Haere tiʻa ma te tiʻa-maite-raa
E haere tiʻa outou e te hoê fâ. E tauturu te Varua Maitai ia outou i te tiʻa maite-raa e na to outou iteraa papu no niʻa i te Faaora e tauturu ia outou i te tiaʻi-papu-raa.
I niʻa i te uahu i Copenhagen i te Fenua Tanemateta, te vaira te hoê tii no te hoê tamahine apî i te iʻoa o Kristina. E hiʻo tiʻa Kristina i te miti no taʼna opuaraa ia haere na muri i te Feia Moʻa i Ziona. E pupuhi uʻana te mataʻi i niʻa iaʼna, aita râ oia e fariu. E tiʻa-maite-oia ma te haere tiʻa e rave i te hoê ohipa teimaha, area râ, ua ite oia e e mea tiʻa. Ua here au i taua tii ra no te mea, e faahohoʻaraa Kristina no toʻu iho tupuna vahine no Tanemateta o tei maiti i te ati atu i te Ekalesia i roto i te taime o te patoʻiraa rahi. Te mauruuru nei au no toʼna itoito e no toʼna iteraa papu. Na taʼna maitiraa o taua mahana ra i faaineine i toʻu tipaeraa mure ore, eiaha noa râ noʻu anaʻe, no te mau uʻi atoa râ.
I roto i te Buka a Moromona, te faaite ra o Nephi e nehenehe tatou ia « haere tiʻa » (2 Nephi 31:20). Te parau ra oia aita tatou e haere tiʻa noa, e mea tiʻa râ ia na reira tatou. Penei aʻe te ite ra o Nephi mai ia Kristina e, te tiʻa-maite-raa i te mau maitiraa a te taata hoê, no te haaputapûraa ïa i te mau uʻi. I to te metua tane o Nephi faaueraa iaʼna ia hoʻi i Ierusalema e tii i te mau papaa parau ia Labana ra, ua parau o Nephi : « Inaha, e mea paari i te Atua ia noaa teie nei mau papaa parau ia tatou nei, ia tiʻa ia tatou i te faaite atu i te reo o to tatou hui tupuna i ta tatou mau tamarii » (1 Nephi 3:19 ; haapapuraa tuuhiaʼtu). Ua feruri Nephi i toʼna utuafare o a muri aʻe noaʼtu e aita oia i tiʻaturi e tupu te faaipoiporaa. O toʼna anaʻe utuafare to te medebara ! Aita Nephi i farii noa i te orama no te hoʻiraa i toʼna utuafare i te raʻi, ua farii atoa oia i te orama i te mea o taʼna e hinaaro no toʼna utuafare i te fenua nei.
E tauturu te Faaora ia outou ia hiʻo e ia maramarama i Taʼna fâ no outou. E mau tamahine herehia outou e Ana. Ua ite Oia ia outou e e faanahonahoraa Taʼna no to outou oraraa. Ua fafau mai Oia e maite mea e ora tiʻamâ noa outou, e parahi tamau mai Toʼna Varua i roto ia outou.
Mai te mataʻi uʻana e pupuhi i niʻa i te tii o Kristina i niʻa i te uahu o Tanemateta, e ite atoa outou i te puai o te patoʻiraa o te ao nei. E haafifi « te haere tiʻa-raa » i te patoʻiraa. Aita te papaʻiraa moʻa i parau e a haere i mua, e aore râ, a faanuu i mua, e aore râ, a nuʻa atu i mua. Ua parau râ e, a haere tiʻa i mua ! No te raveraa i te reira, e mea tiʻa ia outou ia ite e te haere râ outou ihea. E tauturu te Varua Maitai ia outou i te tiʻa maite-raa e na to outou iteraa papu no niʻa i te Faaora e tauturu ia outou i te tiaʻi-papu-raa.
Rave rahi matahiti i mairi, ua tapaʻo taʻu tane e o vau iho nei i roto i te hoê Hororaa i Boston. Te pô hou te hororaa, no to maua hinaaro ia ite eaha te huru o teie nei hororaa, ua pou atu maua i te oire no Boston, afa maile i te reni tapaeraa. I roto i te mărû o te pô, ua taamu maua i to maua tiaa e ua horo maua i niʻa i taua reni ra. Ia tae maua, ua afaʻi maua i to maua na rima i niʻa ma te faahua e, ua rê ia maua ! Ua manaʻo maua i na tauasini taata mataʻitaʻi o te huro ra ia maua. Ia poʻipoʻi aʻe, ua horo maua i taua hororaa ra. E piti ahuru ma ono maile e te afa (41.3 km) te atea to teie tamataraa. Te vaira te mau aivi faataʻuma, hoê tei parauhia « Heartbreak » [mafatu-mauiui] e tumu ïa i piihiaʼi mai te reira. A horo noaʼi au na taua mau aivi ra, ua puta mai i roto i toʻu feruriraa te reni tapaeraa e eaha paʻi ahiri e tapae iho â mai na pô ra. Na te orama o taua reni tapaeraa ra i faaitoito iaʻu ia faaoti i taua hororaa i roto i te mataʻi rahi toʻetoʻe o New England.
E tauturu ta outou opuaraa no to outou oraraa ia outou ia haere tiʻa noa. A rave nâ maa minuti iti no te feruri ihea roa outou i roto hoê e aore râ, piti e tae atu i te pae o te matahiti. Ei reira, a faaineine ia outou iho. Eita e tiʻa ia horo taʻue noa i roto i te hoê hororaa. E titauhia râ ia faaineine i te mau mahana atoa, maa vahiti e maa vahiti no te horo 26.2 maile i te atea. Oiaʼtoa te oraraa. Na roto i te pure itoito e te taiʻoraa i te papaʻiraa moʻa e tauturu ia outou ia manuïa i ta outou mau fâ. Na ta outou mau opuaraa o te mau mahana atoa e horoʻa i te faaurûraa i te mau uʻi.
Ua tauturu te haapiiraa evanelia ia Melissa ia riro ei tamahine o taʼna i manaʻo ia riro oia mai te reira te huru. E ere oia i te melo no te Ekalesia, ua tapaʻo râ oia i roto i te piha haapiiraa evanelia i pihaʻi iho i toʼna mau hoa. I te 18raa o toʼna matahiti, ua haapii te mau misionare iaʼna. Ua ite oia e parau mau te mau mea o ta raua i haapii iaʼna ! E mea au roa toʼna bapetizoraa. Ua manaʻo oia e, e ere toʼna mau hoa e toʼna utuafare anaʻe tei tae mai, ua tae atoa maira toʼna utuafare o a muri atu. Mai te mea ra e, te faaroo ra te episekopo i toʼna iho utuafare i te parauraa mai e : « Mauruuru e Mama ! »
Ua fafau atoa outou mai ia Melissa i te taime o te bapetizoraa. Na roto i te haapaʻoraa i ta outou mau fafauraa e arataʻihiaʼi outou e te Varua Maitai. E paruru, e faaitoito e e faaite te Varua Maitai ia outou « i te mau mea atoa [o ta] outou e rave » (2 Nephi 32:5). Na teie horoʻa e faataa ia outou i te ao nei.
Ua ite matou e te farii nei outou e rave rahi mau patoʻiraa i ta outou mau faatureraa. Ua faatiʻa mai te Feia Apî Tamahine o Tennessee e o Arkansas iaʻu e ua faaruru ratou i te patoʻiraa no ta ratou faaroo i te fare haapiiraa. Oiaʼtoa te Feia Apî Tamahine o taʻu i farerei i Haiti, ua faahepohia ratou ia rave i te mau mea tiʻa-ore e ere i ta te hoê tamahine no te fafauraa. Ua maramarama râ to ratou mata i te tiʻaturiraa o te evanelia. Ua tiʻa maite ratou no te mea ua faaroo ratou i te « reo iti haʻihaʻi » (1 Te Mau Arii 19:12) o te Varua Maitai e ua haapaʻo i Taʼna mau muhumuhuraa.
E arataʻi atoa te Varua Maitai ia outou a rave ai outou i te mau opuaraa no to outou oraraa no a muri atu. Te hoê atoa tamahine apî o taʻu i matau o te haamatau ra i te hoê taureʻareʻa nehenehe roa – te tamaiti numera hoê o te pŭpŭ taora popo i roto i te ete e e peresideni hoʻi no te mau piahi o taʼna piha haapiiraa. A tauʻa parau ai raua no to raua oraraa no a muri atu, ua faaite atu oia e ua opua oia i te faaipoipo i roto i te hiero i te hoê taureʻareʻa o tei rave i taʼna tau misioni. E ere roaʼtu te reira i te opuaraa a teie taureʻareʻa. I te Noela i muri mai, toro atura teie taureʻareʻa i te hoê taoʻa aroha naʼna. I toʼna iritiraa i te vehi, ite ihora oia e, e rata teie no ô roa mai i te hoê peropheta na te Atua e piiraa i toʼna hoa i roto i te hoê misioni. Na taʼna faaurûraa i turaʻi i teie nei tamaiti ia rave i te hoê opuaraa faufaa.
E nehenehe atoa outou e ume i te mau tamaroa apî o ta outou i matau ia « faateiteihia e ia riro ei mea maitai aʻe » (Gordon B. Hinckley, « The Quest for Excellence », Liahona, setepa 1999, 8). E nehenehe outou e tauturu i te feia apî tane ia faaineine e ia tavini i roto i te hoê misioni maitai roa. E nehenehe outou e tauturu ia ratou ia faaea mâ noa e ia faaohipa i to ratou autahuʻaraa ma te hanahana. Na te mana parau-tiʻa i roto i te oraraa o te hoê taureʻareʻa e faatupu i te hoê hopearaa mure ore eiaha noa i roto i toʼna oraraa nei i te oraraa râ o te mau uʻi.
I te 15raa o te matahiti o ta maua tamahine Emi, ua rave oia i te hoê opuraa. I te hoê poʻipoʻi ua iritihia taʼna Buka a Moromona i te pene 48 no Alama. Ua tapaʻo oia i te irava o tei tuatapapa i te huru o te raatira rahi o Moroni ; E taata puai e te mana hoʻi o Moroni ra ; e taata ite mau… E taata mau maite hoʻi i te faaroo i te Mesia ra » (mau irava 11, 13).
I te hiti ua papaʻi oia, « Te hinaaro nei au i te faaipoipo i te hoê taata mai ia Moroni te huru ». Hitu matahiti i muri mai, ua tupu te reira ! Manuïa maitai atura te fâ a Emi no te huru o te tane taʼna i hinaaro a taiʻo ai oia i te mau papaʻiraa moʻa e a faaroo ai te mau muhumuhuraa a te Varua Maitai. Ua haapii mai oia no niʻa i te Faaora e ua maramarama i Taʼna « raveʻa no te oaoa » (Alama 42:8).
A taiʻo ai outou i te mau papaʻiraa moʻa, e ite outou e e ere te Faaora i te maramarama anaʻe e te ora o te ao nei ; ua riro atoa râ Oia ei tiaʻi papu roa no tatou. Na roto Iaʼna e farii ai outou i te tiʻaturiraa no te hoʻiraa e ora i pihaʻi iho i to tatou Metua i te Ao ra. Na roto Iaʼna outou e tatarahapaʼi e e ape ai i te mau mea o te faatea ia outou i te tiʻa maite-raa. Na roto Iaʼna e roaai te puai e te itoito no te haere tiʻa, noaʼtu te pupuhi uʻana a te patoʻiraa.
Eita paha outou e tiʻa i niʻa i te hoê uahu e a maiti ai mai ïa Kristina. E ore-roa paha outou e haere tiʻa i te mau mouʻa i roto i te hoê tataʻuraa horo. E ite râ outou i te mau maitiraa o te faaô mai i te mau tumu mure ore. E haere tiʻa outou e te hoê fâ. E tauturu te Varua Maitai ia outou i te tiʻa maite-raa e na to outou iteraa papu no niʻa i te Faaora e tauturu ia outou i te tiaʻi-papu-raa.
Te vaira te mau mato i mua, ua tapu râ to tatou Fatu e Faaora o Iesu Mesia e e pauma atoa Oia i te mau mato e o outou atoa. Teie te taime faufaa no te haere tiʻa e no te tiʻa- maite-raa.
E parau atoaʼtu vau mai ia Nephi, « E teie nei, e haere tiʻaʼtu outou i mua i te tiʻa-maite-raa i te Meisa, ma te tiaʻi papu roa… E tena na, ia haere outou i mua, … ma te tapeʻa hoʻi e tae noaʼtu i te hopea ra, … te na ŏ maira te Metua : E ora mure ore to outou i reira ra » (2 Nephi 31:20 ; haapapuraa tuuhiaʼtu). Na roto i te iʻoa o Iesu Mesia, amene.