O Faalavelave Tutupu ua Uunaia ai le Tali atu o le Ekalesia

Ua Tatalaina e le Ekalesia ona Falelotu mo le Au Sulufai o Lologa i Atenitina

E faitau fiaselau na saili atu mo se mapusaga i falelotu o le Ekalesia ina ua maea lologa ma timuga tetele i Atenitina i le faaiuga o Mati.

Mo ni aso se tele o timuga sa lolovai ai ni vaega o Atenitina lea sa mafua ai ni lologa sa maliliu ai ni tagata e toa 7. Toeitiiti atoa le 37,000 tagata sa faamalosia e tuua o latou fale, ma sa uunaia ai le Ekalesia e ofoina atu ona falelotu e fai ma mapusaga o eria o loo aafia.

O vaega sili ona afaina o Itumalo o Santa Fe ma Entre Rios i le itu i matusasae o Atenitina. E le o iloa pe fia ni fale ma ni pisinisi sa lolovaia, ae sa leai ni lipoti mai tagata o le Ekalesia o ni maliu po o ni fale ua faaleagaina.

O le valu o falelotu i le risone sa nofoia e le tusa ma le 600 tagata. Sa saunia foi e le Ekalesia ni meaai, faamalu, vailaau mo togafitiga, ma lavalava mo i latou sa afaina i lologa.

Ua Fesoasoani le Ekalesia ia i Latou ua Aafia i Asiosio

I le aso Lulu, 28 o Mati, e sili atu ma le 60 matagi taavilivili sa lia’i i se eria e aofia ai Dakota i Saute e oo atu i Colorado ma Texas, ISA, ma maliliu ai le tusa ma le toafa tagata i totonu o setete e tolu ma sa uunaia ai le tali atu o le Ekalesia e fesoasoani ia i latou ua aafia ai.

O le tele o mea na faaleagaina sa tupu i Holly, Colorado, ina ua oso ae ai se asiosio e 600 futu (185 m) mo le sili atu ma le maila (1.6 km), ma faaleagaina ai le sili atu ma le 60 fale. O le falelotu o le Paranesi o Holly sa afaina i ni aafiaga tuga, ma o le fale o le peresitene o le paranesi sa matua faaleagaina. O le afe ma afe o tagata i le eria ua aafia sa le maua se kesi ma se eletise.

Sa lipotia mai le saogalemu o faifeautalai uma ma tagata o le Ekalesia. Sa galulue taitai o le uelefea a le Ekalesia i ia nofoaga e tali atu i manaoga o tagata o le Ekalesia ma le aai.

Sa Fesoasoani le Ekalesia i e ua Aafia i Lologa ma Sologa Eleele i le Atu Keripeane

Sa fesoasoani le Ekalesia i tagatanuu o Hispaniola, o le motu o le Atu Karipeane e feaiaa’i i ai atunuu o Haiti ma le Dominican Republic ina ua maliliu tagata e 11 ma le sili atu ma le 1,000 o fale ua faaleagaina pe faatamaia e lologa ma sologa eleele i le aso 27 o Mati.

O faalavelave tutupu, e mafua mai i le tolu o aso o le tetele o timuga, ua aafia ai le 20 o taulaga taumamao ma oo atu ai ina aveeseina le sili atu ma le 4,000 o tagata. Sa faatagaina e le Ekalesia le Au Peresitene o le Eria o le Atu Keripeane e faaaoga tupe e faatau ai mea o loo manaomia mo le soifua o i latou ua aafia i lenei faalavelave.

O Loo Saogalemu Tagata o le Ekalesia, ma Faifeautalai ina ua Maea le Mafuie i Iapani

I le taeao po o le Aso Sa, 25 o Mati, o se mafuie e tusa lona malosi ma le 6.9 i le fua mafuie sa luluina ai le itulagi o Hokuriku i Iapani. O le mafuie, lea na lulu tonu e latalata i le talafatai, sa maliu ai se tagata e toatasi; sa faaleagaina ai le tele o auala ma le 50 fale; ma sa matua faatamaia ai le sili atu ma le 200 fale, aoga, ma isi fale.

Ina ua faaatoa maea le mafuie, sa tulai ma ni galulolo se lua e tai ono-inisi (15-cm) i le talafatai ae e lei i ai ni mea na faaleagaina.

Sa saogalemu tagata uma o le Ekalesia ma faifeautalai i le risone ma lipotia ina ua maea le mafuie, e ui lava sa aafia le eria i nisi mafatiaga mulimuli ane ai.

Ua Faaleagaina Fale o Tagata o le Ekalesia i Asiosio i Niu Mekisiko

O se vaega o asiosio sa oo atu i le po i le setete o Niu Mekisiko, ISA, i le Aso Faraile, 23 o Mati. Sa vave ona tali atu tagata o le Ekalesia i lea vaega i le tufaina atu o meaai, vai, ma mea e tausi ai le soifua maloloina i eria ua aafia. Sa fesoasoani atu volenitia mai aulotu o le Au Paia o Aso e Gata Ai i lea vaega i le toe faamamaina.

O nei asiosio sa faatamaia ni fale se 24 ma ni pisinisi i Clovis ma Logan, Niu Mekisiko, lea sa tele ai ni mea na faaleagaina. E sili atu ma le 100 fale, pisinisi, ma aoga i lea eria sa lipotia mai ua faaleagaina.

E ui i nai mea laiti sa faaleagaina i nisi o fale o tagata o le Ekalesia, ae o tagata uma ma faifeautalai sa saogalemu. Sa leai se faalavelave matuia na lipotia mai i ia eria sa aafia.