Faamatalaga

Musuiaina e le Alii

E fia tuuina atu lau molimau o tusitusiga i le Liahona na musuiaina e le Alii, o le mafuaaga lena e molimau ai, suia ai manatu, ma faaliliuina tagata—e oo lava i tagata o le Ekalesia. Ua fai ma au masani lou faitauina o le Liahona i aso uma pe a ou ala a’e. A ou saofai ou te faitau, ona ou mafaufau lea po o le a foi se taimi o le a ou tagi ai. E ese le malosi o le Agaga i le taimi ou te faitau ai, ma e molimau o Ia i le moni o tusitusiga.

Evaldo Gomes de Almeida, Pasila

O Tusitusiga e Maua ai le Malosi

I se tasi aso ina ua ou feagai ma se filifiliga faigata, sa ou matua le mautonu lava ma sa ou le iloa ai po o a ni ou lagona pe o ni manatu foi. Sa ou tootuli ma ou tatalo faatauanau i lou Tama Faalelagi, ma na oo mai le manatu e tatau ona ou faitau i le Liahona. I le taimi muamua sa matua faigata lava ona ou faitau, ae ina ua mavae sina taimi sa ou matauina ai le faatasi mai o le Agaga ia te au. O tusitusiga na faamalosia ai lou faatuatua. O Elder H. Ross Workman (tagai lomiga o Iulai 2006) na ia tuuina mai faapitoa ia te au le malosi fou ou te iloa ai au filifiliga.

Ingelore Penshorn, Siamani

O Faatusatusaga Ofoofogia

Ou te faafetai tele mo le Liahona i le gagana Potukale. E i ai i taimi uma se savali faapitoa mo au. Na faapitoa lou fiafia i le savali a Elder Dieter F. Uchtdorf, “I Luga o Apaau o Aeto,” o loo i le lomiga o Iulai 2006. O loo ou aoga i mataupu tau fisiki, ma ou te manatu o faatusatusaga sa ia faia i le va o faigamalaga i le ea ma aoaoga faavae o le talalelei na ofoofogia tele. O le vaega o loo faapea mai o le Agaga Paia o le “savili i lalo o ou apaau” na faapitoa lava ona ootia ai lou loto.

Lucimara Moraes, Pasila

O Gaoioiga Laiti e Taitaiina atu ai i le Liuaina

I le aso 1 o Tesema, 2002, sa ou savali atu ai i se faletusi ma faatau mai se kopi o le Tusi a Mamona. Na i ai i totonu se tamaitusi e uiga i le ata o le faaolataga. Na tusi ai i luga o le tamaitusi, “Sister Burgey ma Sorensen” ma le numera o le la telefoni. O le masina o Iulai 2003, na ou valaau ai i le numera lenei.

E oo atu i le taumafanafana o le 2004, ua fai au lesona e faifeautalai o Elder Swensen, Vernon, ma Gregory. Mulimuli ane, i le aso 28 o Aokuso, 2006, na ou papatiso ai. I le Liahona o Setema 2006 na ou faitau ai i se tusitusiga “Tolopo le Seleselega,” na saunia e Rian W. Jones, lea na faamanatu mai ai ia te au ia gaoioiga laiti na faapea ona taitaiina atu ai i lou papatisoga ma le faamauga.

Nicolai Penchikov, Rusia

Musumusuga Tausaafia

Ua ou tusi atu e faafetai mo le tusitusiga “E Afaina le Tausaafia po o le Tauagafau,” na lomia i le lomiga o Iuni 2006. Sa ou fiafia tele i ai, ma na fesoasoani malosi ia te au. Sa ou feagai ma ni faigata ona sa latalata mai lou faauuga, ma sa ou le iloa po o le a se ofu e ofu i le siva. Ina ua ou alu ou te faatau sa le mafai ona ou maua se ofu e talafeagai mo le faamoemoe ma tausaafia foi. Na alu le aso o ou mafaufau po o le a le ofu o le a ofu, ma na oo foi ina ou mafaufau o le a ou le alu, po o le faataatiaese foi o ou tulaga faatauaina ae ofu i ofu na ou vaai i ai i lau faatauga. Ae ina ua ou faitau i le “E Afaina le Tausaafia po o le Tauagafau,” na ou iloaina ai e le tatau ona ou tuuina i lalo ou tulaga faatauaina ma e tatau ona ou faaaloalo i lou tino, o lou malumalu.

Na iu ina ou filifili e ofu se ofu manaia lea sa ogatasi ma au aoaoga faavae ma o le a faapea ona ou lagona ai le fiafia e ofu i luma o lou Tama Faalelagi ma lou Faaola. O le vaega sili lava, ona sa iu ina faia e lou tina i ona lava lima faatasi ai ma le alofa tele, se ofu manaia mo au. Ou te alofa i lou Tama Faalelagi ma Iesu Keriso, ma ou te le tuuina lava i lalo ou tulaga faatauaina ina ia ou pei ai o isi tagata uma.

Stephanie Magaña Talavera, Mekisiko