Elder Mervyn B. Arnold
No te Hitu Ahuru

Mai te mea e ahu te mau taata i te tauihaa faatianiani, e ahu ïa elder Mervyn Bennion Arnold, 54 matahiti, melo apî no te pŭpŭ piti no te Hitu Ahuru, ma te teʻoteʻo i te hoê tei papaʻihia, « Homemade in Granger, Utah [tei hamanihia i Granger, Utaha] ».

Fanauhia i Roto Miti i te 19 no tiurai 1948, ua paari mai elder Arnold i te hoê vahi faaapu i te pae tooʻa o te râ i te Afaa no Roto Miti. Ua faahaamanaʻo mai oia e « Hoê tauasini moa ta matou, e hoê puaatoro o ta matou te mau tamarii e haere e faa-te i te u. E hutihuti atoa matou i te tô popaa [betterave] ». Ua faaamu toʼna na metua o John Everett Sorensen Arnold e o Jasmine Bennion Arnold e pae tamaroa e e piti tamahine e ua haapii i te faufaa rahi o te ohipa teiaha, ua mauruuru râ i te faufaa e vai nei, e i te here o te utuafare e i te evanelia. « Ua haapii mai au i te here i te mau parau haapiiraa o te Ekalesia », o ta elder Arnold ïa i parau, « e ua here au i te Buka a Moromona ».

I toʼna ui-raa-hia e mea nahea toʼna fariiraa i toʼna iteraa papu, ua pahono elder Arnold e « e ohipa tupu mărû noa e tae roaʼtu i te rahi. Ia tomo mai te taata i roto i to oe oraraa, e hamata mai ïa oia na to outou apî-roa-raa mai. E e tauturu ratou ia aahia taua iteraa papu ra i roto ia outou. E nehenehe noa ona e tataʻu mai i te iʻoa o toʼna mau orometua tataʻitahi e o toʼna mau taata faatere o te autahuʻaraa e e mea nahea to ratou haafaufaaraa iaʼna.

Ua tavini o elder Arnold i taʼna tau misioni i te pae apatoʻerau no Mexique. I muri mai, ua haere oia i te Fare Haapiiraa Tuatoru no Brigham Young, ua manuïa i taʼna parau tuʻite no te imiraa faufaa e no te faatereraa ohipa. I te matahiti 1971, ua faaipoipohia oia i roto i te hiero no Idaho Falls ia Devonna Kress, e ua faaite oia no niʻa i teie vahine, « e vahine nehenehe roa e e iteraa papu paari mau toʼna no te evanelia ». E ono a raua mau tamarii e e maha mootua. E parau raua no to raua utuafare, « te oaoa o to maua oraraa ».

E rave o elder Arnold i te ohipa i roto i te hoê vahi hooraa fenua/fare e i muri mai, i te fare moni. Mai te matahiti 1985 tae atu 1988, ua tavini oia ei peresideni misioni i te fenua Costa Rica, e i te mau motu no San Blas. Aita i maoro aʻe nei, ua piihia o elder Arnold ei tiʻa faatere no te haapiipiiraa e ei tauturu no te mau peresideni misioni e te mau misionare i roto i te aupŭpŭ misionare.

A haamata ai oia i roto i toʼna piiraa apî, ua faaite elder Arnold i toʼna here i te Taata o tei haamaitai i toʼna oraraa: « Ua ite au e te ora nei te Faaora ! Ua here roa vau Iaʼna ».