Taofi Feau Feaveai i le Telefoni Feaveai Mai le Pulea o Oe

Saunia e Russell ma Brad Wilcox

Ua ou fiafia lava o le a ou toe vaai i lau uo,” o le tala faifai pea lea a se tasi tamaitai talavou na fai atu i ona matua a o sauni o ia mo le faatasiga faapitoa. E le’i leva talu ona foi mai o ia i le aiga ina ua umi se taimi o nofo i se mea mamao. Sa tulimatai atu o ia mo lenei aso mo se taimi umi.

Ina ua toe fevaaiai lenei uo e toalua, sa matua fiafia lava i laua. Na la feopoai ma talie a o la o atu e fiafia faatasi i le la toe faamasaniga. Ae peitai, na faateia matua ina ua toe foi atu lo la afafine i le fale, i se taimi vave nai lo le mea na la mafaufauina.

“O le a le mea ua tupu?” o le la fesili atu lea.

“Sa matua ou fiafia lava e talanoa e pei ona sa ma masani ai, ae na alu le taimi atoa o ave ana feau feaveai i le telefoni feaveai i isi ana uo.” Na iloa atu lava lona ita ma lona le fiafia a o ia tautino atu, “Maimau pe ana le i ai lenei mea o feau feaveai i telefoni feaveai.”

E pei lava o mea faigaluega uma mo fesootaiga, o telefoni feaveai e mafai ona feaveai ai ni feau, e mafai ona lelei pe leaga foi e faalagolago lava i le auala e faaaogaina ai. E mafai ona faamatalaina ni tala e uiga i se faamanuiaga o se aso fanau na auina atu i se telefoni feaveai, na mafua ai ona maua e se tasi se aso fiafia po o se faalavelave na mafai ona alofia ona sa vave ma lelei ona lapataia se tasi i se feau na auina atu. Ae, e i ai foi tala faale-lelei e mafai ona faamatalaina e uiga i tupulaga talavou e feaveai atu i telefoni feaveai i a latou uo i le taimi o le Aoga Sa po o taimi o lesona i le seminare, e uiga i tagata ua faamanualia ona o faamatalaga o se savali na maua, po o le, e pei o le faataitaiga o loo taua i luga, e uiga i tagata ua le amanaiaina pe faaleano i tagata o loo latou faatasi ona ua sili atu feau feaveai nei nai lo isi tagata.

E pei o le i-meli, o feau feaveai i telefoni e mafai ona avea o se auala lelei e fesootai ai ma atiina ae ai mafutaga, ae e le maua i ai le mafutaga lava ia. Afai e pulea ma faatonutonu lelei ia feau feaveai, e mafai ona i ai ni ona taunuuga lelei. Ae peitai, afai o le a faatagaina e puleaina oe, e mafai ona avea ma faasoesa po o le faataumaoi foi.

Mamanu Faapopoleina

Na matou fesiligia nisi o faifeautalai na faamaeaina talu ai nei a latou misiona e uiga i feau feaveai i telefoni. O nei uo o e na faia a latou misiona i se siosiomaga “e le maua ai nei feau feaveai i telefoni ” na latou taua nisi o mamanu faapopoleina ua latou matauina ina ua toe foi mai i le aiga. Na latou talanoa mai i le itu e mafai ai e feau feaveai i telefoni ona fatuina se lagona saogalemu sese ma ni tomai faalefesootaiga le lelei, ma le itu e mafai ona avea ai ma gaoioiga e aveesea ai ma le toe i ai ni lagona [o se tasi].

“E fai si faigofie ona [e] lagona e pei o loo i ai se puipui talipupuni o loo siomia ai oe pe a e auina atu nei feau feaveai i le telefoni,” na fai mai ai le tasi. “E faigofie ona lafo atu sau valaaulia e le’i mafaufauina po o se tali faatiga aua o loo lagonaina le saogalemu.” O se lagona faapena e le o taimi uma e lelei ai. E pei lava o le ee mamao atu i le isi avetaavale mai le saogalemu o lau lava taavale. O le vavamamao e mafua ai ona e lagolelei i le faia o faamatalaga e le taitai mafai ona e faia i se talanoaga faafesaga’i. Pe na i ai sou faiaoga na tusia ni faamatalaga leaga ma le saua i luga o sau tala po o sau tala puupuu na tusia, lea na tele ni itula na e faaaluina [e tusi] ai? Mai se tulaga mamao, na lagona e le faiaoga le saogalemu i le tuuina atu o lona manatu lea atonu e le faagaeetia. Ae ana faapea na oulua talanoa faafesagai, semanu e sili atu ona malu ma magafagafa se faamatalaga e tuuina atu.

Na taua e le isi faifeautalai ua maea le misiona, i lona manatu, o feau feaveai i telefoni e le aoaoina mai ai ni tomai faalefesootaiga lelei. Na fesili o ia, “O le a le taimi e te aoaoina ai le faia o se talanoaga e na o ni nai minute le umi?” “O le a le taimi e te aoaoina ai ia faalogo i feau e faaleo ma feau le leoa o loo faaalia?” Na ia taua e foliga o se mea malie le savali atu i se lotoa o se kolisi po o se malae vaalele ma vaaia ai tagata uma i a latou telefoni feaveai o loo talanoa atu i se tagata o loo i se “isi mea” ae matua le ano lava i tagata o loo i ai “tonu iinei.” Fai mai le faifeautalai ua maea le misiona, “E pei lava o le le mautonu o le tagata autu o se ata tifaga o le ua pupu i le fesootai atu i lana au maimoa i le tifaga po o le CD, ae o loo ia faatauagavale i isi tagata lagolago o le ata, o e o loo fesoasoani, po o i latou e fiafia ma lagolago o ia.”

“Masalo o le itu e sili ona le lelei ai feau feaveai i telefoni, ona e tavavae ese ai oe mai tagata,” o le tala lea a le isi faifeautalai ua maea se misiona. O mafutaga e pei lava o ni faaputuga tupe: a leai se tupe teu, e leai foi se tupe tului. Afai e laitiiti sau taumafaiga e te aapa atu ma fegalegaleai ma isi tagata, e laitiiti foi se mea e te maua mai. Fai mai lenei alii sa avea ma faifeautalai, “E pei lava foi o tagata sailiili. Afai e te le tuuina atu lou loto ma le manatu popole, atonu o le a e faasaoina mai oe lava mai le tele o le faanoanoa pe a latou teena lau savali, ae e te le iloa lava le mea e mafai ona tupu pe ana e tuuina i ai au taumafaiga uma.” O le faia o feau feaveai i telefoni e faigofie lava ona aveesea ai lagona mai fegalegaleaiga ia e matua taua lava i o tatou olaga. “E pei lava o le taumafaina o meaai e aunoa ma ni faamanogi meaai. E mautinoa lava e tele mea ua e misia.”

Ia Puleaina

E mafai faapefea ona tatou aloese ma itu le lelei ae faaaoga tatau feau feaveai i telefoni? Na ofoina mai e nei faifeautalai ua maea misiona nisi o fautuaga lelei lava: ave au feau i le telefoni pe afai ua na o oe, ia tausisia le paleni o ituaiga fesootaiga i le va o le eletonika ma le le eletonika, ma saili ni ituaiga mea faafiafia eseese.

Fai mai se tasi faifeautalai ua maea le misiona, “Talanoa i tagata.” “Aoao auala e amata ai se talanoaga ma se tasi e te le masani ai. Fesili atu, “O fea e te sau ai?” po o le, ‘E te nofo lava iinei?’ O se tasi lena o mea e sili ona faigata ona fai e faifeautalai fou, ma e le tatau ona faapena. E le tatau ona faigata faapena le talanoa i le tagata e otiina lou lauulu po o se tasi e tu i le laina e totogi ai faatau i se faleoloa. E te le tau faafeiloaia se tagata ese i le auala. Tau lava o le fai o sau faamatalaga po o lou fesili atu i le tagata o loo nofo i ou tafatafa i le nofoaga e faatali ai nofoaafi.”

Fai mai se tasi faifeautalai na faamisiona, “O le faia o feau feaveai i telefoni, faalogologo i feau, e oo foi i le taliina o telefoni, e mafai ona faatali. Ia fai i le taimi ua na o oe, ae le o luma o isi tagata.” Fai mai a ia, “Na i ai se telefoni feaveai a lau peresitene o le misiona, ae na te kiina lava faaleolemu, ma na te le taliina i totonu o se konafesi po o se faatalanoaga. Na matou iloaina lava, o i matou na ave i ai lana faamuamua i le taimi lena.”

O le faia o feau feaveai i telefoni e avea moni lava o se mea faafiafia mo le tele o tagata. “E fai lava si faanoanoa pe afai o le mea faafiafia aupito lelei lena e te aafia ai,” na fai mai ai se tamaitai faifeautalai ua maea le misiona. O le a la se mea o le a e tauina i lau fanau i se aso e uiga i mea malie na e faia i “aso ia ua leva”? E te manao moni lava e tautino atu na pau lava mea faafiafia na e fiafia i ai o vitio, taaloga komepiuta, ma feau feaveai i telefoni feaveai? Na fesili le tamaitai faifeautalai, “Ae faapefea ni tafaoga faamasani malie, taaalo i taaloga, pe na o le nofonofo lava ma faamatala ni tala malie ma talie ai seia oo lava ina tiga ai [le manava]?”

O Le Mea Na Oo i ai Russell

Ina ua foi atu Russell i lona aiga mai lana misiona, na fiafia lava o ia i le mauaina o se telefoni feaveai. Na ia faaaogaina muamua se telefoni feaveai ae sa leai ni taaloga, mea pueata, ma mafai ona feaveai ai ni feau. I se tasi o faaiuga o vaiaso muamua lava ina ua foi mai, na talosagaina ai o ia e fesoasoani i le faatauina atu o mea eseese a sona tuaoi. A o feoai solo tagata ma matamata i aitema eseese sa fola i luga o le mutia, sa taalo Russell i lana telefoni feaveai ma amata ona auina atu feau i sana uo i lona misia o lana misiona. Na faafuasei ona ia matauina se tamaitai o le sa foliga mai na fai si le mautonu a o matamata i nisi o aitema. Na ia tuueseina lana telefoni feaveai ma alu atu loa ia te ia. Na vave ona ia iloaina e fou atu o ia i le eria ma e tautala faaSipaniolo ae laitiiti lava se faaPeretania. Ona sa auauna atu o ia i Sepania, sa ia faafiafiaina ai o ia e ala i lona tautala atu faaSipaniolo. E le’i umi, e le gata ina sa fesoasoani atu i le tamaitai i le filifilia o ni nai aitema, ae na ia tusia foi lona igoa ma le tuatusi ma le faamoemoe e auina atu i ai faifeautalai.

Fai mai Russell, “O i sa ou auina atu ai se feau i le telefoni feaveai i la’u uo e uiga i lo’u misia tele o la’u msiona, ma na toeitiiti lava a ou misia se avanoa faaletalaiga. Ina ua ou tuueseina le telefoni feaveai, o le mea moni, na iu ina ou maua ai se tagata e faailoa atu le igoa i faifeautalai. Sa ou fiafia i lou maua o se telefoni feaveai fou, ma sa malie foi lo’u auina atu o se feau i la’u uo, ae na leai se mea na sili ona faafiafiaina ai au nai lo le maua o se tagata e faailoa atu le igoa i faifeautalai.”

E i ai ea se avanoa mo le auina atu o feau i telefoni feaveai? Ioe. Ae pau le mea e tatau ona tatou taofia mai le puleaina o oe.

UA MAUA LE SAVALI

Ole feaveai o feau i telefoni e mafai foi ona faaaoga o se mea faigaluega mo le lelei. E toatolu tamaiti aoga i le Seminare a le Skyline High School i le Aai o Sate Leki, Iuta, na faasoaina mai faataitaiga nei o auala na latou faaaogaina ai ma isi ia musele o o latou limamatua mo le lelei.

Na maua e Mitch se feau feaveai i le telefoni na faafetaia ai o ia mo se mea sa ia faia, ma na ia maua ai se lagona lelei. O le auina atu o feau pupuu ma lelei e le umi se taimi e alu ai, ae e mafai ona maua ai e se tasi se aso fiafia.
Na faaaoga e le faiaoga o le Aoga Sa a Mary-Martha le telefoni feaveai e auina atu ai se feau e faamanatu atu ai i lana vasega se gaoioiga a le Ekalesia.
Na auina atu e Bridger se feau i le telefoni feaveai i lana uo e fesili i ai pe sau i le seminare. E mafai ona e faaaogaina le telefoni feaveai e auina atu ai se feau e valaaulia ai tagata i le seminare po o gaoioiga a le Mutuale e aunoa ma le faamalosia o i latou. E mafai foi ona e auina atu se feau feaveai i se tasi e faapea, na e misia o ia i se gaoioiga ma valaaulia o ia e sau i le isi taimi e sosoo ai.
Na pue e le uo a Mitch ia mau i totonu o lana telefoni feaveai. O le auina atu i le telefoni feaveai o le mau e te fiafia i ai, e mafai ona suia ai se aso o se tasi ma ootia ai lona loto.
E fiafia Bridger e auina atu se feau feaveai i le telefoni i lona tina ma lona tama ma fesili atu pe na faapefea mai le laua aso. Nai lo le faaesea o oe, o lena ituaiga o feau feaveai e mafai lava ona faamalosia moni ai la outou mafutaga ma ou matua.

E faitalia lava oe i le faaaogaina ma le poto o feau feaveai i le telefoni. E mafai ona avea o se mea faigaluega aoga, ae aua nei faatagaina e suitulaga i fesootaiga faafesagai.