Te maramarama o Toʼna here
Te ite mau nei te Metua i te Ao ra ia tatou te taata hoê. Ua ite Oia e nahea ia here ia tatou tataʻitahi ia au i te here i au ia tatou.
E iva toʻu matahiti i te taime a haere atu ai toʻu utuafare e faaea i roto i te hoê fare aitâ te tahua i raro i te repo i hope roaʼtura i te hamanihia, i reira hoʻi maua o toʻu tuahine e taoto ai. I te tahi mau pô, ia tarava vau i niʻa i te roʻi no te taoto, e au e, te ite ra vau i te tahi mau hohoʻa atâ i niʻa i te papaʻi oti ore â i te hamanihia. E na roto i te reira mau hohoʻa atâ, e taotohia vau i te tahi mau taoto riʻariʻa. I te tahi mau taime, i roto i toʻu taoto, e tiʻa vau i niʻa no te haere na roto i toʻu fare, e ia araara mai au tei te hoê vahi taaê roa.
I te hoê pô, i muri aʻe i toʻu haere-hanoa-raa i roto i te taoto, ua araara mai au ma te maere rahi e te riʻariʻa atoa. Ua tamata vau i te tuo no te ani i te tauturu, aita râ te reo e matara. E mea poiri roa i taua taime ra, aita taʻu e nehenehe ia ite i toʻu rima i mua i toʻu mata. I taua taime ra, tuama maira te hoê taata i te mori, i reira toʻu iteraa e, teihea râ vau i taua taime ra. Ua faaroo mai paha toʻu mama iaʻu i te haere-hanoa-raa i roto i te taoto, no reira oia i haere mai ai e hiʻo iaʻu i raro. I toʼna hiʻoraa e aita vau to niʻa i toʻu roʻi, i reira toʼna tuamaraa i te mori no te imi iaʻu.
Hoê noa taumi i niʻa i te pataraa mori, taa ihora iaʻu e, tei hea mau vau, ua here mau toʻu mama iaʻu, e nahea hoʻi ia hoʻi faahou i roto i te ahu taoto. No toʻu riʻariʻa i te mau ata, ua ani au i toʻu mama ia vaiiho noa i te mori ia ama noa na. Ua farii oia. Te mauruuru nei au i te mea e, i here roa hoʻi toʻu mama iaʻu e ua tae roa i te haere mai i raro e ua tuama i te mori.
Te ite nei tatou i teie mahana i te tahi atu huru maramarama i roto ia tatou nei, a faaroo ai tatou i te pŭpŭ himene a te mau tamarii ia himene i te mau parau ra e, « The Lord has blessed me to feel His love » [Ua haamaitai te Fatu iaʻu ia ite i Toʼna aroha] (« I’ll Follow Him in Faith », Liahona, febuare 2003, F16). No taua iteraa ra e haere ai tatou i te pureraa i te mau hepetoma atoa, e ia himene i te mau himene Paraimere, e te mau himene pureraa, e i te tahi taime, na niʻa iho noa i te hmene i te hoê himene. Ua mau maitai ia tatou te mau paraparau o te himene, tera râ, i roto i te hoê taime poto roa, ua faatupu taua mau paraparau ra i te maramarama e te here i roto i to tatou aau. Mai te huru ra e, te haamanaʻo ra tatou e, o vai mau tatou. E no te mea e mau tamarii tatou na te Metua i te Ao ra, mai te huru ra e, te pou mai nei oia i raro no te tuama i te mori no tatou.
Tera maramarama ta tatou e ite ra i roto i te ekalesia, ua tuati noa ïa e tera here e te hau tei iteahia e au i te taime a tuama ai toʻu mama i te mori i te piha i raro.
Te faatiʻa nei te taote Rachel Remen i te hoê aamu mau, no niʻa i te hoê tamaiti nehenehe roa, e taurearea hauti tuʻe popo marite, aita faahou o roto iaʼna, tera aau here ta te maramarama e horoʻa mai. Ua ora oia i te hoê oraraa maitai, mea rahi toʼna mau hoa, e e taata tino nehenehe hoʻi. Ua roohia râ toʼna avae i te maʻi mariri ai taata. Titauhia ia tapu i toʼna avae i niʻa aʻe i te turi. Ua hope atoa aʻera ïa te parau no te hauti popo e te fariiraa i te faateniteniraa. Ua tupu te riri i te rahi i roto iaʼna, ua rumaruma e ua fifi roa toʼna oraraa. Aita oia i ite faahou e, o vai râ oia.
Ua ani te Taote Remen i taua taurearea ra ia papaʻi i te hohoʻa o toʼna tino. Ua papaʻi oia i te hohoʻa o te hoê auʻa faarii tiare. I muri iho, ua rave aʻera oia i te hoê penitara meʻumeʻu ereere , e ua papaʻi ihora i te hoê reni mai niʻa e i raro roa i te auʻa, faaiteraa i te parari o te auʻa. E mea maramarama roa ia ite e, te tiʻaturi nei oia e, mai te auʻa parari ra toʼna tino, aita hoʻi e faufaa faahou to roto. Ua hape roa ïa te reira. Ua hamani te mau taote i te hoê avae haavare noʼna ia nehenehe iaʼna ia haere. No te rahi râ o te inoino i roto i toʼna aau, aita aʻera toʼna tino e raveʻa e ora ai.
Ua paraparau aʻera oia i te tahi mau taata e fifi atoa to ratou mai toʼna ra te huru. Ua ite aʻera oia i to ratou manaʻo. Ua haamata ihora oia i te tauturu i te tahi mau taata ia huru maitai aʻe to ratou feruriraa. Ua tomo maira te hoê maramarama i roto i toʼna iho aau, e ua hamata ihora toʼna tino i te ora.
Ua farerei oia i te hoê tamahine tei faito noa to raua fifi. E inoino rahi to roto i te aau o taua tamahine ra. I te tomoraaʼtu oia i roto i toʼna piha i te fare maʻi no te taime matamua, aita taua tamahine ra i hinaaro e hiʻo mai iaʼna, ua tarava noa râ oia i roto i toʼna roʻi ma te tapiri noa i toʼna na mata. Ua imi oia i te mau raveʻa atoa no te faaanaanatae iaʼna. Ua faataʻi i te ratio, ua faatiʻa i te aamu arearea, e i te faahopearaa, ua rave oia i toʼna avae haavare e ua taora i niʻa i te tahua. Hitimahuta aʻera taua tamahine ra, e araara aʻera i toʼna na mata, e ite maira iaʼna no te taime matamua, i te haamataraa i te ouʻauʻa na roto i te piha, ma te haapaapaaʻina i toʼna na manimani rima ia au i te taʻiraa o te pehe. Ua paho aʻera taʼna ata e na ŏ maira, « Mai te mea e, e nehenehe ta oe e ori, e himene paha ïa vau ». Riro ihora raua ei na hoa. Ua faaau ihora raua i to raua mau riʻariʻa ma te tauturu te tahi i te tahi ia faatupu i te manaʻo tiʻaturi.
I te hoʻiraa hopea taua taurearea ra e hiʻo i te taote, ua hiʻo faahou atura oia i taʼna hohoʻa papaʻi tahito no te auʻa parari e na ô aʻera, « Aita tera hohoʻa toʻu i oti ». Rave maira oia i te hoê penitara reʻareʻa, paipai aʻera i te hoê reni haamata na te parari e tae roaʼtu i te hiti o te api parau. Tuu ihora oia i toʼna manimani rima i niʻa i te parari ereere hairiiri e na ô aʻera, « Na ô te maramarama i te tomo i roto » (A hiʻo Kitchen Table Wisdom [1996], 114-18). Te tiʻaturi nei au e, te parau nei oia e, na teie mau ohipa rumaruma e te ati hoʻi e tauturu ia tatou ia ite i te maramarama no roto mai i te here o te Metua i te Ao ra.
I te pô a ori haere noa ai au i roto i te taoto, na roto i te piha i raro e a ara mai ai ma te riʻariʻa rahi, tei pihaʻi iho noa vau i toʻu tuahine. E mea maitai roa oia, tera râ, ua hinaaro vau i te hoê taata no te tauturu iaʻu ia ite i te maramarama.
Te tupu nei teie huru i niʻa ia tatou paatoa. Te vahi faahiahia no te reira, e ere ïa i te mea e, e iteraa taaê to te tahi i to te tahi, i te mea râ e, te ite mau nei te Metua i te Ao ra ia tatou te taata hoê nei. Ua ite Oia e nahea ia here ia tatou tataʻitahi ia au i te here i au ia tatou. I te tahi taime e ite tatou i Toʼna here na roto i to tatou mau metua, to tatou mau orometua, e to tatou mau hoa. I te tahi taime e ite tatou i Toʼna here na roto i te mau muhumuhuraa a te Varua Maitai. I te tahi taime e ite tatou i Toʼna here na roto i te pehe e te tauahiraa, na roto hoʻi i te mau papaʻiraa moʻa e te mau pure. E nehenehe Taʼna e puohu ia tatou i roto i Toʼna maramarama ia hinaaro tatou i te reira no te mea, e mau Tamarii anaʻe tatou Naʼna.
Ua ite au e, te here nei te Metua i te Ao ra ia tatou tataʻitahi. « Ia vai maite hoʻi te aroha o te Atua i roto i to outou aau » (Alama 13:29), na tera e tuu i te tiʻaturi i roto ia tatou ia rave i te mau ohipa rahi. Te ite nei au i taua here ra mai taʻu e parau atu nei ia outou i teie mahana. Te tiʻaturi nei au e, e haamanaʻo outou i te mau manaʻo tei tupu i roto ia outou, ia faaroo anaʻe outou i te mau iteraa papu no niʻa i te aroha o te Metua i te Ao ra ia outou, e i reira, a imi i te raveʻa ia tiʻa outou i te mau vahi e ite ai outou i te maramarama o Toʼna ra aroha.
Te pure nei au ia tiʻa i te mau tamarii atoa ia farii e ia aupuru i te aroha o to tatou Metua i te Ao ra, na roto i te iʻoa o Iesu Mesia ra, amene.