O Le Tamaitusi Fou o loo Faaautu i le Saunia o “Mea Tatau Uma”

Ua tele tausaga o faamalosiau mai Peresitene Gordon B. Hinckley i tagata o le Ekalesia ia mulimuli i fautuaga o loo maua i le MFF 109:8 ina “ia saunia mea tatau uma.” Ina ia fesoasoani i tagata ia tausia lenei fautuaga i mafaufau, ua i ai ni tamaitusi fou se lua o loo faaautu i le teuina o meaai a le aiga ma mea tau tupe a le aiga, ua avanoa nei mo tagata o le Ekalesia.

I lalo o le ulutala fefaasoaai Ia Saunia Mea Tatau Uma, o le tasi tamaitusi, ua faaulutala Teuina o Meaai a le Aiga, o loo toe iloiloina ai mea manaomia tumau e pei o le faapefea ona maua se sapalai o meaai taua mo le tolu masina, se sapalai o vai inu, o se teuga tupe faaleoleo, ma se sapalai o meaai manaomia mo se taimi umi pe a mafai ai. O le isi tamaitusi, e faaulutala O Mea Tautupe a le Aiga, o loo tuuina mai ai ni fautuaga i le totogiina o sefuluai ma taulaga, le aloese mai le aitalafu, o le faaaogaina o se paketi, faaputuputuina o se tupe faaleoleo, ma le aoaoina o tagata o le aiga i mataupu faavae o le puleaina o tupe.

O le faamoemoega autu o nei tamaitusi o le faalagolago o le tagata ia te ia lava, o se mataupu faavae e faamamafa soo mai e Peresitene Hinckley.

“Uso e, ou te toe fia faamamafa atu le taua o le ola faalagolago o le tagata ia te ia lava, o le pitolaau a tagata taitoatasi o le Ekalesia faapea foi le aiga. E leai se tasi o i tatou e iloa pe o afea e oo mai ai se mala. O ma’i, o manu’a, o le le toe faigaluega, e ono aafia ai soo se tasi o i tatou. E maoae la tatou polokalama faauelefea ma fale o loo teu ai mea e gaosi mai i fatu i vaega eseese. E taua lo tatou faia o lenei mea. Peitai, o le nofoaga sili lava e teu ese ai ni nai meaai, o totonu lea o o tatou aiga, faatasi ai ma sina fasitupe e teu” (“Mo Alii o le Perisitua,” Liahona, ma le Ensign, Nov. 2002, 58).

E ui ina faamalosiau atu i tagata ina ia atiina ae le teuina o meaai i o latou aiga ma ni teuga tupe faaleoleo, e ao i tagata ona faia tau lava o nofoaga e faatagaina ai ma ia aua foi nei soona faia pe a fai, sa saunoa mai ai Kevin Nield, o le Tautua a le Faleteuoloa a Epikopo.

E faamoemoe Uso Nield o le a usitaia e tagata le fautuaga o loo tuuina mai i tamaitusi ae ua faailoa mai foi o le uluai faamuamua e tatau ona ave i le teuina o se sapalai o meaai mo le tolu masina ae le o le taumafai e fai se faaputuga tele o meaai i le taimi e tasi, aua o se galuega lofituina tele. “Tatou faafaigofieina,” sa ia fai mai ai. “O mataupu faavae e faigofie lava, pe a tatou faaaogaina auaua’i mo sina taimi ma faaaoga ai se faiga faigofie.”

Ua tufatufaina atu nei tamaitusi i taitai perisitua i le lalolagi atoa. O le a maua foi i le Liahona ma le Ensign o Aokuso ma Setema ma luga o le initoneti i le ProvidentLiving.org.