Ua Tuu Atu e Fomai o le AAG le Meaalofa o le Vaai

Na tele aso o le olaga o Blendina Muca a o laitiiti sa tauivi ai ma le ma’i o le faaletonu o le vaai, po o le mata sesepa. Ina ua mavae le tele o togafitiga faalemanuia i lona atunuu o Alepania, sa ia maua loa se fesoasoani mai se fomai Amerika o le sa asiasi atu i lo latou atunuu i se galuega alofa.

“Na sesepa lava o’u mata a o o’u laitiiti,” o le tala lea a Ms. Muca. “Na auina atu a’u e lo’u tama mo se feiloaiga ma le fomai, o le na tuuina mai ni nai vai mata ma ni tioata… . E le’i faasa’oina ai o’u mata—ae na leaga tele ai—ae sa ou savali pea ma le faamoemoe o le a manuia lava.”

E ui i le faaletonu o lana vaai, ae sa avea lenei talavou Alepania ma se suisui faapolofesa e ala i lona maelega, o se galuega sa matuai lelei tele ai o ia.

Ina ua auai le tuafafine o Ms. Muca i le Ekalesia, sa faapena loa ona tatalaina le faitotoa mo lenei tamaitai talavou e faaletonu le vaai. Sa faatasi atu i le papatisoga o lona uso ia faifeau fesoasoani o auaunaga alofa a le Ekalesia, ma valaaulia ai Ms. Muca e asiasi atu i se aoaoga e lagolagoina e le AAG e faia e sui o fomai mata mai le Iunaite Setete.

O Dr. Rick Olson, o se fomai mata e faiaoga i le Iunivesite o Iowa, sa faia le taotoga i mata o Ms. Muca. A o lei faia le taotoga, sa auai faatasi le gasegase talavou, o lona uso, ma uo i se tatalo ma Dr. Olson.

“Sa ole atu le fomai i le Atua ina ia avea ona lima ma se auro ina ia faaleleia ai o’u mata,” o le lipoti mai lea a Ms. Muca, “ma sa Ia faia lava. Na ou iloa na faia e le Atua se vavega.”

O lenei meaalofa o le vaai—faaleleia o le faaletonu o le vaai, foaiina atu o masini, ma le tuuina atu o le lagolago faalepulega—o loo ofoina atu i atunuu tau atiae i lalo o le fesoasoani a Auaunaga Alofa a le Ekalesia.

O Dr. George Pingree, o se fomai mata ua litaea a le Aai o Sate Leki, o loo taiulu i le taumafaiga i le lalolagi atoa mo le lelei o le vaai ma o loo avea ma sui o le silia ma le 200 fomai o e o loo ofo fuaina atu o latou taimi i le polokalama.

“E silia ma le 40 miliona tagata i le lalolagi o loo tauaso,” o le faamalamalama mai lea a Dr. Pingree, “o le toatele lava o loo i ai tu, una i’a, po o isi faaletonu i le vaai lea e mafai ona faasa’oina.”

Ua fuafua e taitai o le Ekalesia ma faifeau faamisiona mo auaunaga alofa ia manaoga faapitoa i atunuu tau atiae, o le faamatalaga lea a Dean Walker, le pule o taumafaiga tetele i Auaunaga Alofa a le Ekalesia.

“E auina atu talosaga, ona matou fuafuaina lea o se galuega ina ia ausia ai manaoga i le lotoifale,” o le faaopoopo mai lea a Uso Walker. “Ua mafai ona matou faia galuega e 10 i le 15 i se tausaga—o galuega ia e aoaoina ai tagata galulue i le soifua maloloina i laasaga ma faatinoga lea e tulai mai ai le faaleleia o le vaai mo le tele o tagata.”

Ua matuai ese le vaai a Ms. Muca i le olaga ina ua mavae lona taotoga faamanuiaina. Sa ia faamatalaina: “O lo’u manao i le taimi nei o le alu lea i le iunivesite ma fesoasoani ia i latou o loo manaomia le fesoasoani—ia fesoasoani i tagata i le auala lava lea e tasi na fesoasoani mai ai le Atua ia te a’u. E tutupu lava vavega.”