Ua Faafeiloai e Faitaulaga Shinto ia Elder Eyring i le Fale Tapuai Logologoa o Meiji i Iapani

Na feiloai ia Katsushi Toyama, le faitaulaga sili i le Fale Tapuai logologoa a Tokyo o Meiji, ma Elder Henry B. Eyring o le Korama a Aposetolo e Toasefululua i le taimi o le malaga taamilo a Elder Eyring i eria o le Ekalesia i Asia ma motu o le Pasefika.

O le Susuga a Elder Eyring, faatasi ma Elder D. Todd Christofferson o le Au Peresitene o Fitugafulu ma Elder David F. Evans, le Peresitene o le Eria a Asia i Matu, sa valaaulia ina ia feiloai ma Mr. Toyama ina ia fausia ni sootaga o le femalamalamaai ma le feagaleleiai.

Na ta’ua e Mr. Toyama i le au asiasi e faapea e leai se tusi ua tusitusia o aoaoga a Shinto e talitutusa i le Tusi Paia po o isi tusitusiga paia, ae o e o loo mulimuli i ai o loo faaalia lo latou sootaga i lo latou Atua e ala i le tauivi ia mama ma amiotonu i o latou olaga.

Na saunoa Elder Eyring e faapea o tagata O Le Ekalesia a Iesu Keriso o le Au Paia o Aso e Gata Ai o loo faapea foi ona tauivi ia mama faaletagata ma amiotonu i o latou olaga. “O lo matou perofeta, o Gordon B. Hinckley, e apoapoai pea e le aunoa i tagata o la matou ekalesia ina ia avea o latou talitonuga ma totonugalemu o o latou olaga i aso taitasi,” na ia saunoa ai.

Na uluai masani ia Mr. Toyama ma le Ekalesia ina ua talimalo le Ekalesia ia te ia i le Aai o Sate Leki i le vaitau o le 1970. Ae na sili ai lata mai nei, le faatauaina o lenei sootaga e pei o isi faitaulaga mai le maota tapuai na asiasi atu i le Aai o Sate Leki ma le Iunivesite o Polika Iaga i Provo, Iuta. I le 2005, na avea ai le Aufaipese Faakonaseti a le BYU–Hawaii ma uluai vaega Kerisiano ua faafiafia i le Maota Tapuai o Meiji.

O le feiloaiga ma Mr. Toyama na faia lea i totonu o se tamai potu i le Maota Tapuai lea e masani ona faaleoleo mo talanoaga ma faauluuluga o malo ma o latou amepasa.

O Taitai Meiji, o loo faaigoa ai le maota tapuai, na pulea Iapani mai le 1867 e oo i le 1912. Na ia faatumauina se naunautaiga e taofiofia le tulagaese o le aganuu a Iapani ma se uunaiga malosi ina ia aumaia lona atunuu i totonu o le lalolagi o fefaatauaiga.

O uluai papatisoga i Iapani na faia i le 1902. O le taimi nei ua silia ma le 120,000 tagata o le Ekalesia i Iapani. E lua foi malumalu o le Ekalesia o loo i ai iina, e tasi i Tokyo ma le isi i Fukuoka.