Taimi o Fetufaaiga

Faalogo i le Leo Itiiti ma le Filemu

Saunia e Elizabeth Ricks

“Aua, faauta, e iloa e le Fesoasoani mea uma, ma o molimau atu e uiga i le Tama atoa ma le Atalii” (MFF 42:17).

O a nisi o mea taua e tatau ona iloa? E tatau ona tatou iloa ona nonoa o tatou seevae. E tatau ona tatou iloa tusi o tatou igoa.

O loo i ai se mea e tasi e sili atu ona taua nai lo se isi lava mea. Tatou te maua lea i le Ioane 17:3. O loo faamauina e Ioane upu na fetalai atu ai Iesu i lona Tama, lo tatou Tama Faalelagi: “O le ola e faavavau foi lenei, ia latou iloa oe le Atua moni e toatasi, atoa ma le ua auina mai, o Iesu Keriso lea.” O le iloaina o lo tatou Tama Faalelagi ma lona Alo o Iesu Keriso, o le malamalama aupito sili lea ona taua o le a e maua. O lenei malamalama e taua o se molimau.

E faapefea ona tatou iloa ni mea? Ua faamanuiaina i tatou i le i ai lea o ni o tatou matua e tai lua—matua faalelalolagi ma matua faalelagi. Afai e te fia iloa se mea e pei o le nonoaina o ou seevae, e mafai ona fesoasoani atu ou matua faalelalolagi. E mafai foi ona latou faaaogaina tusi lomifefiloi, tusi saienisi, ma tusitusiga paia e fesoasoani ai e taliina au fesili.

Ina ia i ai se molimau e uiga i mea e paia, e mafai ona e fesili atu i le Tama Faalelagi. E masani lava ona Ia faaaogaina le sui lona tolu o le aigaAtua—o le Agaga Paia—e tali atu ia te oe. O le Agaga Paia e molimau i le Tama ma le Alo. E ala mai i Lona leo itiiti ma le filemu, e mafai ai e le Agaga Paia ona molimau atu ia te oe o Iesu o le Alo o le Atua. E mafai ona Ia molimau atu ia te oe o Iosefa Samita na toefuataiina le talalelei ma o loo i ai se tatou perofeta i aso nei. I le Tusi a Mamona, o loo tau mai ai e Moronae o le mana foi o le Agaga Paia, tou te iloa ai le tonu i mea uma lava (tagai Moronae 10:5).

A o e faalogo i le leo itiiti ma le filemu, o le a mafai ona e maua se molimau. O le a tuputupu ae lou faatuatua ia Iesu Keriso pe a e faalogo i le Agaga Paia.

Gaoioiga

O se palanikeke po o se ie soosoo e mafai ona lagona ai e lou tino le mafanafana, e pei foi o le Agaga Paia e mafai ona avatu ai i lou agaga le mafanafana ma le filemu. Ia aoao atili e uiga i le Agaga Paia e ala i le sueina lea o mau taitasi o loo i luga o le ie soosoo. Atonu o le a e manao e vase lalo o upu Fesoasoani, Agaga Sa, po o le Agaga Paia o loo i au tusitusiga paia. Ona valivali lea o le ie soosoo. Tautau lau ata i tafatafa o lou moega e faamanatu atu ai ia te oe o le Agaga Paia e mafai ona faamafanafanaina oe ma o le a tuputupu ae lou faatuatua pe a e faalogo i Ana uunaiga.

Manatu mo Taimi o Fetufaaiga

1. 1. Ia iloilo pe na faapefea ona maua e Alema le molimau, ia vaai totoa i le Alema 5:45–46. Ia faaali atu na manaomia e Alema ona anapogi ma tatalo ina ia maua ai lana molimau e ala i le mana o le Agaga Paia. Fesoasoani i tamaiti e tauloto le MFF 42:17. Fai atu i ai e sue le mau ma faaigoa sui uma o le aigaAtua. Ia faamatala atu o le “Fesoasoani” o le isi igoa lena o le Agaga Paia. Vaevae le Peraimeri i ni vaega se tolu. O le isi vaega ia tutu i luga ma fai le upu, “o le Fesoasoani,” o le isi, “o le Tama,” ma le vaega mulimuli, “o le Alo.” Toe fai ma saga fai pea, ae faaopoopo i ai ni nai upu i taimi uma lava e toe fai ai. O le isi auala e tuuina atu ai le molimau o le pese. Tuu atu i tamaiti e usu se pese e faatatau i le molimau.

2. 2. A’o lei amataina le Peraimeri, tusi i lalo le upu Valaaulia i luga o se kata lapoa. Fai atu i tamaiti e sii i luga o latou lima pe afai latou te fiafia e maua ni valaaulia. Tatala le kata e faailoa ai le savali lenei: “Ou te valaaulia musumusuga a le Agaga Paia pe a ou …” Fesili i tamaiti pe faapefea ona latou valaaulia musumusuga a le Agaga Paia e fesoasoani ia i latou. I totonu o le kata ia tusia ai ni manatu e pei o le tatalo, faitauina o tusitusiga paia, tausia o poloaiga, ma le mulimuli i perofeta soifua. Ia tufa atu i tamaiti taitoatasi se kata e gagau e fai ai se tusi valaau. Tuu atu ia i latou e kopi ia upu nei i le pito i luma o le kata,“Ou te valaaulia musumusuga a le Agaga Paia pe a ou …” Tuu ia te i latou e lisi i totonu o le kata ia manatu na outou talanoaina ma o latou lava manatu.