2007
Mulimuli i se Perofeta
Aokuso 2007

O Mai e Faalogo i le Siufofoga o se Perofeta

Mulimuli i se Perofeta

Saunia e Peresitene Gordon B. Hinckley

I le 1915 na saunoa atu ai Peresitene Iosefa F. Samita i tagata o le Ekalesia ina ia faataunuu afiafi faaleaiga. Na fai mai lou tama o le a matou faia faapea, o lea na matou faamafanafanaina ai le potu talimalo o loo i ai le piano a Tina ma faia le mea ua saunoa mai ai le Peresitene.

Na avea i matou o ni tagata faafiafia matuai faaletonu lava. E mafai ona matou faia soo se ituaiga mea a o matou taaalo, ae o le taumafai o se tasi o i matou e pese i luma o isi, na pei lava o le tauanauina o le aisakulimi ia tumau lona malo i luga o se ogaumu. I le amataga, sa matou talie ma ula i faafiafiaga a isi. Ae na finafinau lava o matou matua. Na matou pepese faatasi. Na matou tatalo faatasi. Na matou faalogo ma le filemu ao faitau e Tina tala o le Tusi Paia ma le Tusi a Mamona. O Tama sa ia faamatalaina ni tala na mafai ona ia manatuaina.

Mai na faatasiga laiti na faia i le potu talimalo o lo matou fale tuai, na fofoa mai ai se mea matagofie ma e le mafaamatalaina. Sa faamalosia lo matou alolofa i o matou matua. Sa faamausaliina lo matou alolofa i o matou uso ma tuafafine. Na faateleina lo matou alolofa i le Alii. O le agaga faafetai mo mea lelei laiti na olaola i totonu o o matou loto. O nei mea matagofie na oo mai ona sa mulimuli o matou matua i le fautuaga a le Peresitene o le Ekalesia.

Mai se lauga o le konafesi aoao ia Aperila 1993.

MEA E MAFAUFAU I AI

  1. Aisea na amataina ai e le aiga o Hinckley ona faia afiafi faaleaiga? E i ai se mea e tatau ona e amata faia mo le mafuaaga lava lea e tasi?

  2. Pe na e lagonaina le matamuli i le faia o mea e le lelei tele ona e faia? O le a se mea e mafai ona e aoaoina mai i le aafiaga a Peresitene Hinckley?

  3. O a faamanuiaga na maua e le aiga o Hinckley ina ua mulimuli i fautuaga a le perofeta? O a faamanuiaga e maua e lou aiga mai le mulimuli i le perofeta i le taimi nei?

  4. E mafai ona e mauaina se isi mea e te mafaufau i ai e uiga i lenei tala? Afai e i ai, ia faamatala atu i lou aiga ina ia latou mafaufau foi i ai.