻihia na outou. Ua himenehia te tahi o te reira mau himene i teie mahana. Ua himene amui iho nei tatou i tera himene nehenehe roa tei papaʻihia na outou e te mau tamarii o te Paraimere, tera râ, te himene atoa nei to te Ekalesia taatoa i te reira. E himene nehenehe mau. Te faaite ra hoʻi te reira himene i te hoê parau mau rahi e te nehenehe.
E tamarii au
Na te Atua ra ;
Fare oaoa toʻu,
Te metua maitai.
Arataʻi mai iaʻu
I te eʻa mau ;
Parau mai te tano iaʻu
Ia ora Iaʼna ra.
(« E tamarii au na te Atua ra », Te mau Himene, no. 185).
Aue te nehenehe o teie himene. E aue atoa te faahiahia te parau mau ta te reira himene e haapii mai nei. E metua tane to outou i te tahuti nei. O te hoa here ïa o to outou metua vahine. Te tiʻaturi nei au e, te here nei outou iaʼna, e te haapaʻo nei outou i taʼna parau. Tera râ, e metua tane atu â to outou. Oia hoʻi, to outou Metua i te ao ra. Oia te Metua o to outou varua, mai to outou metua i te tahuti nei, e metua ïa no to outou tino. E e mea faufaa ia here e ia haapaʻo i te parau a to outou Metua i te ao ra, mai ta outou e here nei, e e haapaʻo nei i te parau a to outou metua i te tahuti nei.
Te paraparau nei tatou i to tatou metua i te tahuti nei. Oia to tatou hoa rahi roa, to tatou paruru, naʼna hoʻi e horoʻa mai nei i te maa, te ahu e te fare no tatou. Te paraparau atoa nei râ tatou i to tatou Metua i te ao ra. Na roto i te pure tatou i te rave i te reira. Te tiʻaturi nei au e, i te mau pô atoa e te mau poʻipoʻi atoa, te tuturi nei outou i raro no te paraparau i to outou Metua i te ao ra. Te tiʻaturi nei au e, i te poʻipoʻi, e faaite outou i to outou mauruuru no te taotoraa i te pô, no te mahanahana e te au maitai e no te here ta outou e farii nei i roto i to outou fare. Te tiʻaturi nei au e, e ani outou Iaʼna ia tiaʻi ia outou e ia haamaitai e ia arataʻi mai ia outou i te roaraa o te mahana. Te tiʻaturi nei au e, e pure outou no to outou metua tane e to outou metua vahine e to outou mau taeaʻe e te tuahine, e ia haamanaʻo hoʻi i te feia atoa tei roohia i te maʻi e tei ravai ore. Te tiʻaturi nei au e, e haamanaʻo outou i te mau misionare o te Ekalesia ia pure outou.
I te pô, hou a taoto ai outou, te tiʻaturi nei au e, e tuturi faahou outou i raro no te haamauruuru Iaʼna no te mau haamaitairaa o taua mahana ra. Haamauruuru faahou iaʼna no to outou na metua e to outou mau orometua. A ani atu Iaʼna ia horoʻa mai ia outou i te taoto maitai, e ia haamaitai i te mau taata atoa, i te feia hoa râ tei ravai ore e tei ore e ravai te maa e aore râ aita e vahi maitai no te taoto.
E titauraa rahi anei teie ïa rave outou tau minuti rii i te mahana tataʻitahi no te paraparau i to outou Metua i te ao ra, mai te mea e, ua ite outou e, e tamarii outou na te Atua ?
Mai te mea e, ua ite papu mau outou e, e tamarii outou na te Atua, e ite atoa ïa outou e, e titau papu mai Oia ia outou, Taʼna mau tamarii. E titau mau Oia ia outou ia haapaʻo i Taʼna mau haapiiraa e te mau haapiiraa a Taʼna Tamaiti here o Iesu. E titau mai Oia ia outou ia horoʻa na vetahi ê, e ia maitai i niʻa ia vetahi ê. E inoino roa Oia mai te mea e, e tuhi outou e aore râ, e parau i te parau maamaa. E inoino roa Oia mai te mea e, e rave outou i te mau huru ohipa parau tiʻa ore atoa, mai te mea e, e taviri e aore râ, e eiâ rii noa outou. E oaoa oia mai te mea e, e haamanaʻo outou i tei iti aʻe i ta outou i roto i ta outou mau pure Iaʼna ra. E tiaʻi Oia ia outou, e arataʻi e e paruru hoʻi ia outou. E haamaitai Oia ia outou i roto i ta outou haapiiraa e i ta outou Paraimere. E haamaitai Oia ia outou i roto i to outou fare, e e riro outou ei mau tamaiti e ei mau tamahine maitai aʻe, te haapaʻo i te parau a to outou mau metua, te iti te tamaʻi e to outou mau taeaʻe e to outou mau tuahine, te tauturu i te ohipa i te utuafare.
E na roto i te reira, e tupu outou i te paariraa e e riro mai ei feia apî tamaroa e aore râ, ei feia apî tamahine puai i roto i teie Ekalesia. E riro mai outou ei taata maitai aʻe i roto i te oraraa tivira.
Te mau tane atoa e aore râ, te mau vahine atoa tei taahi i niʻa i te fenua nei, tae roaʼtu i te Fatu ia Iesu ra, i riro na ratou tataʻitahi ei tamaiti iti e aore râ, ei tamahine iti mai ia outou na te huru. Ua tupu ratou i te rahi ia au i te haerea tei haerehia e ratou. Mai te mea e, e haerea maitai taua haerea ra, ua riro mai ïa ratou ei mau tane e ei mau vahine maitai.
Eiaha ia moʻehia ia outou e taʻu mau hoa here e, e tamarii mau outou na te Atua, e ua roaa hoʻi ia outou te hoê tuhaa o Toʼna ra huru hanahana, outou Taʼna e here nei e Taʼna e hinaaro nei e tauturu e e haamaitai. Te pure nei au ia haamaitai mai to tatou Metua i te Ao ra ia outou. Ia ataata mai hoʻi Oia ia outou. E mata na outou i te haere na niʻa i Toʼna mau haerea e ia pee i Taʼna mau haapiiraa. E mata na hoʻi outou i te haapae i te parau ino tei matarohia e te mau tamaiti iti e te mau tamahine iti i te parau i te fare haapiiraa. E mata na outou i te pure tamau noa Iaʼna, ma te pure tamau noa na roto i te iʻoa o Taʼna Tamaiti Here, te Fatu ra o Iesu Mesia. E mata na tatou paatoa i te pee tamau maite Iaʼna na roto i te faaroo. Ia haamaitai mai te oraraa ia outou, no te mea, e tamarii outou na te Atua, ua tiʻa ia outou ia farii i Toʼna here e Taʼna haamaitairaa.
Eiaha roaʼtu ia moʻehia ia outou e, e melo outou no Te Ekalesia a Iesu Mesia i te Feia Moʻa i te mau Mahana Hopea nei. Te pure nei au ia haamaitai mai te Fatu ia outou e te horoʻaʼtu nei au i toʻu here ia outou na, na roto i te iʻoa moʻa o Iesu Mesia ra, amene.