Ua Faapotopoto le Konekaresi i Polani e Puipuia le Aiga i le Lalolagi Atoa

E silia ma le 3,300 sui auai mai le lalolagi sa faapotopoto i le Maota o Aganuu ma Faasaienisi i Warsaw, Polani, mai le aso 11 e oo i le 13 o Me, 2007, e auai i le Konekaresi Lona IV a le Lalolagi mo Aiga. O le latou sini o le aoaoina ma faamautuina lea o le aiga o le tagata e pei ona masani ai, na faavaeina lea e le Foafoa ma e taua i le lelei o le lalolagi.

Na lagona e sui na auai i le konekaresi e faapea o aiga i le lalolagi atoa o loo osofaia ma e talitonu o loo moomia le faatutuina o ni mataupu faavae mo le atiina ae o le faaleleia o le aiga i le lalolagi atoa. O i latou sa auai e malaga mai Chile, Niu Sila, Afakanisitana, Mekisiko, ma Filipaina sa taulai atu i le tele o mataupu o loo aafia ai aiga i le lalolagi.

O Ellen Sauerbrey, le failautusi lagolago a le malo o le I.S. mo le faitau aofai, tagata sulufai, ma tagata faimalaga atu, sa fesoasoani i le faafeiloaia o le konekaresi ma faaigoaina le aiga o le faalapotopotoga o tagata sili lea ona matua ma sili ona tumau o loo i ai.

“Na mua’i i ai le aiga i setete uma lava, ma e mafai ona maua i aganuu uma, ma vaitau uma… . E le foafoaina e le setete le aiga; ae, o aiga na foafoaina le setete,” o le saunoaga lea a Mrs. Sauerbrey.

O Roman Giertych, le minisita o aoga ma o le sui palemia foi o Polani, sa ia faafeiloaia foi le konekaresi ma saunoa faapea a na leai le aiga semanu e leai se malo, setete, po o le olaga.

O autu sa talanoaina i le mafutaga e aofia ai le faapau pepe, faaipoipoga a le itupa tutusa, faiifo o le faitau aofai, ponokarafi, osofaia o le aiga i talafou, ma le faafouina o talitonuga faalelotu ua masani ai.

I le autu e faatatau ia Hollywood ma le aiga, na saunoa ai Don Feder, le faatonu o fesootaiga mo le Konekaresi a le Lalolagi mo Aiga, e faapea: “O aso taitasi, e faapau ai e le au faiata tifaga i Amerika le anoanoai o mea oona i o outou atunuu ma aiga. E faatatau la’u tala i Hollywood, o a latou oloa autu—vagana ai nisi o vaega o loo lelei—ae o loo i ai feusuaiga, fasi tagata, uiga mataga, matuai teenaina o talitonuga lautele, osofaia o lotu, ma le matuai tetee i le mataupu faavae o le aiga.”

O Brad Wilcox, o se polofesa o suesuega o le faatulagaga ma le aoga o le aiga tagata i le Iunivesite o Virginia, na saunoa i le nonofo faapouliuli ma le soifua laulelei o fanau.

“O le faatupulaia o le nonofo faapouliuli i Europa e foliga mai e tau atu ai … i le faateleina o matua nofo toatasi, ma ua tatou iloa o le matua nofotoatasi e aliae mai ai se taufaamatau i le soifua laulelei o fanau,” na ia saunoa ai.

I le faaiuga o le mafutaga, na faia ai se Folafolaga i Warsaw e avea ma faamatalaga e lagolagoina ai le aiga mo le seneturi luasefulutasi: “O le aiga, na foafoaina e le Atua, o le faavae o faalapotopotoga o tagata, e faavae mai le faaipoipoga ua loa i le va o se alii ma se tamaitai, lea e foafoaina ai tagata taitoatasi, fananau ai, ma tausiaina ai.”

O le Konekaresi a le Lalolagi mo Aiga (WCF) o se upega faavaomalo ua fausia mai faalapotopotoga e lagolagoina le aiga, o le au atamamai, ma tagata agalelei mai le silia ma le 60 atunuu o e o loo saili ina ia toe faafoi le aiga e pei ona masani ai i le avea ai ma faavae o iunite o le lalolagi.

Na faavaeina e Allan Carlson le WCF i Rockford, Ilinoi, i le 1997. O konekaresi e tolu na muamua atu sa faia lea i Prague, Ripapelika o Siekisolovakia (1997), Sineva, Suiselani (1999), ma le Aai o Mekisiko, i Mekisiko (2004).

O loo ta’ua e le WCF: “O le aiga o le faavae lea o iunite faalelalolagi, o loo tusia i le natura faaletagata, ma e faaautu i le faatasiga lotomalie o se alii ma se tamaitai i le feagaiga i le olaga atoa o le faaipoipoga… . O le aiga lelei e aapa atu i le alofa ma le auauna atu i o latou nuu ma i latou o loo moomia le fesoasoani. O faalapotopotoga uma o fegalegaleaiga ma aganuu e tatau ona faaaloalogia ma tausisia aia tatau ma tiutetauave o le aiga.”