O Lo’u Avanoa Mulimuli
I le 18 o ou tausaga na ou filifili ai e alu ese mai le Ekalesia. Mo se taimi, o le tuua o le itu a lou Faaola na pei lava na leai se aafiaga i lou olaga. I lou atunuu o Chile sa mafai lava ona ou ola fiafia i lou totogi. Sa ou faapea o le a mafai lava ona ou faatupeina lou olaga faalelalolagi ma faaauau ai lava ona faagalogalo ia folafolaga na ou faia i le vai o le papatisoga i le 14 o ou tausaga.
Sa ou mulimuli lava i lea auala mo ni nai tausaga, ae peitai, sa oo ina faaletonu mea uma na ou faia. Na foliga mai na pogisa mea uma ia te au. Na faamaloloina au mai lau galuega ma na faigata ona toe maua se isi galuega. Na oo ina ou faia soo se galuega tau lava ina ia ou ola ai. Na tatau ona avea lenei mea ma fafagu ia te au ma ou toe maua ai le auala, ae peitai e leai.
E le’i umi atu lenei mea, ae maliu lou tama i le 1998. Talu ai ona o au o le atalii matua, o se vaega tele o le matafaioi o le vaaia o lou tina ma lou uso laitiiti na palasi i ou tauau. Sa ou faatofa atu i lou olaga soonafai ma oo ina ou iloa ai, o nisi taimi e faataga ai e le Alii mea e tutupu lea tatou te le malamalama i ai sei vagana ua tatou vaai i lona taunuuga.
Ou te talitonu na Ia faatagaina ina ia aveesea uma lou tamaoaiga, e ta’u mai ai ia te au na o le pau lava le auala e faasaoina ai, o le totogi lea o le sefuluai, lea na ou faia ina ua ou toe foi i le Ekalesia ma faafouina au feagaiga. O le auala lea na Ia toe aumaia ai au i le lafu i le onosai ma le agalelei.
I le konafesi aoao i le 2001, na faasilasila mai ai e Peresitene Gordon B. Hinckley le Tupe Faaagaga mo Aoga. Sa ou manaomia ni avanoa e pei ona tuuina mai e lea polokalama ina ia mafai ona ou siitia ai au lava i le tulaga faaletamaoaiga, ae sa ou tau manatunatu pe ou te ausiaina tulaga manaomia o le polokalama.
I le sauniga faamanatuga i ni nai masina mulimuli ane, na saunoa ai le matou peresitene o le siteki e uiga i le polokalama lea. I lou te’i tele, na ou iloa ai, atonu lava ou te agavaa ai. Sa ou faapea ifo ia te au lava,“O lou avanoa mulimuli lenei. E le tatau ona ou misia.”
Ona amata lea ona ou mafaufau i matafaioi o le a manaomia e le polokalama mai ia te au, ma na ou fefe nei le faamanuiaina au ma lē faataunuuina ou tiute i le silafaga a le Atua. Ae na ou faatoilaloina nei lagona, ma ou aoina mai ai faamatalaga mai le faatonu o le inisitituti i le lotoifale, ma ou talosaga ai loa. I le mafaufau atu i lou olaga ua tuanai, sa laitiiti lava lou faamoemoe o le a taliaina au. Na ou lagona sa le tatau ona ou mauaina se faamanuiaga faapenei e ui lava o lea ua ou salamo ma toe foi i le lotu.
Ina ua ou maua se tali mautinoa mai le laumua o le Ekalesia, na matua faafiafiaina i matou ma lou aiga. O le aofai na maua mai na le lava mo le tausaga atoa faaleaoga, ae na ou alu lava ou lesitala i le aoaoina o le faapolokalamaina o komepiuta. Na ou maua ni togi maualuluga ma maua ai se sikolasipi na totogi ai la’u aoga atoa.
Talu mai lena taimi, ua ou faia ai mea uma i lou malosi e faailoa ai lou agaga faafetai. Ou te galue malosi, ou te suesue malosi, ma ou te faataunuuina ou tiute i le Ekalesia. Ou te auai i vasega inisitituti e taumafai ai e faapaleni ia tausaga na ou misia ma aoaoina mea o loo finagalo ai le Alii ia te au.
O le mea taua ua ou iloa, ua faamagaloina au mai mea leaga uma sa ou faia i taimi ua tuanai. O au fuafuaga uma mo le lumanai ua faavae lea i luga o lenei malamalamaaga. O le a faaauau ona ou fesoasoani i lou aiga, ae o le taimi lenei, o le a mafai ona ou faia i se auala e sili atu.