Faamalolosia o Faaipoipoga ma le Avea ma Paaga Tutusa
O lana ki o le fale o loo tautau i le loka. Ua taunuu o ia i le fale mai le galuega ma o le a laa atu i totonu. I totonu o le umukuka, o loo maua ai aafiaga moni o aso taitasi o le olaga. O loo tagi le pepe. O le tamaitiiti e tolu tausaga na faatoa sasaaina lava le susu—e le o totonu o se ipu inu ae ua sasaa solo i luga o le fata. O le tamaitiiti e fitu tausaga o loo manaomia le uai atu o lona tama ia te ia. Ma e le’i saunia foi le taumafataga o le afiafi.
Faatasi ai ma se galuega e tatau ona faamaeaina a taeao, o le ulu ua niniva i le umi ona sau ona o le pisi o taavale i le taimi manava, atoa ai ma se fonotaga faale-Ekalesia nanei, na faamoemoe ai o ia o le a faafeiloai o ia e lona toalua ma sina faamama avega.
I le lagona atu ua sau o ia i totonu, na fiafia lona toalua ona ua taunuu mai se vaa faaola! Ae ina ua ia vaaia foliga le fiafia o lana tane a o tilotilo solo o ia, na ia tu ai mo lona puipuiga: “Vaai—ou te faigaluega foi au ia i le aso atoa. Ou te le’i malolo i le vaaiga o nei tamaiti, ma ua ou matua fia malolo lava. Faamolemole pe mafai lava ona e faia le meaai i makaloni ma le sisi ma fesoasoani mai i tamaiti?”
I le inaina atu o lona toalua i lana talosaga, na liua ai lona faamoemoe mo se faamama avega i lona le fiafia, ma ua sauni e tali atu.
I lenei fetaulaiga o le pisi o le la aso, ua i ai ni filifiliga a le toalua lenei. Pe o le a laua faaaogaina ea lenei taimi e faaaoao ai le avea ma ituaiga soa na laua osifeagaiga ai e avea ai i laua? Pe o le a faia a laua faaiuga i le toe foi uma i tua i le mea na masani ai—faaleaiga ma le faaleaganuu? O ni amioga ma manatu faapitoa ua tau fai fetolofi ane e avea o se vaega o o laua olaga, ua luitauina ai i laua a o taumafai e galulue faatasi nai lo le faasagatau o le tasi i le isi.
Faapea la na ola ae o ia [tane] faatasi ma se tama, o se tane na pule malosi ma se tina o se ava e tulaga lua lona taua. E valaau fiafia atu le tane, “Hani, o lea ua ou sau!” a o savali atu o ia mai le faitotoa pito i luma ua iila lelei. O le ava tausaafia—e leai se lauulu e masepu ma lana vali laugutu fou ma se talipalapala ua malo i le masoa—ua faafeiloai atu ia te ia, “Lau pele, o lea ua saunia lau taumafataga. Tatala loa lou fusiua ma e nofo i lalo.” Ua i ai mea uma.
Faapea la e talitonu ona matua [a le tane] o le tiute muamua lava a se ava, e pei ona tusia talu ai nei e se tasi o ekalesia i le I.S. so latou taofi, o le ia “gauai atu ma le faaaloalo i lana tane.” Ma faapea la e talitonu i laua [matua] o le tiute o le tane o le tuuina atu lea o faatonuga—avea ma taitai, faia tofiga o galuega, ma tulimataia taunuuga.
Faapea nei la, na ola ae o ia [tina] faatasi ma ni matua o e talitonu i le mau a tamaitai e avanoa tutusa ma alii i mea uma lava. E faafetai lona tina i le ola ai i taimi ua le toe lagona ai e tamaitai le faamalosia o i latou ia tutusa ma se tiute malosi, e ositaulaga ai ia lava, lea e foliga mai e taofiofia ai ona lava lagona ma manaoga.
Atonu o le a fai atu lona tina, faapea foi lona tama, o se ava atamai na te tausisia ni tapulaa po o le a le tele o lona taimi ma ia lava o le a tuuina atu e lagolagoina ai lana tane ma tamaiti, aua e tatau ona muamua vaavaai lelei mo ia lava ma mea e tatau ona ave i ai lana faamuamua patino i lenei talutalu fou o le saolotoga o tamaitai.
Avea Ma Tagata e Faalagolago Le Tasi I le Isi
I le faasa’oina o nei uiga tetee e lua: ua aoao mai ai e le “O Le Aiga: O Se Folafolaga i le Lalolagi” se mataupu i le va o le tane ma le ava, lea e manino lelei le eseese mai [manatu] o aiga e lua lea na ola ae ai lenei ulugalii ua avea o se faataitaiga. O loo taua mai ai o tama “e pulefaamalumalu” ma “saunia mea e manaomia mo le olaga ma le puipuiga,” ae o tina “o le latou matafaioi autu o le faafaileleina lea o le fanau.” O tama ma tina e tatau ona fesoasoani “le tasi i le isi” i le faataunuuina o nei tiute o se “paaga tutusa.”1
O matua o le tatou tane talavou [na fai ma faataitaiga] e talitonu i le manatu tuai e faapea, o le tina e faalagolago atoa atu i le tane. O matua o o tatou ava talavou e talitonu i le manatu fou e faapea, o tamaitai e tutoatasi mai i a latou tane. Ae ua aoao mai le talalelei toefuataiina le mataupu faavavau e faapea, o tane ma ava e faalagolago le tasi i le tasi. E tutusa i laua. O i laua o se paaga.
O le manatu sese i le talafaasolopito o le faaKerisiano e faapea, o ava e tatau ona faalagolago atu [i tama] na amataina mai i se faavae sese e faapea, o le Pau o Atamu ma Eva o se mea sese leaga ma o Eva lava le tagata agasala. O lea la o le tulaga masani o le gauai atu o tamaitai i alii na faapea o se faasalaga talafeagai lea mo le agasala a Eva.2
O le mea e faafetai ai, o le Toefuataiga ua faamanino mai ai o le filifiliga a Eva—ma Atamu—e taua tele mo le alualu i luma e faavavau o le fanau a le Atua. Tatou te faamamalu nai lo le tausalaina le mea na la faia, ma tatou te vaai atu ia Atamu ma Eva o se paaga tutusa.
O le manatu faaonaponei o tagata e lagolagoina le avanoa tutusa o tamaitai ma alii e faapea, o tagata ua faaipoipoina e faalagolago le tagata ia te ia lava, e sese foi. O lona uiga ua tautino mai ai, e leai ni eseesega faalenatura i le va o alii ma tamaitai, po o le, e tusa foi pe i ai ni eseesega, e leai se aia a se tasi e faavasegaina ai tiute eseese mo itupa o [alii ma tamaitai].
I nisi itu, o le tele o le manatu faapito o le ava e faalagolago [i le tane], e faatagaina ai ma atonu foi e uunaia ai le alii e pule toatasi. I se tali atu i lenei tulaga, o le itu e lagolagoina malosi le mau e avanoa tutusa tamaitai ma alii, na toe liliu atu i le isi manatu soonafai o le faalagolago o le tagata ia te ia lava, ma sopoloa ai avanoa o le faalagolago o le tasi i le isi. O lenei lafo faatu faaleaganuu, ma faalelagona, na uunaia ai nisi tamaitai mai le matuai leai o se manatu mo le tagata lava ia i le matuai manatu faapito [mo ia lava]—ua mafua ai ona latou misia le tuputupu ae patino, lea na pau le ala e maua ai o le filifili o le tagata lava ia e ositaulaga mo isi, lea e mafai ai e tomai o se tamaitai ona maua le tuputupu ae malosi mai le faafaileleina o i latou uma e mafai ona ia faatosinaina (tagai Ioane 17:19).
O le mataupu e uiga i le faalagolago o le tasi i le isi, o le paaga tutusa lea, ua maua’a lelei i aoaoga faavae o le talalelei toefuataiina. O Eva o ia o le “fesoasoani” ia Atamu (Kenese 2:18). O le uiga o le upu faavae faaEperu mo le fesoasoani o le, o Eva na talafeagai mo, pe tutusa ma Atamu. E le o ia [Eva] o sa na auauna pe tulaga lua lona taua. Ma o le faaEperu o le upu fesoasoani, i le “fesoasoani” o le ezer, o se upu ua faauigaina na faalagolago Eva i mana faalelagi ina ua ia aumaia i le la faaipoipoga manatu faaleagaga lea e tulaga ese le mauaina e tamaitai o se meaalofa mo le latou itupa. 3
E pei ona saunoa Peresitene Boyd K. Packer, Sui Peresitene o le Korama a Aposetolo e Toasefululua, o alii ma tamaitai e eseese i o laua tulaga faalenatura, a o laua fefaasoaai i le tele o uiga faaletagata, o “uiga lelei ma amioga ia e faalagolago i ai le atoatoa ma le faaeaina, o ni uiga e [tele] ina tupu fua i se tamaitai.”4
Kenese 3:16 o loo tau mai ai o Atamu e “pule” ia Eva, ae e le faapea ai o le a avea Atamu ma pule saua. O se pule e mafai ona avea o se meafaigaluega e faatulagaina ai tulaga faatonuina. O lea e ao ai ia Atamu ona ola ina ia mafai e isi tagata ona fuaina le sa’o o a latou amio e ala i le vaai atu ia te ia. O le avea ma se pule, e le faapea o se avanoa e maua ai le malosi ae o se tiute e ola ai e tusa ma mea o loo aoaoina atu e le tagata. Ma le isi, o le upu i le isi i le “pule i le isi” o loo faaaoga ai le upu faaEperu o le bet, o lona uiga o le pule faatasi a e le o le pule i le isi [tagata]. Afai e faaaoga e se tagata le “faamalosi … i soo se faiga lava o le amioletonu” (MFF 121:37 ua faatusilima mea e faamamafa), e aveesea e le Atua le pule a lena tagata.
Atonu ona o aoaoga sese ua mimiloina ai le uiga moni o le mau, na sili atu ia Peresitene Spencer W. Kimball (1895–1985) le upu “pulefaamalumalu” nai lo le “pule.” Na saunoa o ia, “E le’i i ai lava se tamaitai ua talosagaina e taitai o le Ekalesia ina ia mulimuli atu i lana tane i le faia o se mea leaga. E tatau i le tamaitai ona mulimuli atu i le alii i le [na o le] taimi mulimuli ma usitai ai o ia i le Faaola o le lalolagi, ae i le filifili ai [pe o usitai lana tane ia Keriso], e tatau lava ona ia mautinoa i taimi uma e talafeagai lana filifiliga.”5 O lenei faiga, na tagai ai Peresitene Kimball i le faaipoipoga “o se paaga atoatoa,” na saunoa ai, “Tatou te le mananao i o tatou tamaitai o le AAG e avea o ni paaga gugu po o ni paaga e tapulaa o latou aafiaga ae ia avea ma “paaga e fai saofaga ma atoatoa.”6
E le manaomia e taitoalua ona faataunuu ia matafaioi e tasi ina ia tutusa ai. O uiga faaleagaga faanatura o tamaitai e pei o se maneta o amioga lelei, e faasino atu i matu faaleagaga—sei vagana ai ua fenumiai le faatulagaga o patikale o lena maneta. O le meaalofa a le alii e pulefaamalumalu ai o le perisitua—sei vagana ai ua le ola o ia i mataupu faavae o le amiotonu. Afai e atamamai le tane ma le ava, o le a fefaasoaai a laua fautuaga: o le a faalogo le alii i uunaiga loloto o le tapasa faaleagaga mai le tamaitai, e pei foi ona faalogo le tamaitai i le fautuaga amiotonu a le alii.
Ma i se faaipoipoga e paaga tutusa e tau fai aumaia uma e i laua le malosi faaleagaga i le la mafutaga, e aunoa ma le fesiligia o itupa. E tofu i laua ma lagona o’oo’o faapea ma le Agaga Paia e taialaina i laua. E tau fai iloa e i laua o le olaga faaleaiga o le la tiute aupito taua lea. E taumafai uma foi i laua e avea o se soo atoatoa o Iesu Keriso—o se tagata faaleagaga atoatoa.
Faaipoipoga e Paaga Tutusa
Na saunoa Elder Neal A. Maxwell (1926–2004) o le Korama a Aposetolo e Toasefululua e faapea, i totonu o le Ekalesia, ua umi naua o avea alii ma ni aoao failotu a o tamaitai na avea ma ni Kerisiano.7 Ina ia avea ma se paaga tutusa, e tatau ona taufai avea uma i laua o se aoao failotu ma se Kerisiano.
Ina ua iloa e Elder Maxwell i le 1996 na maua o ia i le lukimia [kanesa o le toto], o ona auga na faavaivai loto. Na galue o ia mo le tele o tausaga i le tuuina atu o ia lava e “gauai i mea uma” (Mosaea 3:19) i le finagalo o le Alii. Afai lava ua oo mai le taimi e faafesagai ai ma le oti, e le’i manao o ia e teena le inumia o lana ipu oona.
Ae na manatu lona faletua o Colleen, sa naunau lava o ia e gauai atu. Ma le le fa’aalo’aloa o lona agaalofa, na ia faapea atu ai, o Keriso lava Ia na muamua augani atu ma le faatauanau, “Afai e mafai, ia e aveese lenei ipu ia te au.” O iina tonu lea na Ia tuuina atu ai o Ia lava, ina ua ia fetalai atu, “A e aua le faia lo’u loto, a o lou finagalo” (Mataio 26:39). Na iloa e Elder Maxwell le loloto o le aoaoga faavae a lona faletua ma malie loa i ai. O le taunuuga la, na laua augani faatasi ina ia mafai ona faasaoina lona soifua. I le faaosofia ona o o laua naunautaiga, na maua ai e le fomai a Elder Maxwell se isi togafitiga fou na mafai ai ona faaumiumi lona soifua mo ni nai tausaga. Na faafetai Elder Maxwell ona sa le na o ia le aoao failotu i le la faaipoipoga.8
I se faaipoipoga e paaga tutusa, “o le alofa e le o mea e maua ae o le auai ai … o se vaega o lena foafoaga fai faatasi o lo tatou valaauga lea faaletagata soifua.”9 I le auai moni, e tuufaatasia ai le tane ma le ava o se tino e tasi o se “malo e faavavau” lea e “aunoa foi ma faiga faamalosi” o le a tafe mai ai le ola faaleagaga ia i laua ma a laua fanau “e faavavau, faavavau lava” (MFF 121:46).
I le malo itiiti o se aiga, e tuuina atu e tagata taitoatasi o le ulugalii ma le loto malie se mea e le o maua e le isi, ma a aunoa ma lena e leai se tasi o i laua e mafai ona atoatoa e toe foi atu i le afioaga o le Atua. O ulugalii e le o se tagata pese toatasi [solo] ae ta e le isi le laau, pe tau fai solo uma foi i laua. O i laua o se vaega pepese toalua e faalagolago le tasi i le isi, e pepese faatasi i le lotogatasi i se tulaga lea e le mafai e se tagata pese toatasi ona oo i ai.
E tuuina atu e le isi le tamaoaiga i le manaoga o le isi. E pei ona tusia e Paulo,
“Aua ou te le manao ina ia mapu nisi, a e lailoa outou:
“Ae fai faatatau, ina … ia fesoasoani lo outou tamaoaiga i lo latou matitiva i nei ona po, ma ia fesoasoani lo latou tamaoaiga i lo outou matitiva i se aso: ina ia fai faatatau” (2 Korinito 8:13–14).
O feagaiga o le faaipoipoga i le malumalu e le faamaneta ona aumaia ai le tulaga tutusa i se faiga faapaaga. O na feagaiga tatou te tautino ai i se faagasologa alualu i luma o le aoao ma le ola faatasi—e ala i faatinoga.
O lena ulugalii na tatou vaaia i le umukuka i fetaulaiga o faiga filifiliga o loo tauaveina faatasi se tautinoga i le folafolaga o le faatasi o aiga i le faavavau. Ae peitai o faiga paaga tutusa e le faia i le lagi—e faia i le lalolagi, e tasi le filifiliga i le taimi, tasi le talanoaga i le taimi, tasi le faaiuga i le taimi. Ma o le faia o se faiga paaga tutusa o se galuega faigata—e pei o le galulue i ni manatu e eseese ai, e uiga i le, o ai na aumaia le faamama avega ia te ai i lena afiafi, pe o soo se po o po e fia afe faapena.
A o sisina ifo le susu mai le fata, o loo uuina e tina i lona lima se pusa makaroni ma le sisi, o loo feagai tama ma le aso mulimuli e faamaeaina ai se galuega faapea ma se fonotaga, ma ua tau fai lagona uma e i laua le mamafa i o laua foliga. O le a faapefea ona taulimaina e ni tagata ua osi feagaiga, ma paleni lelei le mafutaga se taimi faapenei, ma e mafai faapefea e ni nai minute e sosoo ai ona fesoasoani e atiina ae se faiga paaga tutusa?
Le ava talavou, pe e te vaai atu i lau tane o se tasi sa faigaluega i le aso atoa e aumaia mea mo le tausiga o le aiga? Le tane talavou, pe e te vaai atu i lau ava o se tasi o le na galue i le aso atoa e faaopoopo atu i le taua o mea na e aumaia mo le tausiga o le aiga? Pe mafai ona oulua vaai atu i talaatu o feau masani o le aso ma manatuaina le taua naua o le tagata ua e faaipoipo atu i ai ?
Filifiliga o le Alofa
Pe a mavae se olaga o faataitaga ma le onosai faatasi, o le a se tulaga o le a i ai ou aso faaiu i le olaga? Pe o le a foliga ma lagona e pei o aso faaiu o John ma Therissa Clark? I le 1921, na tusia ai e John Haslem Clark o Manti, Iuta, le vaega na avea ma faamatalaga mulimuli i lana tusi o talaaga:
“Na i ai iinei tagata o le matou aiga, ae ua toe foi atu i o latou fale. Ua leai se pao o vae e faanatinati, ma taliega ma talanoaga. Ua na o i maua, Maua e toalua. O i maua e toalua o e ua avea ma tasi i le faasinomaga. I aso lava la ua leva, ua atoa nei le onosefulu tausaga talu ona ta fetaui i lalo o laau i le vaitau o Iuni. Na ou sogi muamua atu ia te oe. Sa ese naua le matamuli ma le palaai o lou teine talavou. E leai se tamaitai i luga o le fogaeleele po o luga foi i le lagi e pei o oe ia te au. E sili atu ia te au pe ana e i ai iinei, siaula, ma lou foga sinasina, nai lo soo se talutalu fou o se talavou. O lo tatou aiga lena ua e i ai. O lou le i ai iinei, o lo’u ma’i manatu lena. A o ou tilotilo atu ia te oe ua iloa ai e i ai se mea e sili atu nai lo le alofa, e ui lava o le alofa o le mea sili lea i le lalolagi. O le faamaoni. Aua, pe afai o le a tulieseina au ma le maasiasi o le a e mulimuli mai ai lava. Pe afai o le a ou mafatia i le vevela ona o le fiva, o lou lima malu o le a faamaluina au. Faatasi ai ma lou lima e uu i lo’u lima, ta fia alu atu loa ma nofoia lo’u avanoa faatasi ma i latou ua faaolaina o le Lagi. Ona e valu tausaga ou te matua ai ia te oe—ma a o faagasolo pea tausaga ma ua ou lagonaina atonu ua latalata mai le taimi e taumavae ai—e masani ona avea o se mataupu e alu ma sau i o taua manatu ma talanoaga: e mafai faapefea ona tuua toatasi se tasi o i taua. Tuua toatasi, ina ua mavae le 56 tausaga o ola faatasi. E seasea ona ou toe fia manatu i ai, ma e ui i si ou manatu faapito teisi na faatoafilemuina au lava ia i lou mafaufau [lea] e tusa ai ma o ta tausaga e le o au o le a tuua toatasi.”
Ona i ai lea o se isi tusitusilima na iloa mulimuli ane i le itulau lava lena e tasi. O le leo o Therissa, o loo ia tapunia malie le tusi o talaaga a John:
“Ua toeitiiti atoa le lua ma le afa tausaga talu ona faia le tusitusiga mulimuli lava, ma o mea na tutupu na sosoo ai e ese le faanoanoa, e matua faamomoiloto mo au, o lana soa o le olaga ona ua faafia ona ou taumafai ma le le manuia ae faatoa mafai ona faamaeaina lenei tala mulimuli ane. O le motusia o le mafutaga ma le lagona o le tuua toatasi [e] tumau pea ona i ai ma o le a i ai pea ma au e oo i le iuga… . Pe o le a faamaluluina ea e le faagasologa o taimi lenei faanoanoaga, pe o le a mafai ea ona ou tuua le Fale Tuai e aunoa ma le lagonaina o loo faatalitali mai o ia mo au, ma valaau mai ia te au? E na o le aiga ou te maua ai le loto malie lea ou te lagonaina ai o loo ia leoleoina au, o loo mafuta mai pea ma au e le aunoa.
“I le aso 11 o Mati, 1923, na maliu ai John Haslem Clark ina ua mavae le tasi o le vaiaso talu ona ma’i. Na foliga mai e le ma’i o ia, i le talanoa mai ma le malosi. Sa leai so matou manatu ua latalata mai le iuga seia oo ina ona le iloa se mea mo ni nai itula a o le’i maliu o ia. E, tau ina ia tatou mama ma lē pona, ma saunia e o atu i luma o Le na faia i tatou.”10
Tatou te le iloa faamatalaga auiliili o le olaga o John ma Therissa a o laua sopoia filifiliga ma faaiuga o o laua aso. Ae ua tatou iloa le auala na mafai ai i le 56 tausaga o a laua talatalanoaga i aso taitasi ona mulimuli ane fausia ai le ituaiga o tagata na avea ai i laua, le ituaiga alofa na laua iloaina.
Ana faapea e mafai ona iloa e o tatou ulugalii talavou o lenei alofa o le mea lea e mafai ona latou lagonaina ma malamalama i ai i le iuga o o latou olaga, o le a se mea o le a latou le tuuina atu! O le a latou faalogo atili ma filifili lelei atu, i lea taimi ma lea taimi, i lea aso ma lea aso, i lea faaiuga ma lea faaiuga. O le a latou aoaoina, e ala i aafiaga o le onosai o le “galue o le alofa ua faaali tino.”11 O le a latou iloaina a o mavae atu tausaga o loo fesoasoani le la faaipoipoga ia i laua e avea ai ma ni soo sili atu ona lelei o Iesu Keriso, e oo lava i le avea atili e pei o Ia. Ona latou malamalama ai lea, a o latou sopoia filifiliga mulimuli o le olaga faaletino o le taunuuga ua latou tasi ai ma Ia, o le taunuuga lea ua tasi ai le tasi ma le isi.