Na O Se Faiga Saua Laitiiti?
“Se, Tama,” na ou faatauanau atu ai, “E ala ona faavasegaina faapena ona o faiga saua. O se tamai tauaifusuga pepelo lava o le a le afaina ai i maua.”
Ma te le masani ma lou tausoga e 16 tausaga ona ma faanoi e matamata i ata tifaga ua faavasegaina mo tagata matutua atu. O i maua o ni tamaiti lelei, e toaaga i le seminare ma le ma korama a ositaulaga. Ae na ma faalogo i le manaia tele o le ata tifaga lea ma le tele o faailoga e ono manumalo ai. Ma le isi, na tau mai ia i maua e leai ni feusuaiga, leai se faaiteite i se mea e le talafeagai, leai ni vaaiga le lavalavā, ma e laitiiti se palauvale e i ai. Na o le pau lava lena o mea leaga, a ea?
E le o le itu lena na tilotilo i ai lo’u tama. Mulimuli ane na suia lana auala. “Ua lelei,” na ia fai mai ai. “Ua oulua iloa le mea sao ma le mea sese. Fai le mea ua oulua lagona e sao.”
Ua tau mai e taitai o le Ekalesia ia i tatou e aua le matamata i ata tifaga e le talafeagai, ma i totonu o le matou aiga na i ai le tulafono e le mafai ona matou matamata i se ata ua faavasegaina i le R. (I totonu o le Iunaite Setete o le faavasegaina i le R e manaomia ai se tagata matua e toalua ma soo se tasi e i lalo ifo o le 17 tausaga le matua.) Ou te masalo sa ou taumafai lava ina ia faapea mai lo’u tama e le afaina ona ma matamata ma lo’u tausoga i le ata tifaga, ina ia mafai ona ou faia le mea na ou manao i ai ma ia ou le lagonaina ai le tausalaina. Nai lo lena, na ia faatietieina tonu lava le faaiuga i o’u tauau.
Ia, e le’i fai mai o ia e leai. Ma le isi, na laitiiti lava ni faiga saua o loo i ai.
Ina ua uma ona ma matamata ma lo’u tausoga i le ata tifaga, na ou maua se lagona le lelei. Na ou manatu na ou maua se lagona le lelei ona o le faavasegaina o le ata tifaga, o lea na ou folafola ai ia te au lava o le a ou le toe matamata lava i se isi ata tifaga e faavasegaina i le R. Ae mulimuli ane, ina ua uma ona ou matamata i se ata tifaga na i ai ni faiga saua (e ui e feololo ifo lona faavasegaina e faataga ai le tupulaga), na ou iloa ai na ou toe maua foi lena lagona le lelei.
O le a le mea na tupu? Pe na ou le faia ea le mea sao i le filifilia lea o se ata tifaga e feololo ifo lona faavasegaina? Masalo sa le na o le faavasegaina o se ata tifaga na afaina. Masalo ona o faiga saua lava latou ia. Ae mata e mafai moni ona tele sou aafiaga ona o faiga saua?
Ina ua ou seiina mai i fafo lau tamaitusi Mo Le Malosi o le Autalavou e tutusa lona tele ma lau tamai atotupe, na ou te’i i lou misia muamua o se vaega taua. I lalo ifo o le “Faafiafiaga ma Ala o Faasalalauga,”o loo faapea mai ai “Aua e te alu, pe matamata, pe auai foi i le faatinoina o faafiafiaga e faatufanua, e le mama, e faatupu vevesi, pe faatiapolo i soo se itu.”
Ae, na ou faatautee pea. “Ia ua lelei,” na ou faapea ifo ai ia te au lava, “masalo o loo i ai ni tagata ua aafia i faiga saua, ae ou te iloa e le mo’i. Ma e sao, o nisi o ata tifaga e fai si malolosi o vaaiga auiliili e i ai, ae o sina vaega itiiti lava e le afaina ai se tasi, a ea?” Na faafuasei lava ona ou le mautinoaina.
Ona sosoo mai lea o le tui maini. E sosoo mai lava ma le faatonuina o i tatou e aloese mai faiga saua, o loo faapea mai le tamaitusi, “Naunau atu e tausia tulaga faatonuina a le Atua.”
Auoia! Ua ou sese. E moni, e mafai ona ou taumafai e tauamiotonuina o lea sa ou filifilia le mea sao e ala i le aloese mai le gagana masoa, legavia, ma ponokarafi. Ae pe ua lava ea le tausia o se vaega tele o tulaga faatonuina a le Atua? Pe na moni ea lau tautinoga pe afai na ou le naunau e tausia uma [ia tulaga faatonuina a le Atua]?
E le’i afaina po o le a le faavasegaina o le ata tifaga, ma e le’i afaina pe o i ai se faiga saua laitiiti. Ua lava lava lena e faatiga ai le Agaga. Ma afai o le faiga lena o ata tifaga, pe o le a tumau pea le moni o lenei aoaoga faavae e tasi i isi mea? Masalo o loo i ai nisi upu e tiga ai le Agaga e tusa lava pe le o ni upu palauvale, ma masalo foi o nisi musika e tiga ai le Agaga e tusa lava pe le leaga ona upu.
Ina ua ou tautino ina ia ou matua filifili lelei i mea ou te matamata, tata, faitau, tautala ma faalogologo i ai, i nai aso, na mafai ona ou lagonaina se suiga. Na ou le iloa le tulaga na oo i ai le le mafai ona ou lagonaina le uunaiga a le Agaga.
Ina ua ou faaitiitia le matamata i faiga saua, na ou iloa ai na faigofie atu ona pulea lou ita, ma sa faaitiitia foi le matou tauaifusu ma ou uso. Na ou matauina, e ui lava ina sa le eleelea lau gagana, ae o le faamamaina na faia ai se eseesega tele. O le mea sili lava, na mafai ona ou lagonaina le Agaga i se malosi sili atu.
Na aoaoina ai au e tusa lava pe “na o sina faiga saua laitiiti” e le fia vaai lava i ai le Agaga.
FAIGA SAUA I ALA O FAASALALAUGA
O le matamataina o ata tifaga ma ata o le televise e i ai faiga saua e mafai ona e aafia ai e tusa lava pe o le a lo latou faavasegaina. Mo le silia ma le 30 tausaga, ua lapatai mai ai taitai o le Ekalesia e faasaga i le matamataina o faiga saua. I le 2000, na saunoa mai ai se vaega o tagata fomai i totonu o le Iunaite Setete i le faamatalaga lenei:
“E sili mamao atu ma le 1,000 ni suesuega … na mafuli uma lava sa latou tuuaiga i se fesootaiga faasamasamanoa i le va o faiga saua i ala o fesootaiga ma amioga soonafai i nisi o tamaiti. O le faaiuga a le vaega o fomai mo le soifua maloloina lautele o tagata, na faavae i le silia i le 30 tausaga o suesuega e faapea, o le matamata i faafiafiaga e i ai faiga saua e mafai ona oo atu i le faatupulaia o uiga, faiga ma amioga soonafai” (Joint Statement on the Impact of Entertainment Violence on Children”[26 Iulai, 2000], http://www.aap.org/advocacy/releases/jstmtevc.htm).
FAALATALATA I LE AGAGA
“E manino lava le tulaga faatonuina. Afai o se mea tatou te mafaufau i ai, vaai i ai, faalogoina, pe faia foi e faataumamao ai i tatou mai le Agaga Paia, o lona uiga ua tatau loa lava ona taofia le mafaufau i ai, vaai i ai, faalogologo i ai, po o le faia o lena mea. Mo se faataitaiga, afai o le mea o loo faamoemoe e faafiafia ai, e tavavae ese mai ai i tatou mai le Agaga Paia, ua manino mai ai o na ituaiga o faafiafiaga e le mo i tatou.”
Elder David A. Bednar o le Korama a Aposetolo e Toasefululua, “Ina Ia Tatou Maua Pea Lona Agaga e Faatasi ma i Tatou,“ Liahona, Me 2006, 30.