Liliuina o Loto i se Atunuu o Malumalu
A talanoa tagata o le ekalesia po o faifeautalai e uiga i o latou papatisoga faatasi ma Li Chiun-tsan a o sauniuni mo lona lava papatisoga i le 1971, sa latou faamatalaina se aafiaga mamana ma le malosi. Ma o le lofituina i le vaivai lea na lagonaina e Uso Li ina ua alu ae mai le vai o le papatisoga, sa le o se mea lea na ia faamoemoeina ma na mautinoa lava o se mea sa le’i masani ai.
Na papatisoina ma faamauina i Taipei, Taiwan, i le 17 o ona tausaga, na taliaina e Uso Li le faaKerisiano i ni nai tausaga na muamua atu, ae na te le’i mauaina le filemu na ia sailia seia oo ina ootia lona loto i le Tusi a Mamona.
“Na ou lagona le malosi o le Agaga,” na ia saunoa ai. “Na tau mai e le Agaga Paia ia te au, o le Ekalesia moni lenei.”
Ae na te le malamalama pe aisea na ia lagonaina ai le vaivai tele a o lenei ua avea o ia ma se tagata o le ekalesia, ma sa tatalo o ia e fia iloa pe aisea na faafuasei ai ona leai sona malosi. O le tali e le’i mafaufauina na faatulaga ai le ala o lona olaga.
“O le a ou maua le malosi pe a ou sailia ou augatama e fai o latou galuega o le malumalu,” na ia manatua ai le musumusuga a le Agaga.
O le 35 ma ona tupu tausaga ua mavae, na faapaiaina ai e Uso Li, o se tasi o le Uarota a Hu Wei, o le Siteki a Chung Hsing Taiwan, o ia lava i galuega o talafaasolopito o aiga ma galuega faalemalumalusa. Ua la mauaina ma lona toalua o Li-hsueh, le laina o lona aiga e tau i tua i le toeitiiti 5,000 tausaga ia Emepera Samasama, e faapea, o le augatama lea o tagata Saina Han uma. E sili atu i le 100,000 igoa ua la auina atu i le malumalu.
“O galuega o talafaasolopito o aiga o nisi taimi e foliga lofituina,” o le tala lea a Uso Li. “Ae o le naunau ina ia faamanuiaina augatama o se tasi e matuai tauia lava.”
O aafiaga a le Au Paia o Aso e Gata Ai i Taiwan e molimau mai e uiga i faamanuiaga o le auai i matafaioi e matuai lavelave o talafaasolopito o aiga ma galuega faalemalumalusa.
O Se Atunuu o Malumalu
O Taiwan o se atunuu e tele ni malumalu eseese o loo i ai, o se atunuu ua avea le faamamaluina o augatama ma se tasi o vaega ua loa ma tamaoaiga o le talafaasolopito. E toatele aiga e teuina faamaumauga ia e tau atu ai o latou laina o augatama i tua i le tele o augatupulaga. E le masino malumalu faaleaganuu ma fale tapuai o loo i ai nofoaga e talitonu tagata e mafai ona latou fesootai ai ma o latou augatama. O nei fale na mamanuina ma le totoa, o nisi taimi e toetoe lava a maua i soo se tulimanu o le aai pisi o Taipei ia tumutumu o nei fale ua tai seneturi le umi, ma e foliga mai e tulioso ae mai le vao lauusiusi e faapea ona lilofia ai nuu maotua filemu.
“O talitonuga faaleaganuu a o matou tagata e tuu ai se faamamafaga tele i augatama,” o le tala lea a Uso Li. “O le liliu atu o o matou loto i o matou tama, o se vaega lea o lo matou aganuu.”
A o faaaogaina e le toatele o tagata ia nei malumalu faaleaganuu e saili ai faamanuiaga mai o latou augatama, o loo i ai se malumalu e ese mai i Taiwan lea e aumaia ai e tagata ia faamanuiaga mo o latou augatama e ala i sauniga o le talalelei toefuataiina.
Talu ona faapaiaina le Malumalu o Taipei Taiwan i le 1984, ua tuuina atu ai i tagata o le Ekalesia le avanoa e maua ai faamanuiaga mo i latou lava, ma e ala i le tuuina atu o le avanoa e faamanuia ai o latou aiga ua maliliu, ua tuuina atu ai foi le taua e faavavau i o latou faamaumauga o talafaasolopito o aiga.
O Se Sootaga Faapitoa
E pei o le aiga o Li, o le aiga foi o Wu ua maua foi le laina o lo latou aiga e tau atu i le emepera. I le faia o lea mea, na latou iloaina ai o fanau a le au Wu na avea o se vaega o le augatupulaga lona 150 talu mai le emepera. Na maua e le au faasalalau le tala, ma o le 2005, na filifilia ai Wilford Wu, a o 19 ona tausaga, e fai ma sui o tagata talavou o Taiwan i le taimi o se faamanatuga faaletausaga i le tuugamau faaleaganuu o le Emepera Samasama.
Mo le aiga o Wu, o tagata o le Uarota a Ching Hsin, Siteki o Taipei Taiwan i Sisifo, o talafaasolopito o aiga na avea o se taumafaiga faaleaiga. O Uso Wu, Chi-Li ma lona toalua o Shirley, na faia le tele o le sailiga, ma o Wilford ma lona tuafafine matua o Camilla, na fesoasoani i le faatulagaina ma le auai i sauniga o le malumalu mo le silia i le 3,000 o o latou augatama.
O le galulue faatasi ua fesoasoani e aumaia faatasi ma vavalalata ai le aiga o Wu. Ua latou fai mai, na fesoasoani foi latou te lagonaina ai se sootaga faapitoa ma o latou augatama.
“O le faia o le galuega mo o’u matua na aumaia ai se fiafiaga mai le lagi ou te le’i lagonaina muamua,” o le tala lea a Tuafafine Wu. “O loo ia te au se naunautaiga tele ina ia matou faatasia e faavavau ma o matou augatama. Ou te tatalo ina ia latou saunia.”
O Se Fesoasoani Tele
O le faafesootaiina o augatupulaga e 150 sa le faigofie. E pei o le toatele o isi o e na auai i le sailia o o latou augatama, na faailoa mai e le aiga o Wu sa latou maua ni fesoasoani.
Ina ua uma ona latou foi i tua i augatupulaga e 26, na tutaia a latou taumafaiga.
“E na o le pau lava mea na matou maua o igoa tauvalaau,” o le tala lea a Tuafafine Wu.
I le aso mulimuli o le Tausaga Fou faaSaina, na fuafua ai Tuafafine Wu e auai i se faamanatuga o se aso fiafia ina ua uma ona faigaluega i le malumalu. Ae ina ua taua e se uo la te sifi faatasi, o le a afe o ia i le nofoaga autu o talafaasolopito o aiga o loo i lotoa o le Malumalu, na musuia foi ia Tuafafine Wu ina ia la o atu.
Na alu atu o ia i se tusi e i ai faamatalaga o tagata e faaiu faatasi ma le augatama o le aiga lea e le’i maua. Ina ua ia susueina le tusi, na matala i se itulau na lisiina ai faamatalaga o lenei augatama faapitoa. Faatasi ai ma lena faamatalaga, na mafai ai ona latou faafesootaiina atu i isi laina lea na taitaiina atu ai i tua i le tele o augatupulaga.
“O se aafiaga matuai taua lava ia te au,” o le tala lea a Tuafafine Wu. “E mafai ona ou lagonaina o loo matuai naunau lava o matou augatama ina ia faataunuuina o latou sauniga.”
O Se Faamanuiaga i le Fanau
O le naunautaiga ina ia auai i faamanuiaga o le malumalu na taitaiina ai Chiang, Jung-feng ma lona toalua o Chun-mei, o le Paranesi o Chi An, Itu o Hua Lien Taiwan, e oo i se isi itu o le folafolaga a Malaki (tagai Malaki 4:6). Faatasi ai ma le liliu atu o o latou loto i o latou tama, i le avea ai ma ni matua, ua liliu atu o latou loto i a latou fanau.
O Uso ma Tuafafine Chiang e auai i se vaega tuputupu ae o tagata o le Ekalesia i Taiwan, o e ua tolu augatupulaga o o latou aiga ua uma ona faamauina faatasi i le malumalu.
“O se fiafiaga ia i matou le vaaia o fanau a a matou fanau o o mai i le lotu,” o le saunoaga lea a Uso Chiang, o le na faamaloloina lata mai nei o se fesoasoani muamua i le au peresitene o le Malumalu o Taiwan Taipei. “O le matou matafaioi tele le fesoasoani atu ia i latou ina ia o mai ia Keriso e ala i sauniga o le talalelei. E le mafai ona matou momotuina le filifili.”
E talitonu le aiga o Li o aafiaga o sauniga o le malumalu e amataina i se ulugalii.
“Na sili atu ona lelei le ma faaipoipoga ina ua uma ona ma faamau i le malumalu, e ui lava ina sa ma ola muamua i tulaga faatauaina o le Ekalesia,” na fai mai ai Uso Li. “O le faamauina e suia ai le lua mafutaga. A uma lou ola, e aveesea mea uma na e galue ai i le olaga—o lau taavale, galuega, fale, tupe. Ae e le tatau ona aveesea lou aiga.”
“E fesoasoani e te iloa ai mea e faavavau ma mea e le faavavau,” o le faamatalaga lea a Tuafafine Li. “O lea e tuuina atu i ai au taumafaiga ma le taulaiga i le aiga.”
O iina e amata salalau atu ai aafiaga.
“A e iloa o lou aiga o se aiga e faavavau, e sili atu lou alofa i lou toalua ma lau fanau,” o le saunoaga lea a Uso Li. “O se taunuuga ua sili atu ona mafanafana lo matou fale. E sili atu ona lagomalie iina. O loo i ai le Agaga iina.”
O Se Faamanuiaga Aupito Maualuga
Na taua e nei aiga Taiwan, o talafaasolopito o aiga ma galuega faalemalumalusa ua faamanuiaina ai o latou aiga i lenei olaga, ma latou te maua le mafanafana i faamanuiaga folafolaina o le faavavau.
“A o matou galulue i le malumalu, na matou lagonaina se suiga malie i o matou olaga,” na saunoa ai Uso Chiang, o le sa la faia faatasi ma lona toalua ia galuega mo le 16 o augatupulaga o le laina o lona aiga. “Ua matou oo i se suiga i totonu o le talalelei.”
E talitonu foi Uso Chiang ua faaitiitia aafiaga a Satani i olaga o i latou o e auai i galuega faalemalumalusa. “O le auai atu i le malumalu e aumaia ai le migao i o tatou loto,” o le faamatalaga lea a Uso Chiang. “Tatou te faagaloina ai mea o le lalolagi.”
E ioeina foi e Uso Wu: “Afai e mafai ona tatou aveina atu le faaleagaga ma le fiafia tatou te maua iina i o tatou aiga, o le a fesoasoani foi i o tatou aiga e foia ai faatosinaga o mea a le lalolagi ae faalatalata atu i le Atua.”
E talitonu nei aiga, o le mauaina o sauniga o le malumalu ma le tuuina atu ia i latou o e e le’i mauaina ia sauniga i lenei olaga, e taua tele i le ausiaina o a latou sini e faavavau.
Na aoao mai Peresitene Gordon B. Hinckley, “O sauniga o le malumalu ua avea ma faamanuiaga aupito maualuga e ofoina atu e le Ekalesia.”1
“O le sini autu o lo tatou avea ai ma tagata o le ekalesia o le toe foi atu lea i lo tatou Tama Faalelagi o ni aiga e faavavau,” o le saunoaga lea a Uso Chiang. “Mo lena mea, e tatau ai ona tatou maua uma ia sauniga talafeagai o loo maua i totonu o le malumalu.”
O Se Faaaliga o le Alofa
I lana misiona, na iloa ai e Camilla Wu le taua tele o agaga taitoatasi i le Atua. Na lagona e Camilla se liligiina tele mai o le alofa o le Faaola mo tagata taitoatasi o tagata e toatele na mafai ona ia aoaoina.
“Ina ua ou foi mai i le fale ma aafia i la matou talafaasolopito faaleaiga,” na ia taua, “na ou iloaina ai, atonu e mafai foi ona ou faia se aafiaga tele i le faaolaina o agaga e ala i le faia o talafaasolopito o aiga ma galuega faalemalumalusa.”
E manatu le aiga o Wu, o le malumalu o se tasi lea o faaaliga maoae o le alofa o le Tama Faalelagi mo Lana fanau i mea uma o loo ofoina mai ai.
“O le uiga ou te maua i totonu o le malumalu,” o le tala lea a le tuagane o Camilla o Wilford, “o le alofa o le Atua mo Lana fanau.”