E mea faufaa rahi mau te mau mamoe tei moʻe
I te mau metua o te mauiui nei, tei tapeʻa maite i te parau-tia, tei itoito e o te haapii tamau nei i ta ratou mau tamarii haapaʻo ore na roto i te pure, te parau atu nei au ia outou, te tiaʻi mai nei te Tiaʻi Mamoe Maitai ra ia ratou.
Toʻu mau taeaʻe e toʻu mau tuahine here, taʻu parau poroʻi i teie poʻipoʻi, o te parau ïa no te tiʻaturiraa e te tamahanahanaraa i te mau metua tei roohia i te mauiui e tei haa rahi hoʻi i te aupururaa i ta ratou mau tamarii i roto i te parau-tia ma te here e te itoito. Ua oto ratou no te mea ua orure mai ta ratou tamarii e aore râ ua arataʻi-ê-hiaʼtu ratou i te peeraa i te eʻa no te ino e te haamouraa. A feruri ai au i to outou oto rahi, te haamanaʻo nei au i te mau parau a Ieremia, « E reo tei itea i Rama, … e te oto rahi roa o Rahela i te otoraa i taʼna tamarii, no te mea aita taʼna tamarii i farii i te tamahanahanaraa ». Ua horoʻa mai te Fatu i teie parau haapapuraa : « A faaea na to reo i te oto, e to mata i te roimata na, e faautuʻahia hoʻi ta oe ohipa, e e hoʻi mai ratou mai te fenua o te enemi mai ».1
E haamata atu vau na roto i te faaite-papu-raaʼtu e te vai ra te parau a te Fatu no te mau metua i roto i teie Ekalesia, ua papaihia i roto i te Parau Haapiiraa e te Parau Fafau, « E teie faahou â, mai te mea e tamarii ta te mau metua i Ziona, e aore râ i roto i te hoê o toʼna ra mau tĭtĭ i haamauhia ra, o te ore hoʻi e haapii atu ia ratou ra ia ite papu roa i te parau no te tatarahapa, te faaroo i te Mesia te Tamaiti no te Atua Ora, e no te bapetizoraa e te horoʻa no te Varua Maitai na roto i te tuuraa rima, ia tae i te vaʻu o te matahiti ra, tei niʻa iho ïa te hara i te upoo o te mau metua ».2 Te haapiihia nei te mau metua ia « haapii i ta ratou mau tamarii ia pure, e ia haere ma te parau-tia i mua i te Fatu ».3 I roto i toʻu tiʻaraa metua tane, papa ruau, e e metua tupuna, te farii nei au i teie parau faaue ei parau na te Fatu, e i roto i toʻu tiʻaraa ei tavini no Iesu Mesia, te faaitoito nei au i te mau metua ia haapaʻo i teie parau aʻo mai te maitai e hope roa.
O vai hoʻi te mau metua maitataʻi ? O ratou ïa o tei tamata na roto i te here e te aau pure i te haapii i ta ratou mau tamarii na roto i te hiʻoraa maitai e te parau tumu « ia pure, e ia haere afaro noa i mua i te Fatu ».4 E parau mau teie, noaʼtu e e haapaʻo ore mai te tahi o ta ratou mau tamarii e aore râ ua pee i te mau peu a to te ao nei. Te fanauhia nei te mau tamarii i roto i teie ao ma to ratou iho mau huru taa ê mau. Te tahi mau tamarii « e haavivi ratou i niʻa i te metua no te mau huru tumu atoa … te vaira râ te tahi pae o ratou o te riro ei haamaitairaa no te oraraa e ei ooaoaraa atoa no te mau metua tane e aore râ te mau metua vahine ».5 Te metua manuïa, o te metua ïa tei faatusia ia ratou e tei rohi ma to ratou puai atoa i roto i te mau fifi o to ratou iho utuafare.
Aita roa e tiʻa ia faitohia te rahi o te here o te mau metua no ta ratou mau tamarii. Aita atu â e tuʻatiraa mai teie te huru e vai ra. E vai noa te here o te hoê metua no te tamarii, noaʼtu e ua mauiui te mafatu i te mau ohipa ino i ravehia e te tamarii. Te hiaai e te pure nei te mau metua atoa ia rave faaoti ta ratou mau tamarii i te mau faaotiraa tano e te maitai. Te mau tamarii o te haapaʻo i te parau, e faatae mai ïa ratou i te mauruuru e te oaoa rahi i niʻa i to ratou mau metua.
Eaha ra ïa mai te mea e ua patoʻi e aore râ ua arataʻi-ê-hiaʼtu te mau tamarii tei haapiihia e te tahi na metua faaroo e te here ? Te vai ra anei te tiʻaturiraa ? E mea rahi tera oto i niʻa i te metua no te hoê tamarii tei orure. Te toru o te tamarii a te Arii Davida, oia hoʻi o Abasaloma, ua taparahi pohe oia i te hoê o toʼna mau taeaʻe, e ua arataʻi oia i te hoê orureraa rahi i niʻa i toʼna metua tane. Ua taparahi-pohe-hia o Abasaloma e Ioabi. A faaroo ai te Arii Davida e ua pohe o Abasaloma, ua heva oia e ua faaite aʻera oia i toʼna oto na roto i teie nei mau parau, « Aue oe, e taʻu tamaiti, e taʻu tamaiti, e Abasaloma e ! Ahiri o vau tei pohe ei mono ia oe, e Abasaloma, e taʻu tamaiti, e taʻu tamaiti e ! » 6
Ua faaite-atoa-hia mai teie huru here o te metua i roto i te parabole o te tamaiti puhura taoʻa ra. A hoʻi mai ai taʼna tamaiti orure ra i te fare i muri iho i te puhuraraa i taʼna taoʻa i roto i te oraraa haapaʻo ore, ua rave mai te metua tane i te kafa faaamu ra e patia no te faaoaoaraa i te hoʻiraa mai o te tamaiti puhura taoʻa, e ua parau atu i taʼna tamaiti maitai e te haapaʻo ra, « E amu hoʻi tatou i te maa, e oaoa hoʻi tatou o taʻu tamaiti nei hoʻi, i pohe na, e ua ora mai nei, i moʻe na, e ua itea mai nei ».7
Te tiʻaturi nei au e te farii nei au i te parau tamahanahana a te taeaʻe Orson F. Whitney i te na ŏraa e :
« Ua parau mai te peropheta Iosepha Semita – e aita roa oia i haapii i te hoê parau tamahanahana rahi atu i teie – oia hoʻi te mau taatiraa mure ore a te mau metua faaroo e te haapaʻo e te mau fafauraa moʻa tei horoʻahia ia ratou no to ratou itoito rahi i te taviniraa i te Parau Mau, na te reira ïa e faaora ia ratou iho, e i to ratou mau huaai atoa. Noaʼtu e e moʻe te tahi o te mau mamoe, e vai noa râ te mata o te Tiaʻi Mamoe i niʻa ia ratou, e eita e maoro e ite mai ratou i te rima marû o te Atua Moʻa ra ia faatorohiaʼtu ia ratou ra e ia huti mai ia ratou i roto i te nana. I roto anei i teie oraraa e aore râ te oraraa i mua nei ia tatou, e hoʻi mai ihoa ratou. E titauhia ia ratou ia aufau i te utuʻa no te reira ; e mamae mau ratou no ta ratou mau hara ; e pee paha ratou i te eʻa taratara ; tera râ mai te mea i te pae hopea e, e arataʻi te reira ia ratou, mai te tamaiti puhura taoʻa tei tatarahapa, i te aau e i te fare o te hoê metua tane o te faaore i te hape, aore ïa taua mauiui ra i riro ei mea faufaa ore. A pure no ta outou mau tamarii haapaʻo ore ; a tapeʻa noa ia ratou ma to outou faaroo. A tiʻaturi noa, a tiʻaturi noa, e tae roa ua ite atu outou i te faaoraraa a te Atua ».8
Te vai ra te hoê parau tumu o te moʻehia nei, oia hoʻi e mea titauhia ia ratou ia tatarahapa hope roa e ia « mauiui no ta ratou mau hara » e ia « aufau i ta ratou utuʻa ». Ua ite au e o teie nei te taime no te faaineine no te farerei i te Atua.9 Mai te mea aita te tatarahaparaa a te tamarii haapaʻo ore e tupu i roto i teie oraraa, e mea paari roa anei te taatiraa no te tauturu ia ratou i ta ratou tatarahaparaa ? Ua parauhia mai tatou i roto i te Parau Haapiiraa e te Parau Fafau : « E faaorahia te feia i pohe o te tatarahapa, na roto i te haapaʻoraa i te mau oroʻa no te fare o te Atua ra,
« E i muri iho i to ratou aufauraa i te utuʻa no ta ratou mau ofatiraa ture, e ua horoi-mâ-hia ratou, i reira ïa ratou e farii ai i te haamaitairaa mai te au i ta ratou mau ohipa ra, inaha e farii ratou i te faaoraraa ».10
Ua ite tatou e ua haamauʻa te tamaiti puhura taoʻa i taʼna faufaa e i te pauraa te reira, ua hoʻi mai oia i te fare o toʼna metua tane. Ua fariihia mai oia i roto i te utuafare, ua pau râ taʼna faufaa.11 E ore roa te aroha e eîa i te titauraa a te parau-tia, tei te huru o ta ratou tarahaparaa e na roto i te taraehara a te Mesia e manuïa ai te mana taatiraa a to ratou mau metua faaroo i niʻa i te tamarii haapaʻo ore. E roaa i te mau tamarii haapaʻo ore tei tatarahapa te faaoraraa e te mau haamaitairaa atoa o te apiti ra i te reira, area râ te faateiteiraa, na ratou iho ïa e titau i te reira. Teie te uiraa : O vai te feia o te farii i te faateiteiraa ? E vaiihohia ïa te reira i te Fatu ra i roto i Toʼna aroha.
E mea iti roa te feia o tei orure e tei rave i te mau ohipa ino rahi roa, e tei « tiavaru ê atu i te mana no te tatarahaparaa na roto i te reira ».12 Na te Fatu ïa e haava mai i te reira, inaha ua parau oia ia tatou, « E faaore au, o te Fatu, i te hara a ratou taʻu i hinaaro i te faaore atu, ia outou râ ua titauhiaʼtu ra outou ia faaore i te hapa a te taata atoa ».13
Peneiaʻe paha i roto i teie oraraa aita tatou e haroaroa maitai nei eaha mau te roaraa o te mau taatiraa o te mau metua parau-tia i niʻa i ta ratou mau tamarii. Peneiaʻe paha te vai ra te mau tautururaa e rave rahi o te haa nei o te ore râ e itehia nei e tatou.14 Te tiʻaturi nei au e te vai ra te hoê taura huti puai a te utuafare, oia hoʻi te faaûrûraa a to tatou mau tupuna here o te haa noa ra i te tahi atu paeʻau mai o te paruru.
Ua parau mai te peresideni Howard W. Hunter « Te tatarahapa o te mihiraa ïa o te aau i te utuafare, e te aupuru hope ore a te metua ra, o te faaiteraa papu te reira e, e faaore papu te Atua i ta tatou mau hape ». E ere anei o te utuafare te mea ta te Faaora i tutava i te patu i roto i taʼna ohipa i te tahuti nei ? 15
E rave rahi te mau haapiiraa no niʻa i te tiʻaraa metua ta tatou e apo nei mai roto mai i to tatou iho mau metua. Ua rahi roa toʻu here no toʻu metua tane a faaohipa ai oia i te mărû, te faaoromaʻi e te haroaroaraa i niʻa iaʻu. I te û-ino-raa te pereoo o te utuafare iaʻu i te hoê mahana, ua faaohipa oia i te mărû i niʻa iaʻu e ua faaore mai i taʻu hape. E tamaʻi râ oia i taʼna mau tamarii tamaroa o te haavare e aore râ o te tamau noa i te ofati i te ture, i te faatura-ore-raa ihora i to ratou metua vahine. Ua pohe toʻu metua tane no fatata roa e pae ahuru matahiti i teie nei, tera râ te mihi nei au no te ore-faahou-raa e tiʻa ia haere atu iaʼna ra no te farii i taʼna mau parau aʻo e te aroha. Parau mau, aita i afaro iaʻu taʼna mau parau aʻo i te tahi mau taime, area râ toʼna here noʻu, e mea papu mau roa ïa te reira. Aore roa vau i hinaaro ia inoino mai oia iaʻu.
Te hoê tuhaa faufaa roa no te faatere-maitai-raa ei mau metua, o te faatitiaifaroraa ïa i te tamarii na roto i te aroha. Ia ore tatou e faatitiaifaro i ta tatou mau tamarii, na te ao nei paha ïa e rave mai i te reira na roto i te raveʻa e au-ore-hia e tatou e aore râ e ta tatou iho mau tamarii. Te hoê tuhaa no te faatitiaifaroraa i te tamarii, o te haapiiraa ïa ia ratou ia rave i te ohipa. Ua parau mai te peresideni Gordon B. Hinckley, « Te hoê o te mau peu maitai roa ra… o te rave-tia-raa ïa i te ohipa. E mea faufaa ore te ite ahiri e aita e apitihia i te ohipa. Area râ te ite e apitihia i te ohipa, e mea faahiahia roa ïa ».16
Te rahi roa nei te mau herepata a Satane, e te haere atoa nei te ohipa faaamuraa tamarii i te fifi atoa no te reira. No reira e mea tiʻa i te mau metua ia rohi maitai, e ia titau atu i te tautururaa ta te haereraa i te pureraa e te taviniraa e nehenehe e horoʻa mai. Mai te mea e rave te mau metua i te hape e e haere haapaʻo ore atu noaʼtu no te hoê taime poto noa, e na reira atoa paha ïa ta ratou mau tamarii, oia hoʻi i te pee i taua hiʻoraa hape ra.
Te vai ra te tahi atu paeau o teie mea. Te taparu atu nei au i te mau tamarii tei faaatea roa i to ratou mau metua ia faatoro atu i te rima ia ratou, noaʼtu e aita ratou i hinaaro faahou e paraparau mai ia outou. Te mau tamarii o te parau faaino nei no niʻa i to ratou mau metua, e mea tiʻa ïa ia ratou ia haamanaʻo i te parau aʻo a Moroni i toʼna parauraa, « Eiaha e faaino mai iaʻu no taʻu mau hape ; eiaha atoa taʻu metua no taʼna mau hape ; eiaha hoʻi ratou tei papai na i mua i taʼna, e haamaitai râ i te Atua, oia i faaite mai i ta matou mau hape ia outou ia hau to outou paari i to matou ra ».17
A fâ mai ai o Moroni i te peropheta apî roa ra o Iosepha Semita i te matahiti 1823, ua faahiti mai oia i te irava no niʻa i te misioni a Elia : « E tuu hoʻi oia i roto i te aau o te tamarii te mau fafau i faaauhia i to ratou metua, e e fariu hoʻi te aau o te tamarii i to ratou mau metua ».18 Te tiʻaturi nei au e, e fariu te mau tamarii atoa i to ratou aau i to ratou mau metua tane e i to ratou metua vahine atoa.
Ua mâtau vau i te tahi na metua i toʻu apîraa ra, e tamaiti ta raua tei haapaʻo ore e tei faaatea iaʼna iho i te utuafare o teie na metua. Area râ i to raua paariraa mai, ua faatitiaifaro mai oia i toʼna fifi i toʼna na metua ra, e ua riro mai oia ei tamaiti maitai e te haapaʻo roa aʻe i rotopu i te mau tamarii atoa a teie na metua. A paari mai ai tatou, e riro te umeraa a to tatou mau metua e a to tatou mau metua tupuna i te tahi paeʻau mai no te paruru ei umeraa puai mau. E mea faahiahia mau ia haere mai ratou e farerei ia tatou i roto i ta tatou mau moemoea.
E ere i te mea tano ia tatou ia haava i te mau metua faaroo no te mea ua haapaʻo ore te tahi o ta ratou mau tamarii e aore râ ua faaruʻe i te mau haapiiraa e i te here o to ratou na metua. Ua fanaʻo te mau metua no te mau tamarii e te mau mootua o te horoʻa mai i te tamahanahanaraa e i te oaoa ia ratou. E mea tiʻa roa ia ratou ia aroha atu i te mau metua tiama e te mea parau-tia o te rohirohi nei e o te mauiui nei no ta ratou mau tamarii faaroo ore. I parau noa te hoê o toʻu mau hoa, « Mai te mea e aita â oe i roaahiaʼtura i te ati i te hoê o ta oe mau tamarii, a tiaʻi rii noa ïa ». Aita roa hoê taata e nehenehe e ite eaha te ohipa ta ta ratou mau tamarii e rave i roto i te tahi mau huru. Ia ite anaʻe toʻu metua vahine hoovai i te tahi atu mau tamarii ia rave i te ohipa tiʻa ore, ua parau oia e, « Aita roa vau i parau e, e ore taʻu iho mau tamarii e rave i tera ohipa, no te mea te rave ra paha ratou i te hoê â huru ohipa i teie iho nei taime a paraparau atu ai au ! » Ia oto anaʻe te mau metua no ta ratou mau tamarii haapaʻo ore, e mea tiʻa ïa ia tatou, ma te aau aroha, « ia ore e riro ei taata o te rave mai i te ofaʻi matamua no te taora atu ».19
Ua papai te hoe melo no te Ekalesia aita i itehia o vai te iʻoa i te aamu no niʻa i te mauiui tamau ta toʼna taeaʻe i faatupu i niʻa i toʼna na metua. Ua rave teie tamaiti i te raau taero. Ua patoʻi oia i te mau tutavaraa atoa a vetahi ê no te tauturu e no te faatitiaifaro mai iaʼna. E taata haavare roa oia e te taviri taata. Taa ê atu i te tamaiti puhura taoʻa ra, aita roa teie tamaiti haapaʻo ore i hoʻi mai i te fare no te faatitiaifaroraa. Ua roaahia râ oia e te mau mutoʻi e ua titauhia oia ia amo i te faautuʻaraa no taʼna mau ohipa. No te roaraa e piti matahiti, ua paturu toʼna na metua i te faanahoraa rapaauraa maʻi o Bill, e tae roaʼtu i te ora-roa-raa mai oia i te tiʻaturiraa i niʻa i te raau taero. Teie ta te tuahine o Bill i parau, « Ia manaʻo anaʻe au, e na taata faahiahia roa toʻu na metua. Aita roa raua i tapu i to raua here no Bill, noaʼtu e ua ore roa raua i te mau mea ta Bill i rave i niʻa iaʼna iho e i to ratou oraraa utuafare. Ua faaoti râ raua i te paturu ia Bill na roto i te mau huru raveʻa atoa e titauhia i te faaora ia Bill e tae roa ua tae mai oia i niʻa i te eʻa papu e te afaro. Ua faaohipa mau ïa raua i te evanelia a te Mesia na roto i te hereraa i te hoê o tei faaruʻe mai i te eʻa ra. »20
Eiaha na tatou e faateʻoteʻo ia tatou iho, a mauruuru râ tatou ma te aau haehaa, mai te mea e ua haapaʻo ta tatou mau tamarii e te faatura ra ratou i ta tatou mau haapiiraa no niʻa i te Fatu. I te mau metua o te mauiui nei, tei tapeʻa maite i te parau-tia, tei itoito e o te haapii tamau nei i ta ratou mau tamarii haapaʻo ore na roto i te pure, te parau atu nei au ia outou, te tiaʻi mai nei te Tiaʻi Mamoe Maitai ra ia ratou. Ua ite te Atua e ua taa maitai iaʼna i to outou oto rahi. Te vai ra te tiʻaturiraa. A farii mai i te mau parau a Ieremia, « E haamaitai a outou » e e haere mai ta outou mau tamarii « i rapae i te fenua o te enemi ».21 Te faaite atu nei au i teie iteraa papu e te pure nei au na roto i te iʻoa o Iesu Mesia ra, amene.