Ua parau anei au ia oe…?
I roto i te opuaraa mure ore no te mau mea, te mea rahi e te rave faaotiraa o ta outou e rave, o te paturaa ïa i te hoê utuafare moʻa e i te faaamuraa i te hoê utuafare puai na roto i te here.
Fatata a toru matahiti i mairi aʻe nei, ua faaipoipo hoê o ta maua tamahine, e revaʼtura i te atea e taʼna tane no te haere i te haapiiraa taote. Faaruʻe mai nei i te utuafare i paari mai ai oia, no te faatupu i toʼna iho. Feruri ihora vau : Ua hapii anei au iaʼna i te mau mea o taʼna e hinaaro ia ite ? Ua ite anei oia i te mea faufaa roaʻe o te oraraa ? Ua ineine anei oia no te paturaa i te hoê utuafare oaoa ?
A hiʻo noaʼtu ai au i toʼna nuuraaʼtu i muri, haamanaʻo ihora vau i te hoê buka o taʻu i horoʻa naʼna i te 17raa o toʼna matahiti. Parau tumu, « Ua parau anei au ia oe…? » Ua tapaʻo vau i te aʻo o taʻu i aʻo pinepine noa iaʼna i roto i ta maua mau tauʻaraa parau o te maororaa pô. A ratere amui atu ai raua taʼna tane i roto i to raua oraraa, manaʻo ihora vau i na mea e toru o taʻu i hinaaro i te papaʻi i roto i taʼna buka no te tauturu iaʼna ia faatupu i te hoê faanuuraa faufaa rahi e te tamataraa hau atu i te tahi atu vahi o te fenua : te faanuuraa no te haamata i roto i toʼna iho fare e i toʼna iho utuafare. Te hinaaro nei au e horoʻaʼtu ia outou te reira no te tauturu i te feia apî o te Ekalesia, no te haapii e no te faaite papuraa i te faufaa o te utuafare.
Na mua roa, ua parau anei au ia oe… nahea ia faariro i to outou fare ei pare tapuniraa no te hau e ei aoraʻi no te puai ? E mea tiʻa ia pee outou i te hohoʻa o ta outou i ite a tomo atu ai outou i roto i te fare o te Fatu, no te « haamau i te hoê fare… no te pure, ei fare no te haapaeraa maa, ei fare no te faaroo, ei fare no te haapiiraa, ei fare no te hanahana » (PH&PF 109:8). Ia pee tatou i teie hohoʻa, e faaea mai te hau rahi i roto i to tatou mau fare i roto i teie ao huanane.
A rave na i te hohoʻa o na fare o to oe na na tupuna. Ua faaamu na tupuna toopiti atoa ra i ta raua mau tamarii i roto i te « maramarama e te parau mau » (PH&PF 93:40). E fare to Papa no te haapii. Ua faaite oia i roto i te hunaraa o toʼna metua tane e, aita oia i haapii mai i te mau parau tumu o te evanelia i roto i te hoê putuputuraa i te fare pureraa, ua haapii râ oia i te reira i roto i toʼna iho utuafare. E faahau noa-raa te pureraa no toʼna utuafare. E fare toʻu no te hanahana. E mea faufaa roa (noaʼtu e e mea ohipa roa) ia parahi matou no te tamaa amui i te poʻipoʻi e i te ahiahi. Ua hau atu te hora tamaaraa i te tamaa noa. E taime faufaa roa no te faaamuraa i te varua e i te tino hoʻi.
Na te mau mea rii e faatupu i te utuafare oaoa – te mau mea mai te pure, te parauraa e, « te tatarahapaʼtu nei au », te faaiteraa i te aau mehara, te taiʻo-amui-raa i te hoê buka maitai. A haamanaʻo i to tatou ataataraa a hamani ai tatou i te aua i muri i to tatou fare ? A haamanaʻo i to tatou himeneraa a tere ai tatou na niʻa i te pereoo ia ore tatou e tamaʻi ? A haamanaʻo i to tatou haapaeraa no te hoê opuaraa faufaa roa e no ta te tahi hiʻopoʻaraa faufaa ? Te faaite ra i roto i te poroʻi no te utuafare : « Ua faatumuhia… te manuïa o te mau utuafare… i niʻa i te mau parau tumu no te faaroo, te pure, te tatarahapa, te faaoreraa hara, te faatura, te here, te aroha, te ohipa, e te faaoaoaraa… maitai » (« Te Utuafare : E Poroʻi i to te Ao nei », Liahona, atopa 1998, 24).
I to outou apîraa, ua roaa ia outou te mau peu mai te pure e te taiʻoraa i te mau papaʻiraa moʻa. Ua faatupu outou i teie mau peu ia faufaahia outou oiaʼtoa te mau aravihi no te haapiiraa i te tunu maa e i te haaputuraa i te moni. Na roto i teie mau hiaai parau-tiʻa e i to outou mau ite i te raveraveraa ohipa, e patu outou i te hoê fare ei pare tapuniraa no te hau e ei aoraʻi no te puai ?
I muri mai, ua parau anei au ia oe… e « Inaha hoʻi te tamarii ra, e tuhaa ïa no ô mai i ia Iehova ra » ? (Salamo 127:3) Ua faaite te Poroʻi i to te Ao nei, « te faaueraa a te Atua i taʼna mau tamarii ia fanau e ia rahi e ia faaî i te fenua, te mana noa nei ïa » (Liahona, atopa 1998, 24). Te tiʻaturi nei matou e e haamaitai mai te Metua i te Ao ra ia outou ia fanau. E rave rahi feia i te ao nei o tei ore i farii i te oaoa e o tei manaʻo e mea taupupu te tamarii. E parau mau, e rohirohi te tino e te pae aehuehu, te feruriraa ia riro anaʻe ei metua. Aita roa te mau metua vahine e faahanahanahia nei. I te tahi taime, e manaʻo oe, « Ua tano anei te ohipa o taʻu i rave ? E mea faufaa anei ? »
E mea faufaa anei ! Ua faaite te mau peropheta atoa i teie mau mahana hopea nei no niʻa i te ohipa a te metua vahine. Ua parau te peresideni Spencer W. Kimball e, « E mea faufaa ia maramarama outou e te mau vahine o te Mau Mahana Hopea Nei, ua faariro te Fatu i te auvahineraa e te mau metua vahine ei mea moʻa e ei arueraa teitei aʻe (« Privileges and Responsibilities of Sisters », Ensign, novema, 1978, 105). Ua faaite te Varua iaʻu e e parau te reira.
E tae teie iteraa ia outou, mai iaʻu atoa nei, e ere te riroraa ei metua i te hoê tamataraa noa, e hopoi mai râ i te oaoa rahi. E roaa te oaoa ia faaite te hoê tamarii pae matahiti i roto i te pureraa pô utuafare i te aamu no roto i te papaʻiraa moʻa ma te faahuʻahuʻa tiʻa mau e aore râ, ia taiʻo te hoê tamarii i te Buka a Moromona i te mau pô atoa ma te faaroo. Ua oaoa vau i taʻu tamahine, o oia te arataʻi pŭpŭ oaoa, i toʼna itoito i te patoʻiraa i toʼna arataʻi pŭpŭ apî i te mau peu tiʻa-ore o taʼna e haapii mai i te pŭpŭ, e ia papaʻi mai te hoê tamahine misionare i te rata ma te faaite i toʼna iteraa papu no te evanelia. E tupu mai te oaoa ia taiʻo atu te hoê tamahine na te hoê vahine mata pô e i te hoê tamaiti o te tavini atu i roto i te hiero. I roto i te mau taime mai teie te huru, e manaʻo vau mai ia Ioane te pĭpĭ here : « Aitaʼtu oʻu oaoa rahi maori râ, ia ite au, e te haapaʻo ra taʻu mau tamarii i te parau mau » (3 Ioane 1:4). Ua parau anei au ia oe… i roto roa i te hohonu raa o toʻu nei tino, ua oaoa vau i te riroraa ei metua vahine ?
Inaha, ua parau anei au ia oe… ua riro te here ei faufaa morare tumu i roto i te paturaa i te hoê fare puai ? Ua hamani to tatou Metua i te Ao ra i te hoê hohoʻa na tatou ia pee. Ua here Oia ia tatou, ua haapii ia tatou, ua faaoromaʻi ia tatou, e ua horoʻa mai i to tatou tiʻamâraa. Ua parau te peresideni Hinckley, « E nehenehe te here e faatupu i te huru-ê-raa – te here o te horoʻa maitaihia i te tamarii raa ra e vai ïa e tae noaʼtu i te paariraa… Te hoê faaitoitoraa tei horoʻa vavehia e taere ïa te faaino » (« Bring Up a Child in the Way He Should Go », Ensign, novema 1993, 60). I te tahi taime e taa-ore-hia te haavîraa, te auraa ra o « te haapiiraa » ïa, e te faaino. E maitai atu â te mau tamarii – oiaʼtoa te feia paari – ia haamaitai ratou i to ratou huru ei hopearaa no te here e te faaitoitoraa eiaha râ na roto mai i te faaino.
Ua matau vau i te hoê tamaiti, e rouru roa toʼna i toʼna apî-roa-raa, ua maiti toʼna na metua i te haapapu i niʻa i te manuïaraa o taʼna mau ohipa maitai e i toʼna maitai i niʻa i te mau taata riirii. E inaha, ua maiti oia i te tapu i toʼna rouru. Haapuai atura i niʻa i te haapiiraa, tavini atura i te Ekalesia, e pee atura i toʼna iho utuafare i te hohoʻa no te here i te tamarii na roto i te raveraa i te mea maitai.
E faaite tatou i to tatou here i te mau melo o te utuafare eiaha noa na roto i te haapii papuraa ia ratou, na roto râ i te horoʻaraa i to tatou taime. Ua taiʻo vau i te hoê veʻa tau matahiti i mairi aʻe nei tei piihia, « A Tuu i Te Tamarii i te Hopea », o te parau nei no te mau metua o tei tabula i to ratou taime no ta ratou mau tamarii mai ta ratou e « tabula » i ta ratou hora ohipa : 15 minuti i te pô, mai te mea e nehenehe, hoê atoa huru no te hauti, hoê taime i te hebedoma, e te vai atura (a hiʻo Mary Eberstadt, Wall Street Journal, 2 no me, 1995). Taaê atu i te metua vahine o tei pûpû na taʼna mau tamarii eiaha noa te huru maitai i te taatoaraa râ o toʼna taime. Ua ite oia e titau te auraa o te here i te aparauraa tamau, te hautiraa, te ataataraa, e te faataaraa i te taime no te ohipa. Te tiʻaturi nei au e mea tiʻa i te mau metua e i te mau tamarii ia amui i roto i ta ratou mau ohiparaa i te mau mahana atoa. Ua ite au e hiʻopoʻaraa ta oe e haere mai nei ; ua ite oe i taʻu haapiiraa e faaineine nei. E haere atoa vau i ta oe mau tuʻaroraa ; a haere mai na muri iaʻu i roto i te fare tunuraa maa no te faaineine i te maa. E nehenehe roa tatou e faaurû i to te tahi e i to te tahi oraraa, ma te faaite i te here i roto i te mau ohipa o te mau mahana atoa.
E faaoromai te here i te mau tamataraa o te oraraa. Ua haapii te Aposetolo Paulo e : « E faaoromaʻiraa roa to te aroha… E tapoʻi i te mau mea atoa ra, e faaroo i te mau mea atoa ra, e tiaʻi i te mau mea atoa ra, e haamahu i te mau mea atoa ra. E ore roa te aroha e mou » (1 Korinetia 13:4, 7, 8). Ua mataʻitaʻi au i te here faaoromai o te hoê metua vahine no taʼna tamaiti inu ava. Aita roa oia i haamarirau i te pure e ia pûpû iaʼna noʼna. I te mau matahiti i muri mai, inaha, « îho faahou maira toʼna iho huru mau » (Luka 15:17), roaa mai nei te hoê ohipa maitai, e faaohipa ihora i toʼna aravihi no te tataʻi i te fare o toʼna mama.
Te aro nei e rave rahi mau utuafare no ta ratou mau tamarii etaʻeta. E tamahanahanahia tatou na roto i te « mau taatiraa o te mau metua faaroo » no te ume mai i te mau tamarii « i roto i te nănă » (Orson F. Whitney, i roto i te Conference Report, eperera 1929, 110). A here noa tatou ia ratou, a pure no ratou, ma te tiʻaturi i te hamani-maitai a to tatou Metua i te Ao ra.
Na taʻu tamahine, e na te feia apî atoa o te Ekalesia, a faanuu ai outou i roto i to outou oraraa apî, teie taʻu parau ia outou. Te faaite papu atu nei au e i roto i te opuaraa mure ore no te mau mea, te mea rahi e te rave faaotiraa o ta outou e rave, o te paturaa ïa i te hoê utuafare moʻa e i te faaamuraa i te hoê utuafare puai na roto i te here. Na teie utuafare ruuruu-maitai-hia e haamaitai i te sotaiete ma te faaoromaʻi e tae noaʼtu i te ora mure ore. Te faite papu nei au i te reira, na roto i te iʻoa o Iesu Mesia, amene.