O Manatu Faaopoopo mo Taimi o Fetufaaiga, Aokuso 2007

O manatu faaopoopo nei e mafai e taitai o le Peraimeri ona faaaogaina faatasi ma le Taimi o Fetufaaaiga o loo lomia i le Liahona o Aokuso 2007. Mo le lesona, faatonuga, ma gaoioiga e o faatasi ma nei manatu, tagai “Faalogo i le Leo Itiiti ma le Filemu” itulau U4 ma le U5 o le itulau a tamaiti i lenei lomiga.

1. Faaaoga se mea faitino mo le lesona ( tagai “Lesona Faatino,” O Le Aoao Atu, E Leai Se Isi Valaauga e Sili Ai [1999], 172) ina ia fesoasoani i tamaiti ia malamalama pe faapefea ona iloa le Agaga. Saunia se “pusa ma ni totini” ma tipi ni pu se lua e tusa ma le 3 inisi ( 8 cm) le lapotopoto ma le tusa pe 6 inisi (15 cm) le va i le pito i lalo o le pusa. O le pusa e tatau ona lapoa lelei ina ia mafai e le tamaitiiti ona tuu i ai lona ulu ae ia lava le laitiiti ina ia mafai ona sii i luga ma iloa uma mai e le Peraimeri. Faapipii gutu o pito i luga o ni totini tuai ua tatipi, ia faataamilo i pu. Faamau lelei ia mau, ia mautinoa o pito i totonu pito o pine [staples] ina ia aua nei afaina ai se isi. O le faapipii o totini i pu o le a le ati atu ai le vaai a le tamaitiiti i le isi itu o le pu.

   E aunoa ma le iloa e tamaiti o mea e faaaoga, ia tuu se mea e masani ai i totonu o le pusa, tapuni le pito i luga ma faataatia le pusa i lona itu. Uu i luga le pusa pe tuu i luga o se laulau, ona fai lea i se tamaitiiti e tuu ona lima i totonu o totini ma taumafai e mafaufau po o le a le mea la e i totonu. Tatala le pito i luga o le pusa ina ia iloa mai e tamaiti o le Peraimeri po o le a le mea o loo i ai. Faaaoga mea e faigofie ona iloa e pei o fualaau aina, mea taalo, ma mea faitino e faaaoga i le fale. Toe faaauau le gaoioiga i isi tamaiti ma mea faitino. Faamatala le faigofie ona tatou iloaina o mea faitino tatou te masani ai.

   O le isi mea e sosoo ai, o le tuuina atu i tamaiti o mea faitino e faigata ona iloa. O ia mea e aofia ai ni meafaigaluega faapitoa e pei o ni mea e faaaoga i kuka po o ni meafaigaluega i le togalaau. Afai e le mafai e le tamaitiiti ona ta’u mai le mea faitino, fesili ia te ia e faamatala mai le ituaiga o mea la e tago i ai.

   Ia faatusatusa le gaoioiga i le pusa ma le iloaina o musumusuga o le Agaga Paia. Pe a tatou masani i le Agaga, pe a tatou lagona Lona aafiaga toafilemu i taimi faifai pea, tatou te iloa le lagona pe a oo mai ma faigofie ona tatou iloa le Agaga. Ae peitai, ao tatou laiti po o le le tele o ni o tatou aafiaga ma le Agaga, atonu o le a le faigofie ona tatou iloa le Agaga.

   O le auala e aoao ai ia iloa le Agaga Paia o le lagonaina lea o Ana musumusuga e oe lava, ae mafai foi ona tatou aoao mai aafiaga o isi. Tuuina atu lau molimau o le Agaga Paia, ma fetufaai atu se aafiaga o se taimi sa e lagonaina ai Lana musumusuga.

2. Faailoa atu ia upu aoao, taiala, fautuaina, puipuia ma le faamafanafana i vaega eseese e faataamilo i le potu. Tau atu i tamaiti o le a e tuuina atu uiga o upu ma e te manao ia i latou e saili le upu e fetaui ma le uiga ua e tuuina atu. Faaaoga uiga faigofie. Faamatala atu ia i latou e te iloa se tagata se toatasi e mafai ona ia iloaina nei mea uma. Tuu atu i tamaiti e mate maia le Agaga Paia.

   Faaali atu ata nei: Ata o le Pusa Ata o le Talalelei 520 (Gordon B. Hinckley), 518 (Ezra Taft Benson), ma 516 (Harold B. Lee). Fesoasoani i tamaiti e tau mai suafa taitasi o nei Peresitene o le Ekalesia. Faitau upusii filifilia mai tala tusia nei ina ia faapupula ai le tolu o upu e lima: aoao (Gordon B. Hinckley, “Ou Te Talitonu ia i Latou Nei e Toatolu,” Liahona, Iulai 2006, 2), puipuia (Ezra Taft Benson, “I Tamaiti o le Ekalesia,” Ensign, Me 1989, 81), ma le lapatai (tala ia Harold B. Lee, Peraimeri 1, lesona 7). Pule foi oe pe suia i ni au lava tala aoga e maua ai uiga po o le tagai i tala tusia ia e faapupula ai isi upu e lua: faamafanafana (James E. Faust, “O Le Fesoasoani,” Liahona, Ape. 2005, U2) ma le taiala (Thomas S. Monson, “Aoaoina o a Tatou Fanau,” Liahona, Oke. 2004, 2). Tuuina atu lau molimau i auala patino ua fesoasoani ai le Agaga Paia ia te oe.