MANATU MO AFIAFI FAALEAIGA

O nei manatu e mafai ona faaaoga mo aoaoga i le potuaoga faapea foi i le aiga. E mafai ona e fetuunaia nei manatu i lou aiga po o le vasega.

“O Mai i le Malumalu,” i. 14: I le faaaogaina o le tusiga, lisi sauniga e faataunuuina i totonu o le malumalu, ma ia talanoaina faamanuiaga o le tapuai i le malumalu. Ia faasoa atu manatu o auala e saunia ai e alu atu i le malumalu.

“Tumau e oo i le Amataga,” i. 29: Ia saunia le meaai e sili ona fiafia i ai lou aiga. Tuu mai i fafo ina ia mafai ona iloa ma sosogi e lou aiga lona manogi. Tau atu ia i latou, e ui atonu ua latou mananao e ai loa i le taimi lena, ae e tatau ona latou faatali. Faasoa atu le tala a Maria. Ia faatusatusa le faatalitali e ai se meaai e sili ona fiafia i ai i le faatalitali a Maria ina ia papatisoina ma faamauina.

“Mo Le Malosi o Oe,” i. 32: I le vaiaso a o lumanai le afiafi faaleaiga, ia valaaulia tagata taitoatasi o le aiga e saunia se tautalaga puupuu e uiga i se tulaga faatauaina o loo i le Mo Le Malosi o le Autalavou. Ia fefaasoaai i tautalaga, ona filifili faatasi lea o se aiga se tulaga faatauaina se tasi pe lua e galulue i ai i lena vaiaso.

“O Le Taavale Gaogao,” i. U2: A o le’i amataina le lesona, ia tusi uma igoa o tagata taitoatasi o le aiga i luga o se fasipepa. Ia faasoa atu le tala a Peresitene James E. Faust, ma ia talanoaina fesili i le faaiuga o le tusiga. Ona tuu atu lea i tagata taitoatasi e piki se fasipepa se tasi. Ia tau atu, e tatau ona latou vaavaai mo auala e tuuina atu ai se auaunaga e le faailoaina i lena vaiaso i le tagata na latou seiina le igoa.

“Misia o Mikaele,” i. U12: Faitau le tala, ma ia talanoaina le auala na fesoasoani ai Natalie i lona tuagane. Tuu atu i tagata o le aiga e sue le 1 Ioane 4:21. Ia talanoaina le uiga o le “alofa i lona uso.” Atonu o le a e manao e fesoasoani atu i tamaiti o le aiga e tusi se tusi puupuu i se tasi e le masani ona sau i le lotu. E mafai foi ona latou valaauliaina lena tagata e sau i le Peraimeri po o le isi aso o gaoioiga a le Peraimeri.