O Le Pogai o Aoaoga FaaKerisiano
Ua aoao mai Peresitene Gordon B. Hinckley, e tatau ona tatou faia le mea e sili ona lelei i le faaooina ifo lea o le talalelei i o tatou lava loto ma loto o i latou tatou te alolofa ma auauna atu i ai. Ou te talitonu o le tasi auala e faataunuuina ai le lui a Peresitene Hinckley o le taulai atu lea i le Togiola a Iesu Keriso.
I ni tausaga ua mavae na saunoa ai Peresitene Boyd K. Packer, Sui Peresitene o le Korama a Aposetolo e Toasefululua, e uiga i le alofa mutimutivale na ofoina mai e le Puluvaga o Iesu Keriso: “O le faavae tonu lenei o aoaoga faaKerisiano. Atonu ua tele lou silafia e uiga i le talalelei aua e tatupu ae mai iina, ae afai na o lala e te iloaina ma o na foi lala e le papai i lena aa, afai la ua tipieseina mai lena upumoni, o le a leai se ola po o se lelei po o se togiola ia i latou.”1
Ou te ofoina atu ni fautuaga se tolu o auala e mafai ona tatou fesootai atu ai i lena aa, i le faagasologa, ia o’oo’o ifo i o tatou loto ma loto o i latou o loo tatou auauna atu i ai.
Taumamafa i Faatusa o Lona Puapuagatia
I le faatalanoaga mo le pepa faataga o le malumalu, e fesiligia ai i tatou, “Pe o i ai sau molimau i le Togiola a Keriso ma Lana matafaioi o le avea ai ma Faaola ma Togiola?” I lou aafiaga i le avea ai ma se epikopo ma se peresitene o se siteki, e mafai ona ou lipoti atu ma le fiafia e le’i i ai lava se tasi na tali ese i lena fesili ae na o le ioe. Ae ui i lea, ua leva ona ia te au se popolega tatou te le o talisapaiaina atoatoa lena fesili. Ou te manatu e taua tele, aua o le tele o matafaioi a Keriso, ua na o Ona matafaioi lava o le avea o Ia ma Faaola ma Togiola ua fesiligia ai i tatou. E tatau ona i ai se mea e uiga i nei matafaioi e faapitoa le taua i le malumalu—o se nofoaga lea Na te fusia ai i tatou ia te Ia lava e ala i feagaiga.
I le avea ai ma se peresitene o le siteki, sa ou popole pe na i ai i tagata o le siteki “se molimau i le Togiola a Keriso faapea ma Lana matafaioi i le avea ai o se Faaola ma Togiola.” Na ou lagonaina o le toatele o i latou na alolofa ia Keriso—e le o se mea laitiiti lena—ae na ou popole ona e le toatele i latou na iloa o Ia o lo latou Faaola (o Le na faaolaina i latou) po o lo latou Togiola (o Le na faatauina i latou). A o ou manatunatu e uiga i lenei mea i se tasi o aso, sa ou faitauina le 3 Nifae 11, ma na ou iloa ai nisi o mea ou te le’i iloaina muamua.
O tagata ua tatou faitau i ai i lena mataupu o tagata amiotonu na totoe, o e na gauai atu i lapataiga a perofeta. Na saunia i latou e feiloai ma le Alii. Ina ua faaali atu le Alii toetu ia i latou, na Ia “faaloaloa atu lona aao,” ma faaali atu Ona manuale faailoga ma le faamaoniga o Lana taulaga. Ona Ia “fetalai atu [lea] i le nuu, ua faapea atu: Faauta o Au o Iesu Keriso, o Le na molimau ai perofeta, e sau i le lalolagi” (3 Nifae 11:9–10).
Ona Ia fetalai atu lea, “O au o le malamalama ma le ola o le lalolagi; ua ou inu foi i lena ipu oona na tuuina mai ia te au e le Tama, ma ua ou faamamaluina le Tama i le aveina i ou luga o agasala a le lalolagi, ua tigaina au i le finagalo o le Tama i mea uma talu le amataga” (3 Nifae 11:11).
O Lana savali lena. O Ia o Le ua Faauuina, lea na molimau mai ai perofeta. O Ia o Le Foafoa. Na puapuagatia o Ia mo i tatou.
Silasila i le tali atu a tagata: “Ua oo foi ina fetalai atu e Iesu o nei upu, ona faapauu ai lea le motu o tagata uma i le eleele; aua ua latou manatua, sa valoia ia te i latou e faaali Keriso e ia lava ia te i latou” (3 Nifae 11:12).
O le mea na sosoo ai, ia te au lava ia, o le vaega aupito paia lea o lenei aafiaga. Na poloai atu Iesu ia te i latou ina ia o atu taitoatasi ma faia se mea faigata: “Ina tutulai ia ma o mai ia te au, ma ia tuu o outou lima i lou itu, ma ia outou tagotago i mea sa tutui ai fao i ou lima ma ou vae, ina ia outou iloa o au o le Atua o Isaraelu, o le Atua foi o le lalolagi uma, ma ua fasia au mo agasala a le lalolagi” (3 Nifae 11:14).
O nei tagata na latou fetagofi ma pai atu i nei faailoga o Ona puapuaga: “Ua oo ina o ane le motu o tagata, ma ua tuu o latou lima i lona itu, ma ua tagotago i mea na tutui ai fao i ona lima ma ona vae; ma ua latou faia lenei mea, ua alu atu taitasi, ina seia o ane i latou uma” (3 Nifae 11:15)—le toa 2,500 o i latou uma.
Ia matau le mea na sosoo ai:
“Ua uma ona latou o ane, ma vaavaai i ai mo i latou lava, ona latou alalaga faatasi ai lea, ua faapea atu:
“Osana! Ia faamanuina le suafa o le Atua Silisiliese! Ona latou faapauu ai lea i aao o Iesu, ma ua ifo ia te ia” (3 Nifae 11:16–17).
O le taimi lona lua na faapauu ai nei tagata i aao o Iesu, na latou “tapuai ia te Ia.” O le taimi muamua, atonu na latou faapauu i le eleele ona e le tasi se mafuaaga: matau, meia, faatosinaga a uo. Ae o le taimi lona lua na latou faapauu e tapuai ia te Ia. Aisea ua eseese ai uiga na faaalia? O le taimi lona lua, na latou alalaga faatasi ai, “Osana!” o lona uiga, “Laveai nei ia i matou!” Aisea na alalaga ai nei tagata ia Keriso mo le faaolataga i lenei taimi?
Sei ou fautuaina atu se tali e ono talafeagai. E ui ina sa latou usiusitai, ae atonu e lei oo ina latou iloa o Ia o lo latou Faaola, aua e lei oo ia i latou se lagona o le tatau ona laveaiina i latou. Na latou ola i ni olaga na tumu i galuega lelei. Na latou iloa Iesu o se Atua ma o se Faaaoao. Ae peitai, atonu latou te le’i iloa i lena taimi o Ia o le Faaola. Sa le’i faapea a latou tatalo, “Matou te faafetai i lau Afio mo le laveaiina o i matou i taimi ua te’a ma le faamanatuina mai ia i matou o lena mea e ala i Lou faatasi mai i le aso.” E leai, o le tatalo o se faatauanau i lena taimi: “Osana!” po o le “Laveai nei ia i matou!” O lena mea na tau mai ai ia te au ua oo ina latou iloa o Ia o le Faaola.
O le a le mea na suia ai i latou mai ni tagata lelei ma usiusitai, i ni tagata lelei ma usiusitai o e ua iloaina nei Iesu Keriso o le Faaola? O le a le mea na mafua ai ona latou faapauu i ona aao e tapuai ia te Ia? Ona o le pai tino atu i faailoga o Ona puapuaga.
O le mea lena na manaomia e tagata o le matou siteki ina ia mafai ona latou iloa ai o Keriso o lo latou Faaola ma le Togiola: o le pai tino atu i faailoga o Ona puapuaga. Ae e faapefea ona tatou faatupuina lena mea? Ona oo mai lea o le manatu ia te au: tatou te maua lena aafiaga i Aso Sa uma pe a tatou fetagofi i le faamanatuga. Tatou te taumamafa i le areto ua vaevaeina, o se faatusa o Lona tino na fasia. Tatou te feinu i le vai, o se faatusa o Lona toto na faamaligiina. O faatusa iloga nei ua faamoemoeina e tuuina i totonu o i tatou se lagona loloto o le agaga faafetai ma le migao.
Ou te talitonu a o tatou auai i le faamanatuga o le Talisuaga a le Alii, o le a tatou alalaga atu ia Keriso i totonu o o tatou loto, “Laveai nei ia i matou!” ma o le a tatou mananao e faapauu ma tapuai ia te Ia.
Mafaufau Loloto i Lana Taulaga
Ina ia faaoo ifo le talalelei i totonu o o tatou loto ma loto o i latou tatou te auauna atu i ai, e ao foi ona tatou iloa auiliili ma malamalama loloto ma lagona mea na tutupu na afua ai le Togiola a Iesu Keriso. I le Mataupu Faavae ma Feagaiga e 19, na tuuina mai ai e le Alii se tala auiliili o puapuaga na Ia onosaia:
“Aua faauta, o au le Atua na puapuagatia i nei mea mo tagata uma, ina ia latou le puapuagatia pe afai latou te salamo; …
“O le tiga lea na faagateteina ai au lava, o le Atua, le silisiliese i mea uma, ona o le tiga, ma na, maligi ai le toto mai pu laiti uma lava o le tino, ma na tiga le tino atoa ma le agaga—ma sa ou loto ou te le inu i le ipu oona, ae teena” (f. 16, 18).
O le a se ituaiga Atua o loo tatou tapuai i ai? O se Atua o le e finagalo ina ia tatou iloa o Lona alofa mo i tatou e le gata mai ma e faavavau. O se Atua o le e finagalo ia tatou iloa o Lona alofa mo i tatou na Ia maua ai le malosiaga e puapuagatia ai mo i tatou. O le iloa o lenei mea, ua tatau ona lava lea e musuia ai i tatou e tuuina atu o tatou ola ia te Ia i le usiusitai ma le agaga faafetai.
I se taimi ua mavae na ou faalogo ai i se talanoaga leotetele ma le naunautai i le va o ni tagata se toalua e uiga i se galuega o faatufugaga na faaalia ai se faatusatusaga moni o puapuaga o Keriso. O se tasi o i laua na tetee i le galuega ma faapea mai, “Ou te le manao ou te mafaufau i le tele o le puapuaga na oo ia Keriso.” Na ou manatu o se faamatalaga ese lea e faia e se tasi, aua ou te le talitonu ua i ai i soo se tasi o i tatou le faatagaga e aloese ai mai le mafaufau atu i mea na Ia puapuagatia ai, e ui lava e le mafai ona tatou malamalama atoatoa i mea na Ia puapuagatia ai.
A o le’i faaiuina e Moronae lana tala i le Tusi a Mamona i se apoapoaiga ina ia “o mai ia Keriso” (Moronae 10:30, 32), na ia faasoa mai ia i tatou se tusi patino mai lona tama. E manatu sa tele se aafiaga ia te ia, ma ou te manatu foi na ia faamoemoe o le a tele sona aafiaga ia i tatou: “Lou atalii e, ia e faamaoni ia Keriso; aua foi e te faanoanoa i nei mea ua ou tusia, e mafatia oe e oo i le oti; a ia faaeaina oe e Keriso, ma ia tumau e faavavau i lou loto o ona puapuaga, ma lona maliu, ma le faaalia o lona tino i o tatou tama, ma lona alofa, ma onosai, ma le faamoemoe o lona mamalu, ma le ola faavavau” (Moronae 9:25).
E aofia ai i mea e tatau ona teuina i o tatou mafaufau e faavavau o “puapuaga ma le maliu” o Keriso. E le tatau ona tatou aloese mai le mafaufau i le tau na Ia totogiina ina ia laveaiina ai o tatou agaga. O a tatou viiga o loo faamanatu mai ai ia i tatou lenei upumoni:
O Lou toto sa totogi ai lau sala!
[E] le galo ia te au se alofa ua faapena?2
Nei galo ia au, le Faaola e,
Na e maliu mo au nei.3
Mafaufau pea ia te au;
Mafaufau i mea sa fai.
O Lou toto sa masaa,
pei se timu mai luga,
Ma Lou tino sa tautau
E faaola ia outou.4
I se sauniga faamanatuga talu ai nei lava, na ou mulimuli ai ao faitauina e le failauga se mau masani: “Ia manatua e taua tele le aoga o agaga i le silafaga a le Atua” (MFF 18:10). Ona pue mau lea e lo’u mafaufau o se manatu mai le fuaiupu na sosoo ai ou te le’i iloaina muamua. Ina ia faamaonia le taua tele o o tatou agaga, na fetalai mai ai le Alii, “Aua, faauta, o le Alii lo oulua Faaola na maliu tiga i le tino; o le mea lea na tigaina ai o ia i le tiga o tagata uma, ina ia salamo tagata uma lava ma o mai ia te ia” (MFF 18:11; ua faatusilima mea e faamamafa).
O Ona puapuaga ua faamaonia ai Lona alofa, ae peitai e le gata ai i lena. O le auala o loo Ia faaaogaina ina ia mafai ai ona “salamo tagata uma lava ma o mai ia te ia.” Pe a oo ina tatou maua sina malamalama i le mea ua Ia faia mo i tatou—ae, patino lava, i mea ua Ia puapuagatia ai mo i tatou—o o tatou uiga faaalia masani i le avea ma fanau a le Atua, o le manao lea e faaali atu lo tatou agaga faafetai ma le alofa e ala i le usiusitai ia te Ia. O lenei fuaitau, i lo’u lava manatu, o se faamatalaga aupito puupuu ma loloto—mai le Alii lava Ia—i le auala e molimoli atu ai le talalelei i o tatou loto.
O le auala sili lava e faaoleole ai tagata e salamo ma o mai ia Keriso o le tuuina atu lea ia i latou e mafaufau i mea ua Ia faia mo i tatou, aemaise lava i mea ua Ia puapuagatia ai mo i tatou. O le auala lena e fai ai e le Alii.
Manatua o Ia
I nai tausaga ua mavae na ou faalogo ai ia Elder N. Lund, o le Au Fitugafulu, o ia faamatalaina se tala mai se mekasini e uiga i le fe’aei i papa. Na talanoaina i le tusiga le taulaina—o le faiga faaleoleo lea e puipuia ai tagata fe’aei. E a’e se tasi o tagata a’e i se tulaga saogalemu, nonoa le maea i se vaega mautu, ona valaau atu lea i lana soa, “Ua taula oe”—o lona uiga “Ua ou faamauina lau maea.” Na faamatala e le faatonu o se aoga e a’o ai fe’aeiga, o Alan Czenkusch, ona aafiaga ma le taulaina i le tusitala o le tusiga:
“O le taulaina ua maua ai e Czenkusch ni taimi sili ona lelei ma ni taimi sili ona leaga i fe’aeiga. E faatasi ona pau mai Czenkusch mai se mato maualuga, ma mase’i ai ni pine lagolago se tolu ma mamulu ai lana taula mai le vaega sa faamau ai. Na taofia o ia, na u i luga ona vae ae u i lalo lona ulu, i le toe 10 futu [3 mita] mai le eleele ina ua aapa atu lima malolosi o le na taulaina o ia.
“‘Na faasaoina e Don lo’u ola,’ o le tala lea a Czenkusch. ‘E faapefea ona e tali atu i se alii e pei o ia? Pe e te avatu ia te ia se maea na faaaogaina e fai ma se meaalofa o le Kerisimasi? E leai, e te manatua o ia. E te manatua o ia e le aunoa.’”5
Na tau mai e Peresitene Gordon B. Hinckley ia i tatou:
“E le tatau ona i ai se tasi o le Ekalesia e tatau ona faagaloina le matautia o le tau na totogiina e lo tatou Togiola, o le na tuuina atu Lona soifua ina ia ola uma ai tagata—o puapuaga i Ketesemane, o le matuitui o tauemuga o Lona faamasinoga, o le maamaai o le pale tuitui na tuia ai Lona ao, o le tuualaga atu a le motu o tagata ia Pilato, o Lona tauaveina toatasi o le avega mamafa ao ia savalia le ala e agai atu i Kalevaria, o le tiga uiga ese a o tutuiina fao i Ona lima ma vae… .
“E le mafai ona tatou faagaloina lena mea. E le tatau ona tatou faagaloina, aua o iinei na tuuina atu ai e lo tatou Faaola, lo tatou Togiola, le Alo o le Atua, o Ia lava mo se taulaga e sui ai mo i tatou taitoatasi.”6
Tau ina ia tatou manatua pea o Ia ma le tau na Ia totogiina e faaolaina ai o tatou agaga.
Mai se saunoaga i le faigalotu a le Iunivesite o Poliga Iaga, i le aso 14 Mati, 2006.
Ia manatua pea o ia
“O le Keriso na faamanuaina, o lo tatou taitai o o tatou agaga—o Ia o le o loo tauaveina maila o le taulaga, o faailoga o manua o le alofa ma le lotomaualalo ma le loto faamagalo.
“O manua na ua ia valaauina ai e iti ma e matutua, i na ona po ma aso nei, e o atu ma vaavaai ma tagotago i ai (tagai 3 Nifae 11:15; 3 Nifae 18:25). Ona tatou manatua ai lea o le tala a Isaia, ona o i tatou uma ua mafua ai ona ‘inosia ma tuulafoaiina … ; o se tagata faanoanoa, ua masani foi ma le tiga’ (Isa. 53:3). O nei mea uma e mafai ona tatou manatua, pe a valaaulia i tatou e se alii ositaulaga talavou, ia manatua pea Keriso.”
Elder Jeffrey R. Holland o le Korama a Aposetolo e Toasefululua, “Tou Te Faia Le Mea Nei ma Faamanatuga ia te Au,” Liahona, Ian. 1996, 82.