Te hoê pure na te mau tamarii rii
Tatou te mau tamarii e nehenehe ta tatou e aupuru maite i te oraraa na roto i te here e te faaroo, na roto i te mau uʻi, te tamarii hoê.
I te hoperaa o Taʼna mahana matamua i te haapiiraa i te ati Nephi faaroo, ua huri atura o Iesu tei tiafaahou mai i te hoê pupu taaê roa te tiʻa noa ra i te hoê vahi, te tahi taime fatata eita e itehiaʼtu.
Te na ô ra te papaʻiraa moʻa e : « E faaue atura oia ia hopoihia mai ta ratou mau tamariirii [i mua]…
« E… oti aera ratou i te tuu i te turi i raro i te repo ra, … tuu atoa ihora oia i te turi i raro…; e inaha pure atura i te Metua, e aita e tiʻa ia papaihia te mau mea taʼna i pure ra, … i te mau mea i hau i te rahi e te taaê… [parau atura Oia] i te Metua.
«… E ia faaoti aera Iesu i taʼna pure… , tiʻa aera oia i niʻa ; … e… oto ihora, … e ua rave atura i ta ratou mau tamarii rii, haamaitai tataʻi hoê ihora ia ratou, e (faahouâ) pure atura i te Metua no ratou.
« E oti aera oia i te na reiraraa, oto faahou ihora oia ;… [ma te parauraa] i te feia ra, … a hiʻo na i ta outou mau tamarii rii ».1
Eita tatou e ite papu eaha te mea o ta te Faaora i farii i roto i tera taime, teie râ ua ite tatou e ua « oto » oia e ua « tapeʻa Oia i te reira i roto iaʼna iho » i niʻa aʻe i te mau raveʻa haamouraa i te taata hapa ore. Ua ite tatou e hinaaro rahi Toʼna i te pure e ia haamaitai te mau tamarii rii.
I roto i tera mau taime mai ia tatou i teie nei, i roto anei i te peʻapeʻa o te ao nei e aore râ i te fenua nei e aore râ o te taata hoê, te pure atoa nei au no te mau tamarii rii. Te tahi mau taime mai te mea ra te vai nei te faahemaraa e te ofatiraa ture o te haru nei ia ratou, ohie roaʼtu i te aratô ia ratou na mua aʻe ratou i te aro atu i te reira. E mea pinepine i roto anei i te taime ohipa o te ore e roaahia i te arai.
Oia, te tahi o taua mau mea ra tei rapae roa i ta tatou arairaa area râ te faaite tu nei au ia outou na roto i te faaroo i te Atua ora aita te reira mau mea e hau atu i Taʼna. Te ora nei Oia e te ohipa nei te mana o te autahuʻaraa i na pae e piti atoa oia te tahuti nei e i te pae tahuti ore. E ere o tatou anaʻe teie e tiʻa nei e aita atoa tatou e aueue nei. Na roto i te raveraa i ta tatou tuhaa, e nehenehe ta tatou e ora i te evanelia e ia paruru i te reira. E nehenehe tatou e faaite ia vetahi ê i te Eʻa papu, te Parau-tiʻa e ora ai, te ora oaoa.2 E nehenehe tatou e tatarahapa i te taime atoa e titauhia tatou ia tatarahapa e ia na reira anaʻe tatou e nehenehe ta tatou e pure. Na roto i teie mau raveʻa atoa e nehenehe ta tatou e haamaitai i te tahi e te tahi i te feia ihoa râ te titauhia ia paruru – oia te mau tamarii rii. Tatou te mau tamarii e nehenehe ta tatou e aupuru maite i te oraraa – na roto i te here e te faaroo, na roto i te mau uʻi, te tamarii hoê.
Na roto i tera huru pure no te feia apî, te hinaaro nei au e aʻo atu i niʻa i to ratou parururaa. I roto i taʻu aʻoraa nei te haamanaʻo atoa nei au i te feia paari o te Ekalesia, mai te mau metua e te vai atura, o ratou o te ore e tiʻaturi roa ra i te Atua, e aore râ e faaea noa ra na te hiti, e ere to ratou faaroo i te mea puai. Ia ratou ra – o ta tatou e here nei e te hinaaro nei tatou ia fatata mai ratou ia tatou nei – Te parau nei au ia ratou ia ara inaha mea teimaha roa tera huru inaha e vai noa te faahaparaa i niʻa ia ratou e tae roaʼtu i te mau uʻi i muri mai. Te tahi o taua mau huru ra e topa ïa i niʻa i ta outou mau tamarii e te mau mootua tei ore i manaʻohia e outou e na atou e amo i tera fifi.
Te vai nei i roto i te Ekalesia te vahi e te reira te papairaa moʻa – te vahi no te haapiiraa, no te faaauraa e no te tutonuraa, no te aparauraa e no te tiaʻiraa i te heheuraa. Te haapii nei tatou « reni i muri i te tahi reni, te haapiiraa i muri i te tahi haapiiraa » 3 ma te opuaraa ia puai te faaroo e ia ora mai te Mesia ra te huru. I roto i teie huru aita e vahi no te faaturoriraa, aita e vahi no te faariariaraa e aore râ no te haavarevare. Eiaha roaʼtu te hoê tamarii no teie nei Ekalesia ia vaiihohia i roto i te papu ore no niʻa i toʼna mau metua o te pupu ia ratou i roto ia Iesu Mesia, te faahoʻi-faahou-raa-hia mai Taʼna Ekalesia, e te parau no te mau peropheta e te mau aposetolo, i teie mahana, o te arataʻi nei i teie Ekalesia mai te au i te « hinnaro o te Atua, … te manaʻo o te Fatu, … te parau a te Fatu, … e te mana o te Atua ia roaa te ora ».4 Eiaha e mătaʻu i te tahoê ia outou, ia hoê, mai ta te peropheta Iosepha Semita i parau aʻe nâ.5 Mai ta elder Neal Maxwell i parau mai iaʻu, « Aita hoê fifi i tupu mai i te vahiraahia te Miti Uteute ».
Eita e tiʻa i te mau metua ia tamata i te ino, e ia ui maere i muri mai no te aha râ ta ratou mau tamarii i topa ai i roto i te ino. Mai te mea e aita e puai te faaroo e te tiʻaturi, e ô te mau tamarii i roto i te opape o te ao nei fifi atu ai, area tatou te mau metua ia ore tatou ia mau papu i niʻa i te tapeʻaraa paina e papu maitai te oto i te roaa mai ia tatou. Eiaha e haere i tera aʻe pae o te eʻa turu, ei reira tatou e topa atu inaha hoʻi ua ite tatou e parau mau te Ekalesia e tei roto i reira te mau taviri o te autahuʻaraa, aita tatou e hinaaro nei i te tapeʻa i te tiamaraa o te taata. Tera râ nafea tatou e nehenehe e manaʻo e ora mai te mau tamarii mai te mea aita te mau metua i tutau i to ratou pahi i te vahi tano. Ua parau o Isaia i te feia tiʻaturi ore, « ua mataratara te mau taura, aore hoʻi to ratou tira i mau ia ratou ; eita e tiʻa ia ratou ia hohora i te ie ».6
Te manaʻo nei au e, aita paha te tahi mau metua e ite ra e, noaʼtu e te feruri ra ratou e, aita ratou e fifi ra no niʻa i te parau o to ratou iteraa papu, aita râ ta ratou mau tamarii e papu ra i te reira. Noaʼtu to tatou itoito, noaʼtu to tatou haere pureraa, ia ore tatou ia ora papu i te evanelia, e ia faaite i ta tatou mau tamarii i to tatou iteraa hohonu no niʻa i te parau mau o te faahoʻi-faahou- raa-hia mai te Ekalesia, e no niʻa hoʻi i te arataʻiraa hanahana o te Ekalesia mai te taime o te Orama Matamua e tae roa mai i teie nei hora, i reira ïa taua mau tamarii ra e paruparu ai, eita hoʻi e riro ei Feia moʻa haere pureraa, e aore râ, te tahi mau mea mai te reira rii te huru.
Aita i maoro roa aenei ua farerei maua te tuahine Holland i te hoê tamaiti apî o tei ora mai i roto i te tiʻaturiraa tano ore e ua haere aenei i roto i te mau haapaʻoraa mai te bouda, no te imiraa i te faaroo. Aita ta toʼna metua e tiʻaturiraa i te Atua. Toʼna râ papa ruau, e melo ïa no te Ekalesia a Iesu Mesia i te Feia Moʻa i te Mau Mahana Hopea Nei. « Aita râ oia i ite maitai », te parau ïa a teie tamaiti. « E ere oia i te mea tauʻa roa i te Ekalesia ». Mai tera mai papa ruau haere mai i taʼna tamaiti e tae roa mai i taʼna mootua e o te ore roa e tiʻaturi i te mea o ta te Atua i horoʻa na toʼna utuafare ! Tera te hoê hiʻoraa ta elder Richard L. Evans i faaite.
Ua parau oia e, « Te tahi taime te hape nei te mau metua i te manaʻoraa e e nehenehe ta ratou e rave noa maa vahi iti noa e aore râ rave noa i te tuhaa o te mau haapiiraa – mai te manaʻo e aita e fifi – e aore râ te hape ra ratou i te haapii e aore râ aita e haere ra i te pureraa, e aore râ e patoi. E manaʻo te tahi mau metua e… i te tahi taime, e nehenehe noa e rave i te hoê noa tuhaa e eita te reira e fifi i niʻa i to ratou utuafare. Area râ », parau faahou maira oia, « mai te mea e haere te hoê metua na niʻa i tera eʻa, e na reira atoa ïa te mau tamarii ».7
No te arataʻi i te hoê tamarii (e aore râ i te tahi atu huru taata), tei atea i te faaroo, tei atea i te havare ore e te tiʻaturi papu, no te mea noa e, te hinaaro ra tatou ia riro ei taata maramarama aʻe, e aore râ, ia riro ei taata tiʻamâ, aita ïa te reira parau tuite i horoʻahia i te hoê metua e aore râ, i te tahi atu taata ra. Te uiuiraa no niʻa i te faaroo e ere ïa te tahi hiʻoraa teitei, maoti ra te hoê aau tiʻaturi, e riro atoa te tahi mau mea feruri noahia e aita e haapapu ei mauhaa no te vavahiraa i te faaroo i roto i te utuafare. E te reira hahiraa mai niʻa mai i te haereʻa parau-tiʻa e riro ïa ei vavahiraa. Mai ta te tahi papai veʻa i parau, « [Mai te mea e taui noa oe i te faito veavea o] te pape hapu i te 1 noa teteri i te mau 10 miniti atoa, eaha te taime e ite ai au i te veavea ? » 8
I to Iseraela faatiaraa i ta ratou tetene i niʻa i Sinai, ua faauehia ratou ia taamuamu maitai i te mau taura e ia paetaeta te mau tĭtĭ o te tapeʻa ia ratou.9 Te tumu ? E tupu noa mai te mau mataʻi puai. No reira ia haamau, ia haapaari, e ia haamau faahou e ia haapaari faahou. Noaʼtu te reira e ite â tatou i te tahi mau tamarii i te raveraa i te faaotiraa o te haamauiui i te aau o te mau metua. E nehenehe ta papa e ta mama mâ e rave i te mau mea atoa noaʼtu e, e hahi ê te tamarii. Inaha te vaira te tiamaraa. Noaʼtu te reira mau taime mauiui, mea tano râ ia ite outou e ua ite ta outou mau tamarii i to outou faaroo i te Mesia, e i Taʼna Ekalesia mau, e i te mau taviri o te autahuʻaraa e i te feia e mau ra i te reira mau taviri. Ia ite atoa outou mai te mea e maiti ta outou mau tamarii i te vaiiho i te eʻa titiaifaro e te pirihao na roto i to ratou iho hinaaro, ua ite râ ratou e tei roto te mau metua i te vai papuraa. Hau atu e hinaaro â ratou i te hoʻi mai i niʻa i taua eʻa ra oia hoʻi ia iho faahou maira toʼna iho huru mau10 ma te haamanaʻo i te hiʻoraa maitai e te mau haapiiraa maitai o ta ouou i horoʻa ia ratou.
A haapaʻo i te mau ture no te evanelia ma to outou puai atoa. A haapaʻo i te mau fafauraa o ta to outou mau tamarii i ite ia outou i te raveraa. A horoʻa i te mau haamaitairaa a te autahuʻaraa. A faaite i to outou iteraa papu ! 11 Eiaha outou e manaʻo e na ta outou iho mau tamarii e haapii ia ratou. Ua parau te peropheta Nephi i te pae hopearaa o toʼna oraraa e ua papai ratou i te mau parau no te Mesia e ua faaherehere i te reira tiʻaturiraa no niʻa i Taʼna evanelia no te « faaite i ta ratou mau tamarii… ia ite ta matou mau tamarii… [e ia tiʻaturi] i te eʻa afaro ».12
Mai ia Nephi atoa ra ia ani tatou ia tatou iho e aha ta to tatou mau tamarii e hinaaro ia ite ? Mai roto atu ia tatou ? Ta tatou iho ? Ua ite anei ta tatou mau tamarii e te here nei tatou i te mau papairaa moʻa ? Te ite ra anei ratou ia tatou i te taiʻoraa e i te tapaʻoraa e te haapaʻoraa i te mau mahana atoa ? Ua ite anei ta tatou mau tamarii ia tatou i te pureraa i to ratou iritiraa mai i te uputa piha ? Ua faaroo anei ratou ia ratou i te pureraa i pihaʻi iho ia ratou e no ratou e ma te faaite i te here metua ia ratou ? Ua ite anei ta tatou mau tamarii e tiʻaturi nei tatou i te haapaeraa maa e ere ïa i te sabati haapaeraa anaʻe ? Ua ite anei ratou e ua haapae tatou no ratou e no to ratou ananahiraa no te mau mahana ta ratou e ore e ite ra ? Ua ite anei ta tatou mau tamarii e mea au na tatou ia haere i te hiero, ia paruruhia ratou i te pohe e i te mau nuu o hade ? Ua ite anei ratou e te here nei e te turu nei tatou i te feia faatere o te Ekalesia io tatou nei e te mau huimana faatere rahi, noaʼtu to ratou huru, i to ratou fariiraa i te mau piiraa o ta ratou i ore i titau ia vai noa ratou i roto i te parau-tiʻa ? Ua ite anei taua mau tamarii ra e ua here tatou i te Atua ma to tatou aau atoa e te tiaʻi nei tatou ia hiʻo i toʼna ra hohoʻa – e ia parahi i mua i te avae – o Taʼna Tamaiti Fanautahi ? Te pure nei au ia ite ratou i te reira.
Te mau taeaʻe e te mau tuahine, te tere nei ta tatou mau tamarii i roto i te tau i mua nei na roto i ta tatou tururaa e to tatou here. E ua ite maitai tatou i te mau mea iino atoa o te nehenehe e faaapiapi i to ratou haereʻa, tera râ te faaitoito nei tatou ma te haamanaʻo e te mea faufaa roa ia ite tatou i te reni e arataʻi papu na roto i te papu, te puai, e te hahi ore e ma te mau papu i te paina.13
Ua parau te taata ra o Carl Sandburg, « Te hoê aiu o te hinaaro ïa o te Atua no te faatupu tamau i te oraraa ».14 Inaha mai tera ra aiu oia atoa o tatou nei, ia puai. Ia riro ei mau taata tiʻaturi. A tapeʻa i te here e a faaite tamau i te reira. A tamau i te pure. E faaroohia taua mau pure e pahonohia mai te reira i te taime manaʻo-ore-hia. E faatae mai te Atua i te tauturu i te tamarii – e i te metua o te hoê tamarii.
« E ua parau atura [Iesu] i te feia ra, na ŏ atura, A hiʻo na i ta outou mau tamarii rii.
« E… nânâ aera ratou i to ratou mata i niʻa i te raʻi, e ua veteahia aera te raʻi ia ratou, e hiʻo aera ratou i te mau melahi mai te mea ra e, … tei roto i te auahi ; e pou maira ratou i raro e haati aera i te mau tamarii rii, e ua haati atoa hia i te auahi, e ua tauturu maira te mau melahi ia ratou ».15
Ia pure tamau noa tatou – no ta tatou mau tamarii – na roto i te iʻoa o Iesu Mesia ra, amene.