Ua aʻo mai ratou ia tatou
E parau faataaraa na te mau tamarii o te Ekalesia mai roto mai i te 173raa o te amuiraa rahi matahiti, 5-6 no eperera 2003
Peresideni Gordon B. Hinckley : Ua riro te evanelia a Iesu Mesia ei raveʻa e roaa ai te hau. E ia haapaʻo hoʻi tatou i te reira, e ia faatumu i te reira i roto i to tatou oraraa nei, e haamaitaihia ïa tatou, e faufaahia ïa tatou. Aue ïa te faahiahia ia riro ei feia ohipa i roto i teie ohipa hanahana. A oaoa anaʻe tatou no taua fanaʻo ra. E tavini anaʻe tatou ma te oaoa rahi.
Peresideni Thomas S. Monson, tauturu hoê i roto i te Peresideniraa Matamua : Eita te moemoea e mono i te faaineineraa mau i mua i te mau fifi no te oraraa. E mea ohipa rahi mau te faaineineraa, e mea titauhia râ te reira no to tatou haereraa i mua.
E ere to tatou tere i te mau tau i mua nei i te mea ohie. Te vai ra te mau tipuuraa e te mau vahi apoopoo i niʻa i te eʻa. E mea tiʻa roa ia tatou ia pure i te mau mahana atoa i te hoê Metua Here i te Ao ra o te hinaaro nei ia tatou paatoa ia manuia i roto i te oraraa.
Peresideni James E. Faust, tauturu piti i roto i te Peresideniraa Matamua : Ua rau te hohoʻa no te vai-tano-raa e no te vai-hape-raa, e mea titauhia ia outou ia faaoti tei hea te reni arataʻi. Te poroʻi atu nei au ia outou mai te mea aita e papu ra i roto i to outou feruriraa e aore râ i roto i to outou aau ua tano anei e aore râ ua hape, eiaha ïa e rave i te reira. Te mau nei tatou tataitahi i te tiʻamâraa, e e faaite mai te horoʻaraa a te Varua Maitai ia tatou eaha te mea tano e eaha te mea hape, eaha te parau mau e eaha te haavare.
Elder Russell M. Nelson no te Pŭpŭ no te Tino Ahuru Ma Piti Aposetolo : E nehenehe tatou e faaite i to tatou here i te Atua na roto i te pure. Ua faaohie hoʻi Oia i te reira. E pure tatou Iaʼna i te mau taime atoa. Aita e titauhia te hoê mauihaa. Aita atoa tatou e titauhia ia faaî i te mau accu e aore râ, ia aufau i te moni avaʻe…
E pûpû-atoa-hia te pure ma te mamu noa. E nehenehe te hoê e feruri i te pure, ia ore te parau ia anoi-noa…
E faaoti tatou i ta tatou pure « na roto i te iʻoa o Iesu Mesia, amene ». Ia faaroo tatou i te hoê taata ia pure, e amui tatou i ta tatou « amene », oia hoʻi ïa, « Naʻu atoa teie pure ».
Elder Dallin H. Oaks no te Pŭpŭ no te Tino Ahuru Ma Piti Aposetolo : Mai te mau pionie, e tiʻa roa ia tatou ia haamaitai i te Atua no to tatou mau peapea, e ia ani i te aratairaa ia farerei anaʻe tatou i te reira. Na roto i taua huru ra, e na roto i to tatou faaroo, to tatou haapaʻo, e faatupu ïa tatou i te mau fafauraa ta te Atua i horoʻa mai. O te taatoʻaraa o te tuhaa o te faanahonahoraa.
Elder Joseph B. Wirthlin no te Pŭpŭ no te Tino Ahuru Ma Piti Aposetolo : Te Varua Maitai e Varua ïa, e melo taaê e te papu maitai oia no te Atuaraa. E ite oia e aore ra e faaiteraa papu no te mana o te Atua, no te hanahana o te Mesia, e no te parau mau o te evanelia tei faahoʻihia mai…
… I to tatou haamauraahia ei melo no te Ekalesia, ua horoahia mai ia tatou i te tiʻaraa no te tapea noa i te Varua Maitai, tera râ e tiʻaraa noa teie o te mea titauhia ia tatou ia fanaʻo e aore ra ia farii na roto i te haapaʻoraa i te ture e te parau-tiʻa. A haapaʻo maitai i teie horoʻaraa.
Elder Dennis B. Neuenschwander no te peresideniraa o te Hitu Ahuru : Ua hau atu te auraa o te mau pureraa oroʻa i te tahi noaʼtu mau pureraa. E mau taime moʻa roa i roto i te vahi moʻa. I roto i teie mau pureraa, e hiʻo tiʻa tatou i te aroha o te taraʻehara o ta te ao nei i ore â i ite na. E feruri hohonu tatou i te here o te Atua o tei horoʻa mai i Taʼna Tamaiti Fanau Tahi ia roaa ia tatou te ora mure ore. A rave ai tatou i te oroʻa, e haamanaʻo tatou Iaʼna e e faaite tatou i to tatou hinaaro i te rave i Toʼna iʻoa i niʻa iho ia tatou e i te haapaʻo i Taʼna mau faaueraa.