Fesili & Tali

“E faapefea ona ou tausia le aso Sapati ia paia? Na ou taulai atu i mea e le mafai ona ou faia. E faapefea ona ou faia o se aso ou te tulimatai atu i ai, nai lo o se aso e le mafai ona ou faia ai se mea fiafia?”

Ia taulai atu i mea lelei e mafai ona e faia.
Ia fuafua mamao ma o le a amata ai ona e tulimatai atu i le Sapati.
Ia fiafia i lou taimi faatasi ma lou aiga i le Aso Sa.
O le aso Sapati na faia mo oe; o le a faamanuiaina oe a o e tausia ia paia.

Liahona

Na faapaiaina e le Alii le Sapati o se aso e malolo ma tapuai ai. Talu ai ona o le Sapati e le pei o isi aso o le vaiaso, tatou te filifili ai tatou te le faia mea e tasi tatou te faia i isi aso o le vaiaso i le aso Sapati. E le faapea ai la o le a le tele ni mea e mafai ona e faia. A o e aoao e faamuamua le Alii i le aso Sapati, o le a “e taua le sapati, o le aso fiafia” (Isaia 58:13). O nisi nei o fautuaga o mea e mafai ona e faia e tausia ai le aso Sapati ia paia ma tulimatai atu i ai i le taimi lava lea e tasi.

Matau mea e mafai ona e faia. I le vaitaimi o Iesu, sa tele ni tulafono e faatatau i mea e mafai ona e faia pe e le mafai foi ona faia i le Sapati. Na fesiligia foi e tagata ia Iesu ina ua Ia faamaloloina tagata i le Sapati. Na aoao atu ma faaalia e Iesu e ala i Ana faataitaiga e faapea, e sili atu le taua o le faia o se mea lelei i le Sapati nai lo le mafaufau i mea e le mafai ona e faia.

Fuafua Mamao. Muamua, mafaufau i mea e te manao e fai i le Sapati—e pei o le galue i sini mo le Alualu i Luma o le Tagata Lava Ia po o le Tiute i le Atua—ona fai lea o ni fuafuaga e faatino na mea. Lua, ia faia au mea aoga, feau i le fale, ma isi au feau i le gasologa o le vaiaso ina ia mafai ona e tulimatai atu i mea faaleagaga i le aso Sapati. O le fuafua mamao o le a amata ai ona e tulimatai atu i le aso Sapati.

Faaalu Lou Taimi faatasi ma Lou Aiga. Na faamalamalama mai e Peresitene Gordon B. Hinckley se auala taua e tausia ai le aso Sapati ia paia: “Nofo i le fale ma faapotopoto mai ia te oe lou aiga. Aoao atu ia i latou le talalelei, fiafia faatasi ma le auaiga i le aso Sapati, o mai i a outou sauniga, ma auai.”¹ O le faaaluina o lou taimi faatasi ma lou aiga, e mafai ai ona e lagonaina le fiafia i le Sapati.

Tatalo mo se fesoasoani. Afai e te le mautinoa po o le a se mea e fai i le Sapati pe afai e faigata ia te oe ona e tulimatai atu i le Sapati, ia e tatalo. Ua poloaiina i tatou e le Alii ia tausia le aso Sapati ia paia, ma e Na te le tuuina mai ia i tatou ni poloaiga e aunoa ma le saunia o se auala mo i tatou e tausia ai (tagai 1 Nifae 3:7). Afai e te tatalo i le Tama Faalelagi, o le a Ia fesoasoani ia te oe ia iloa le mea e fai i le Sapati ma o le a fesoasoani ia te oe e suia ou lagona.

O le Sapati na faia mo i tatou (tagai Mareko 2:27). A o e faia le mea sili e tausia ai le aso Sapati ia paia, o le a faamanuiaina oe ma e te sagisagi fiafia atu i aso Sapati taitasi.

Au faitau

O le aso Sapati e faapitoa ia te au aua o se taimi e aoao atili ai e uiga i le Faaola ma le talalelei ma latalata atili atu ai i le Tama Faalelagi. E mafai ai foi ona ou lagonaina lelei le malu ma le filemu o Lona Agaga aua ua le faalavelaveina au e le pisapisao o le lalolagi. Afai e te saili i le Alii ma le filiga e ala i le anapogi, tatalo, ma le suesue i tusitusiga paia, o le a e maua o Ia ma o le a Ia faamanuia oe i Lona Agaga (tagai Ieremia 29:13). O Lona Agaga o le a fesoasoani ia te oe e tuuese ai mea faalelalolagi o loo e popole ai ma avea ai o se tagata sili atu (tagai Isaia 58:13–14).

Moriah M., 15, Idaho, ISA

Ou te iloa lou lagona. Ae na oo mai lava le taimi na mafai ai ona ou iloa le matagofie o le aso Sapati. E mafai ona galo ia i tatou mea e le mafai ona tatou faia pe a tatou tatalo i le Tama Faalelagi ma ole atu mo le malosi. O lo tatou tatalo atu mo se malosi, o le a avea ai le aso Sapati ma se aso e te fiafia i ai. I le aso Sapati e mafai ona e malolo, tatalo, maua faamanuiaga, fafagaina lou agaga, ma atiina ae malosiaga faaleagaga ofoofogia.

Richard R., 16, Nariño, Colombia

la faia le Sapati ia ese mai isi aso o le vaiaso. Atonu e te manatu ua e misia le faaaluina o lou taimi faatasi ma au uo, po o le le maua foi o se aso faaopoopo se tasi e faia ai meaaoga i le fale. Ae afai o le a e filifilia na mea faalelalolagi mai mea moni e faamamaluina ai le aso Sapati, mafaufau i faamanuiaga e faavavau ma le olioli o le a e misia. O le tausia o le aso Sapati ia paia o le a le gata ina e lagonaina ai le faatumulia i le faaleagaga ma saunia e fetaiai ma le vaiaso fou, ae o le a e faaali atu i lou Tama Faalelagi lou migao. O loo ia te au se molimau malosi e mafai ona e tautino atu ma le faamaoni o le Aso Sa o le aso aupito sili lea o le vaiaso.

Sophia W., 16, Maine, ISA

Ua ou iloaina o lou manatunatu pea i le Sapati ua avea o se mea ua faasolosolo lava ina faigofie a o ou faataunuuina ou valaauga o le Ekalesia ma le perisitua. A o ou faia ou tiute o se ositaulaga ma fesoasoani atu i aoao ma tiakono i o latou tiute, ou te iloa ai ou te le o mafaufau i mea e le mafai ona ou faia ae manatuaina mea uma e tatau ona ou faataunuuina.

Andrew S., 17, Montana, ISA

Ou te faatalitali ma le fiafia e le aunoa mo le aso Sapati. I lea aso, ou te lagona ai le alofa tele o lo tatou Tama Faalelagi. I le Sapati, e galo ai faigata uma o lou olaga. A o ou ai i le faamanatuga, e uai atu lou mafaufau i le taulaga silisili na faia e Iesu Keriso mo i tatou. Ou te manatua le mafatiaga tele na Ia onosaia ina ia mafai ona tatou toe faatasi ma lo tatou Tama Faalelagi. Ua tumu lou loto i le alofa mama. Ou te manao e faasoa atu lenei lagona i ou tuaoi, aemaise lava i latou e le o ni tagata o le Ekalesia.

Anna R., 20, Ukraine

Vaai atu i le Sapati o se aso o avanoa. Mafaufau i gaoioiga uma faaleaiga e mafai ona e faia. O le Aso Sa i lo’u aiga e aofia ai le o i le lotu, faitauina o tusi e maua ai le faagaeetia, matamata i ata tifaga e faatatau i le Ekalesia, auai i faeasaite, ma faia ni taaloga ma lo’u aiga. O se aso e faaaluina ai le tele o le taimi ma lo’u aiga ma latalata atili atu ai i le Tama Faalelagi.

Justin D., 18, Uosigitone, ISA

Talu ona ou faia se faaiuga e faapaiaina le aso o le Alii, ua avea ai lava ma aso o le vaiaso e sili ona ou fiafia i ai. Na ou faia se lisi i lo’u mafaufau o mea e fesoasoani ia te au e tausia ai le agaga faaaloalo ma le agaga o tapuaiga i le Sapati. Mo se faataitaiga, o la’u lisi e aofia ai le alapo, faitauina o tusitusiga paia, galue i le Alualu i Luma o le Tagata Lava Ia, tusitusi i la’u tusi o talaaga, ma le tusia o ni tusi. A o ou faia nei mea ma isi gaoioiga faaleagaga, ou te lagonaina se lagona matagofie ma le fiafia e tupu ae i totonu ia te au. Na ou iloa ai foi e leai se taimi avanoa e ono faia ai nisi gaoioiga e itiiti se faaleagaga e maua ai.

Sílvia M., 18, Rio Grande do Sul, Pasila

O tali o loo faamoemoe o se fesoasoani ma ni manatu, ae le o se faasilasilaina atu o ni aoaoga faavae o le Ekalesia.

“Ole Sapati o se … aso e auai atu ai pea i sauniga e tapuai atu ai i le Alii, ma taumamafa i le punavai o le malamalama ma aoaoga, fiafia i le aiga, ma maua le faagaeetia i musika ma viiga.

“O le Sapati o se aso paia lea e faia ai mea tauaogaina ma le paia… . Ina ia faamamaluina, o le a tatau i se tasi ona tootuli i le tatalo, saunia lesona, suesue i le talalelei, manatunatu loloto, asiasi atu i tagata mamai ma mafatia, tusia ni tusi i faifeautalai, malolo, faitau i tusi lelei, ma auai atu i sauniga ma fonotaga uma.”

Peresitene Spencer W. Kimball (1895–1985), “The Sabbath—A Delight,” Ensign, Iulai 1978, 5.