Savali a le Au Peresitene Sili

Taliaina o Tagata Taitoatasi Uma

Saunia e Peresitene James E. Faust

Fesoasoani Lua i le Au Peresitene Sili

Ata

Ou te manao i lenei savali ia ofo atu ai avanoa mo le alualu i luma ma le fiafia i tagata uma o le ekalesia, pe ua faaipoipoina pe nofofua. O le pulea o lou olaga, o le avea ma se tagata faamanuiaina e tusa lava pe o le a lou tulaga faaipoipoina, ou te fautua atu e te sau ia e iloa lou Tama o i le Lagi.

O le auala sili e te faia ai lenei mea o le tatalo, suesue, ma le tausi o poloaiga. Ia manatua i taimi uma e alofa o Ia i a te oe ma o le a tuuina atu ia te oe le taitaiga ma le lagolago pe afai o le a e valaaulia o Ia i lou olaga. Ia faaaofia o Ia i au faiga filifiliga. Ia faaaofia o Ia pe a e faia se sailiiliga o lou lava taua patino. Tatalo atu ia te Ia pe a e lotovaivai, aua ou te molimau atu Na te faafofogaina a tatou augani mo se fesoasoani. I lana aoaoga mataalia e uiga i le tatalo, na iloa ai e le perofeta o Senosa, “Sa e faafofoga mai ia te au ona o o’u puapuaga ma lo’u faamaoni” (Alema 33:11).

Matou te lagonaina le ootia loloto ma le manatu mamafa a o matou faalogo i se manatu lea e masani ona faaalia e le toatele o o tatou tagata nofofua. Mo nisi, o le tuua toatasi ma le lotovaivai o a latou soa ia i taimi uma. Na faapea mai se tasi tagata maoae o le o loo i ai sana epikopo lelei, se faiaoga o aiga lelei, ma se galuega lelei, ma tulaga lelei, “Ou te le manaomia nisi mea e fai; e na o lou manao i se tasi ma te faia faatasia.” O lenei mea e avea ma se tulaga e faapopoleina tele ai pe a tatou mafaufau atu e tusa ma le tasi vaetolu o tagata matutua o le Ekalesia e nonofofua.

E aunoa ma le le faatauaina o le tiga o le tuua toatasi lea e lagonaina e nisi o tagata nofofua, na ofoina mai ai e Peresitene Gordon B. Hinckley se manatu e fai ma fofo ina ua ia fautuaina: “Ou te talitonu, mo le toatele lava o i tatou, o le vailaau sili lava mo le tuua toatasi o le galue ma le auauna atu mo isi. Ou te le faaitiitia a outou faafitauli, ae ou te le faatuai i lou fai atu e toatele isi e sili atu ona ogaoga o latou faafitauli nai lo outou. Ia aapa atu e auauna atu ia i latou, e fesoasoani i ai, ma faamalosiau atu i ai. Ua anoanoai tama ma teine ua latou le mafaia le aoga ona o le le lava o le uai atu i ai faaletagata ma se faamalosiauga. Ua matuai anoanoai tagata matutua o loo ola faanoanoa ma tuua toatasi ma le atuatuvale, ma ua na o sina talanoaga faatauvaa lava ma i latou o le a aumaia ai sina tulaga o le faamoemoe ma le fiafia.”¹

Faamolemole ia manatua sa tatou nofofua uma lava, o loo nofofua i le taimi nei, pe i ai se taimi e toe nofofua ai; o lea la, o le nofofua i totonu o le Ekalesia e le o se mea e sili atu ona ese ai. O le faaipoipoina foi e i ai luitau ma matafaioi. Atonu ua outou faalogo i le tamaitai faaipoipo talavou o le na faapea mai, “Ou te faaipoipo loa, o le a uma ai iina ou faafitauli.” Na tali atu lona tina atamai, “Ioe, lau pele, ae o le fea le itu?”

Fuaina o lo Tatou Alualu i Luma

E le aoga le matuai faatumulia i le manao ina ia faaipoipoina ma faapea ona misia ai faamanuiaga ma avanoa mo le alualu i luma a o tatou nofofua. Ou te talitonu foi o le a aoga tele le faia o ni sini; a aunoa ma ni sini e le mafai ona fuatia lou alualu i luma. Ae ia aua le le fiafia ona o le leai o ni manumalo faaaliali. O nisi mea e le mafai ona fuatiaina. Afai o loo e taumafai mo le lelei silisili—afai o loo e faia le mea sili i lea aso ma lea aso, i le faaaogaina ma le poto o lou taimi ma lou malosi e ausia ai sini lelei—o le a e manuia e tusa lava pe ua e faaipoipo pe nofofua.

I se saunoaga e uiga i tagata nofofua o le ekalesia, na saunoa ai Peresitene Harold B. Lee (1899–1973) i se tasi taimi, “I o outou tulaga o loo i ai ni tagata o le Ekalesia e sili ona tamalii—faamaoni, loto toa, finafinau e ola i tulafono a le Alii, e fesoasoani e atiina ae le malo i le lalolagi, ma auauna atu i o outou uso a tagata.”² E tele ina tatou le mafaufau ma lē magafagafa i lagona o nei agaga filifilia tatou te faatasi. Na fesili atu se tasi o taitai perisitua i se agaga lelei, ma le popole i se tasi o nei tamaitai nofofua filifilia, o le sa moomoo lona loto mo se mafutaga faalesoa ma se olaga e sili atu ona faamalieina, “Aisea ua e le maua ai se toalua?” Sa tali atu o ia i se agaga talasua lelei, “Tuagane, ou te matuai manao lava i ai, ae e le mafai ona ou tauina mai [se toalua] mai se laau.”

E ui lava ina toatele tagata matutua nofofua o le ekalesia ua mau fetuutuunai lelei i le olaga ma ona faafitauli, ae latou te manaomia pea le manatulia ma le alofa mai le Ekalesia ma ona tagata e faamaonia ai lo latou aoga ma le alofa o le Atua o loo i ai mo i latou taitoatasi. O le taulaiga talafeagai ma le sao a le Ekalesia i le aiga ma le auaiga e masani ona aliae ai i nisi o tagata nofofua o e e leai ni soa po o ni fanau le lagona o le tuuaunoaina.

Na tusia e se tasi tagata: “E toatele tagata o le Ekalesia latou te faia ia tagata ua tetea e pei o maua i le ma’i lepela. Sa ou nofo i se tasi uarota a le Au Paia i Sate Leki mo ni nai tausaga, lea sa latou faia ai se pati i tausaga uma i le vaitaimi o le Kerisimasi mo alii ma tamaitai ua maliliu o latou taitoalua. Sa le valaauliaina ai lava au. Sa ou ola i se olaga lelei i taimi uma ma ou te talitonu e valaaulia au e le Faaola. Ou te iloa nisi o e ua i ai ni aafiaga i le maliu ma le tetea, ma ua latou faapea mai e sili atu le leaga o le tetea nai lo le oti.”

Ae na tusia e se isi tagata: “Talitonu mai, faatasi ai ma le faamamafa a le Ekalesia i aiga ma fanau, ua matou matuai iloa lelei lava o i matou o ‘[tagata] faaesea.’ O se fiafiaga moni le taliaina o se tagata masani.” E le tatau ona i ai se tasi e lagonaina le faaesea ona o ia o se alii po o se tamaitai nofofua. Matou te mananao i tagata uma ia lagona latou te auai i le Ekalesia e pei ona tusia i le savali a Paulo i Efeso: “E le toe tagata ese outou, po o e ua aumau, a ua nuu faatasi ma le au paia, o le aiga foi o le Atua” (Efeso 2:19). Tatou te auai e le gata i le Ekalesia a le Alii ae o le tasi foi i le isi.

O tagata uma lava, e aofia ai tagata matutua nofofua, e i ai se fiafia faapitoa i tama ma tina ma aiga. O ni nai tausaga ua mavae, na saunoa ai Peresitene Boyd K. Packer, o le Sui Peresitene o le Korama a Aposetolo e Toasefululua, i tagata nofofua o le Ekalesia e faapea: “Ua matou talanoa soo e uiga i aiga. O nisi taimi i [lagona] tiga, o le a e manao ai e fai atu ‘o nei tala uma e uiga i le aiga, ae e leai sou aiga, ma …’ taofi ai iina! Aua nei tauina mai lena fasifuaitau faaopoopo. ‘Talosia ia tuu loa lo latou talanoa soo mai e uiga i aiga.’ E tatau ona outou tatalo ina ia faaauau pea ona matou talanoa atu e uiga i aiga; e uiga i tama ma tina ma fanau ma afiafi faaleaiga, faaipoipoga i le malumalu, ma le mafutaga faalesoa ma isi mea uma lava, aua o na mea uma o le a fai ma outou. Afai e tuu lo matou talanoa e uiga i ai, o lona uiga o outou faatasi ma isi tagata uma, o le a avea ma tagata toilalo.”³ Ou te toe tauina atu foi lena lagona. Mulimuli ane, o na mea uma o le a fai mo outou.

Sailia o i Latou e Manaomia le Fesoasoani

Tatou te manatuaina uma lava le faataoto i le leoleo mamoe lelei o le na tuua le lafu ae alu e sue mai le mamoe e tasi na leiloa (tagai Luka 15:3–6). O nisi o tagata o le ekalesia o loo nofofua e ono leiloloa seiiloga tatou te aapa atu ia i latou. O le sailia o le tasi o loo manaomia la tatou fesoasoani e aofia ai le aapa atu i le tele o auala.

O le a se mea e mafai ona tatou faia e aapa atu ai i o tatou tagata nofofua? O le tasi auala o le faia o se taumafaiga ina ia aafia atili [i o latou olaga]. A tatou vaaia se tagata o nofo na o ia i se sauniga lotu, e mafai ona tatou o atu a le o le nonofo faatasi ma ia pe valaaulia foi o ia tatou te nonofo faatasi. E mafai e i tatou uma ona ofo atu se lima o le faauo. O le mea moni, e lelei atu pe a tatou manatua le fautuaga a Peresitene Hinckley e uiga i tagata liliu mai ona faaaoga lea ia i latou o e o loo tuua toatasi: latou te manaomia se uo, se valaauga, ma le faafaileleina i le afioga lelei a le Atua. Ou te manatu e mafai ona tatou faaopoopo atu i ai se vaega se tasi i lenei lisi—o se faiaoga lelei o aiga. O faiaoga o aiga filiga o le a faatatau atu savali a faiaoga o aiga i manaoga o tagata nofofua. E mafai foi ona latou tuuina atu le faauooga, faalaeiauga, o se lagona o le taliaina, ma, e faapitoa lava i tuafafine nofofua, le avanoa mo faamanuiaga o le perisitua.

E faigofie ona faaupuina se tagata o se tagata nofofua ma lē mafai ai ona vaai i tua atu o le faaupuga. O tagata nofofua o ni tagata ma e mananao e taulimaina i latou o ni tagata. E le o tagata nofofua uma na nofofua ona o se filifiliga. E pei ona fai mai le fai Salamo, ia avea ma “tama o e ua matuaoti” ma ia manatua “o le Atua na te faatagataina e ua ausage” (Salamo 68:5–6). Tatou te auai uma i le aiga o le Atua ma o le a i ai se aso tatou te foi atu ai ia te Ia, i afioaga ua Ia saunia mo Ana fanau uma lava.

Auala e Mafai Ona Fesoasoani ai Taitai

O nisi nei o taiala mo taitai o le Ekalesia: “E mafai e le au epikopo [po o le au peresitene o le paranesi] ona faatulaga se afiafi faaleaiga fai faavaega se tasi pe sili atu foi mo tagata nofofua e leai ni fanau i le fale, ma e le o nonofo foi ma o latou matua.”⁴ E faaopoopo atu i ai, “e tatau ona ofoina atu i tagata nofofua ni gaoioiga faalesiteki ma uarota e pei o faeasaite, siva, aufaipese, semina e sauniuni ai mo le perisitua, semina e sauniuni ai mo le malumalu, asiasiga i le malumalu, aso faaleaganuu, ma taaloga.”⁵

E tatau i taitai o le Ekalesia ona mafaufau loloto i manaoga o tagata nofofua i taimi uma i fonotaga faaleautaitai ma ia faaaofia i latou i valaauga aoga, tofiga, ma gaoioiga. E tatau i taitai o Korama ma le Aualofa ona mataala i manaoga o tagata nofofua, ae maise lava pe a fai lesona e aofia ai autu e pei o faaipoipoga ma fanau. O tagata nofofua e tatau ona manatuaina ma faafaileleina.

Ia Fiafia Nei

O le nofofua e le faapea e tatau ai ona tolopo le mauaina o le fiafia. E pei ona taua e Peresitene Harold B. Lee (1899–1973) i se tasi taimi: “O le fiafia e le faalagolago lea i mea e tutupu i fafo mai o oe, ae o mea e tutupu i totonu ia te oe. E fuaina i le agaga e te faafetauia ai faafitauli o le olaga.”⁶

Ou te faamanatu atu ia te outou, o le toatele o e o loo nofofua latou te aumaia le malosiaga lea e sili ona manaomia i tagata o aiga ma isi, tuuina mai le lagolago, taliaina, ma alofa i fanau teine ma tama [a uso ma tuafafine], uso ma tuafafine, ma le aiga potopoto. O le mea lea, i se isi itu, o tagata nofofua e mafai ona latou faatinoina le tele o galuega faamatua i o latou lava aia tatau. A o latou faia ia mea, e mafai ona i ai ni o latou aafiaga maoae aua e masani lava, e mafai ona latou tau atu mea e le mafai e matua ona tau atu ia latou lava fanau.

Ma le mea mulimuli, o lau fautuaga ia te outou o e o loo nofofua, ia tatalo e le aunoa aua o lo tatou Tama Faalelagi, o le sili atu lona silafiaina o oe, na te silafia au taleni ma malosiaga faapea foi ma ou vaivaiga. Ua Ia tuuina mai oe i luga o lenei fogaeleele i lenei taimi e tuputupu ae ma faaleleia nei uiga. Ou te folafola atu ia te oe, o le a Ia fesoasoani atu ia te oe. Na te silafia lelei ou manaoga, ma e alu aso ma sau aso, o na faamanuiaga folafolaina o le mauaina o se soa, o le a oo mai ia te oe.

Manatu mo faiaoga o aiga

A uma ona e suesue ma le agaga tatalo i lenei savali, ona fetufaai atu lea e faaaoga ai se metotia e uunaia ai le auai o tagata o loo e aoaoina. O ni nai faataitaiga nei:

Ia talanoaina le apoapoaiga a Peresitene Faust e saili i latou o loo manaomia le fesoasoani. Lui le aiga ia asiasi atu i se tagata nofofua po o se tagata e le auai i le ekalesia. Tuu atu i le aiga e fautua mai nisi auala e mafai ona latou fesoasoani ai i lena tagata ia lagona atili le taliaina ma le faatauaina. Ia uunaia i latou e faaalu se taimi e faamasani lelei ai ia te ia.
Amata le lesona i se talanoaga po o se taaloga. I le taimi o le gaoioiga, fai atu i se tagata se toatasi e tuua le potu mo ni nai minute. Valaau le tagata e toe sau i totonu a o lei auina atu le isi tagata i fafo. A uma loa ona auauai tagata i fafo o le potu, ia talanoaina pe o le a se lagona na i ai i le tuua toatasi [o i latou]. Ia faamalamalama atu “sa tatou nofofua uma lava, o loo nofofua nei, pe o se taimi foi o le a toe nofofua ai.” Ia talanoa pe mafai faapefea ona tatou maua ni olaga fiafia ma tauaogaina e ui lava i o tatou tulaga.
Aumai se vase po o se fua toso. Ia faaali atu le [vase po o le fua toso] ao e faasoaina atu fautuaga mai le vaega “Fuaina o lo Tatou Alualu i Luma.” Ia talanoaina pe faapefea ona tatou fuaina o tatou olaga. Molimau atu afai tatou te taumafai mo le mea silisili, e mafai ona faamanuiaina i tatou.