Faia o ni Uo
Oso e Tusitusi i Tusi o Talaaga—Nicole Antúnez o Santiago, Chile
O Nicole Antúnez e fiafia e tafue. E mafai ona tafue i le tulaga e tasi po o le savalivali foi ma tafue e oo lava foi i le tamoe i luga o le auala savali ma lona laulu uliuli uumi e saluelue i ona tua.
I se taimi e lei leva tele atu, na aoaoina ai e Nicole se togafiti fou a o tafue. O se mea sa ia galue ai mo ni aso. Na matua fiafia tele o ia ina ua iu lava ina mafai ona ia iloaina le auala e fai ai, o lea na ia tusia ai i lana tusi o talaaga i le vave na ia mafai ai.
O le mafuaaga ona e sili atu le fiafia o Nicole e tusitusi i lana tusi o talaaga o lona olaga nai lo le tafue.
Aisea e Tusitusi Ai?
“Na te tusia mea uma e tutupu ia te ia,” o le faamatalaga lea a lona tina o loo faitatala atu i luga ae o tauau o Nicole, a o tusitusi lenei teineitiiti e valu tausaga i lana tamai tusi o talaaga e faavaa lanu sesega. Sa vave ona tapuni e Nicole lana api ma faanonou ona mata. Ae ata taufaalili i ai lona tina.
E le faatagaina e Nicole ni tagata se toatele e faitauina lana tusi o talaaga. “Ou te le faatagaina soo se isi e faitauina sei vagana ua ia filifilia se vaega e mafai ona latou faitauina,” o lana tala lea. E oo lava i lana uo lelei mai le lotu ma lana vaega tafue o Claudia, e le’i faitau lava i lana tusi o talaaga.
O a ni mea ua ia tusia e faapitoa ona taua?
O ananafi, na fai mai ai Nicole, na ia tusia ai e uiga i lona i ai i se pati i le vaitaele. O le asō na fai mai o ia, o loo tusi ai e uiga i lona alu atu i le lotu. “Ma sa ou talanoa ai i se tagata mai le Mekasini o le Liahona,” o lana faaopoopo mai lena.
E le misia lava, o le a ia tusia foi lena mea i lana tusi o talaaga.
Aisea la ua taua tele ai ia Nicole lana tusi o talaaga?
“Ou te le manao e galo ia te au mea lelei pe a ou matua,” o le faamatalaga lea a Nicole. Ae a galo ia mea, lea tatou te oo uma lava i ai, e faamoemoe Nicole o le faitauina o lana tusi “pe a ou matua o le a mafai ai ona ou iloa mea e uiga ia te au, ua ou le toe manatuaina.”
O le mea lena e mafai ona faia e se tusi o talaaga mo oe. Ae e le na o le pau lena o mea e mafai ona ia faia.
O Se Oa Patino
O le tina o Nicole na uunaia ia Nicole e faamasani i le tusitusi i tusi o talaaga. Ao laitiiti Tuafafine Igor, sa ia tusia foi se tusi o talaaga. O le mea e faanoanoa ai, na leiloa [lana tusi o talaaga] ina ua siitia atu i Santiago ma faaipoipo ai.
“Sa matuai ou faanoanoa lava ina ua leiloa,” o le tala lea a Tuafafine Igor. “O lo’u olaga lena, o mea uma lava na tutupu ia te au. O sa’u oa patino na sili atu i soo se tau.”
Ina ua fanau mai Polisi, le tuagane matua o Nicole, na toe amata ai foi ona tusitusi ia Tuafafine Igor. Sa ia tusia ona mafaufauga ma lagona ina ua fanau mai Polisi ma sosoo ai ma Nicole.
O le taimi la lenei ua fiafia lava Polisi ma Nicole e faitau e uiga i lo la tina. “E fesoasoani tele ou te malamalama ai i mea na tutupu i lou tina,” o le tala lea a Nicole. E faamoemoe o ia o le a mafai ona malamalama lana fanau ia te ia i le auala lava lea e tasi.
O Mea e Tusi
I le mulimuli ai i tulagavae o lona tina, na tusia ai e Nicole lana tusi o talaaga i aso uma talu ona ia maua ma avea o se vaega o se galuega faatino i le aoga. E tusitusi i taimi uma na te lagonaina ai e i ai se mea e fia talanoa ai. E le afaina po o le ao po o le po pe a i ai se mea e manao e tusi i lalo.
Ae e taua po o fea le nofoaga e tusitusi ai.
O le nofoaga e sili ona fiafia e tusitusi ai o fafo, i le mea e leai se isi o i ai e faalavelave ia te ia. O le auala lena e mafaufau lelei ai i mea o loo ia tusia—ma e le popole ai i tagata e faitatala atu.
O mea na te tusitusia e mafai ona eseese i lea aso ma lea aso. E tusi e uiga i tagata e masani ai po o nofoaga na malaga i ai. E tusi e faatatau i meaai e sili ona fiafia i ai ma ana uo faapitoa. E tusi foi e uiga i mea na ia aoaoina, e pei o lana togafiti fou i le tafue.
E tusitusi o ia pe a fiafia, ma e tusitusi foi pe a faanoanoa.
“E faapitoa lava lou fiafia ou te foi i tua e faitau mea malie na tutupu ia te au,” o lana tala lea.
O Nicole, o le na faatoa atoa lona valu tausaga ma ua uma ona papatiso ma faamauina, e tusitusi foi e uiga i mea e aupito taua ia te ia. “Ina ua uma ona papatiso ma faamauina au, sa ou tusia e uiga i lou lagonaina o le Agaga Paia,” o lana tala lea. Ua ia iloaina o le a taua le manatuaina o na mea i se taimi mulimuli mai e faamalosia ai lana molimau pe a oo mai taimi faigata.
O lea ua fiafia o ia e toe foi i tua ma faitauina mea na ia tusia. “E i ai lava le laupepa e tasi ou te fiafia lava e faitauina,” o lana tala lea ma ataata. “Ae e le mafai ona ou tauina atu ia te outou.”
Ia Tusi Loa i le Taimi Nei
Ina ua valaauina Spencer W. Kimball (1895–1985) e avea ma Peresitene o le Ekalesia i le 1973, na faatumulia ni faila se 33 i tusitusiga o lona olaga. Sa ia faamalosiauina tagata o le Ekalesia ia tausia ni a latou tusi o talaaga ma sa ia aoao mai e finagalo le Faaola ia tusitusi tagata o le ekalesia ia latou tusi o talaaga.
O nisi nei o mea ua fautuaina e Peresitene Kimball e tatau ona tusia:
-
Faauoga
-
O lau molimau
-
Mea ua ausia
-
Faamanuiaga ua e maua
-
O au mea e fai, tautala ai, po o le mafaufau i ai
-
O mea e faafiafiaina ai oe
-
O mea e te fiafia ai ia te oe lava
-
Aafiaga ma le Agaga Paia
-
O lui ma auala na e taulimaina ai
“Ao faitau a tatou fanau i mea na tutupu i o tatou olaga, o le a latou iloa foi ma alolofa ia i tatou. Ma i lena aso mamalu ma le matagofie pe a toe faatasia o tatou aiga i le faavavau, ua uma ona malamalama lelei le tasi i le isi.”
Mai le “President Kimball Speaks Out on Personal Journals,” Ensign, Tes. 1980, 61.