Savali a Faiaoga Asiasi

Avea ma Tufugaaao o le Atua e ala i le Saunia ma le Auai i Tapuaiga i le Malumalu

Filifili ma faitau ma le agaga tatalo mai lenei savali ni mau ma aoaoga e fetaui ma tulaga o loo manaomia e uso o loo e asia. Fetufaai atu i ai ou aafiaga ma molimau. Valaaulia foi i latou o loo e aoaoina ia faapena foi ona fai.

E Mafai Faapefea e le Saunia mo Tapuaiga i le Malumalu ona Fesoasoani Ia Te Au e Avea o Se Tufugaaao o le Atua?

MFF 95:8: “Na ou tuuina atu ia te outou le poloaiga ia outou faia se fale, i lena foi fale ou te loto ina faauuina ai i latou o e ua ou filifilia i le mana mai luga.”

Elder Russell M. Nelson o le Korama a Aposetolo e Toasefululua: “O feagaiga faalelagi e fesoasoani ia i tatou e fufulu ese ai mai o tatou mafaufau ia mea leaga ia e mafai ona faaleagaina ai i tatou. Afai tatou te filifili e teenaina e o tatou tagata ia amioletonu uma, e leai se mea ua tatou maimauina ae maua le mamalu o le ola e faavavau. O feagaiga e le faasaina ai i tatou; latou te siitiaina ai i tatou i luga e sili atu mai le mea e gata ai lo tatou malosi ma manatu… . O sauniga o le malumalu e faatatau lea i le alualu i luma o le tagata lava ia faapea foi ma le togiolaina o augatuaa ua mavae atu… . O le auauna atu mo i latou e maua ai pea avanoa mo tapuaiga i le malumalu… . Ae i le taimi nei, i totonu o lenei lalolagi ua matuai afaina i le leaga faaleagaga, pe mafai ea e tagata taitoatasi ua saunia mo faamanuiaga o le malumalu ona faia se suiga? Ioe! O na Au Paia “o tagata o le feagaiga a le Atua, … ua faaauupegaina i latou i le amiotonu atoa ma le mana o le Atua i le mamalu tele’ [1 Nifae 14:14]. O a latou faataitaiga e mafai ona siitia ai olaga o tagata ola uma.” (“Sauniuniga a le Tagata Lava Ia mo Faamanuiaga o le Malumalu,” Liahona, Iulai 2001, 38–39).

E Mafai Faapefea i le Auai i Tapuaiga i le Malumalu Ona Fesoasoani Ia Te Au Ia Avea o se Tufugaaao o le Atua?

Elaine S. Dalton, fesoasoani muamua i le au peresitene aoao o Tamaitai Talavou: “E taua le agavaa patino e ulufale atu ai i Ona malumalu paia, ma avea moni ai ma suli i “mea uma o i le Tama” [MFF 84:38]. Ua fetalai mai le Alii, ‘Ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua’ [MFF 121:45]. A tatou faia lena mea, e mafai ona tatou ulu atu ma le mautinoa i malumalu paia o le Atua, faatasi ai ma se iloa ua tatou agavaa e o atu i le mea e afio ai le Alii lava ia. A tatou agavaa e le gata ina mafai ona tatou ulufale atu i le malumalu, ae ua mafai foi ona ulufale mai le malumalu ia i tatou. E avea folafolaga a le Alii o le faaolataga ma le fiafia ma o tatou folafolaga—e avea foi la tatou misiona i le olaga nei ma Ana misiona” (“Vaavaai atu i le Faavavau!” Liahona, Nov. 2006, 32).

Elder Joseph B. Wirthlin o le Korama a Aposetolo e Toasefululua: “O le mauaina o o tatou lava faaeega paia i se malumalu, ma toe saga foi atu i ai e faia sauniga paia mo o tatou aiga ua maliliu, e faateleina ai lo tatou faatuatua, faamalosia ai lo tatou faamoemoe, ma faalolotoina ai lo tatou alofa mama. Tatou te mauaina o tatou lava faaeega paia ma le faatuatua, ma le faamoemoe o le a tatou malamalama i le fuafuaga a le Alii mo Ana fanau, o le a iloa mana paia i totonu o i tatou taitoatasi o ni fanau a lo tatou Tama Faalelagi, ma o le a faamaoni e oo i le iuga i le tausia o feagaiga ua tatou osia. O le faia o sauniga o le malumalu mo e ua maliliu, o se faaaliga lea o le alofa mama, ma ofoina atu ai faamanuiaga taua ia i latou na muamua atu ia te i tatou, o faamanuiaga latou te le’i maua a o i ai i lenei olaga. Ua tatou maua le avanoa e faia ai mo i latou, o mea sa latou le mafai ona faia mo i latou lava” (“O Le Atinaeina o Uiga Paia,” Liahona, Ianuari 1999, 31).