O se Tusi Tulaga Ese, o se Tali Tulaga Ese
Ina o le a ou papatiso ma faamauina o se tagata o le Ekalesia, sa ou lagona lava le popole pe na ou filifilia le ala sao. Na iloa e faifeautalai o le matou paranesi i Gyumri, Aremania, na i ai si o’u le mautonu e uiga i le Tusi a Mamona ma le auai i le Ekalesia, o lea na la valaauliaina ai au matou te o a o la aoaoina atu nisi o lesona a faifeautalai.
Ina ua matou oo atu i le aiga muamua, sa fesili atu Elder Perrin ia Anichka pe na ia faitauina ia mataupu na tuuina atu. “E leai,” o lana tala lea, “ua galo ia te au.” O lea na matou faitauina faatasi ai le 2 Nifae 29–33. A o faitauina le mataupu e 29, na matou suesue ai i valoaga e uiga i le Tusi a Mamona ma lona teenaina e tagata o Nuu Ese i aso e gata ai i le faapea mai, “O se Tusi Paia! O se Tusi Paia! Ua ia te i matou le Tusi Paia, e le mafai ona i ai se isi Tusi Paia” (f. 3). O lena mataupu na matuai ou ootia ai i le taimi atoa o le lesona.
Na sosoo ai ma lo matou o atu i le isi aiga. A o matou faitauina le Tusi a Mamona iina, na fesili mai le tama o le tamaitai na matou aoaoina, “O le a lena tusi?”
Na ou faamatalaina atu o le Tusi a Mamona: O Se Tasi Molimau ia Iesu Keriso. Na iu ina ita o ia ma fai mai, “O lea ua i ai la matou Tusi Paia, ma e le mafai ona toe i ai se isi Tusi Paia.”
Na ou manatuaina le mataupu lea na matou faitauina i le 10 minute ua tea ma Anichka.
Na amata ona fai atu Elder Perrin: “Ua ia te oe se Tusi Paia, e mai le nuu o le Atua o le feagaiga anamua a le Atua.” Sa faaauau pea ona ia fai atu, “Na foafoaina e le Atua tagata uma lava, ma Na te faaalia mai Ana afioga i Lana fanau, o lona uiga o tagata uma lava i luga o lenei fogaeleele. E ui ina i ai lau Tusi Paia, e te le manatu la e tuuina mai e le Atua ia Ana afioga i isi?” Na faaauau pea ona ia fai atu faapena, ma faamalamalama atu le amataga mai o le Tusi a Mamona.
Sa ou maofa i le mea na faatoa tupu atu nei. Na foliga mai e leai se isi molimau e sili atu mo le fofoina o o’u popolega e uiga i le Tusi a Mamona nai lo le vaaia o le faataunuuina o ona valoaga.
O le taimi nei, faatasi ai ma se loto faamaoni, ua mafai ona ou faapea atu o le Tusi a Mamona o le tusi ua sili ona sao. Ou te iloa e alofa le Atua ia i tatou uma ma o le a Ia le faagaloina i tatou. Ua ou iloaina ma saga iloaina o se matuai oa taua tele le Tusi a Mamona.